Градоначалникот на Скопје, Орце Ѓорѓиевски информира дека се почнати активности за уредување на паркот „Македонија“ 1, 2 и 3 во Карпош, каде се поставува нова урбана опрема – клупи, корпи за отпадоци, како и уредување на летниковците кои секојдневно ги користат голем број граѓани.

„Го уредуваме еден од најубавите паркови во Скопје. Парковите се белите дробови на градот. Таму децата растат, семејствата создаваат спомени, младите се дружат, а повозрасните наоѓаат мир, сенка и простор за одмор. Токму затоа, започнавме со уредување на паркот „Македонија“ 1, 2 и 3 во Карпош, каде поставуваме нова урбана опрема – клупи, корпи за отпадоци, како и уредување на летниковците кои секојдневно ги користат голем број граѓани“, објави Ѓорѓиевски на Фејсбук.

Нашата обврска, додаде тој, е парковите да бидат чисти, уредени, безбедни и достојни за сите посетители.

„Затоа редовно ги одржуваме зелените површини кои се под надлежност на Град Скопје, но истовремено упатувам и апел до сите граѓани – да ги чуваме парковите како свој дом. Само со совесен однос можеме да имаме поубав, почист и позелен град“, нагласи градоначалникот.

The post 📷 СЕ ДОТЕРУВА ЕДЕН ОД НАЈПОСЕТУВАНИТЕ ПАРКОВИ ВО КАРПОШ Нови клупи, корпи и летниковци во „Македонија“ appeared first on plusinfo.mk.

Во изминатиот период од страна на Град Скопје биле преземени засилени инспекциски контроли на индустриските капацитети, воведени редовни и вонредни надзори, се работело на решавање на сообраќајот, изградба на нови зелени површини и зелени коридори, како и соодветен третман на депониите. Само во периодот од 6 ноември до 1 јануари, издадени се 90 прекршочни платни налози и глоби, 33 решенија за задолжување, 35 вонредни надзори и 290 опомени. Изречени биле глоби во висина од 1.000 до 53.000 евра.

– На вонредната седница на советот на градот Скопје, посветена на загадувањето на амбиенталниот воздух и неговите причинители. Драго ми е што по долго време за овие прашања се дискутира искрено и без политиканство, со цел да се преземат конкретни активности, а не само да се ставаат проблемите под тепих. Се согласувам со сите излагања на советниците. Овој проблем бара посветеност, конкретни акции и заедничка одговорност. Загадувањето не е проблем кој се решава преку ноќ, ниту е создаден од сегашниот систем, но сега е наша обврска да делуваме и да го направиме Скопје почист и поздрав за сите. Во изминатиот период преземавме засилени инспекциски контроли на индустриските капацитети, воведовме редовни и вонредни надзори, работиме на решавање на сообраќајот, изградба на нови зелени површини и зелени коридори, како и соодветен третман на депониите. Само во периодот од 6 ноември до 1 јануари, издадени се 90 прекршочни платни налози и глоби, 33 решенија за задолжување, 35 вонредни надзори и 290 опомени. Инспекторите за животна средина извршија над 45 вонредни надзори на правни субјекти во кругот на поранешните фабрики ОХИС и Стаклара, како и на територијата на општина Сарај. Изречени се глоби во висина од 1.000 до 53.000 евра – напиша градоначалникот на Град Скопје, Орце Ѓорѓиевски на својот фејсбук профил.

Одговорни лица во правни субјекти биле казнети со по 3.000 евра, додека десетици физички лица кои неправилно одлагале отпад на јавни и приватни површини добија казни од 250 до 500 евра за палење и неправилно одлагање на отпадот.

– Инспекцијата за патен сообраќај и патишта изврши контроли на девет градилишта, од кои седум беа задолжени со решенија за времен режим на сообраќај, а две имаа позитивни записници. На едното градилиште е изречен прекршочен платен налог од 3.000 евра за правно лице и 900 евра за одговорното лице. Комуналната инспекција изврши 240 контроли на градилишта низ целото Скопје, опоменувајќи 25 објекти, а на 11 се изречени глоби од по 1.300 евра. Комуналните редари вршат постојана обиколка и контрола на територијата на градот, плоштадите и јавните површини, со што се изречени повеќе од 60 казни – вели скопскиот градоначалник.

Тој информира дека за буџетот за 2026 година се предвидени 64 милиони денари за делот за животна средина, во споредба со 24 милиони денари во 2025 година, што, како што вели, јасно покажува колку сериозно ја сфаќаат заштитата на здравјето на граѓаните.

– Дополнително се обезбедени 220 милиони денари за подигање и одржување на јавно зеленило и паркови, како дел од нашите искрени заложби за чист воздух и здрав живот. Предвидени се субвенции за инвертер-клима уреди, чистење на оџаци, филтри, субвенции за велосипеди итн. Драго ми е што седницата се одвиваше конструктивно и без политиканство. Благодарам на сите кои учествуваа со искрена намера. Знам дека само со обединета работа, редовни инспекции, конкретни мерки и силна волја можеме да го заштитиме здравјето на нашите сограѓани, здравјето на нашите деца и идните генерации. Скопје заслужува чист воздух, ред во јавниот простор, зелени паркови и одговорност од сите нас. И ние тоа го правиме. Сега е време резултатите да бидат видливи, мерливи и трајни – напиша Ѓорѓиевски по одржувањето на вонредната седница на Советот на Град Скопје.

The post СКОПСКИТЕ ИНСПЕКТОРИ „ЧЕШЛАА“ ФАБРИКИ И ДЕПОНИИ Глоби до 53.000 евра и 290 опомени за загадување appeared first on plusinfo.mk.

Градоначалникот на Општина Центар, Горан Герасимовски, во гостување на Сител изјави дека во неговиот мандат не е продаден ниту еден квадратен метар државно земјиште, а сите донесени детални урбанистички планови (ДУП-ови) се насочени кон зголемување на зеленилото и намалување на бројот на градби.

– Со носење на секој Детален урбанистички план го зголемуваме бројот на зеленилото во општината. Вклучуваме пошироки улици, дополнителни пешачки и велосипедски патеки, намалување на катноста, отстранување на парцели за градба и нивно претворање во зелени појаси – изјави Герасимовски.

Тој потенцираше дека урбанизмот во Центар се води од принципи на заштита на јавниот интерес и дека општината преку ЗЕЛС поднела иницијатива до Министерството за транспорт и врски за измени на правилото „70-30“, кое овозможувало инвеститор со само 30% сопственост да оформи парцела за градба.

– Ние бараме да се поседува минимум 70% од парцелата за да може да се дооформат уште 30%. На тој начин директно го штитиме државното земјиште – истакна градоначалникот.

Како други примери на резултати во урбаното уредување, Герасимовски ги наведе: отстранување на дупли паркирања и импровизирани детски елементи што ја загрозувале безбедноста, уредување на парцели со обврзувачки стандарди за пристапни рампи, паркинг за велосипеди и садење високи дрвја, транспарентност во постапките за издавање одобренија за градба.

Во вториот дел од изјавата, градоначалникот остро одговори на тврдењата на неговиот противкандидат и, како што рече, неговиот ментор, кои, според него, шират дезинформации во јавноста.

– Вчера на ова столче седеше и неговиот ментор и изнесе многу лаги, почнувајќи од бројот на издадени дозволи, до тоа колку одобренија се во тек. Спомна 80 барања што наводно „седеле на маса“, вистината е дека во моментов има само осум барања во завршна фаза, и тие се јавно достапни преку системот на ЗЕЛС – објасни Герасимовски.

– Целата кампања се служи со лаги и невистини. Тоа е класична црна кампања, која граѓаните на Центар ја препознаваат. Тие се доволно мудри и во првиот круг веќе кажаа на кого му ја даваат довербата – заклучи Герасимовски.

Првата рампа за затворање на Дебар маало веќе е поставена, Центар добива и 30 мерачи за бучава

Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.

– Заврши јавната набавка, чекаме да поминат изборите за да ги поставиме мерните единици, првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација – изјави Герасимовски.

Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.

Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.

– Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок – рече Герасимовски.

Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.

– Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични – додаде градоначалникот.

The post „НЕ ПРОДАДОВМЕ НИТУ МЕТАР ДРЖАВНО ЗЕМЈИШТЕ“ Герасимовски обвини дека противниците шират дезинформации за Центар appeared first on plusinfo.mk.

Општина Центар има евидентирано над 10.000 дрвја и садници во својот ГИС портал, објави актуелниот градоначалник и кандидат за втор мандат од редовите на СДСМ, Горан Герасимовски. Во гостувањето во емисијата „Клик Плус“ на телевизија 21, тој истакна дека Центар е првата општина во државата која има фотодокументирано секое дрво, со можност граѓаните јавно да ја следат состојбата на зеленилото.

– Имаме ГИС портал кадешто во моментов се детектираат сите зелени површини во градот. Имаме над 10.000 садници коишто се со слика. Може да го отворите порталот, јавно достапен е, на истиот да ги видите сите оние садници кои се исликани на територијата на Општина Центар – изјави Герасимовски.

Градоначалникот најави дека ГИС порталот ќе се прошири со нови функционалности кои ќе им овозможат на граѓаните пристап до сите детални урбанистички планови (ДУП-ови), како и електронски услуги за запишување на деца во училишта и градинки.

– ГИС порталот го прошируваме за повеќе можности, граѓаните ќе можат да вадат ДУП-ови, да имаат увид во плановите и да користат различни општински услуги. Нашата грижа за зеленилото е на највисоко ниво. Засадивме над 4.500 садници во изминатите четири години – дополни Герасимовски.

Тој додаде дека најголем предизвик останува одржувањето на зелените површини, кое формално е во надлежност на „Паркови и зеленило“, но поради нивната неажурност општината често интервенира со сопствени ресурси.

– Поголем проблем ни е одржувањето коешто е на „Паркови и зеленило“, коешто треба да ги наводнува зелените површини и не го прави истото. Затоа ние, со нашата цистерна го завршуваме и тоа онаму кадешто нема систем капка по капка – нагласи тој.

Со оваа иницијатива, Општина Центар покажува дека дигиталната транспарентност и заштитата на животната средина можат да одат рака под рака, овозможувајќи граѓаните сами да ја следат грижата за зеленилото во нивната општина.

The post СЕКОЕ ДРВО ВО ЦЕНТАР ИМА СВОЈА ФОТОГРАФИЈА Герасимовски воведе систем во кој има информација за сите 10.000 садници appeared first on plusinfo.mk.

За чист воздух во Скопје не е доволно да се посади дрво или да се замени неколку автобуси – потребна е синхронизирана и одлучна акција на сите нивоа, порача Каја Шукова, кандидатката за градоначалничка на Скопје од СДСМ, на дебата на ТВ24.

Таа истакна дека изворите на загадување се јасно идентификувани и дека борбата со овој проблем мора да опфати интервенции во греењето, јавниот превоз, управувањето со отпадот и одржувањето на зеленилото.

– Идентификувани се изворите на загадување и на ниво на Град Скопје и на ниво на држава. Потребна е интервенција во многу сектори: начинот на затоплување, јавниот превоз, управувањето со отпадот и зеленилото, кое со години е запоставено – изјави Шукова.

Шукова нагласи дека е подготвен сеопфатен план со мерки на краток, среден и долг рок, при што дел од активностите може да почнат веднаш и да дадат брз ефект.

– Има мерки што може многу бргу да се реализираат, како што е БРТ системот, кој директно ќе го намали загадувањето од сообраќајот. Или, на пример, проектот за 15 нови паркови за 15 месеци, кој ќе придонесе за почист воздух и подобар урбан живот – додаде таа.

На прашањето за индустриските загадувачи, меѓу кои и цементарницата „Усје“, Шукова посочи дека постои катастар на загадувачи и дека мерките за контрола се веќе предвидени во градските и државните стратегии.

– Имаме доволно планови, време е за акција – рече таа, потенцирајќи дека спроведувањето на мерките досега било попречено од слабите капацитети на општините и недостигот на средства.

Шукова истакна дека клучен проблем е недостатокот на соработка меѓу Градот и општините, што мора да се надмине доколку Скопје сака трајно решение за загадувањето.

– Државата е тука да помогне преку стратегии, поддршка и идентификација на загадувачи, но големиот дел од реализацијата останува на локалната самоуправа – нагласи Шукова.

Како идна градоначалничка, таа вети дека ќе воспостави функционален систем за координација меѓу сите институции, за Скопје конечно да добие чист воздух, повеќе зелени површини и модерен јавен превоз.

The post ШУКОВА ВЕТУВА РЕВОЛУЦИЈА ВО ГРАДОТ 15 нови паркови и чист воздух за само 15 месеци appeared first on plusinfo.mk.

Арсовска во своето излагање вели дека во изминатите денови започна зголемување на загадувањето и само за четири дена бројките кои го покажуваат степенот на загадување се зголемуваат и тоа е достапна информација во јавноста од официјалната страна и на Министерство за животна средина и просторно планирање. Токму затоа таа најавува сериозен пристап и почеток на системско решавање на проблемите веднаш, без одложување.

– Уште во првите 82 дена од мандатот ќе ги исчистиме дивите депонии каде се согорува опасен отпад. Ќе набавиме 250 еколошки автобуси и ќе го олесниме пристапот до јавниот превоз, а со бесплатниот и квалитетен јавен превоз се очекува намалување на користењето автомобили и сообраќајниот метеж. Ќе бидат воспоставени повеќе пешачки зони во општините, каде што пешаците и велосипедистите ќе имаат приоритет пред автомобилите. Секоја година ќе бидат засадени 100.000 нови дрвја за да го зголемиме зеленилото во градот, нема повеќе да се сечат дрвја ниту во центарот ниту на кое било друго место во градот. Ќе иницираме закон за заштита на Водно и ќе се отпочне со продолжување на жичницата – додава таа.

Како едно од решенијата во програмата на Арсовска е и гасификација на Скопје со што ќе се овозможи еколошко решение за скопјани, како и креирање на повеќе зелени површини во градот, што дополнително ќе придонесе до намалување на загадувањето и овозможување на чиста и здрава животна средина за сите скопјани.

– Со работа за конечна реализација на гасификацијата и ќе се овозможи еколошко решение за скопјани. Ова е едно од барањата на коишто посочуваат скопјани. Дополнително, ќе се реализираат 5 нови мега парка. Мора да има системски решенија за загадувањето. На скопјани им е доста од оправдувања дека нема време нешто да се среди. Знаеме сите дека треба волја и план. Потребни ни се ефикасни и целосни, а не половични решенија. Да почнеме да ги менуваме работите, за наше Скопје, за модерно Скопје – заклучува Арсовска.

The post АРСОВСКА ВЕТУВА ЗЕЛЕН СОВЕТ ВО ГРАД СКОПЈЕ 100.000 нови дрвја годишно, гасификација, чистење на депониите appeared first on plusinfo.mk.