Во рамките на проектот „Зелена иднина: од градинка до училиште“, компанијата dm drogerie markt продолжува со активности за раззеленување и уредување на дворовите на воспитно-образовни установи, кои се реализираат во партнерство со Македонското еколошко друштво (МЕД). На 23 и 27 март беа спроведени нови акции за пошумување во гимназијата „Гоце Делчев“ во Куманово и во градинката „Детска радост“ во Гевгелија, при што беа засадени вкупно 133 садници.

Со овие активности, дворовите на двете установи добија поуреден, позелен и попријатен изглед, а воедно се создадоа и подобри услови за престој, игра и едукација на учениците и децата. Акциите се одвиваа во позитивна атмосфера, со активно учество и интерес, а благодарение на стручната поддршка, ова искуство имаше и едукативен и мотивирачки карактер. Воедно, беа реализирани и едукативни предавања од експерти на Македонското еколошко друштво (МЕД), преку кои учениците имаа можност одблиску да се запознаат со значењето и важноста на грижата за животната средина.

По успешната реализација на првата фаза од отворањето на конкурсот во септември 2025 година, кога беа раззеленети четири училишни двора со повеќе од 500 садници, проектот продолжи и оваа година со нови активности во основните училишта „Маршал Тито“ во с. Банско, Струмица и „Андреја Савевски – Ќикиш“ во Тетово, каде беа засадени вкупно 160 садници. Со овие активности, годинашниот циклус на раззеленување веќе е започнат и продолжува и во други воспитно-образовни установи ширум земјата.

Посебна вредност на проектот му дава и едукативната димензија, преку која најмладите се поттикнуваат да развиваат одговорен однос кон природата и зелените површини. Преку вакви иницијативи, dm и МЕД продолжуваат да придонесуваат за создавање поздрава, поуредена и позелена средина за идните генерации.

За потсетување, конкурсот „Зелена иднина: од градинка до училиште“ е наменет за државни и општински основни и средни училишта, како и за градинки, кои имаат можност да го пријават својот двор за раззеленување и хортикултурно уредување. Пријавените проекти ги разгледува стручен тим составен од претставници на dm drogerie markt и Македонското еколошко друштво (МЕД), а крајниот рок за аплицирање е 31.8.2026 година. Во секој од предвидените месеци за садење се реализираат по два проекти, а пријавувањето се одвива преку формуларот на платформата „Заедно едни за други“.

Со проектот „Зелена иднина: од градинка до училиште“, dm drogerie markt и Македонското еколошко друштво (МЕД) уште еднаш го потврдуваат својот придонес кон заедницата и заложбата за поттикнување еколошка свест, одржлив развој и грижа за просторот во кој растат и се развиваат младите.

The post ПРОДОЛЖУВААТ АКТИВНОСТИТЕ ОД ЗЕЛЕНИОТ КОНКУРС НА ДМ Раззеленети дворовите на две воспитно-образовни установи во Куманово и Гевгелија appeared first on plusinfo.mk.

Компанијата дм дрогерие маркт на прес-конференција во скопското кафуле „Leaf“ го најави отворањето на конкурсот „Зелена иднина: од градинка до училиште“ за пријавување на сите државни и општински градинки, основни и средни училишта за хортикултурно уредување и раззеленување на нивните дворови. Конкурсот е поддржан од Министерството за образование и наука, а партнер за неговото спроведување е Македонското еколошко друштво (МЕД).
На прес-конференцијата присуствуваа претставници од Македонското еколошко друштво (МЕД), ЈП Национални шуми, еколошки здруженија, инфлуенсери и повеќе медиуми.

– Сите сме дел од ова општество, и како дел од него имаме моќ, но и одговорност да помогнеме, бидејќи животната средина е неповратен ресурс и треба да се грижиме за неа. Одржливоста и грижата за животната средина е стратешка определба во работењето на dm години наназад. Особено сме среќни што оваа година повеќе ќе се фокусираме на градинките и училиштата – во нивно раззеленување и збогатување на знаењата на учениците и децата. Со ова, сакаме да поттикнеме љубов, одговорност и зелени навики, бидејќи овие нешта најубаво се учат од најрана возраст – изјави Сандра Атанацковиќ Ѓурѓев, дел од маркетинг тимот на dm.
Конкурсот е достапен на платформата dm-zaedno.mk и ќе биде постојано отворен за праќање пријави. Повеќе информации за правилата и условите за конкурсот може да прочитате тука.

Садењето во градинките и училиштата ќе се одвива во етапи, во месеците што се предвидени за садење: септември, октомври, ноември, март, април и мај. Со оваа иницијатива, дм сака оваа година да инвестира речиси 1,5 милион денари за садење дрвја во дворовите на градинките и училиштата низ целата земја.

Оваа иницијатива ќе има и повисока цел – благодарение на експертизата на Македонското еколошко друштво, проектот ќе биде збогатен и со едукативни и интерактивни работилници преку кои децата и учениците во градинките и училиштата во кои ќе се садат дрвја ќе научат повеќе за важноста на пошумувањето и грижата за животната средина.

Во истиот амбиент беше најавено и следното масовно пошумување што дм традиционално ќе го организира и оваа година, во ноември.

Преку проектот „Пошумуваме заедно за позелено утре“, изминатите 3 години беа насадени повеќе од 100 000 садници на територијата на целата земја. Оваа година од компанијата најавија дека е планирана најмасовната акција досега за засадување 50 000 садници во околината на Штип, со поддршка на ЈП Национални шуми, вработени во дм и волонтери.

Не смееме да го игнорираме фактот дека природата може без нас, но ние не можеме без природата и нејзините ресурси. Токму затоа ги повикуваме сите државни и општински градинки и училишта да се пријават на конкурсот „Зелена иднина: од градинка до училиште“ и да се приклучат во раззеленување на нашата животна средина!

The post „ЗЕЛЕНА ИДНИНА: ОД ГРАДИНКА ДО УЧИЛИШТЕ“: ДМ најави раззеленување на училишните дворови низ целата земја appeared first on plusinfo.mk.