Министерот за здравство Азир Алиу денеска изјави дека на листите на чекање за хируршки интервенции се евидентирани и починати пациенти, нагласувајќи дека нивното ажурирање мора да се спроведува рачно и во координација меѓу Министерството и здравствените установи.

Тој посочи дека до Министерството пристигнуваат индиции и сомнежи од пациенти за можни злоупотреби со листите на чекање, но дека засега тие не можат јавно да се објават поради недоволна документација.

– Има случаи кога пациент, на пример со онколошко заболување, се враќа бидејќи лабораториските резултати не се соодветни за интервенција, а потоа во друга лабораторија се покажува дека состојбата е поинаква. Овие ситуации мора да се анализираат и да се детектираат можни злоупотреби – рече Алиу.

Тој нагласи дека системот за листи на чекање мора постојано да се „чисти“, бидејќи во него сè уште фигурираат пациенти кои починале.

– Имаме пациенти кои, за жал, веќе не се меѓу нас и тие мора да се отстранат од листите. Тоа не може да го прави само Министерството, туку заедно со здравствените установи. Затоа имаме и наши вработени на терен кои учествуваат во ажурирањето – додаде министерот.

Алиу потсети дека во февруари е пуштен во употреба порталот operacii.zdravstvo.gov.mk, кој овозможува електронско следење на листите за елективни хируршки интервенции, со принцип „прв дојден – прв услужен“.

Тој информираше и дека системот за евиденција на работното време преку отпечаток од прст (finger print) е во пилот-фаза и засега функционира во Министерството за здравство и во три клиники во Клиничкиот центар „Мајка Тереза“ – Инфективна клиника, Торакална хирургија и Трансфузиологија.

– Системот е во пилот-фаза. Има отпор кон промените, но ова е позитивен процес бидејќи ќе овозможи реална евиденција на работното време и прекувремените часови, а истовремено ќе го намали притисокот врз оние што навистина работат – изјави Алиу.

Министерот потсети и дека се работи на анализа за евентуално пренасочување на пациенти од јавниот во приватниот здравствен сектор, но дека за тоа сè уште нема конечни резултати.

The post ЛИСТИТЕ ЗА ОПЕРАЦИИ СЕ „НЕЧИСТИ“, ИМА И ПОЧИНАТИ ПАЦИЕНТИ Алиу открива сериозни проблеми во системот appeared first on plusinfo.mk.

Најдобро и најевтино ќе биде новиот клинички центар да се направи близу ГОБ 8 Септември, информираше денеска министерот за здравство Азир Алиу, кој имаше брифинг, а потоа даде и изјава за медиумите, по повод една година откако е на министерската функција.

Изјацата доаѓа откако Владата обзнани дека преговара за земјиштето спроти „8 септември“ кај спортскиот центар Борис Трајковски за можна локација.

Министерот Алиу смета дека не е грешка да се инвестира и во местото каде што сега се наоѓа Клиничкиот центар Мајка Тереза, со оглед на тоа што дури и веднаш да почне да се прави, ќе бидат потребни најмалку 4 години за новиот клинички да биде завршен. Министерот подвлече дека тој временски период не е мал и додаде дека таму каде што сега се вложува, нема да се руши просторот, па, оценува дека не е грешка да се инвестира.

– Не е трошење пари за џабе – подвлече тој.

На новинарско прашање, Алиу одговори дека во Министерството за здравство, како и на Инфективна клиника, ТОАРИЛУЦ, Трансфузиологија, веќе делумно функционира фингерпринтот – односно идентификација со отпечаток од прст на вработените во овие установи. Се работело тоа да се прошири и на другите клиники.

Се работело на чекалните во болниците, да се направат како што треба. Рече дека ќе биде поевтино да се оди за цела држава, наместо посебно за секоја клиника да се бара и да се купуваат столчиња. Се работело и на тоа да се реши проблемот со кречењето.

На прашање дали ќе бидат опфатени и тоалетите, министерот одговори потврдно.

– На Онкологија е почнато со реновирање на тоалетите. На онкологија во план е да се гради плус уште еден кат – најави министерот, меѓу другото.

Тој информираше и дека се работи на дигитализација во здравството. Се работело со картичка пациент да оди кај лекар, на преглед, да се има евиденција колку време чека еден пациент. Ова, наместо да му даваат бројче и да чека со ливче за да може да се следи системот.

Министерот се согласи со констатацијата на еден од новинарите дека хигиената не е на ниво во дел од клиниките, додавајќи дека некои клиники немаат доволно хигиеничари.

Прашан за регионализација, тој кажа дека се прави функционална анализа, некои услуги ќе се затвореле во некои болници, ќе се инвестирало во најблиската болница до тој град – чекор кон регионализацијата.

По една година од преземањето на функцијата министер за здравство, тој рече дека е голема одговорноста да се води таков ресор – сензитивен како што е здравството, дека не е лесно.

– Периодот за една година е прекраток за да кажеме дека денеска имаме здравствен систем што е различен од вчера. Тоа што можам денеска да го кажам пред вас е дека денеска, тоа што го немавме пред една година, имаме јасна слика за здравствениот систем и јасна цел кај сакаме да стигнеме со реформите во здравството – и од инфраструктурна гледна точка и од човечки капацитети и од технологија и дигитална трансформација. Чест ми е денеска пред јавноста да кажам дека мапирањето на здравствениот систем ни ги кажа сите недостатоци во системот, но, исто така, ни даде – буст, ни даде енергија за да може да креираме и да предвидуваме проекти, со што здравството нема само да лечи, туку и ќе предвидува – истакна Алиу.

Според капацитетите и како држава и од финансиска гледна точка и од инфраструктурна гледна точка, тој рече дека на 24. овој месец, нашата држава или нашиот здравствен систем веќе станува дел од европските здравствени системи.

– Така, ние ќе бидеме полноправна членка на EU4Health, на една од најголемите или најголемиот здравствен фонд во Европа, од кој што ќе црпиме финансиски средства од Европа, ќе црпиме и технички и експертиза од нив. Потоа, имајќи предвид дека знаеме што треба да промениме во здравството, од јули, ќе почнеме да аплицираме на оваа програма и се надевам дека ова ќе ни дојде дополнителна енергија со цел да може да се забрзаат реформите во здравството – подвлече министерот Алиу.

The post НАЈДОБРО И НАЈЕВТИНО Е НОВИОТ КЛИНИЧКИ ДА БИДЕ БЛИЗУ „8 СЕПТЕМВРИ“ Не е за џабе ниту инвестирањето кај сегашниот комплекс „Мајка Тереза“ appeared first on plusinfo.mk.

Очекуваме во месеците кои што следат нови убави вести за македонските граѓани со нови лекови кои ќе бидат вклучени на позитивната листа – изјави премиерот Христијан Мицкоски, одговарајќи на новинарско прашање што да очекуваат граѓаните дали ќе има ново проширување на позитивна листа на лекови.

– Тоа што ние го правиме во здравствениот сектори е нешто кое што не се случувало со години, па и со децении би рекол, вклучително и проширувањето на позитивната листа. Очекуваме во месеците кои што следат нови убави вести за македонските граѓани со нови лекови кои ќе бидат вклучени на позитивната листа. Но, исто така мораме да бидеме свесни дека здравствениот систем е сериозен предизвик за сите нас и како таков мораме да се однесуваме кон него. Ако ние континуирано продолжиме да го исцрпуваме, на начин на кој што го исцрпуваме во моментот, а истовремено да очекуваме квалитетни услуги и сервис, тоа е невозможно – рече Мицкоски.

Тој рече дека очекува поодговорно однесување и од вработените во здравството и од граѓаните.

– Пред овој настан имавме уште еден настан каде што зборував за демографијата и таму испратив една порака во која што кажав: конечно е дојдено време кога треба да си го поставиме прашањето што можеме ние да направиме за татковината, а не татковината за нас. Ние како влада ќе сториме сè што е во наша моќ да ги заштитиме интересите на граѓаните и државата, но очекуваме такво однесување буквално од сите, затоа што ние не можеме да се однесуваме како поединци, не велам дека тоа е пракса, во здравството се однесуваат да речеме, се пишуваат дежурства итн. за 31 ден работен во февруари, со 24 часа работа, а истовремено да очекуваме да вложуваме во здравството. Така што ќе треба и ние многу повеќе да водиме сметка за општиот интерес и интересот на граѓаните – рече премиерот Мицкоски.

The post МИЦКОСКИ НАЈАВИ ПРОШИРУВАЊЕ НА ПОЗИТИВНАТА ЛИСТА НА ЛЕКОВИ „Мора да внимаваме да не го исцрпуваме здравствениот сектор“ appeared first on plusinfo.mk.

Со децении болницата ја доживувавме како физичка метафора на здравствената грижа, како цврста градба во која се влегува со болка, а од која се излегува со надеж. Нејзината ограничена и строго дефинирана просторна архитектура се претвори и во архитектура на нашиот начин на размислување за здравјето, која се движи од влезот, преку приемот, кон одделението, до креветот и чекањето за лекарската визита. Но, најинтересните здравствени процеси и реформи што денес се случуваат во светот го менуваат ова наше поимање, создадено врз основа на нашето локализирано искуство. Денес сe почесто се поставува прашањето до каде може да достигне болничката грижа, наместо прашањето каде се наоѓа болницата. Одговорот на оваа дилема бара да се утврдат контурите на идејата за „болница без ѕидови“.

Не станува збор за поетска идеја или слика, за научно-фантастичен расказ или илузија на човечкиот ум. Напротив, оваа идеја треба да се прифати како зрела реорганизација на медицинската одговорност во системот, нешто што веќе е карактеристично за најнапредните здравствени системи во светот.

Во Англија, виртуелните одделенија се дефинираат како hospital at home, односно болничка грижа во домот на пациентот, со цел лекувањето да се одвива во поприродна средина, додека болничките кревети да останат достапни за оние на кои навистина им се потребни. Во САД, програмата Acute Hospital Care at Home веќе има добиено широки институционални размери; CMS (Centers for Medicare & Medicaid Services) соопшти дека до октомври 2024 година во оваа иницијатива учествувале 366 болници и биле третирани повеќе од 31.000 пациенти. Во Австралија, пак, Hospital in the Home одамна е дел од институционалниот речник на јавниот здравствен систем.

Вредноста на овие искуства не лежи само во новитетот што го претставуваат или во ентузијазмот што можат да го предизвикаат во помалку развиените системи. Таа лежи во фактот дека зад нив сe повеќе стојат конкретни резултати, а не само институционален ентузијазам.

Едно истражување објавено во JAMA Network Open во 2025 година, спроведено во рурални области во САД и Канада, покажува дека дел од возрасните пациенти со акутни заболувања можат успешно да се третираат и во домашни услови, кога грижата што ја нуди системот е добро организирана. Ова значи дека квалитетот на грижата не зависи само од ѕидовите што ја опкружуваат, туку од прецизноста со која таа е организирана.

Секако, тука почнуваат да се отвораат и посериозните аспекти на оваа тема. Болницата без ѕидови бара повисоко ниво на системска дисциплина и институционална одговорност. Бара внимателна селекција на пациенти, домашни посети, далечинско следење, 24-часовна достапност на медицинските тимови и јасна распределба на одговорностите. Во најдобрите модели што функционираат во светот, домот станува продолжение на болницата затоа што протоколите се цврсто поставени и нивната примена е прецизно координирана. Таму каде што овие предуслови недостигаат, идејата може да остане само привлечна фраза.

Прашањето што природно се наметнува е дали оваа тема има смисла и за Македонија. Мојата проценка е дека има, но под услов да се размислува постепено, со клиничка строгост и без реторички претерувања. Во извештајот North Macedonia: Health system summary 2025, објавен од European Observatory on Health Systems and Policies во март 2026 година, се нагласува дека земјата го проширува дигитализирањето преку „Мој термин“, електронски здравствени картони, е-рецепти, порталот „Мое здравје“ и можностите за телемедицина. Ова сe уште не е „болница во домот“, но е токму основата без која една таква идеја не може да добие одржлива форма, правна сигурност и клинички истражувања.

Во оваа слика постои и еден домашен сигнал дека насоката веќе може да се насети. Во Дебар беше промовиран пилот-проект за телемедицина во дерматовенерологијата, поврзувајќи ги Скопје, Дебар и Делчево. Изборот на овие региони не беше случаен, станува збор за периферни подрачја каде што недостигот од специјалисти и оддалеченоста од поголемите центри директно влијаат врз пристапот до здравствена грижа. Овој пилот-проект не е „болница без ѕидови“ во целосна смисла на зборот, но е дел од истата реформска логика: знаењето да се доближи до пациентот, наместо пациентот секогаш да го носи товарот на системот.

Токму тука вреди да се даде и одговор на критиката што може да се појави: дали е оправдано да се отвори ваква тема во време кога има листи на чекање, недостиг од кадар, нееднаквости во пристапот и организациски слабости? Токму овие проблеми ја прават темата актуелна. Во систем каде што патувањето до специјалист често претставува трошок, замор и губење време, каде што болничкиот кревет е ограничен ресурс и некои пациенти остануваат подолго отколку што е потребно, секој модел што ја доближува грижата до домот на безбеден начин претставува порационална организација на постојните капацитети. Значи, не станува збор за дискусија за некаква луксузна иднина, туку за поумно користење на сегашноста.

За Македонија, најразумниот пат би бил внимателно дизајниран пилот-проект со јасно дефинирани категории пациенти. На пример: пациенти кои примаат интравенска антибиотска терапија, стабилизирани кардиолошки и пулмолошки пациенти, одредени состојби по акутната фаза што бараат надзор, но не и целосен болнички престој, како и случаи од рурални средини каде што самата дистанца претставува дополнителен ризик. За ова ќе бидат потребни мобилни медицински тимови, клинички протоколи за прием и отпуст, далечинско следење, јасно регулирани одговорности и модел на финансирање што ја препознава услугата, а не само физичката употреба на креветот. Меѓународните искуства укажуваат дека постепеноста е најсигурниот пат кон одржлива практика.

Во суштина, станува збор за подлабока промена во здравствената култура. Современата медицина е изградена околу институциите. Но човекот живее дома, со семејството, со своите навики, со своите стравови, често на периферијата. Кога здравствениот систем ќе созрее доволно за да пренесе дел од својата клиничка моќ токму таму, тој не само што го зачувува својот сериозитет, туку и го продлабочува својот хуманизам.

Затоа, болницата без ѕидови заслужува да се отвори и кај нас со внимателност и чувство за реалност, како внимателен чекор кон пофлексибилен и поправеден систем, кој ја поврзува технологијата, клиничката строгост и достоинството на пациентот.

The post Болница без ѕидови appeared first on plusinfo.mk.

Граѓаните од 1 мај ќе купуваат поевтини лекови, откако Министерство за здравство на Северна Македонија го спроведе годишното усогласување на максималните цени за 2026 година. Намалување е постигнато кај повеќе од 300 медикаменти, меѓу кои и лекот Ксарелто, кој се користи во третман на кардиоваскуларни заболувања.

Министерот за здравство Азир Алиу нагласува дека цените на лековите се важен инструмент за достапна терапија и стабилен здравствен систем.

– Со анализи и преговори успеавме да обезбедиме намалување таму каде што има пазарни услови за тоа. Ова значи полесен пристап до терапија за пациентите и намалување на трошоците – истакна Алиу.

Според објавените податоци, пониски максимални цени има кај 156 оригинаторни лекови, 174 генерички и 13 медикаменти од интервентен увоз.

Особено значајно е намалувањето на цената на „Ксарелто“, кој често пациентите го набавуваа од странство поради пониски цени. Во големопродажба, цената за таблетите од 15 и 20 милиграми се намалува од над 2.300 на околу 1.600 денари, додека таблетите од 10 милиграми поевтинуваат од околу 824 на 589 денари.

Од Министерството најавуваат дека лекот е предложен за вклучување на позитивната листа во примарната здравствена заштита во текот на годинава, што би значело дополнително намалување на трошоците за пациентите преку покривање на дел од цената од страна на државата.

Новите цени ќе почнат да се применуваат по периодот во кој фармацевтските компании треба да ги усогласат цените во прометот на големо и мало.

The post ПОЕВТИНУВААТ НАД 300 ЛЕКОВИ „Ксарелто“ со значително намалена цена, како и терапијата на срцеви пациенти appeared first on plusinfo.mk.

Во втората половина од 2025 година ја презедов одговорноста да го водам Министерството за здравство со јасно поставена цел -здравството да нема потреба од импровизација, туку од архитектура. Од првиот ден, мојот фокус не беше да ветувам брзи решенија, туку да поставам одржливи темели за систем што внимателно планира, мери, се пресипитува и континуирано се подобрува.

Втората половина од 2025 година беше период на поставување развојна насока. Време исполнето со внимателно слушање на здравствените работници, темелна анализа на податоците, со цел реално согледување на состојбата во здравството. Овој процес се одликуваше со тивка и структурирана работа, затоа што трајните промени во здравствениот систем бараат јасност и трпение.

Од задоцнета реакција кон управување во реално време

Една од клучните пораки што ја истакнав на мојата прва прес-конференција беше дека одлуките во здравството мора да се носат врз основа на реални податоци, а не на интуитивно чувство или моментален надворешен или внатрешен притисок. Во месеците по јуни 2025 година започна поставувањето темели на новиот пристап, насочен кон навремено препознавање на ризиците пред тие да се претворат во проблем за граѓаните.

Во 2026 година, овој пристап станува стандард. Целта е Министерството за здравство да функционира како систем што во реално време ги следи капацитетите, оптоварувањата и човечките ресурси и интервенира со промислени, проактивни, а не реактивни мерки.

Инвестиции што создаваат капацитет и рамномерност

Оваа година означува важна фаза на капитални инвестиции, кои се резултат на анализите и планирањето започнати во втората половина од 2025 година. Со инвестиција од 205 милиони евра, ќе напредуваат проектите за клиничките болници во Штип, Тетово и болницата во Кичево. Овие инвестиции нема да бидат само градежни зафати, туку дел од инфраструктурна политика за јакнење на регионалните капацитети и намалување на хроничната преоптовареност на постојните клиники од терциерно здравство. Според нашите анализи, 70% од пациентите кои треба да добијат здравствени услуги на примарно и секундарно здравство тие се приморани, поради системски слабости се упатуваат на терциерно ниво. Оваа аномалија, освен што претставува екстра трошок за пациентите, таа е губење време за нив, но исто така, претставува и дополнителен товар за терциерното здравство, односно значјано отежнување на исполнувањето на неговата обврска за научно истражувачка дејност и следење на новите технологии и протоколи кои се дел од современите трендови во здравството.

Во насока на одговорно планирање, во текот на оваа година ќе започне и изработка на физибилити студија за нов клинички центар во Скопје, како неопходен чекор за долгорочен и одржлив развој на здравствениот систем во нашата држава.

Дополнително, решавањето на проблемот со паркирањетво клиничкиот комплекс „Мајка Тереза“ во Скопје, ќе биде резултат на конкретен проект што покажува дека реформите не се однесуваат само на големи стратегии, туку и на секојдневните услови кои директно влијаат врз пациентите и здравствените работници.

Првпат здравството ги познава своите човечки капацитети

Еден од најзначајните процеси започнати во втората половина на 2025 година е креирањето прва структурирана база на податоци за човечките капацитети во здравството. Првпат, системот гради реална слика за професионалните профили, нивната распределба и критичните недостатоци.

Врз основа на овие податоци, во 2026 година започнува и суштинска промена во системот на специјализации и курикулуми за специјалистичка едукација. Специјализациите повеќе нема да се креираат изолирано или врз основа на застарена историска меморија, туку ќе се адаптираат врз основа на реалните потреби на здравствените институции. Преку овој пристап, ќе се воведе појасна структура на општи специјализации и супспецијализации, не само во терцијарното, туку и во примарното и секундарното здравство. На овој начин ги оспособуваме нашите човечки капацитети нивниот профил да биде компатибилен со потребите на сите нивоа на здравствениот систем.

Оваа реформа значи подобро планирани кадри, поквалитетни услуги и систем кој не произведува специјалисти „по желба“, туку професионалци што реално му се потребни на здравството и на граѓаните.

Дигитализацијата како алатка за транспарентност и доверба

Од јуни 2025 година, дигитализацијата е поставена како централна столб на реформата. Годинава, овој пристап го конкретизираме преку националната стратегија за дигитална трансформација на здравството, со фокус на дигитализација на процесите, зголемување на транспарентноста и носење одлуки базирани на податоци.

Дигитализацијата не е цел сама по себе, затоа ја поставуваме таа да биде алатка за зголемување на отчетноста, за намалување на просторот за злоупотреби и за создавање пофер систем за секој граѓанин.

Правна рамка за здравство што превенира

Сериозна реформа не е можна без стабилна правна основа. Затоа, во моментот се подготвуваат две целосно нови законски решенија во здравството, додека 12 постојни закони се адаптираат и модернизираат, во согласност со стратегијата, мисијата и визијата што ја градиме.

Целата кон која системски се стремиме е да создадеме правна рамка што поддржува превентивно здравство, а не систем кој реагира само кога болеста веќе се појавила.

Довербата како секојдневна обврска

Позитивниот фидбек што го добив од преземањето на мандатот во јуни 2025 година не го доживувам како личен успех, туку како дополнителна одговорност за постојана доследност и транспарентност во извршувањето на министерската функција. Довербата, без воздржување, се гради секој ден, со прецизни одлуки и искрена комуникација.

Здравството во 2026 година нема да биде совршено, но ќе биде подобро планирано, потранспарентно, попредвидливо и поблиску до сите граѓани. Тенденцијата која е поставена води кон систем што нема да реагира од страв, туку ќе делува со знаење, податоци и одговорност. Ова е насоката на движење на здравството која ја започнавме во јуни 2025 година, за да продолжиме сериозно и одговорно и текот на 2026 година.

И оваа активност почна во јуни 2025 година, за да се гради сериозно и одговорно во текот на оваа година.

Модерниот екосистем и нашата одговорност

Современиот здравствен екосистем во светот функционира како жива мрежа во која клиниките, лекарите, лабораториите, регистрите, осигурувањето, но и самите граѓани се внимателно поврзани преку податоци, стандарди и јасни патеки на пациентите. Најразвиените системи веќе не го мерат успехот само по број на интервенции, туку по тоа колку успеале да спречат појава и развој на болест, колку брзо препознале ризик и колку безбедно го насочиле пациентот низ системот. Тоа е премин од „пожарникарско“ здравство кон здравство кое преку предвидување превинира, односно здравство кое е исполнето со современи болници, интероперабилни дигитални платформи, поддржано од вештачка интелигенција и телемедицина која релативизирајќи го просторот ја елиминира географијата како бариера.

Токму затоа, дигитализацијата кај нас не смее да се сведе на набавка на софтвер или на „електронски печат“ за старите навики. Таа мора да биде системска алатка што ги ослободува лекарите од административни обврски, ги прави податоците побрзи од бирократијата и ја гради довербата преку транспарентност. За помалите држави како Македонија, ова е и шансата за „скок“ со правилно поставени правила на упатување и алгоритамски „gatekeeper“ меѓу примарно, секундарно и терциерно ниво, со поврзани регистри и стандарди што создаваат заеднички јазик на системот, можеме да ја исправиме аномалијата каде што пациентите непотребно завршуваат на терциерно. Така, инвестициите во инфраструктура, кадар и дигитални решенија стануваат една иста политика на рамномерност, безбедност и предвидливост.

Иднината која ја гледаме во светот, како што се дигитални близнаци што симулираат исходи, ВИ што препознава ризик пред симптомите, виртуелни болници без ѕидови и персонализирана медицина, не мора утре да биде наша секојдневна реалност, но мора денес да биде наша насока. Нашата обврска е да преминеме од вчерашната реалност на преполни болници, лекари под огромен притисок, системи што постојано се обидуваат да балансираат меѓу ограничени ресурси и сè поголеми очекувања од граѓаните, кон иднина исполнета со здравство водено од податоци, паметни болници, дијагностика поддржана од вештачка интелигенција и технологии што не само што реагираат, туку превенираат и предвидуваат.

Авторот е министер за здравство

The post Здравството во 2026 – од темели до систем што планира, превенира и штити appeared first on plusinfo.mk.

Министерот за здравство Азир Алиу најави дека до мај Клиничкиот центар „Мајка Тереза“ во Скопје ќе добие целосно нов паркинг, со „смарт“ инфраструктура и катна гаража, што треба да го реши долгогодишниот проблем со паркирањето за пациентите и вработените.

Одговарајќи на новинарски прашања, Алиу појасни дека досега реализацијата била закочена поради административни проблеми поврзани со инфраструктурата на паркингот, но дека тие пречки се надминати и проектот влегува во завршна фаза.

Покрај инфраструктурните зафати, министерот информираше дека Министерството за здравство, заедно со Министерството за образование и наука, работи на изработка на национална стратегија за развој на здравствени кадри во следните 10 години.

– Ова не е процес што може да се заврши за една или четири години. За да се изгради профил на еден лекар потребни се минимум шест години, а ние сакаме системски и долгорочен пристап – истакна Алиу.

Тој најави и значително зајакнување на итната медицинска помош. Како што рече, во соработка со Владата ќе бидат набавени 100 нови амбулантни возила, а дополнителни 50 се планирани за 2027 година.

– За кратко време здравствениот систем ќе добие 150 нови, целосно опремени амбулантни возила, со што значително ќе се подобри услугата за граѓаните – нагласи министерот.

Изјавите Алиу ги даде по посетата на реконструираната Клиника за гинекологија и акушерство, каде што беше презентиран напредокот во унапредувањето на здравствената инфраструктура.

The post КРАЈ НА ХАОСОТ СО ПАРКИРАЊЕТО НА КЛИНИЧКИ Комплексот добива нов „смарт“ паркинг и катна гаража до мај appeared first on plusinfo.mk.

Лидерот на ВМРО-ДПМНЕ, Христијан Мицкоски, на народниот митинг во општина Сопиште во рамки на изборната кампања за локалните избори 2025 со слоган „Вистинскиот избор! Твојот човек! Твоето место! Твојата иднина!“, остро ја критикуваше состојбата во судството и обвинителството, нарекувајќи ги „последните бастиони на власта на СДСМ и ДУИ“.

– Многу ме прашуваат изминатиов период, зошто и како не правиме реформи во судството и обвинителството. Тоа е нешто што за сите нас претставува болка, бидејќи тие институции се уште се последните бастиони во одбрана на претходната влада – изјави Мицкоски, додавајќи дека бројни пријави од надлежните институции не се процесуираат, туку „се држат во фиока“.

Тој најави дека по локалните избори, реформите во правосудниот систем ќе станат приоритет.

– После овие локални избори, ќе се навратиме и на таа тема – рече Мицкоски.

Во своето обраќање, Мицкоски порача дека „моментот што го чекале генерации е пред нас“ и дека е време за ресет на системот и изградба на држава на правда, слобода и грижа за секого.

– Судството мора да биде непристрасно и непокорливо, со судии кои судат според законот, а не според влијанија. Правдата не смее да биде привилегија на малкумина, туку право на секој граѓанин – брза, достапна и ефикасна – нагласи Мицкоски.

Тој додаде дека ќе постават јасни правила, транспарентни процеси и нулта толеранција кон корупцијата, која, како што рече, „тоне животи и ја кочи промената“.

– Здравствениот систем ќе биде столб на државата со модерни болници, достапни лекови, стручен кадар и превенција што ќе ги штити семејствата, наместо да ги остава ранливите сами да се борат – изјави Мицкоски.

Во завршницата на говорот, тој предупреди дека „кочниците“ во институциите ја гушат државата.

– Не можеме да го чекаме утрото додека ситни и големи кочници ја гушат работата на државата. Тие кочници се вградени во институциите и претставуваат длабока држава во државата – заклучи Мицкоски.

The post МИЦКОСКИ НАЈАВИ РЕФОРМИ И „РЕСЕТ“ НА СИСТЕМОТ Премиерот порача дека правдата ќе биде достапна за сите appeared first on plusinfo.mk.

Граѓаните денес се технолошки подготвени повеќе од кога било, што е основа и обврска за поголемо дигитално учество во здравствениот систем, истакна министерот за здравство Азир Алиу на панел-дискусијата за дигитализација и нови технологии во здравството, што се одржа во рамки на 21. Конгрес на лекари во организација на Македонското лекарско друштво.

– Нашата цел е едноставни и практични решенија што ќе носат директна корист за пациентите: полесен пристап до податоци, навремени информации и сигурност дека нивните податоци се заштитени. Системот „Мој Термин“, апликацијата „Мое Здравје“ и идните национални мрежи за радиологија и телемедицина се чекор напред во таа насока. Верувам дека со зголемување на интероперабилноста, анализа на податоци и примена на нови технологии ќе создадеме поефикасен и поправеден здравствен систем – изјави министерот Алиу.

На панелот учествуваше и Далибор Фруниќ, извршен директор на СОРСИКС и експерт за дигитално здравство, кој нагласи дека дигитализацијата во Македонија е на светско ниво.

– Податоците кои постојат се богатство кое ќе овозможи напредни чекори во вештачка интелигенција и „data-driven decision making“, за бенефит и на системот и на клиничката пракса – рече Фруниќ.

Од Министерството за здравство нагласуваат дека остануваат посветени на создавање модерен дигитален систем кој ги става пациентите во центарот на здравствената заштита.

The post АЛИУ СО ВЕТУВАЊЕ ЗА РЕВОЛУЦИЈА ВО ЗДРАВСТВОТО „Мој Термин“ и „Мое Здравје“ ќе добијат моќни надградби appeared first on plusinfo.mk.

Министерот за здравство Азир Алиу денеска имаше средба со д-р Сашко Кедев, на која беа разменети информации во врска со наводите дека се вршеле непотребни кардиохируршки интервенции кај пациенти во приватните болници, соопшти Министерството за здравство.

Министерот Алиу на средбата потсетил дека ќе биде испратен допис со кој сите приватни здравствени установи се задолжени од 15 септември да го информираат Министерството, односно Управата за електронско здравство, за сите извршени прегледи и интервенции.

Од Министерството за здравство наведуваат дека се отворени за соработка со сите чинители и ги повикуваат сите засегнати страни, кои имаат каква било информација за евентуални неправилности во системот, веднаш да се обратат до нив.

Транспарентноста е еден од главните столбови во работата на Министерството за здравство и е од клучно значење за унапредување на процесите во системот, стои во соопштението.

The post МИНИСТЕРОТ АЛИУ СЕ СРЕТНА СО КЕДЕВ Приватните клиники мора да ги пријават секој преглед и операција во Министерството до 15 септември appeared first on plusinfo.mk.