Француската филмска икона Брижит Бардо, која почина во неделата на 91-годишна возраст, ќе биде погребана на крајбрежните гробишта во одморалиштето Сен Тропе на француската ривиера. Погребот ќе се одржи на 7 јануари во црквата Нотр Дам де л’Асомпсион.

Иако сите детали за погребот сè уште се чуваат во тајност, потврдено е дека ќе биде погребана на крајбрежните гробишта во јужниот француски град и покрај нејзината последна желба која, според нејзината минатогодишна изјава за „Paris Match“ била – скромен погреб во нејзината градина, со едноставен дрвен крст како обележје на нејзиниот гроб.

Според „Ројтерс“, нејзиното барање за приватен погреб не е формално потврдено, што значи дека церемонијата ќе мора да биде во согласност со стандардите на локалните власти.

Гробиштата каде што ќе биде погребана Бардо се наоѓаат покрај морето, симболично одразувајќи ја поврзаноста на актерката со Сен Тропе и природата што толку многу ја сакаше.

Откако се пензионираше од светот на филмот, еден ден пред нејзиниот 40-ти роденден, Брижит се посвети на животните и животот на својот имот во Сен Тропе. Нејзините соседи ја паметат како блиска пријателка и љубителка на животни.

Еден од нив изјавил за Ројтерс: „Беше прекрасна, прекрасна, нема други зборови. Да, навистина ќе ни недостига. Ја познавав 30 години и ја гледав како ги шета кучињата на плажа. Еднаш падна во вода со своето куче. Морав да ја извлечам.

Со децении, Бардо живееше опкружена со своите омилени животни – кучиња, мачки, коњи, а нејзината посветеност на животните беше потврдена и во нејзиниот тестамент, откако го остави своето богатство на нејзината Фондација.

Денот по нејзината смрт, Сен Тропе беше преплавен со цвеќе и пораки од обожаватели. Фондацијата што го носи нејзиното име отвори книга на сочувство, додека бројни обожаватели и познати личности му оддадоа почит на нејзиниот живот и дело.

Брижит Бардо не беше само филмска икона, туку и симбол на Сен Тропе и глобалната култура. Нејзината посветеност на животните, нејзиното влијание врз модата и филмот и харизмата што ја зрачеше, остануваат трајна инспирација за генерациите.

The post БРИЖИТ БАРДО ЌЕ ПОЧИВА ПОКРАЈ МОРЕ Со децении, глумицата живееше во Сен Тропе, опкружена со своите омилени животни appeared first on plusinfo.mk.

На територија на Скопје, по предходна пријава на граѓани беше пронајдено младо женско куче, на возраст од приближно една година, затворено во напуштен автомобил – без вода, храна или провев, изложено на екстремни температури и во загрижувачки услови, соопшти јавното претпријтие Лајка.

„Благодарение на навремена реакција, животното е извадено и моментално е во процес на опоравување. Се работи на стабилизирање на нејзината психофизичка состојба. Случајот е пријавен до надлежните институции“, се вели во соопштението од Лајка.

Според сведоштва од жители на местото, се додава во соопштението, ова не е прв пат истото лице да држи животни во вакви услови. Претходно биле забележани уште две кучиња од расата кане корсо кои исто така биле чувани во запуштени, нехумани услови.

„Станува збор за континуирано и сериозно кршење на Законот за заштита и благосостојба на животните, кое бара итна реакција од институциите. Апелираме до надлежните органи да постапат со целосна сериозност и да преземат мерки за да се спречи понатамошно загрозување на животните од страна на ова лице. Потсетуваме дека затворање на кучиња во автомобили, особено во лето, може да доведе до фатални последици за само неколку минути. Граѓаните кои имаат информации за случајот или за други слични примери ги охрабруваме да се јават и да помогнат во борбата против насилството врз животни“, се вели во соопштението од ЈП Лајка.

The post СПАСЕНО КУЧЕ КОЕ БИЛО ЗАТВОРЕНО ВО АВТОМОБИЛ НА ЕКСТРЕМНИ ТЕМПЕРАТУРИ Лајка апелира институциите да го казнат злоставувачот appeared first on plusinfo.mk.