Соединетите Држави и Украина се договорија за низа предлози за ставање крај на војната во Украина, вклучително и безбедносни гаранции за Киев. Во среда, на 21 октомври, претставникот на американскиот претседател, Стив Виткоф, ќе му ги предаде нацрт-договорите на руското раководство.

Украинскиот претседател Володимир Зеленски го соопшти ова по разговорите во Осло со Виткоф и со зетот на Доналд Трамп, Џаред Кушнер. Тој исто така напомена дека Вашингтон и Киев ја обновиле размената на разузнавачки податоци, а целосното функционирање на „Старлинк“ ќе биде воспоставено во текот на следните 48 часа.

– Разговаравме за различни предлози: НАТО, Член 5, гаранции слични на Член 5 – постојат различни безбедносни гаранции кои се ставени на хартија, во документот, а кои Стив ќе им ги пренесе на Русите – изјави Зеленски. Тој додаде дека одговорот од Кремљ би требало да се дознае „во рок од еден ден“.

Според норвешкиот премиер Јонас Гар Сторе, кој исто така учествуваше во разговорите, Виткоф ќе отпатува за Русија на 21 октомври за да се сретне со руското раководство и да разговара за мировните иницијативи.

– Виткоф ќе ги пренесе идеите за кои се разговараше денес, како и предлозите изготвени од неговите европски и американски колеги. Ова би можело да го отвори патот за средба на ниво на раководствата. Американските и европските тимови, заедно со Украина, завршија значителна работа по клучните прашања – рече тој.

Друг учесник на денешната средба во Осло, финскиот претседател Александар Стуб, изјави дека страните успеале да „постигнат реален напредок – на две нивоа“.

– Првото е пошироката слика. Второто е краткорочната перспектива. Во однос на пошироката слика, идентификувавме одредени елементи за мир кои утре ќе бидат претставени во Санкт Петербург. Разговаравме за клучните елементи на безбедноста и за клучните елементи на економијата – рече тој.

Според Стуб, преговорите „на техничко ниво“ напредуваат „прилично успешно“.

– Според моето искуство, за мир е потребно трпение. Но, за жал, војната не чека. Луѓе умираат секој еден ден… Мислам дека денешниот ден беше чекор во вистинската насока – додаде тој.

Новинарите го прашаа Зеленски каква е неговата анализа по денешните разговори.

Тој одговори дека Украина сака што побрзо да стави крај на оваа војна и дека се подготвени за преговори.

– Се разбира, не ја губиме оваа војна, но губиме луѓе бидејќи Русија напаѓа – вели тој, додавајќи дека се надева оти нивните партнери – вклучително и САД – ќе им помогнат во ставањето крај на војната.

ЗЕЛЕНСКИ БАРА СПАС ВО ОСЛО, ТРАМП ВО МОСКВА И ПЕКИНГ „Киев да најде друг преговарач“

The post ВИТКОФ И КУШНЕР ОД ЗЕЛЕНСКИ ВО ОСЛО „ИСЦЕДИЈА“ ПРЕДЛОГ ЗА ПУТИН Утре ќе го претстават во Санкт Петерсбург appeared first on plusinfo.mk.

Американскиот државен секретар Марко Рубио денеска ги отфрли тврдењата на украинскиот претседател Володимир Зеленски дека Вашингтон привремено ја прекинал размената на разузнавачки информации со Киев, поручувајќи дека ги оспорува изјавите на украинскиот лидер.

– Немаше никаков прекин – изјави Рубио пред новинарите, доведувајќи го во прашање тоа зошто украинскиот претседател јавно ги изнел ваквите тврдења и оценувајќи дека лидерите треба да се фокусираат на дипломатските напори за завршување на војната.

– Не знам од каде ги добива овие информации ниту зошто му ги кажува овие работи на печатот – рече Рубио.

Реакцијата на шефот на американската дипломатија следува по изјавите на Зеленски во неделното интервју за американската телевизија Ен-би-си њуз (NBC News), во кое украинскиот претседател изјави дека размената на разузнавачки информации била прекината извесен период за време на руските балистички напади, пред американските власти на крајот повторно да го воспостават каналот за пренос на информации.

На прашањето за поплаките од Украина дека Киев не добил навремени предупредувања пред руските балистички ракети да ја погодат престолнината во текот на изминатата ноќ, Рубио рече дека не може да ги коментира најновите воени операции, но додаде дека Европската команда на американските вооружени сили неодамна разгледала технички проблем со софтверот што влијаел врз системите за рано предупредување неколку дена претходно.

The post РУБИО ГИ ОТФРЛА ПОПЛАКИТЕ НА ЗЕЛЕНСКИ КАКО „НЕРАЗБИРЛИВИ“ Немало прекин во размената на разузнавачки информации, туку технички проблем appeared first on plusinfo.mk.

Украинскиот претседател Володимир Зеленски го обвини рускиот претседател Владимир Путин дека нема вистинска намера да преговара за мир. Зеленски истовремено го критикуваше американскиот претседател Доналд Трамп поради договорот за продажба на руски дизел.

Според Зеленски, тој договор само ќе ѝ обезбеди нови приходи на Москва за продолжување на војната против Украина.

На прес-конференција во Брисел, каде што учествуваше на самитот на Европската Унија, Зеленски оцени дека Кремљ само создава привид на подготвеност за мировни разговори.

– Путин во моментов не сака мировни преговори, во каква било форма. Тој си игра со зборови. Едноставно кажано, тоа делува како пародија на вистинска желба за ставање крај на војната – изјави Зеленски.

Неговите критики се однесуваат и на договорот што Трамп го најави на 9 октомври, по телефонскиот разговор со Путин. Тој предвидува олеснување на продажбата на руски дизел на светските пазари, вклучително и во САД.

– Благодарение на овој договор за дизел, парите повторно ќе почнат да се слеваат во Русија – предупреди украинскиот претседател.

Зеленски смета дека продажбата на руски дизел нема значително да го ублажи влијанието на кризата во Ормуската Теснина врз светските пазари, но ќе му донесе дополнителни средства на Кремљ.

– Тоа директно ќе ги наполни џебовите на Путин со средства за финансирање на оваа војна – рече Зеленски.

Трамп, меѓутоа, има поинаква оценка за причините поради кои војната продолжува. Во интервју за „Њузмакс“ на 15 октомври, тој го обвини Зеленски дека не е подготвен за мировен договор.

– Зеленски не е човек со кој лесно се соработува. Тој не сака договор. Тврди дека сака, но всушност не сака. Не, не сум голем љубител на Зеленски – изјави Трамп.

Американскиот претседател додаде дека потешко преговара со Зеленски отколку со Путин и оцени дека мирот би бил можен доколку украинскиот лидер се повлече од функцијата.

Во меѓувреме, нов спор предизвикаа и тврдењата на Трамп за американската финансиска и воена помош за Украина. Тој изјави дека Зеленски добил „милијарди и милијарди долари“ од Вашингтон, како и најсовремена американска воена опрема.

На овие тврдења реагираше полскиот министер за надворешни работи Радослав Сикорски, кој изјави дека САД не потрошиле „ниту еден цент“ за Украина од јануари 2025 година, кога Трамп се врати во Белата куќа.

Податоците на Институтот за светска економија од Кил покажуваат дека новата американска помош за Украина е намалена за 99 отсто во споредба со 2024 година. Анализата го опфаќа периодот до крајот на август 2026 година.

Од друга страна, според Конгресната служба за истражување, американскиот Конгрес одобрил приближно 174,2 милијарди долари за помош поврзана со Украина, главно за време на мандатот на Џо Бајден.

Тоа не значи дека целата сума била исплатена на украинската влада. Значителен дел бил наменет за американско оружје, надополнување на воените залихи, обука на украински војници и други трошоци поврзани со војната.

Покрај финансиските несогласувања, Зеленски предупреди и на проблеми со сателитските комуникации што ги обезбедува компанијата „Спејс икс“ на Илон Маск, а кои се важни за украинската противвоздушна одбрана.

– Во изминатите денови имаше ограничувања на брзината на системот, што значеше дека не можевме да ги собориме дроновите „Шахед“ кои користат млазен погон – изјави Зеленски.

Тој ја опиша ситуацијата како „многу болна и многу непријатна“, но додаде дека услугата постепено се обновува.

Илон Маск во петокот му одговори на Зеленски дека неговата компанија не одлучува за сателитските ограничувања. Истворемено Маск на Икс му порача на Зеленски дека треба да отстапи од функцијата во Украина бидејќи „во војната умираат многу луѓе“.

Трамп подоцна негираше дека тој или Илон Маск се одговорни за проблемите со „Старлинк“, тврдејќи дека САД не вовеле никакви ограничувања за пристапот на Украина до воениот сателитски систем „Старшилд“.

Истовремено, европските лидери, признаа дека засега немаат соодветна замена за американската сателитска технологија. Шефицата на европската дипломатија Каја Калас предупреди дека „Старлинк“ е неопходен за украинската одбрана и дека Европа не може да обезбеди алтернатива на краток рок.

Зеленски побара од европските лидери дополнителни системи за противвоздушна одбрана пред зимата, предупредувајќи дека голем дел од американските системи „Патриот“ моментално се насочуваат кон Блискиот Исток.

– Јавна тајна е дека ние не сме приоритетна дестинација за овие системи – рече украинскиот претседател.

Киев најави продолжување на разговорите со американскиот преговарачки тим во наредните денови. Зеленски истовремено порача дека Украина ќе продолжи да ги напаѓа руските енергетски постројки сè додека Москва не престане со ударите врз украинската енергетска инфраструктура.

Овие изјави доаѓаат во време кога Трамп со извршна наредба го суспендираше спроведувањето на новите американски санкции против Москва, кои требаше да го погодат рускиот енергетски сектор.

Специјалниот пратеник на Путин, Кирил Дмитриев, ја поздрави одлуката како „навистина историски момент“.

Од друга страна, Европската Унија најави дека ќе ги задржи санкциите против Русија и разгледува нова финансиска помош за Украина, која за 2027 година се соочува со недостиг од околу 70 милијарди евра.

The post ИЗВОЗОТ НА ДИЗЕЛ ЌЕ МУ ЈА ФИНАНСИРА ВОЈНАТА НА ПУТИН Зеленски го критикува Трамп, Сикорски вели дека САД не дале ниту цент appeared first on plusinfo.mk.

Украина ќе ги продолжи нападите врз руските рафинерии, изјави украинскиот претседател Володимир Зеленски во интервју за „Фајненшл тајмс“.

– Забраната за напади врз рафинериите е укината. Завршивме со тоа – изјави Зеленски.

Тој рече дека Киев привремено ги запрел нападите врз руските рафинерии и другата енергетска инфраструктура по барање на Вашингтон, по најавата на американскиот претседател Доналд Трамп за енергетско примирје меѓу Русија и Украина. Според Зеленски, Москва продолжила со нападите врз Украина и во периодот кога украинските сили ја почитувале паузата.

Во интервјуто, Зеленски откри дека украинските воени претставници добиле предупредување од американските колеги дека ќе го загубат пристапот до разузнавачките информации доколку продолжат со нападите врз руската енергетска инфраструктура.

– Ако не ги запрете нападите врз енергетските објекти, ќе го блокираме разузнавачкото споделување – му било порачано на Киев, според Зеленски.

Тој рече дека подоцна на Украина ѝ било објаснето дека проблемите се технички, но го отфрли тоа објаснување. Според него, украинските сили во тие денови не добивале рани предупредувања за руските балистички ракетни напади, додека сателитската комуникација преку „Старлинк“ била забавена низ земјата, што ги отежнало операциите на фронтот и нападите врз руски воени цели на среден дострел.

– Тоа не беше технички проблем, туку прашање на волја – рече Зеленски.

Американскиот претседател Трамп, меѓутоа, негираше дека САД го прекинале разузнавачкото споделување со Украина. Компанијата „Спејс екс“ управува со „Старлинк“, а нејзиниот сопственик Илон Маск изјави дека воената верзија на системот, „Старшилд“, е во сопственост и под контрола на американската влада, која одлучува за ограничувањата на брзината.

Зеленски ја критикуваше и подготвеноста на Вашингтон да склучува деловни договори со Москва, како и односот на Трамп кон рускиот претседател Владимир Путин. Во истиот контекст е и договорот за испорака на руски дизел, што американскиот претседател го најави во периодот на раст на цените на горивата.

На прашање дали Украина повторно би се согласила да ги запре нападите врз руската енергетска инфраструктура за да ги подобри односите со Белата куќа, Зеленски рече дека тоа би го прифатил само доколку Киев добие дополнителни американски противракетни системи „Патриот“. Тој ја опиша таквата воена помош како „минимумот“ што би го прифатил.

The post УКРАИНА ЌЕ ГИ ОБНОВИ НАПАДИТЕ ВРЗ РУСКИ РАФИНЕРИИ Зеленски вели дека „енергетското примирије“ не издржало appeared first on plusinfo.mk.

Најновиот сеопфатен мировен предлог за завршување на војната во Украина, кој се развива во октомври 2026 година, е заедничка иницијатива на САД и на европските партнери. Овој нов дипломатски напор се интензивираше по состаноците на американските преговарачи Џаред Кушнер и Стив Виткоф со претставници на Украина, Велика Британија, Франција и Германија.

Според информациите објавени од медиумите како The Washington Post, планот е конципиран како „широк пакет“ кој нуди економски и безбедносни поттикнувања за двете страни со цел да се олеснат тешките компромиси. Планот се состои од четири клучни столба.

1. Прекин на огнот на постојната фронтовска линија. Ова е согледано како најболен дел за Киев, бидејќи би значело дека Русија задржува де факто контрола врз окупираните територии. Како прв чекор кон ова, се преговара за делумен „енергетски прекин на огнот“ (запирање на нападите врз енергетската инфраструктура и испораката на жито), за што претседателот Володимир Зеленски изјави дека Украина е подготвена иако додаде дека не бил запознаен со одлуката што ја објави Трамп.

2. Безбедносни гаранции за Украина. САД и европските земји би се обврзале на воен одговор во случај на нов руски напад, што американските функционери го опишуваат како гаранција еквивалентна на Членот 5 од НАТО договорот за колективна одбрана.

3. Обнова на Украина. Светската банка и инвестициската компанија BlackRock работат на финансиски механизам за обнова на уништените региони, поддршка за семејствата на загинатите и ранетите војници и рестартирање на економијата.

4. Енергетски договор со Русија и укинување на санкциите. Се предлага нов енергетски модел во Европа кој би вклучувал гасоводи/нафтоводи за испорака на руски енергенси, при што профитот би се делел меѓу Русија и Украина. Овој договор треба да дефинира како и кога би се олеснувале економските санкции кон Москва.

Новиот предлог содржи четири фундаментални столбови кои треба да ги донесат двете страни на преговарачка маса до летото 2027 година.

Претседателот Зеленски неодамна изјави дека реалниот временски рок во кој дипломатијата може да доведе до конкретен мировен договор е периодот од крајот на 2026 до летото 2027 година.

Украина изрази подготвеност за трилатерална средба меѓу Украина, Русија и САД под покровителство на претседателот Доналд Трамп.

Паралелно со мировните иницијативи, Советот за безбедност на Украина разгледува и долгорочен одбранбен план подготвен од врховниот командант Михајло Драпатиј, со цел „зачувување на Украина“ во случај конфликтот да продолжи во исцрпувачка фаза.

Трамп до Зеленски: „Престанете со рафинериите, тоа е светски проблем“

Американскиот претседател Доналд Трамп упати остар, досега најдиректен напад кон украинскиот претседател Зеленски, барајќи од Киев веднаш да ги запре воздушните напади со долгодострелни дронови врз руските нафтени рафинерии. Нападите кои Украина ги изведуваше со месеци имаа за цел да ја пресушат воената каса на Кремљ, но Трамп го обвини Киев за предизвикување глобален скок на цените на горивата.

– Му рековме: можеш да правиш што сакаш во Русија, но не ги допирај рафинериите. Затоа што тоа предизвикува глобален проблем. Русија снабдува голем дел од дизелот во светот. И што направи тој? Отиде и го погоди дизелот – изјави Трамп во остар тон, додавајќи дека Зеленски „подобро проклето добро да престане“ со нападите и дури сугерираше дека Украинците треба да си изберат нов лидер кој е способен да постигне договор.

Покрај тоа, Трамп во неделата преку својата платформа Truth Social изненадувачки објави дека е постигнат „енергетски прекин на огнот“ кој стапува на сила веднаш. Администрацијата во Вашингтон, како што пренесува Axios, јасно стави до знаење дека очекува Зеленски строго да се придржува до ова барање, додека извори во медиумите шпекулираат дека САД дури се заканиле со кратење на разузнавачките податоци и испораката на оружје доколку нападите продолжат.

Зеленски: „Фер договор е двете страни да запрат“

Украинскиот претседател во интервју за ABC News ја бранеше стратегијата на својата земја, нагласувајќи дека нападите врз рускиот дизел се реакција на секојдневните руски бомбардирања врз украинските градови и електроенергетска мрежа.

– Ако Русите сакаат да не им го напаѓаме дизелот и рафинериите, тогаш бараме претседателот Трамп да им даде сигнал да не ја напаѓаат енергетската инфраструктура на Украина. Не нè напаѓајте нас, не ни ги убивајте децата. Ние ќе престанеме да го напаѓаме вашиот дизел. Мислам дека тоа е фер договор – изјави Зеленски.

Киев потврди дека го поддржува предлогот за енергетски прекин на огнот.

Што е позадината на договорот меѓу Трамп и Путин?

Договорот, кој неодамна беше склучен меѓу Трамп и Путин, претставува комплексен спој на внатрешна американска политика и остра геополитичка тактика за принудување на двете страни да седнат на преговарачка маса.

Глобалните цени на горивата, особено на дизелот, доживеаја огромен скок кој сериозно ги погоди американските фармери, ранчери и транспортниот сектор. Бидејќи во САД се ближат конгресните избори во ноември, Трамп има огромен внатрешнополитички притисок да ги намали цените на бензинските пумпи. Преку овој договор, Русија се обврза веднаш да испорача 300.000 метрички тони (2,25 милиони барели) дизел на американскиот и глобалниот пазар, со ветување за дополнителни 1,5 милиони тони во ноември. Како противслуга, Министерството за финансии на САД експресно издаде шестмесечна виза (изземање од санкциите) за трговија со руски дизел до 7 април 2027 година.

Зад затворени врати во Мајами, американските преговарачи Џаред Кушнер и Стив Виткоф им признаа на украинските претставници дека Путин во моментов воопшто не е заинтересиран за преговори бидејќи смета дека победува на фронтот. САД го искористија ублажувањето на санкциите за дизелот како економски мамец. Идејата на Вашингтон е со овој бизнис-договор да ја „омекне“ цврстата позиција на Москва и да му испрати сигнал на Путин дека Трамп е подготвен да направи отстапки во сферата на санкциите доколку Русија се врати на трилатералните преговори.

Европа реагираше со гнев, шок и отворено одбивање на потегот на Трамп привремено да ги укине санкциите за рускиот дизел и еднострано да прогласи „енергетско примирје“.

Шефицата на европската дипломатија, Каја Калас, се спротивстави на договорот.

– Суспендирањето на санкциите за рускиот дизел ѝ обезбедува на Москва дополнителни приходи за војување. Сега не е време за ублажување на притисокот врз Русија и Европа нема да го стори тоа – рече Калас.

Како директен контрапотег на договорот меѓу Трамп и Путин, ЕУ веднаш го прошири својот „црн список“ со нови големи санкции против повеќе од 1.600 руски лица и субјекти.

The post КОЈ Е НОВИОТ ПЛАН ЗА КРАЈ НА ВОЈНАТА ВО УКРАИНА? Рускиот дизел и американските избори го диктираат мировниот предлог appeared first on plusinfo.mk.

Украина ја обвини Русија дека воопшто не го почитува договорот за енергетско примирје во замена за ослободување на руските резерви на дизел гориво на светскиот пазар кој го објави американскиот претседател Доналд Трамп.

Овој унилатерен договор, според кој Москва ќе испорача стотици илјади тони дизел гориво во наредниот период, во замена за привремено ублажување на санкциите и значителни економски отстапки од САД, наиде на остри критики од европските министри за надворешни работи.

Украинскиот претседател Володимир Зеленски изјави дека набргу откако Трамп го објавил договорот на своите профили на социјалните мрежи, Русија продолжила со нападите на енергетските капацитети на неговата земја.

– Минатата ноќ руските рафинерии за нафта не беа во пламен, но на полноќ руски дрон „Шахед“ со млазен погон погоди објект за производство на гас во Украина. Имаше и руски напад врз обична бензинска пумпа со неколку дронови, а екипите за поправки сè уште работат на санирање на штетите од вчерашните напади. Значи, имаше руски прекршувања на енергетското примирје што го најави претседателот Трамп – рече Володимир Зеленски, претседател на Украина.

Шефицата на европската дипломатија, Каја Калас, во име на ЕУ ја поздрави можноста за енергетско примирје, но и додаде дека не гледа знаци дека Русија планира да го почитува.

The post „ЕНЕРГЕТСКОТО ПРИМИРЈЕ“ БРЗО СЕ ИЗМОРИ Украина ја обвинува Русија дека го прекршува appeared first on plusinfo.mk.

Администрацијата на Доналд Трамп ги предупреди Украина и нејзините европски сојузници дека САД би можеле да ја прекинат размената на разузнавачки податоци и европската набавка на американско оружје за Украина. Условот е Киев да престане со нападите со долг дострел врз руските енергетски капацитети.

Оваа информација за Си-Ен-Ен (CNN) ја потврдија двајца европски функционери.

За време на викендот, Стејт департментот и Пентагон упатија предупредувања до украинските и европските функционери, а американската војска директно стапи во контакт со командантите во Украина.

Друг извор запознаен со ситуацијата потврди дека САД се заканиле оти ќе ја прекинат размената на разузнавачки податоци.

„Фајненшл тајмс“ (Financial Times) прв објави за заканите за прекин на соработката и набавката на оружје.

– Му се јавуваат на Киев… Им се јавуваат на сите во Европа – изјави еден од функционерите кои примиле повик од Министерството за одбрана на САД.

Заканите доаѓаат во момент кога претседателот Доналд Трамп е крајно незадоволен од украинскиот претседател Володимир Зеленски поради нападите врз руските рафинерии.

Трамп долго време смета дека војната меѓу Украина и Русија е одговорна за растот на цените на дизелот на светскиот пазар и бара од двете страни да ги прекинат нападите врз енергетските капацитети.

Претходно во неделата, Трамп објави дека Русија и Украина се договориле за она што тој го нарече „енергетско примирје“.

Извор близок до Зеленски тврди дека таквиот развој на настаните бил изненадување.

„Украина го поддржува прекинот на огнот и важно е и Русија да го поддржи. Ги очекуваме деталите од американска страна“, напиша Зеленски на мрежата „Икс“ (X) по објавата на Трамп.

Европски функционер изјави за Си-Ен-Ен дека размената на разузнавачки податоци и набавката на оружје се „клучни“ за Украина. Тој ја опиша заканата како „тажен ден“ за Киев и неговите сојузници. Доколку заканите на САД се остварат, последиците за украинската одбрана би биле моментални.

Американските разузнавачки податоци се клучни за одбраната на Украина од руските балистички ракети бидејќи ги откриваат локациите на лансерите, како и целите и времето на нападите. Од друга страна, прекинот на набавката на оружје, која се спроведува преку механизмот PURL (Листа на приоритетни барања на Украина), најтешко би ги погодил испораките на пресретнувачки ракети за системот „Патриот“.

На Украина и онака критично ѝ недостигаат тие ракети, особено сега кога Русија ги засили ракетните напади и нападите со беспилотни летала низ целата земја.

The post ТАЖЕН ДЕН ЗА КИЕВ, ОСТАНУВА БЕЗ ПОМОШТА ОД САД? Трамп се закани со прекин на разузнавачките информации и снабдувањето со оружје appeared first on plusinfo.mk.

Американскиот претседател Доналд Трамп денеска соопшти дека Украина и Русија се согласиле на она што тој го нарече „енергетско примирје“, кое според неговите зборови стапува во сила веднаш, иако не изнесе дополнителни детали за договорот.

Претходно денеска, украинскиот претседател Володимир Зеленски, одговарајќи на критиките упатени од Трамп, изјави дека е подготвен да организира избори во Украина доколку рускиот претседател Владимир Путин се согласи на 60-дневно примирје.

„Кажете му на Путин да ни даде два месеца, 60 дена целосно примирје, 60 дена — и ние ќе организираме избори“, изјави Зеленски во емисијата „Оваа недела“ на американската телевизија Еј-Би-Си (ABC).

Трамп вчера го критикуваше Зеленски поради украинските напади врз руските рафинерии за нафта, само еден ден откако Соединетите Американски Држави привремено ги укинаа санкциите за руските горива, чија првична цел беше да ја лишат Москва од приходи за финансирање на војната во Украина.

„Мислам дека е време Украина да добие нов претседател“, им изјави Трамп на новинарите во Белата куќа.

Зеленски, одговарајќи на овие критики, истакна дека „на Украинците е да одлучат“ кој ќе ја води земјата, додавајќи дека и Путин исто така би сакал да го смени украинското раководство. Тој додаде дека е лесно Украина да се обвинува за растот на цените на горивата, „кога сите во светот разбираат дека цените растат поради војната на Блискиот Исток“.

Инаку, претходно денеска Зеленски порача дека Украина е подготвена да ги запре нападите врз руските рафинерии за нафта, под услов Москва да ги прекине сопствените напади врз украинската енергетска инфраструктура.

Украинскиот претседател Володимир Зеленски изјави дека не е запознаен со „енергетското примирје“ меѓу Украина и Русија, но истакна дека Киев е подготвен да го прифати доколку Москва се согласила на тоа.

„Објавеното прекинување на огнот (во однос на енергетската инфраструктура) е новост за мене. Ако Русите се согласни на енергетско примирје, и Украина е согласна. Ако Трамп го договорил тоа со (рускиот претседател Владимир) Путин, ве молам, кажете ни кога стапува во сила примирјето – ние сме подготвени и ќе го прифатиме“, изјави Зеленски во интервју за порталот „Аксиос“.

The post ТРАМП СООПШТИ ДЕКА УКРАИНА И РУСИЈА СЕ СОГЛАСИЛЕ НА ЕНЕРГЕТСКО ПРИМИРЈЕ Примирјето стапува во сила веднаш appeared first on plusinfo.mk.

Јужна Кореја денеска соопшти дека ќе го повлече својот амбасадор од Украина, откако украинскиот претседател Володимир Зеленски на седница на Обединетите нации јавно ја откри доверливата операција за префрлање на двајца севернокорејски воени заробеници во Јужна Кореја.

Министерството за надворешни работи на Јужна Кореја не соопшти кога амбасадорот Парк Хи-чанг ќе се врати во Сеул, но во соопштението се наведува дека земјата ќе продолжи со консултациите со Украина, со надеж дека дипломатскиот спор ќе биде решен по мирен пат.

Двете земји влегоа во дипломатски спор откако Сеул ја обвини Украина за прекршување на договорот за доверливост во врска со префрлањето на заробениците во средината на септември, додека Киев негираше дека бил постигнат таков договор. Јужнокорејските претставници наведоа дека договорот за доверливост бил склучен за да се заштити безбедноста на севернокорејските војници и нивните семејства кои сè уште се наоѓаат во Северна Кореја.

Заробените војници биле дел од севернокорејските сили распоредени во Русија како поддршка на Москва во војната против Украина. Откако беа заробени на почетокот на 2025 година, тие изразиле желба да се населат во Јужна Кореја, плашејќи се од прогон и од одмазда на севернокорејскиот режим доколку бидат вратени во татковината.

Јужна Кореја ги прифати заробениците во согласност со својата политика за прифаќање и финансиска поддршка на сите пребегани лица, со оглед на тоа што според нејзиниот Устав, целиот Корејски Полуостров правно се смета за нејзина територија.

The post ДИПЛОМАТСКИ СКАНДАЛ ПОРАДИ ДВАЈЦА СЕВЕРНОКОРЕЈСКИ ВОЈНИЦИ Јужна Кореја ги спасила, Зеленски ги издаде! appeared first on plusinfo.mk.

Јужна Кореја бара објаснување и извинување од Украина, обвинувајќи го Киев дека еднострано ја објавил информацијата за трансферот на двајца севернокорејски војници заробени во Украина, иако претходно било договорено прашањето да остане доверливо.

Канцеларијата на јужнокорејскиот претседател Ли Џе Мјунг во неделата соопшти дека подоцнежното негирање од украинска страна дека постоел таков договор за доверливост е неточно и дека со тоа е нарушена довербата меѓу двете влади, пренесе Јонхап.

Во соопштението посебно се посочува на, како што го нарекоа во Сеул, „лажното“ негирање од кабинетот на украинскиот претседател Володимир Зеленски дека постоел договор со кој информацијата за трансферот требало да остане тајна.

Јужнокорејската страна тврди дека токму украинската влада побарала трансферот на заробениците да биде доверлив.

Образложението, според Сеул, било дека Украина во спротивно би можела да се соочи со критики во земјата затоа што се откажала од можноста севернокорејските заробеници да ги размени за украински воени заробеници.

Високиот секретар на јужнокорејскиот претседател за односи со јавноста, Сонг Ги-хонг, изјавил дека Сеул се согласил трансферот да остане во тајност поради безбедноста на заробениците и нивните семејства, но и поради други дипломатски и безбедносни прашања.

Според него, Зеленски, и покрај постигнатиот договор меѓу двете страни, ја објавил информацијата за трансферот без претходно објаснување и консултации со јужнокорејската страна.

Јужнокорејскиот претседателски функционер изразил и „длабоко жалење“ поради, како што навел, поединци во Јужна Кореја кои го „политизирале чувствителното безбедносно прашање“ во корист на Украина.

Сонг оценил дека политизирањето на ова прашање е штетно за националниот интерес и повикал да престане ширењето на, како што ги нарекол, „неосновани невистини“.

Зеленски минатата недела, во обраќање пред Обединетите нации, соопшти дека Украина префрлила двајца севернокорејски војници во Јужна Кореја. Двајцата минатата година биле заробени во Украина.

По ова, претседателот на Јужна Кореја Ли Џе Мјунг и неговиот кабинет соопштија дека Украина го прекршила договорот за доверливост, чија цел, според нив, била трансферот да остане во тајност за да се заштитат заробените војници од опасности на кои би можеле да бидат изложени доколку нивниот трансфер биде јавно објавен.

Сеул притоа се повика и на меѓународното право и хуманитарните принципи.

Набргу потоа, украинските медиуми пренесоа изјава од извор од кабинетот на украинскиот претседател, кој негирал дека со Сеул постоел каков било договор за доверливост.

The post ЗЕЛЕНСКИ ЈА ОБЈАВИ ТАЈНАТА ЗА СЕВЕРНОКОРЕЈСКИТЕ ЗАРОБЕНИЦИ Остра реакција од Сеул, Украина го нарушила договорот за тајност appeared first on plusinfo.mk.