Локалната водоинсталатерка и советничка на Зелените, Хана Спенсер, е избрана за прва пратеничка на таа партија во северна Англија, надоместувајќи го претходното мнозинство на лабуристите од 13.000 гласови, пренесува „Гардијан“.

Зелените освоија 14.980 гласови, што е за 5.616 повеќе од лабуристите, додека „Reform UK“ заврши на второто место со 10.578 гласови. Лабуристите забележаа пад на поддршката од 25,3 отсто во споредба со 2024 година. Ова е прва победа на Зелените на дополнителни избори во Вестминстер и првпат по речиси 100 години Гортон во Манчестер да нема пратеник од редовите на лабуристите.

Во победничкиот говор, Спенсер порача дека луѓето се исцрпуваат работејќи за да ги „полнат џебовите на милијардерите“ и ја истакна солидарноста на заедницата, со порака дека нејзините пријатели и соседи муслимани се „луѓе како и сите други“.

Дополнителните избори беа распишани по оставката на Ендру Гвин од здравствени причини, додека поранешниот пратеник беше под парламентарна истрага поради навредливи пораки во група на платформата WhatsApp. Извори од Лабуристичката партија наведуваат дека дел од муслиманските гласачи не ѝ простиле на партијата за нејзиниот став за Газа, што Зелените го искористија во кампањата.

Излезноста изнесуваше 47,6 отсто, нешто помалку отколку на општите избори во 2024 година. Заменик-лидерот на лабуристите, Луси Пауел, го потврди поразот и порача дека Стармер е „вистинската личност за работата“, со оценка дека партијата мора појасно да ја претстави својата политика.

Кандидатот на „Reform UK“, Мет Гудвин, за поразот ја обвини „коалицијата на исламисти и разбудени прогресивци“ (woke progressives) и ги обвини Зелените за „секташка политика“.

Кампањата ја одбележаа остри меѓусебни обвинувања на Лабуристите и Зелените, додека „Reform UK“ се соочува со постапка пред Врховниот суд поради спорни изборни писма без пропишани политички обележја, истакнува „Гардијан“.

The post УБЕДЛИВА ПОБЕДА НА ЗЕЛЕНИТЕ, ЛАБУРИСТИТЕ НА ТРЕТО МЕСТО!? Изненадувачки резултат на дополнителните избори за пратеник од Вестминстер appeared first on plusinfo.mk.

Некогашната германска канцеларка Ангела Меркел би можела да се врати на политичката сцена како кандидатка за сојузна претседателка во 2027 година, пишуваат германските портали „Билд“ и „Фокус“. Според написите, оваа гласина предизвикала силни реакции во јавноста и вознемиреност во редовите на владејачката Христијанско-демократска унија (ЦДУ).

Иако засега нема официјална потврда ниту од ЦДУ, ниту од други партии, шпекулациите добиле тежина бидејќи некои кругови – особено од редовите на Зелените и делумно од социјалдемократите (СПД) – ја гледаат Меркел како можно обединително лице во време на сѐ подлабоки политички поларизации.

Меркел е во пензија од 2021 година, но нејзиното политичко влијание и симболична тежина остануваат силни. Односите меѓу Меркел и актуелниот канцелар Фридрих Мерц (ЦДУ) се одамна нарушени – Меркел го маргинализираше Мерц во почетокот на 2000-тите, а откако тој ја презеде партијата, ја помести десно од центристичките позиции по кои таа беше препознатлива.

Идејата Меркел да стане претседателка доаѓа во овој контекст – како можно балансирање на десниот курс на Мерц и сигнал за стабилност. Иако функцијата на сојузниот претседател е претежно церемонијална, таа има силно морално и политичко влијание.

Германскиот сојузен претседател не се избира директно од граѓаните, туку од специјално тело наречено Бундесферамлунг, составено од пратениците во Бундестагот и ист број претставници именувани од покраинските парламенти. За избор е потребно апсолутно мнозинство во првите два круга, а потоа доволно е и релативно мнозинство.

Меркел би можела да добие поддршка од опозициските Зелени и СПД, доколку тие решат да поддржат кандидат надвор од актуелната парламентарна коалиција. Од ЦДУ, пак, се размислува и за други имиња, меѓу кои се споменуваат Јулија Клекнер (претседателка на Бундестагот) и министерката за образование Карин Прин – блиски до Мерц.

Од мигрантската криза во 2015 година до справувањето со должничката криза во еврозоната, Меркел остави длабока трага во германската и европската политика. Нејзиниот центристички стил доби силна поддршка кај либералните кругови, но и предизвика реакции кои придонесоа за подемот на десничарската Алтернатива за Германија (АФД).

Иако се работи за шпекулација, можноста Ангела Меркел повторно да се појави на политичката сцена, дури и во симболична улога, покажува колку нејзиното влијание сè уште е присутно – и колку актуелните политички односи во Берлин и натаму се дефинираат преку нејзиното политичко наследство.

Тековен сојузен претседател е социјалдемократот Франк-Валтер Штајнмаер, кој ја извршува функцијата од 2017 година. Неговиот мандат завршува во 20027 година.

The post АНГЕЛА МЕРКЕЛ СЕ ВРАЌА ВО ГЕРМАНСКАТА ПОЛИТИКА? Можно е да се кандидира за сојузен претседател appeared first on plusinfo.mk.

Зошто е ова така? Затоа што организмите кои не користат кислород или живеат во средини со малку кислород често имаат виолетова боја. Како на пример, виолетовите бактерии.

А според според д-р Лигија Фонсека Коељо од Универзитетот Корнел, ваквите средини без кислород, се најверојатната средина на вонземска планета.

– Виолетовите бактерии можат да напредуваат под широк спектар на услови, што ги прави еден од главните кандидати за живот кој би можел да доминира во различни светови – вели таа.

Значи, ова е сосем различно од животот на нашата земја, каде повеќето растенија, на пример, се зелени, затоа што имаат хлорофил. Но, дури и на Земјата, ако ја следиме историјата на планетата, три четвртини од сите организми биле едноклеточни, бактерии…

Тимот на Фонсека Коељо трага по виолетови бактерии на Земјата кои живеат во сурови услови.  Ова вклучува хидротермални отвори на длабоко море, мочуришта, па дури и застојано езерце кое лесно се наоѓа на кампусот Корнел.

– Тие (бактерии) веќе напредуваат овде во одредени ниши. Замислете само да не се натпреваруваат со зелените растенија, алгите и бактериите: црвеното сонце може да им даде најповолни услови за фотосинтеза.

Црвеното сонце, познато и како црвена ѕвезда е тип на ѕвезда која често се наоѓа во системи блиски од нашиот Сончев систем. Тимот открил дека слабата светлина од овој тип ѕвезда е доволна за развојот на виолетови бактерии.

Црвените џуџиња, како што ги викаат овие ѕвезди, обично тежат колку половина од нашето Сонце.

The post ВОНЗЕМЈАНИТЕ НЕ СЕ ЗЕЛЕНИ ТУКУ ВИОЛЕТОВИ? Еве зошто оваа боја е најдобриот кандидат за живот на друга планета appeared first on plusinfo.mk.

По дводневните масовни протести, десетици илјади луѓе во неделата излегоа на улиците на германските градови за да демонстрираат против екстремно десничарската партија Алтернатива за Германија (АфД) и нејзината антиимиграциска агенда.

Од петокот до викендот, беа свикани демонстрации на околу 100 локации низ Германија. Во неделата се одржаа митинзи во поголемите градови како Келн, Минхен и Берлин. Неколку други германски градови, вклучувајќи ги Котбус, Дрезден и Кемниц на исток, исто така планираа да одржат демонстрации.

Прекинат маршот во Минхен

На протестот во Минхен се очекуваа околу 25.000 луѓе, но организаторите велат дека се собрале и до 250.000, пишува германски Велт.

Во Минхен демонстрациите беа прекинати поради пренатрупаност, соопшти полицијата и посочи дека е невозможно да се обезбеди безбедност на учесниците.

Според проценките на полицијата, на демонстрациите во Минхен се собрале околу 80.000 луѓе, додава Шпигел.

Според проценките на полицијата, на митингот „Против десницата“ во Бремен се собрале меѓу 35.000 и 40.000 луѓе, додека организаторите проценуваат дека имало околу 50.000 луѓе.

Thousands gather in #Bremen to support a nationwide day of protests against the #AFD pic.twitter.com/DIo3gcV05n

— Derek Ivens (@derekivens) January 21, 2024

„Цел Бремен ја мрази АфД“, скандираа учесниците на протестот во Бремен.

Протести против десничарскиот екстремизам и ксенофобија се одржаа и во Келн и Бон.

Неколку илјади луѓе се собраа во Бон, додека три собири беа одржани во Келн, каде десетици илјади луѓе протестираа против десничарскиот екстремизам.

So sieht ein Bruchteil von 50.000 Menschen, die für Solidarität, Freiheit und Menschenrechte auf die Straße gehen, aus. Danke, #Bremen! #noAfD pic.twitter.com/9qUSdykWZm

— Alexandra Werwath (@AlexWerwath) January 21, 2024

На плакатите што ги носеа учесниците на протестот во Келн, пишува „Тагесшпигел“, пишува „Омразата те прави болен“ и „Нема Келн за нацистите“.

Најголемиот протест се очекува да се одржи во главниот град Берлин, каде коалицијата на организации ги повика луѓето да се соберат пред Бундестагот, долниот дом на парламентот, од 16 часот по локално време.

Иако полицијата рече дека очекува само 1.000 учесници, минатите демонстрации далеку ги надминаа првичните проценки, а Берлин е дом на многу активисти.

Германија е зафатена од протести повеќе од една недела по објавувањето на истражниот извештај во кој се открива дека членовите на АфД присуствувале на состанокот на екстремно десничарските екстремисти во ноември.

На тој состанок во Потсдам, учесниците разговараа за плановите за репатријација на барателите на азил и мигрантите кои се сметаат за недоволно асимилирани, дури и оние со германски пасоши.

Извештајот на истражувачката фирма Коректив, објавен на 10 јануари, предизвика вознемиреност во Германија, каде што расте стравот од зголемување на јавната поддршка за АфД меѓу главните политички партии.

Партијата напредува високо во анкетите во трите поранешни источногермански покраини, кои одржуваат регионални избори подоцна оваа година.

На состанокот во Потсдам, екстремните десничарски екстремисти разговараа за теми како „ремиграција“, термин кој често се користи во крајнодесничарските кругови како еуфемизам за протерување на имигрантите и малцинствата.

Најмалку 300.000 луѓе излегоа на улиците на Германија во саботата за да го изразат своето противење на екстремно десничарската партија АфД и да ја поддржат демократијата. Зимата воопшто не им пречеше.

In Hamburg, Germany, tens of thousands protest against the far-right today.

The rally had to be cut short due to safety concerns because of crowd size.

The wave of protests against the far-right will continue on the weekend with dozens of rallies. pic.twitter.com/SYAVcn6CPo

— Michael Knigge (@kniggem) January 19, 2024

Протести се одржаа од јужна Баварија до северниот град Хамбург и од западните градови како Франкфурт до Ерфурт и Хале/Сал на исток, каде што АфД има поддршка од околу 30 отсто од електоратот, според неодамнешните истражувања.

Дури и на северноморскиот остров Зилт, популарна дестинација за одмор на богатите Германци, која не е позната по политички активизам, околу 600 луѓе протестираа против екстремната десница, според полицијата.

Во Франкфурт, финансискиот главен град на земјата, полицијата процени дека имало околу 35.000 демонстранти.

Во Хановер, на северот на Германија, организаторите процениле дека на протестите дошле 35.000 луѓе.

Демонстрантите држеа натписи на кои пишуваше „Фашизмот не е алтернатива“ и „Нема место за нацистите“.

Претставниците на синдикатите, здруженијата, Зелените и Социјалдемократската партија (СПД) на канцеларот Олаф Шолц посебно ги поканија луѓето да учествуваат на протестите.

The post 📽 ГЕРМАНИЈА НА НОЗЕ ПОРАДИ ТАЈНА СРЕДБА Германците протестираат трет ден по ред, маршот во Минхен е прекинат поради премногу народ appeared first on plusinfo.mk.

Писмото на Поповска ви го пренесуваме во целост:

Почитувани зелени пријатели,

Ви се обраќам како поранешна претседателка на првата парламентарна зелена партија во Македонија, ДОМ – Демократска обнова на Македонија, која е и Ваша полноправна членка. Долги години соработувавме како соборци за демократија, човекови права, заштита на климата и животната средина, културен диверзитет и социјална правда. Овде, во Македонија, со Ваша помош се собираа зелените партии од целиот Балкан, кога другите политички фамилии не можеа да најдат заеднички јазик. Ние, пак, заеднички го сонувавме зелениот европски сон, покажувајќи дека зеленото е моќна обединувачка идеја која надминува граници и предрасуди. Како што знаете, се повлеков од политиката целосно и трајно, дејствувајќи сега како граѓански активист за истите вредности во кои верувам.

Во свое лично име Ви се обраќам за да побарам помош за нормализација на процесот на отворање преговори со ЕУ за Македонија и за исправање на една голема неправда. Токму зборот НЕПРАВДА стана синоним за Македонија, зашто изгледа како секоја држава да добива право да си поигрува со нас, со нашата иднина и среќа. Премногу долго сме третирани како монета за поткусурување на интересите на „поголемите“ од нас. Веќе три децении сме под разни блокади, од кои две се во официјалната чекална на ЕУ, а сме имале неброени позитивни оценки за почеток на преговорите.

Во моментов на Македонија и се нуди целосно неприфатлив предлог, диктиран од Бугарија, напишан од Франција, а официјално поддржан од ЕУ. Се претставува како „компромисно решение за дигање на бугарското вето за почеток на преговорите со ЕУ“, иако е само грда уцена и измама, која не може дури ни да се реализира, и по цена некој да се обиде да ги исполнува бесмислените диктати од предлогот. Во преговарачката рамка е вградена целата негаторска политика на поголемиот дел од бугарската политичка елита за јазикот, идентитетот и историјата на Македонците и македонската држава. Од нас се очекува да „признаеме“ дека сме всушност Бугари со бугарски јазик, на кои Тито им го „свртел умот“, па се декларирале како Македонци од 1945 наваму. Ова треба потоа да го внесеме во учебниците, што ќе биде под строга „вето контрола“ на нашите соседи. А пред да почнат воопшто преговорите, треба да ги внесеме Бугарите во нашиот устав, но не како малцинска заедница, туку како конститутивен народ, за да можеле, како што велат, „да ги освестуваат“ заблудените Македонци одвнатре, како вградена мина во државната структура. Само да потсетам, истата држава не признава малцинства во својот устав и жестоко ги прогонува и забранува тамошните Македонци и нивните здруженија. За ова сте добро информирани, со оглед на тоа што Европските Зелени се со години особено активни во Советот на Европа со поддршка на нивните права, со што се издејствувани 16 пресуди на Европскиот суд за човекови права во нивна полза. Ниедна од овие пресуди не е реализирана!

Се разбира, целиот пакет со условувања во преговарачката рамка е спротивен на критериумите од Копенхаген, но и на сите повелби на ОН за човековите права и правото на самоизјаснување. Сепак, во овој миг, европските структури застанале зад ваквиот предлог и се прави непримерен притисок врз Владата и пратениците да го прифатат, во состојба на масовна огорченост и револт на граѓаните, кои се на улица. Не повикуваат да бидеме рационални, а не емотивни. Но токму во името на разумот не можеме да прифатиме уцени кои го засегаат идентитетското чувство. Исто така, не можеме да не бидеме емотивни кога сме понижени и загрозени, зашто ни е реално затворен патот за кој верувавме дека води кон подобро, поправедно и понапредно општество.

Само да потсетам, нашиот од по маките започна со блокадата од Грција и забрана на самиот збор Македонија во нашето име! ЕУ со Лисабонската декларација од 1992 првин го прифати ова, за да се повлече по наша реакција и на многу разумни личности од меѓународната сцена. Но грчкото вето за НАТО и ЕУ продолжи со долги и мачни преговори за името, во кои беше гмечено нашето достоинство, чувство за реалност и шанси за демократски и економски напредок. И за ова сте добро информирани, зашто Европските Зелени беа речиси единствените доследни борци за заштита на човековите права и европските принципи, инсистирајќи на деблокада на Македонија и невнесување на билатералните спорови во европската агенда. Преку Вашите претставници во Европскиот парламент и нивните амандмани, Македонија имаше свои претставници и заштитници на правата на обесправените!

Агонијата со името само формално заврши со Преспанскиот договор, зашто додавката пред нашето име ја мразиме и не сакаме ни да ја изговориме, а посебно не боли кога некој сака од неа да прави именки и придавки за идентитетот и јазикот. Освен приемот во НАТО што беше една од стратешките цели и кохезивен елемент меѓу македонските граѓани, добивме длабока граѓанска поделеност, но и ново вето од Франција заради нова методологија на прием, па уште едно вето од Бугарија поради идентитетски и историски причини. ЕУ, која беше гарант на договорот, не измами и остана затворена за нас.

Почитувани зелени пријатели, ова обраќање е молба да и помогнете на Македонија повторно и на Ваш начин, во името на правдата и вистинските европски вредности да го издејствувате невозможното – нова дебата во Европскиот парламент за отворањето на преговорите со Македонија. Европа се бори за правда во Украина, против присвојувањето на јазикот, идентитетот и територијата од страна на Русија. Зошто тогаш дозволува истото тоа да и го прави Бугарија на Македонија? Зарем правото на правда зависи од големината на земјата и од моменталните геостратешки интереси?

Молам за правда за Македонија, подеднаква како и за Украина и за секоја онеправдана земја! Помогнете ни да се одбраниме од империјалистичкото наметнување услови за тоа кои сме, кој е нашиот јазик, како ќе се нарекуваме и каква ќе биде нашата колективна меморија! Со Ваше заземање како најавтентични Европејци меѓу Европејците, ќе застанете и во одбрана на вербата дека Европската унија не е само нереален сон за целиот Балкан и пошироко.

Со почит и надеж,

Лилјана Поповска

П.С. Во прилог ставови за францускиот предлог од проф. Флоријан Бибер, проф. Улф Брунбауер и од македонските граѓански организации.

The post ОТВОРЕНО ПИСМО ДО ПАРТИИТЕ НА ЗЕЛЕНИТЕ Лилјана Поповска моли за правда за Македонија appeared first on plusinfo.mk.

Најголема доверба кај испитаниците ужива ЦДУ со 27 отсто . Зелените се на второ место со 21 отсто, додека на трето место е партијата на канцеларот Олаф Шолц со 20 отсто.

На четврто место во анкетата објавена во „Билд“ е десничарската партија Алтернатива за Германија, која во моментов би можела да се надева на 10 отсто од гласовите на наредните избори.

The post ГЕРМАНЦИТЕ НЕ ГО САКААТ ШОЛЦ Паѓа рејтингот на владејачката СПД appeared first on plusinfo.mk.

– Мислам дека партијата си направи алиби за да ги забетонира постојните и да ги прошири и надгради политичките позиции во областа на „еколошките“ бизниси. Веќе две децении имаат огромна моќ во областа на животна средина и бизнисите што ја тангираат. На чело се на цел синџир од институции, како министерства за екологија и економија, инспекторати за животна средина, техничка инспекција, шумска полиција и сл., а Македонија има сериозни еколошки проблеми, честопати поврзани со организиран криминал и корупција. Со овој потег ДУИ најавува дека и понатаму неприкосновено ќе владее со ресорот животна средина, особено во светлото на климатската акција, зелените фондови за развој на зелена економија и енергетската транцизија од фосилни кон обновливи енергии – вели Поповска за „Дојче Веле“.

Таа објаснува дека зелениот бран опфаќа масовни грантови и кредитирања на Балканот и во тој контекст потегот на ДУИ го гледа како номинално фаќање на чекор со актуелните глобални трендови.

– Сепак, претенциозно е да се преоблечат во „зелено“, знаејќи ги високите стандарди и принципи на таа идеологија, а имајќи ги пред очи резултатите од општините каде што имаат градоначалници – додава Поповска.

The post Лиле се испаничи: ДУИ сака да ги лапне зелените фондови appeared first on plusinfo.mk.

На денешната пленарна дебата на Европскиот Парламент со португалскиот премиер, Антонио Коста, целосно изостана темата за проширувањето и преговорите со Северна Македонија и Албанија.

Португалија претседава со ЕУ од први јануари до 30 јуни оваа година. Премиерот Коста утрово ги изложи приоритетите на неговата земја за следните шест месеци, но не го спомена проширувањето.

Пратеничката Тинеке Стрик меѓутоа побара експресно од Коста да изврши притисок врз Бугарија.

– Наметнавме услови кои Северна Македонија направи сѐ за да ги исполни сите, но една земја блокира, итно барам од вас да извршите притисок врз Бугарија да го повлече ветото и да се врати кредибилитетот на ЕУ на Западен Балкан – изјави Стрик.

The post Европските зелени повикаа за почеток на преговорите со Македонија appeared first on plusinfo.mk.

Во 05.55 часот на „Деве Баир“ полициски службеници го лишиле од слобода Ф.С.(31) од Р.Турција, кој управувал товарно моторно возило „рено“ со турски национални ознаки и полуприколка „тирсан“ со турски национални ознаки, поради сомнение дека турската зелена карта е фалсификувана.

Неколку часа подоцна полициски службеници го лишиле од слобода Е.Д.(34) од Р.Турција, кој управувал товарно моторно возило „рено“ со турски национални ознаки и полуприколка „тирсан“ со турски национални ознаки, поради сомнение дека турската зелена карта е фалсификувана.

Од слобода бил лишен и У.Д.(49) од Р.Турција, кој управувал товарно моторно возило „рено“ со турски национални ознаки и полуприколка „тирсан“ со турски национални ознаки, кој исто така се обидел да влезе со фалсификуваната турска зелена карта.

Трите лица се предадени на полициски службеници од Полициска станица Крива Паланка, за понатамошна постапка.

The post Турци со лажни зелени картони сакале да влезат во земјава appeared first on plusinfo.mk.

Овие нови кредитни линии се дел од Програмата за поддршка на конкурентноста и Програмата за финансирање на зелена економија (GEFF) и се наменети за правни и физички лица со цел да им обезбедат соодветната поддршка  за инвестиции за енергетската ефикасност и подобрување на конкурентноста.

– Во рамки на кредитната линија за енергетска ефикасност која е наменета за физички лица, НЛБ Банка воведе два кредитни продукти за поддршка на инвестициите во зелени технологии и тоа: Енерго Потрошувачки кредит за енергетска ефикасност, на износ до 25.000 еур и Енерго Хипотекарен кредит за енергетска ефикасност, на износ до 50.000 еур – велат од банката.

Од НЛБ Банка истакнуваа дека овие кредитни продукти се наменети за инвестиции во изведба или реновирање на куќа или стан, а со цел постигнување енергетска ефикасност и намалување на трошоците за електрична енергија.  Со овие кредитни продукти можат да се финансираат: енергетски ефикасни прозори и врати, топлинска изолација на надворешни ѕидови, под или кров, топлински пумпи, котли на биомаса или гас, фотоволтаични системи и слично.

– Преку кредитната линија за правни лица Конкурентност +, НЛБ Банка овозможува  поддршка на конкурентноста на микро, малите и средни претпријатија (според ЕУ дефиниција). Инвестициите може да бидат исто така со сферата на енергетската ефикасност, но освен тоа подобни се и инвестиции во индустриски објекти кои ќе овозможат подобрување на производствените капацитети (опрема, софтвер), зајакнување на процесите и квалитетот на производите како и подобрување на конкурентноста и усогласеноста со техничките стандарди во согласност со ЕУ законодавството – се вели во соопштението.

Како дополнителна придобивка на новите кредитни продукти е повратот на средства по успешно реализираните инвестиции, и тоа до 20% за физички лица и 15% за правните лица. Покрај ова правните лица ќе имаат можност и за консултантски услуги преку тим од локални и меѓународни експерти ангажирани од ЕБОР кои ќе овозможат бесплатно техничко советување, како и техничка помош во областа на одобрување и верификација на проектите.

Програмата за поддршка на конкурентноста е поддржна од ЕУ, додека Програмата за финанирање на зелена eкономија (GEFF) е поддржана од ЕУ, Австрија и Инвестициската програма за Западен Балкан.

Сите дополнителни информации во врска со овие кредитни продукти клиентите можат да ги добијат на веб страницата на Банката, на телефон 02/15600 или во најблиската експозитура.

The post Нови кредитни продукти на НЛБ Банка за поддршка на конкурентноста и енергетската ефикасност appeared first on plusinfo.mk.