Обвинетиот Раде Трајковски-Штекли доби казна затвор од 8 години во случајот со организирана група за трговија со дрога.

Обвинетите Стефан Китанов, Александар Бучевски и Филип Таневски добија казни затвор од по пет години. Стојан Миланов е осуден на казна затвор од 3 години и 10 месеци.

Постапката се водеше девет месеци, а судеше судијата Илија Трпков.

Групата се товареше за организирање, набавка, транспорт и продажба на дрога преку синџир на посредници, контролиран од Штекли.

„Раде Трајковски Штекли се јавува како организатор и координатор на криминалната група, кој бил во контакт со лица од странство и домашни посредници, кој ја договара првичната набавка на кокаин, комуницира со неколку обвинети и осомничени и на истите им дава насока и упатство за проширување на мрежата. При претрес на домот и возилото, и комуникацијата од мобилниот уред се пронајдени бројни докази кои го потврдуваат неговото раководно и централно однесување во набавката на дрога“, беше наведено во обвинителниот акт.

Групата била добро организирана, со јасно дефинирани улоги – од набавка до продажба на кокаин и марихуана и дејствувала во периодот од јануари 2024 до јануари 2025 година.

The post 8 ГОДИНИ ЗАТВОР ЗА РАДЕ ШТЕКЛИ ЗА ТРГОВИЈА СО КОКАИН Тројца негови соработници добија по 5 години затвор appeared first on plusinfo.mk.

Иранското судство негираше дека 8 жени ќе бидат погубени, откако американскиот претседател Доналд Трамп денеска побара помилување за нив.

„Трамп повторно е доведен во заблуда со лажни вести“, соопшти официјалната веб-страница на ирансото судството, Мизан онлајн.

„Жените за кои се вели дека се соочуваат со егзекуција… Некои веќе се ослободени, додека други се соочуваат со обвиненија кои, доколку бидат осудени, би можеле да резултираат со затворски казни во најлош случај“, се вели во објавата.

Трамп претходно изјави на социјалните мрежи дека нивното ослободување би можело да му користи на Иран во преговорите. Тој сподели активистичка објава во која се тврди дека 8 жени чекаат егзекуција со бесење.

Тврдењето не ги вклучуваше имињата на жените, само фотографии.

ТРАМП БАРА ИРАН ДА ГИ ОСЛОБОДИ 8-ТЕ ЖЕНИ КОИ НАВОДНО ТРЕБА ДА БИДАТ ОБЕСЕНИ Ве молам, не им наштетувајте

The post НЕМА ДА ГИ ПОГУБИМЕ 8-ТЕ ЖЕНИ, ТВРДИ ИРАН Трамп е доведен во заблуда со лажни вести appeared first on plusinfo.mk.

Газдата на „Дурмо турс“ Дурмиш Белули конечно се пријавил во затворот „Идризово“ за да ја одслужи 10-годишната казна затвор за сообраќајната несреќа кај Ласкарци, во која загинаа 16 патници, а повеќе од 30 беа повредени. Веста ја потврдил директорот на установата Зоран Јовановски, кој изјавил дека Белули е примен и сместен според стандардна процедура.

По серија одлагања, најчесто оправдувани со медицински причини, Белули во декември 2025 конечно се појавил во затвор. На 1 декември имал уште едно одложување поради втора операција на тестис, а претходно во октомври тврдеше дека се оперирал од кила.

Судијата тогаш лично разговарал со хирургот во тетовската болница кој го потврдил специјалистичкото мислење дека операцијата е неопходна.

Неговиот соработник Ремзи Мифтари, одговорен за возниот парк на „Дурмо турс“, исчезна на крајот на ноември 2025 и по него е распишана потерница. И двајцата добија правосилни пресуди на 9 мај 2025, кога Апелациониот суд во Скопје им ги зголеми казните – на Белули од четири на десет години, а на Мифтари од шест на десет.

Трагедијата кај Ласкарци останува едно од најтешките сообраќајни страдања во поновата македонска историја, со длабоки последици за семејствата на загинатите и прашања за безбедноста на јавниот превоз.

The post ГАЗДАТА НА „ДУРМО ТУРС“ КОНЕЧНО СЕ ЈАВИ ВО ЗАТВОРОТ ИДРИЗОВО По 4 одлагања и 2 операции на тестиси, сам се пријавил во затворот appeared first on plusinfo.mk.

Новите федерални документи ја разголуваат улогата на Жилејн Максвел во најмрачните кругови околу милијардерот Џефри Епштајн. Сведочењата откриваат дека таа се претставувала како „неговата кул постара сестра“, со насмевка која служела да ги разоружа жртвите, додека постепено ги вовлекувала во неговата мрежа.

Максвел, која издржува 20-годишна затворска казна за трговија со луѓе, според документите, била „нормализатор“ на злоставувањето. Сведоците пред големата порота опишале дека со шеги и навидум случајни гестови, како кога се сончала топлес крај базенот, го ублажувала ужасот на она што следело.

– Таа се однесуваше како тоа да е нормално – изјавил еден агент, цитирајќи ја жртвата.

„Кул сестра“ во служба на злосторството

Жената идентификувана како „Џејн“ сведочела дека била само 14 години кога Епштајн почнал да ја злоупотребува, често во присуство на Максвел. „Имаше раце насекаде,“ изјавила таа. Други искази го потврдуваат истиот образец: Максвел присуствувала, се шегувала, ги насочувала девојките „што да прават“.

Во еден случај, на ранчот во Ново Мексико, Максвел ѝ дала упатства на 16-годишна тинејџерка како да му прави масажа на Епштајн, додека во друго сведоштво жртва ја опишува како „весела, лесна и безгрижна“, што ја натерало да мисли дека сè е прифатливо.

Тишината како соучесник

Во некои рани испрашувања, жртвите не ја спомнувале Максвел. Причината – никој не ги прашал. Агентот потврдил: „Не беше прашана.“ Дури подоцна, кога делата на Епштајн веќе станале јавна тајна, нејзината улога била разобличена.

Керолин, уште една од сведанките, починала од предозирање во 2023 година. Нејзиниот случај останува симбол за долготрајната траума што ја оставила оваа мрежа.

„Овие транскрипти не се доказ за вина“

Иан Максвел, нејзиниот брат, во реакција рече дека материјалите се „еднострани“ и дека не даваат „целосна слика за фактите“. Тој повика јавноста да не ги меша исказите од големата порота со докажани факти.

Но документите, кои излегоа во јавност токму додека Максвел се обидува да ја поништи пресудата, нудат морничав увид во тоа како се создавал амбиентот на „нормалност“ околу злосторството.

The post „КУЛ СЕСТРАТА“ ЖИЛЕЈН, ГЛАВНА ВО МРЕЖАТА НА ЕПШТАЈН Откриено како ги врбувала младите тинејџерки appeared first on plusinfo.mk.

Полицајци од Одделот за криминалистички работи – Ѓорче Петров и Одделот за криминалистички работи – Кисела Вода при СВР Скопје, по издадена судска наредба, вчера во 14.20 часот во Скопје го уапсиле скопјанецот С.Х. (40).

Тој бил баран со потерница за издржување казна затвор од четири години и 10 месеци, поради сторени кривични дела „грабнување“ и „силување“.

По целосно документирање на случајот, уапсениот осуденик ќе биде спроведен во надлежна казнено-поправна установа.

The post УАПСЕН СКОПЈAНЕЦ ОСУДЕН ЗА СИЛУВАЊЕ Се криел за да не ја одлежи затворската казна appeared first on plusinfo.mk.

Дурмиш Белули, сопственикот на гостиварската транспортна компанија „Дурмо турс“, осуден на десет години затвор за автобуската трагедија кај Ласкарци во која загинаа 16 лица, повторно побара одложување на издржувањето на казната во КПУ „Идризово“, повикувајќи се на здравствени причини.

Барањето било доставено до Основниот суд во Гостивар заедно со лекарски извештај од доктор-специјалист, во кој се наведува дека по оперативен зафат извршен на 1 декември, на Белули му е потребно постоперативно мирување во траење од најмалку 20 до 30 дена.

Судијата Ќирко Михајлоски за „Телма“ изјави дека судот дополнително ќе побара мислење и изјава од докторот кој ја извршил операцијата во тетовската болница, по што ќе донесе одлука пред истекот на рокот. Според судската одлука, Белули требаше денеска до 15 часот да се јави во затворот „Идризово“ на издржување на казната.

Паралелно со ова, второобвинетиот во предметот, Ремзи Мифтари, шеф на возниот парк во „Дурмо турс“, и натаму е во бегство. Тој не се појави во затворот за издржување на десетгодишната затворска казна, поради што по него е распишана потерница.

И Мифтари претходно побара одложување на издржувањето на казната, исто така повикувајќи се на оперативен зафат, но по истекот на рокот не се појави во затвор, по што институциите го прогласија за недостапен за органите на прогонот.

Случајот со трагедијата кај Ласкарци и натаму предизвикува силни реакции во јавноста, особено поради повторливите одложувања и избегнувањето на издржување на правосилно изречените казни.

ТЕСТИСОТ ПАК ГО СПАСУВА ОД ИДРИЗОВО Газдата на „Дурмо турс“ ја одложи десетгодишната казна до 17 декември

The post ТРЕБАЛО ДА ОДМАРА 20-30 ДЕНА ПО ОПЕРИРАНИОТ ТЕСТИС Газдата на „Дурмо турс“ пак бара да му се одложи одењето во „Идризово“ appeared first on plusinfo.mk.

Американскиот музички продуцент и рапер Шон – „Диди“ Комбс е осуден на 50 месеци затвор за подведување. Но, ќе треба да биде в затвор околу три години, земајќи го предвид и времето минато во притвор пред пресудата, според евиденцијата на федералните власти во САД. Следствено, Комбс треба да биде ослободен на 8 мај 2028, објави денес „Ен-би-си њуз“.

Музичарот беше прогласен за виновен претходно овој месец по две точки од обвинението за подведување, и ослободен од точките за рекетирање и трговија со луѓе. Обвинителите бараа 11-годишна казна затвор, но судот го зеде предвид фактот дека ова е прва кривична пресуда на Комбс. Тој се изјасни за невин по тужбите и ги негираше обвинувањата во текот на целото судење.

Комбс не сведочеше на судењето, но во писмо до судијата пред изрекувањето на пресудата, тој изрази каење, велејќи дека „искрено жали за болката и страдањето“ што ги предизвикал.

„Се изгубив, се изгубив во дрога и луксуз. Мојот пад произлегува од сопствената себичност“, додаде тој во пишаната изјава.

Судијата Арџун Субраманијан, исто така, го казни со парична казна од 500.000 долари и му наложи да отслужи пет години условна казна по неговото ослободување. Во таа смисла, по ослободувањето од затвор, Комбс ќе биде должен редовно да се јавува во полиција, да учествува во програми за лекување од дрога и од алкохол, советување за менталното здравје и програма за сторители на семејно насилство.

Тој ќе се подложува на редовно тестирање за дрога, а неговиот претпоставен има право да го претресе неговиот дом, автомобил, електронски уреди или лични предмети во секое време доколку има сомнеж дека ги прекршил прописите по неговото ослободување.

The post ДИДИ ЌЕ ИЗЛЕЗЕ ОД ЗАТВОР НА 8 МАЈ 2028 ГОДИНА После тоа ќе мора редовно да прави тестови за дрога appeared first on plusinfo.mk.

Некогаш најмоќен човек во земјата, поранешниот француски претседател Никола Саркози ќе оди на отслужување на казната во парискиот затвор Ла Санте во вторник (21. октомври), објавува „Ле Фигаро“.

Кога ќе го напушти својот дом во 16. арондисман во Париз, ќе го следи колона сниматели на мотоцикли.

Автомобилот на Саркози ќе вози директно до затворскиот комплекс. Поранешниот француски претседател ќе го пречека директорот на затворот, по што чуварите ќе го придружат до крилото со висок степен на обезбедување каде што се наоѓа неговата ќелија.

Саркози ќе ја отслужи казната во изолациониот оддел на затворот Ла Санте, објави BFMTV, повикувајќи се на свои извори.

Тој беше осуден во септември за криминален заговор во врска со финансирањето на неговата претседателска кампања во 2007 година со средства од Либија, во замена за дипломатски услуги на тогашниот лидер на земјата, Моамер Гадафи, кој беше погубен од бунтовниците во 2011 година. Тој е првиот поранешен лидер на земја-членка на Европската Унија кој отслужува казна затвор.

Саркози ја нарече пресудата „неправда“ и поднесе жалба, но ќе биде задржан во парискиот затвор Ла Санте, каде што, според француските медиуми, ќе биде сместен во посебна самица од девет квадратни метри за да нема контакт со други затвореници.

– Ако сакаат да спијам во затвор, ќе спијам во затвор – но со крената глава – рече тој по пресудата на 25 септември.

Неговиот син Луј Саркози ја повика јавноста да „дојде и да покаже поддршка“ за неговиот татко пред неговиот дом во Париз во вторник наутро.

Саркози е во брак со поранешната манекенка Карла Бруни, која е 12 години помлада од него. Нивната љубов започна недолго по неговиот развод, а многумина не веруваа дека нивниот брак ќе трае.

Саркози ја запозна Карла во 2007 година по разводот од политичарката Сесилија Атијас (64), со која го има синот Луј (27). Тоа беше љубов на прв поглед, а тие се запознаа благодарение на заеднички пријатели.

Нивната врска „крена многу прашина“ бидејќи многумина сметаа дека Бруни е недостојна да биде прва дама на Франција, но тие ги игнорираа критиките и преживеаја сè. Некои им се потсмеваа и затоа што Карла е девет сантиметри повисока од Саркози. Тие не се разделија дури ни кога Никола беше осуден на три години затвор за корупција и злоупотреба на влијание.

Карла со Саркози ја има ќерката Џулија, а од седумгодишната врска со радио водителот Рафаел Ентховен, го има синот Орелиен, кој физички наликува на неа од времето кога таа сè уште не го имаше променето лицето со естетски зафати.

Орелиен ја започна својата кариера како модел и веќе прошета на Неделата на модата во Милано. Додека не влезе во модните води, тој ги избегнуваше рефлекторите и се занимаваше со својата друга страст, науката. Имено, тој го водеше YouTube каналот Motorsport Gigantoraptor каде што објаснуваше научни теории, а љубовта кон неа ја наследи од својот татко.

Некои се на мислење дека тој добил „билет“ за светот на модата благодарение на неговата мајка, исто како што велат за Лила Мос, Каја Гербер и Хелен Клум, сестрите Хадид, Кендал Џенер и многу други „непо бебиња“.

Интересно е и тоа што неговата мајка го сакала таткото на Рафаел, новинарот Жан-Пол Ентовен. Жан-Пол јавно се откажа од Рафаел поради објавувањето на неговиот автобиографски роман „Заштедено време“ пред две години.

The post НИКОЛА САРКОЗИ ОДИ ВО ЗАТВОР Кога поранешниот француски претседател ќе го напушти својот дом, ќе го следи колона камермани на мотоцикли appeared first on plusinfo.mk.

37-годишниот Љупчо Бојчевски од Скопје е единствениот Македонец осуден на затворска казна за учество во странска војска во конфликтот во Украина, борејќи се на руска страна. Тој е осуден на четири години затвор, а на судењето изјавил дека се кае за стореното, што е забележано и во пресудата, јавува Радио Слободна Европа (РСЕ).

Според законот воведен во септември 2014 година, целта е да се спречи заминување на македонски државјани во странски конфликти, претходно поврзани со формации како ИСИС. Случајот на Бојчевски е прв поврзан со војната во Украина, која започна со руската инвазија во 2022 година.

Бојчевски бил регрутиран преку затворена група на апликацијата „Телеграм“ и отпатувал од Скопје до Москва пред да биде упатен на фронтот кај Мариупол. Тој на фронтот не бил сам – со него бил и неговиот другар Тони Шегмановски, кој подоцна починал во Скопје.

– Бев на забрзана обука и веднаш испратен на фронт. Сум видел непријатни сцени и колеги кои правеле ѕверства – изјавил Бојчевски. Тој тврди дека се борел од лични убедувања и дека месечно требало да добива 3.000 евра.

Државните институции нагласуваат дека ова се индивидуални случаи и нема организирано регрутирање на македонски државјани за конфликтот во Украина. Македонија ја осудува руската инвазија и ја поддржува меѓународната политика за санкции против Москва.

Целата сторија прочитајте ја на Радио Слободна Европа.

The post „ВЕДНАШ МЕ ИСПРАТИЈА НА ФРОНТОТ КАЈ МАРИУПОЛ“ Македонец лежи во „Идризово“ осуден за борба на руска страна appeared first on plusinfo.mk.

Разрешениот претседател на Република Српска, Милорад Додик, ги исплати парите што ги искористи за замена на едногодишната затворска казна што ја доби по конечната пресуда за непочитување на одлуките на високиот претставник.

– Одлучувајќи по барањето на одбраната на осудениот Милорад Додик за замена на изречената затворска казна со парична казна, Судот, во согласност со законските прописи, донесе одлука со која, по изјавата на Обвинителството на БиХ, беше усвоен горенаведениот предлог на одбраната, а затворската казна на осудениот Милорад Додик беше заменета со парична казна – соопшти Судот на БиХ.

Додик платил 36.500 КМ 18.662 (евра), или 100 КМ за секој од 365-те дена што требало да ги помине зад решетки.

Покрај затворската казна, на Додик му е забрането и политичко дејствување во траење од шест години. Поради овој дел од пресудата, Централната изборна комисија на Босна и Херцеговина му го одзеде мандатот како претседател на Република Српска.

Одлуката на Комисијата денес ја прими неговиот адвокат, Горан Бубиќ, кој поднесе жалба. Се очекува одлуката на Жалбениот совет да биде објавена следната недела.

The post НАМЕСТО ЗАД РЕШЕТКИ ЌЕ ОСТАНЕ НА СЛОБОДА Милорад Додик ја откупил затворската казна appeared first on plusinfo.mk.