Израелската армија објави дека започнала „прелиминарни акции“ како дел од планираната копнена офанзива насочена кон освојување и окупирање на градот Газа.

Израелските одбранбени сили (ИДФ) објавија дека веќе ги контролираат областите на периферијата на главниот град на Појасот Газа.

Воен портпарол изјави дека војниците веќе дејствуваат во областите Зејтун и Џабалија за да ги постават темелите за офанзивата, која вчера официјално ја одобри министерот за одбрана Израел Кац и ќе биде презентирана пред безбедносниот кабинет на израелската влада подоцна оваа недела.

Околу 60.000 резервисти беа повикани да облечат униформи во септември за да го ослободат активниот персонал за операцијата во градот Газа.

Палестинската екстремистичка организација Хамас  обвини дека Израел го попречува договорот за прекин на огнот во Појасот Газа за да продолжи „брутална војна против невини цивили“.

„Соопштението на терористичката окупаторска армија за почетокот на операцијата против градот Газа и неговите речиси еден милион жители и раселени лица покажува јасно непочитување на напорите што ги вложија медијаторите за постигнување договор за прекин на огнот и ослободување на заложниците во Газа. Иако Хамас објави дека се согласува со најновиот предлог презентиран од медијаторите, Израел инсистира на продолжување на својата варварска војна, а со тоа што не одговара на овој предлог израелскиот премиер Бенјамин Нетанјаху покажува дека е вистинска пречка за каков било договор, дека не се грижи за животите на израелските заложници и дека нема сериозна намера да ги врати“, пишува во реакцијата на Хамас.

Медиумите објавија дека Палестинците веќе бегаат од градот Газа и дека се очекува стотици илјади жители на главниот град на палестинската енклава да добијат наредба да се евакуираат во засолништа на југот од Појасот Газа, бидејќи се во тек подготовките за планот на Израел за преземање на територијата.

Многу од сојузниците на Израел го осудија неговиот план за таа земја, а францускиот претседател Емануел Макрон вчера предупреди дека овој план „може да доведе само до катастрофа за двете нации и ризикува да го вовлече целиот регион во циклус на постојано војување“.

Во меѓувреме, Меѓународниот комитет на Црвениот крст објави дека понатамошното раселување и интензивирањето на непријателствата „носат ризик од влошување на веќе катастрофалната ситуација“ за 2,1 милиони жители на Појасот Газа.

Израелската влада ја објави својата намера да го освои целиот Појас Газа откако индиректните разговори со Хамас за прекин на огнот и договорот за ослободување на заложниците пропаднаа минатиот месец.

The post ИЗРАЕЛ ГО ПОЧНА НАПАДОТ НА ГРАДОТ ГАЗА Заземени се предградијата, Палестинците бегаат од градот appeared first on plusinfo.mk.