Изминатата година поставена е нова насока – здравствен систем што планира, мери, дигитализира и одговара, се наведува министерот за здравство Азир Алиу, во изјава за медиумите по повод една година од преземањето на министерската функција.

– Пред една година ја презедов одговорноста да го водам Министерството за здравство. Не беше лесен период, ниту систем во кој проблемите можат да се решат преку ноќ. Здравството е еден од најсложените и најчувствителните системи во државата, систем во кој секоја слабост ја чувствува пациентот, секоја одлука има човечка тежина, а секое одложување значи изгубено време за некого кому му е потребна грижа – истакнува Алиу.

Министерот нагласува дека изминатата година целта не била да се создаде впечаток дека сè е решено, напротив, се тргнало од вистината.

– Здравството има наследени слабости, недоволна организација, нерамномерна достапност на услуги, недостиг на кадар, застарена инфраструктура и систем кој премногу долго функционирал со хартија, фрагментирани податоци и недоволна предвидливост. Затоа целта ми беше да не ги прикриваме проблемите, туку да почнеме да ги решаваме системски – појаснува Алиу.

Тој додава дека во изминатата година поставена е нова насока – здравствен систем што планира, мери, дигитализира и одговара.

– Започнавме процес на дигитална трансформација. Пациентот не треба да се движи со папки, извештаи и ЦД-а од една институција до друга. Податоците треба да го следат пациентот, а системот треба да му помага на лекарот да донесе побрза и побезбедна одлука – додава Алиу, потсетувајќи дека биле воведени транспарентни листи на чекање, затоа што фер пристапот до здравствена услуга, како што подвлекува, е основа на довербата.

Зборувајќи за проектот со телемедицина во Дебер и Делчево, тој порачува дека специјалистичкото знаење мора да стигне поблиску до граѓаните, особено во регионите каде што пациентите најмногу го чувствуваат товарот на патувањето до Скопје.

– Паралелно работевме на инфраструктурата. Здравството не може да биде силно ако целата тежина е концентрирана во главниот град. Затоа регионализацијата е една од нашите најважни политики. Инвестициите во Штип, Тетово, Кичево, Струмица, Битола и другите здравствени центри, се начин – пациентите да добијат услуга поблиску до местото каде што живеат. Набавката на 100 нови амбулантни возила, реконструкциите на операционите сали и зајакнувањето на регионалните болници, се дел од истиот пристап кој води кон здравствен систем што е побрз, подостапен и порамномерно развиен – потенцира министерот.

Тој вели дека посебно внимание е посветено и на здравствените работници.

– Ниту еден апарат, ниту една сала, ниту една дигитална платформа не вреди без луѓето што секој ден го носат системот, затоа се работи на подобро кадровско планирање, нови програми за специјализации и супспецијализации, зајакната практична обука и подобро вреднување на трудот. Здравствениот систем мора да ги задржи, мотивира и поддржи своите луѓе – истакнува Алиу.

Осврнувајќи се на важните јавноздравствени политики, тој потсетува и на предлог-законот за заштита од употреба на производи од тутун или сродни производи, кој е чекор кон поздрав јавен простор, заштита на децата, непушачите и вработените. Притоа нагласувајќи дека не станува збор за законско решение кое е против некого – туку за закон за здравјето на граѓаните.

– Работевме и на чувствителни теми, како што се онкологија, органодарителство, трансплантација, третман на дебелина кај децата, кризни протоколи. Теми кои бараат човечност, институционална одговорност и континуитет – вели министерот.

Тој порачува дека здравството мора да биде систем што не реагира само кога ќе настане криза – туку систем што учи, се подготвува и превенира.

– По една година, мојата оценка е дека не сме на крајот на реформата. Ние сме во нејзината најважна фаза во која системот почнува да се поставува на нови основи. Имаме уште многу работа. Но, денес знаеме појасно каде одиме, а тоа е кон здравство што е дигитално поврзано, кадровски планирано, инфраструктурно зајакнато, регионално порамномерно и насочено кон пациентот. Здравството се развива со одлуки, со работа, со податоци, со луѓе и со лична одговорност – заклучува Алиу.

The post 📽️ ЗДРАВСТВОТО ВЛЕГУВА ВО НАЈВАЖНАТА ФАЗА НА РЕФОРМИТЕ Системот се поставува на нови основи, вели Алиу appeared first on plusinfo.mk.

Министерството за здравство, со поддршка од Светската здравствена организација, Канцеларијата на СЗО во Северна Македонија и Канцеларијата на СЗО за квалитет на здравствена заштита и безбедност на пациентите во Атина, започна значајна национална иницијатива за зајакнување на квалитетот на здравствената заштита и безбедноста на пациентите во земјата.

Иницијативата, како што соопшти Министерството за здравство, има за цел да придонесе за подобрување на здравствените услуги и постигнување подобри здравствени исходи за граѓаните, во согласност со приоритетите утврдени во владината програма за здравство. Во нејзина основа е првата сеопфатна проценка на националната рамка за квалитет на здравствената заштита, која ќе се реализира во периодот од мај до август 2026 година.

Процесот официјално беше означен со национална работилница во Скопје, на која присуствуваа министерот за здравство Азир Алиу, претставникот на СЗО во Северна Македонија д-р Аким Али и д-р Жоао Бреда, раководител на Канцеларијата на СЗО за квалитет на здравствена заштита и безбедност на пациентите во Атина. На настанот учествуваа и претставници на клучни здравствени институции, академската заедница, професионални здруженија и пациентски организации.

Министерот Алиу истакна дека квалитетот и безбедноста на пациентите се суштински дел од реформите во здравството.

– Нашата цел не е само да обезбедиме повеќе здравствени услуги, туку услуги кои се побезбедни, поквалитетни и поориентирани кон пациентот; услуги кои носат подобри резултати, поголема доверба и сигурност за граѓаните. Квалитетот и безбедноста на пациентите не се дополнителен елемент на реформата — тие се нејзината суштина – изјави министерот Алиу.

Процесот на проценка ќе вклучи консултации со здравствени институции, професионални здруженија, академската заедница, пациентски организации и други релевантни чинители, како и теренски посети, технички состаноци, интервјуа и преглед на релевантните политики и практики. Наодите ќе обезбедат основа за зајакнување на управувањето со квалитетот, отчетноста и континуираното подобрување на здравствените услуги.

– СЗО ја поздравува силната заложба на Министерството за здравство и националните партнери да ги постават квалитетот на здравствената заштита и безбедноста на пациентите во центарот на здравствените реформи. Квалитетот е од суштинско значење за постигнување подобри здравствени исходи, зајакнување на довербата на јавноста и обезбедување инвестициите во здравството да донесат конкретни придобивки за луѓето. СЗО останува посветена да ја поддржи Северна Македонија во преточување на наодите од оваа проценка во практични активности кои ќе го зајакнат здравствениот систем и ќе го подобрат искуството на пациентите – изјави д-р Аким Али, претставник на СЗО во државава.

За време на посетата на Северна Македонија, д-р Жоао Бреда сподели меѓународни искуства и примери од земји од Европскиот регион на СЗО кои успешно спровеле национални политики за квалитет и програми за подобрување на квалитетот.

– Квалитетот на здравствената заштита е еден од најсилните двигатели на подобри здравствени исходи и посилни здравствени системи. Со спроведувањето на оваа сеопфатна проценка, Северна Македонија покажува лидерство и јасна посветеност кон континуирано подобрување. Овој процес не е само проценка на моменталната состојба, туку и можност да се идентификуваат конкретни области за дејствување. СЗО е горда што ја поддржува земјата во развојот на посилна национална рамка за квалитет, унапредување на безбедноста на пациентите и вклучување на луѓето, како и во градењето култура на учење во здравствениот систем – изјави д-р Жоао Бреда.

Од Министерството за здравство и СЗО нагласуваат дека заедничката цел е воспоставување посилна рамка за квалитет и безбедност на пациентите, како и создавање здравствен систем кој ќе биде поефективен, поотчетен и целосно ориентиран кон потребите на граѓаните.

The post ЌЕ СЕ БАРААТ СЛАБИТЕ ТОЧКИ ВО ЗДРАВСТВОТО Министерството и СЗО почнаа национална анализа и проценка appeared first on plusinfo.mk.

The post AЛИУ ОТКРИ КОИ СЕ ПЛАНОВИТЕ ЗА ДИГИТАЛИЗАЦИЈА ВО ЗДРАВСТВОТО Помалку чекање, многу повеќе податоци и ред appeared first on plusinfo.mk.

Македонија и Светската здравствена организација отворија ново поглавје во здравствената политика. Денес беше потпишана петгодишната Стратегија за соработка во областа на здравството за периодот 2026–2030 година.

Документот, кој треба да ги насочи сите клучни здравствени реформи до крајот на деценијата, го потпишаа министерот за здравство Азир Алиу, премиерот Христијан Мицкоски и д-р Аким Али, шеф на Канцеларијата на СЗО во земјава. На настанот се обрати и директорот на СЗО за Европа, Ханс Клуге, преку онлајн вклучување.

Министерот Алиу истакна дека со овој документ започнува најсеопфатната и најдолгорочна рамка за соработка со СЗО досега. Според него, стратегијата е создадена заедно со сите институции и партнери и ќе биде основа за реформи во неколку клучни области: модернизација на примарната здравствена заштита, целосна дигитална трансформација на системот, унапредување на здравствената заштита на мајките и децата, како и климатска отпорност и еколошко здравје во согласност со зелената агенда на Владата.

Во документот се вклучени и мерки за заштита на ранливите групи, планирање на човечките ресурси во здравството, јавно здравје, здравствена безбедност и подобра подготовка за кризни состојби.

– Стратегијата ни овозможува јасен план, партнерство и поддршка за заедничко реализирање на клучните реформи – нагласи Алиу, додавајќи дека постигнатата меѓусекторска соработка е една од најважните придобивки.

Министерот се заблагодари на СЗО и сите ресори вклучени во подготовката, посочувајќи дека стратегијата го обединува целиот владин систем околу заедничката цел, подобро здравје и поголема благосостојба на населението.

– Со оваа стратегија го поставуваме темелот за посилно, помодерно и поправедно здравство. Ова е симболична потврда на силната политичка волја и партнерството меѓу Владата и СЗО за спроведување на клучните здравствени реформи – изјави Алиу.

The post ВЛАДАТА И СЗО СО НОВ ПАКТ ЗА ЗДРАВЈЕТО Потпишана петгодишна стратегија која ќе го смени здравствениот системот appeared first on plusinfo.mk.

Министерот за здравство Илир Алиу во гостување во „Топ Тема“ на Телма изјави дека првата фаза од реформите во здравствениот систем ќе биде насочена кон стабилизација на примарното здравство, бидејќи дури 70 проценти од пациентите во моментов гравитираат кон Скопје, особено кон кампусот „Мајка Тереза“, иако дел од услугите припаѓаат на примарно или секундарно ниво, стои во соопштението од Министерството за здравство.

Според Алиу, во тек е процесот на регионализација, со фокус на подобрување на онколошките услуги на амбулантско ниво. Тој појасни дека Градската болница е при крај со административните подготовки, со што таму ќе може да се нудат онколошки здравствени сервиси без потреба пациентите да патуваат до Скопје.

– Во КБ Битола онколошката служба веќе функционира, а исти подготовки се прават и во КБ Тетово. Сме многу внимателни, мора да се дефинира и финансискиот момент за секоја установа и услуга. Во Битола веќе имаме три медицински сестри и еден физичар кои шест месеци ќе работат на Клиниката за онкологија во Скопје за да се вратат назад и да опслужуваат терапија – рече министерот.

Во однос на меморандумот за соработка со приватните здравствени установи, кој се потпишува за првпат, Алиу изјави дека системот веќе функционира и дека приватните и јавните здравствени работници заедно нудат услуги без застои.

– Според системот на ДРГ, граѓаните и досега можеа да избираат каде ќе се лекуваат – во приватна или во јавна установа – но тоа не е доволно. Ако примарното здравство не може да ја даде услугата која е дефинирана во здравствената патека, средствата нема да се префрлат таму, туку ќе го следат пациентот и институцијата каде навистина ги добил услугите – нагласи Алиу.

The post ГОЛЕМИ ПРОМЕНИ ВО ЗДРАВСТВОТО Новиот систем ги спојува приватните и јавните лекари appeared first on plusinfo.mk.

Министерот за здравство, д-р Азир Алиу, денеска одржа работен состанок со деканот на Медицинскиот факултет при УКИМ, проф. д-р Светозар Антовиќ, и со шефовите на катедри, на кој главна тема била ревизијата и унапредувањето на системот на специјализации и супспецијализации во здравството.

Од Министерството информираа дека состанокот е дел од пошироки реформи со кои ќе се редефинираат постојните гранки на специјализација, ќе се скрати времетраењето на дел од нив и ќе се зајакнат пошироките специјализации, како што се интерна медицина и општа хирургија.

– Откако ја презедов министерската функција, еден од моите приоритети е унапредување на човечките ресурси, со цел усогласување со реалните потреби на здравствениот систем и подобрување на навременоста и квалитетот на услугите во секундарното и терциерното здравство – изјави министерот Алиу.

Со новите мерки, Министерството има цел да го надмине недостигот на специјалисти, да ја зголеми мотивацијата кај младите лекари и да го прилагоди системот на обука на современите потреби во здравствениот сектор.

The post МЛАДИТЕ ЛЕКАРИ ЌЕ ИМААТ ПОКРАТКИ СПЕЦИЈАЛИЗАЦИИ Алиу го менува системот, најавени големи реформи во здравството appeared first on plusinfo.mk.