Агенцијата за храна и ветеринарство (АХВ) работи на подготовка на нова одлука за висината на надоместоците на ветеринарните друштва. Како што информира за МИА, АХВ го очекува ребалансот на буџетот за да види колку дополнителни средства ќе бидат одобрени.

Во врска со заостанатите обврски од 2025 година, наведува дека се веќе доставени до трезорот, а исплатата се врши согласно утврдената динамика од Министерството за финансии.

– Во очекување сме на ребалансот на буџетот за да видиме колку дополнителни средства ќе бидат одобрени. Со претставници од Ветеринарната комора и Владата разговаравме за корекција на цените. Дали тоа ќе биде во висина од 40 отсто или 50 отсто ќе се знае откако ќе биде донесен ребалансот. Што се однесува до нас, во финална фаза е подготовката на одлуката. Заостанатите обврски од минатата 2025 година се доставени за исплата до терзор и согласно утврдената динамика од Министерството за финансии се врши и исплатата на финансиските средства. Во АХВ нема заостанати фактури за реализирани активности, освен оние кои тековно пристигнуваат – велат од АХВ.

Ветеринарните друштва денеска се пожалија дека се во тешка финансиска состојба. На координативниот состанок што го организира Ветеринарната комора, истакнаа дека проблемите ги изнеле пред надлежните институции, од каде добиле уверување дека ќе бидат надминати.

Според ветеринарите, буџетот за здравствена заштита на животните е преполовен, од поранешните 300 милиони денари на максимум 150 – 170 милиони, „со што и се врзуваат рацете на Агенцијата за храна и ветеринарство (АХВ) да ги сервисира своите долгови кон ветеринарните друштва“.

– Ветеринарната служба подолго време се наоѓа во тешка материјално-финансиска криза, особено во делот на ветеринарните друштва со јавни овластувања кои ги спроведуваат активностите согласно годишната наредба за здравствена заштита на животните. Ако буџетот за здравствена заштита на АХВ пред две-три години бил 300 и нешто милиони денари, сега е намален на 150, 160, 170 милиони денари. Со ова драстично намалување на буџетот за здравствена заштита на животните во АХВ, ветеринарните друштва дојдоа во ситуација да не можат да ги добијат финансиските средства за услугите што ги даваат кон државата. Ние ги преземавме сите можни институционални мерки и активности – одржавме бројни состаноци со АХВ, со владини претставници, со националниот координатор за ветеринарство, Министерството за земјоделство,… Имаме акламација за решавање на овој проблем, за доделување дополнителни средства, но до денес се исплатени само мал дел финансиски средства кон ветеринарните друштва со јавно овластување, изјави претседателот на Ветеринарната комора Жарко Михајлоски.

Ваквата ситуација, оцени Михајлоски, може да се одрази врз заштитата на здравјето на животните, но и на луѓето.

– Ветеринарниот сектор мора да биде во добра кондиција за да може да се справува со сите заразни болести кај домашните животни и птиците кои се ризик за државата. Ветеринарните друштва не само што го штитат здравјето на животните, туку со тоа го штитат и јавното здравје – здравјето на луѓето и безбедноста на храната, предупреди претседателот на Комората.

Во Македонија има околу 120 – 130 ветеринарни друштва со јавни овластувања. Освен редовно сервисирање на долговите, тие бараат и минимум 50 отсто покачување на цените на услугите што ги вршат иако, како што објаснија, и тоа е веќе малку ако се земат предвид економските случувања и инфлаторните движења.

Во однос на болестите, информира дека во последните години се појавуваат и оние што воопшто ги немаше на овие простори, на Балканот, па и во Европа.

– Со климатските промени, со големите миграции на луѓе, стигнаа болести што беа карактеристични за Африка, за Мала Азија,… Моментно Македонија се справува со сипаниците кај овци и кози. Има неколку жаришта, меѓутоа ветеринарните друштва повторно излегоа во пресрет и успешно се справуваат со ширењето на болеста. Да не го заборавиме присуството на вирусот на африканска свинска чума кај дивата популација свињи. Постојано има и бруцелоза, туберкулоза кај фармските животни, а тука се и сите останати заразни зоонозни кои претставуваат реална опасност за луѓето. Да не заборавиме дека околу 70 отсто од новите инфективни заразни болести кај луѓето се со зоонозен карактер. Така што, можеме да претпоставиме колкава е опасноста од немање ветеринарен сектор во добра кондиција. Овие болести, ако не се сузбијат, можат да предизвикаат и загрозување на безбедноста на храната. До денес, ветеринарниот сектор успева да се справи заедно со АХВ. Болестите ги локализираме, се сузбиваат, меѓутоа апелираме повторно, да се помогне на ветеринарниот сектор – порача Михајлоски.

The post ВЕТЕРИНАРНИТЕ ДРУШТВА ВО ОЧАЈНА ФИНАНСИСКА СОСТОЈБА, БАРААТ ПОВИСОКИ НАДОМЕСТОЦИ Агенцијата за храна и ветеринарство работи на нов правилник appeared first on plusinfo.mk.

Четириесет и деветгодишна жена од Солун е уапсена откако полицијата открила дека на балконот од нејзиниот стан чувала три мачки врзани со јаже.

Според грчките медиуми, случајот бил откриен вчера попладне, по што полицијата веднаш интервенирала и ја привела жената.

Покрај апсењето, против неа биле изречени и административни казни во вкупен износ од 17.600 евра поради прекршување на Законот за заштита на животните.

Жената ќе биде изведена и пред надлежен јавен обвинител, кој ќе одлучува за понатамошната постапка.

Грција во 2021 година усвои построг закон за заштита на животните и домашните миленици, со кој се предвидени високи парични казни и кривична одговорност за случаи на злоупотреба и малтретирање на животни.

The post НА БАЛКОН ЧУВАЛА МАЧКИ ВРЗАНИ СО ЈАЖЕ Жена од Солун уапсена и казнета со 17.600 евра appeared first on plusinfo.mk.

Градот Скопје ќе инвестира 30 милиони денари за сериозно проширување на капацитетите на ЈП „Лајка“, со цел трајно и системско решавање на проблемот со бездомните кучиња, најави градоначалникот Орце Ѓорѓиевски.

Како што посочи тој, по преземањето на функцијата, завршила практиката „Лајка“ да се користи за партиски вработувања, а фокусот е ставен на создавање хумани услови и вистинска грижа за животните.

– Предолго време проблемот со бездомните кучиња се туркаше под тепих. Последиците ги чувствуваа и граѓаните и самите животни, кои беа оставени без заштита, услови и соодветна грижа. Денес започнуваме нов пристап – сериозно, одговорно и со јасна визија – истакна Ѓорѓиевски.

Градоначалникот нагласи дека инвестицијата од 30 милиони денари ќе овозможи проширување на капацитетите на „Лајка“ и создавање современи услови за згрижување на бездомните кучиња, што, според него, ќе донесе видливи и долгорочни резултати.

– Оправдани се забелешките на граѓаните. Со години проблемот растеше наместо да се решава. Токму затоа сега пристапуваме посветено и со цел трајно да го надминеме – рече тој.

Ѓорѓиевски најави и дека нема да се дозволи Скопје да стане „депонија за туѓи проблеми“, посочувајќи дека веќе е отворено прашањето за носење бездомни кучиња од други градови.

– Со воведувањето на системот „Сејф сити“, сите кои несовесно носат животни во главниот град ќе бидат откриени и санкционирани. Ред мора да има – и заради безбедноста на граѓаните, но и заради заштитата на самите животни – потенцираше градоначалникот.

Тој упати апел до граѓаните да бидат активен партнер на институциите и да ги пријавуваат сите појави поврзани со напуштање или незаконско носење животни.

– Само со заедничка акција можеме да воведеме ред и да изградиме систем што функционира. Многу брзо започнуваме конкретна постапка за проширување на капацитетите на „Лајка“ и обезбедување достоинствен третман за бездомните кучиња – додаде Ѓорѓиевски.

Според него, решението на овој долгогодишен проблем нема да биде со декларативни ветувања, туку со реална работа, инвестиции и континуирана грижа.

The post „ЛАЈКА“ ЌЕ ДОБИЕ 30 МИЛИОНИ ДЕНАРИ ОД ГРАДОТ „Сејф сити“ ќе ги лови оние што носат кучиња во Скопје appeared first on plusinfo.mk.

Фондацијата основана од покојната француска актерка Брижит Бардо ќе продолжи „повеќе од кога било“ да го спроведува делото на својата основачка, објави организацијата по смртта на актерката, додавајќи дека нејзиното заминување не го означува крајот на борбата за заштита на животните.

– Нејзиното наследство останува живо преку активностите што ги спроведуваме со истата страст и лојалност кон нејзините идеали – се вели во соопштението, пренесува „Фигаро“.

Фондацијата Брижит Бардо, основана во 1986 година во Сен Тропе, е посветена на заштитата на дивите и домашните животни во Франција и низ целиот свет, а денес е една од најважните организации за права на животните во Франција.

– Ја дадов мојата младост и убавина на мажите. Сега им ја давам мојата мудрост, моето искуство и најдоброто од себе на животните – рекла еднаш актерката Бардо.

Директорот на фондацијата Бруно Жаклен нагласил дека „фондацијата е силна и ќе продолжи со сила и енергија“.

Фондацијата започнала скромно во мала соба во познатата куќа на актерката Ла Мадраг, а во 1988 година се преселила во Париз. Од своето основање, се грижела за повеќе од 12.000 животни. Со тим од околу 50 вработени во Париз и вкупно 300 работници на неколку локации, фондацијата управува со центри во Нормандија и Дордоња, како и со меѓународни проекти во 70 земји, од Индија до Мароко, вклучувајќи спасување животни и заштита на загрозени видови.

Бардо, според парискиот дневен весник, била активна до крајот на својот живот, учествувајќи во работата на одборот на директори и барајќи укинување на ловот и другите практики што ги смета за сурови.

Нејзината фондација, се вели во соопштението, ја продолжува борбата за заштита на животните, вклучително и забраната за малолетници да присуствуваат на борби со бикови и укинување на консумацијата на коњско месо.

The post ФОНДАЦИЈАТА БРИЖИТ БАРДО ЈА ПРОДОЛЖУВА БОРБАТА ЗА ЗАШТИТА НА ЖИВОТНИТЕ „Продолжуваме со истата страст и со истите идеали“ appeared first on plusinfo.mk.

Зоолошката градина во Скопје ќе прерасне во современ центар за едукација, заштита на природата и хуман третман на животните, најави градоначалникот на Скопје, Орце Ѓорѓиевски, при презентацијата на новата Стратегија за развој на установата.

Според Ѓорѓиевски, стратегијата носи јасна визија за напуштање на концептот на зоолошка градина како исклучиво забавна содржина и нејзино претворање во „училница на отворено“, каде децата и посетителите ќе стекнуваат знаење, еколошка свест и емпатија кон животната средина.

– Нашата цел е Зоолошката градина да стане место каде децата нема да заминуваат само со фотографии, туку и со разбирање за природата и одговорноста кон животните. Едукацијата е најсилната алатка за долгорочна заштита на биодиверзитетот – истакна Ѓорѓиевски.

Клучен сегмент од стратегијата е трансформацијата на Зоолошката градина во функционално прифатилиште за заштитени и ранливи видови, со професионална ветеринарна грижа и безбедни услови за животните кои не можат самостојно да опстанат во дивината.

Во документот е предвидено и целосно усогласување со строгите стандарди на Европската асоцијација на зоолошки градини и аквариуми (EAZA), со цел полноправно членство, што подразбира високи стандарди за благосостојба на животните, активна научна и конзервациска улога, како и највисоки безбедносни и еколошки норми.

Дополнително, стратегијата опфаќа и целосна модернизација на Зоолошката градина, подобрување на условите за животните, посетителите и вработените, воведување енергетски ефикасни решенија, зголемена безбедност и нови содржини, меѓу кои и центар за хипотерапија за деца со посебни потреби.

– Ова е амбициозна, но неопходна визија. Затоа ги повикувам институциите, граѓанскиот сектор и бизнис-заедницата активно да се вклучат во нејзината реализација – порача Ѓорѓиевски.

The post ЗОО СКОПЈЕ ДОЖИВУВА ЦЕЛОСНА ТРАНСФОРМАЦИЈА Ѓорѓиевски најавува едукативен и хуман центар appeared first on plusinfo.mk.

Синоќа, пожарникарите од Кавадарци успешно спасиле куче од водите на реката Луда Мара, по што животното е пренесено во стационар за соодветна нега.

Инцидентот бил пријавен од член на здружението за заштита на животните „Лина спаси живот – добиј живот, спас за животните“, кој забележал дека кучето е мокро, исплашено и беспомошно во речното корито. По известувањето, противпожарната служба веднаш излегла на терен и со брза и професионална акција го извлекла животното од водата.

Кучето сега е сместено во стационар каде ќе му биде обезбедена потребната медицинска помош и нега, доколку е потребно.

Во објавата на Фејсбук страницата на градоначалникот на Кавадарци, Митко Јанчев се истакнува благодарност кон пожарникарите:

„Голема благодарност за храброста, вниманието и љубовта кон животните. Хуманите дела зборуваат најгласно, заедно спасуваме животи“, пишува Јанчев.

The post 📽️ 📷 МОКРО И ИСПЛАШЕНО КУЧЕ СПАСЕНО ОД ЛУДА МАРА Храбрите пожарникари го извадија беспомошното животно од реката appeared first on plusinfo.mk.

Зголемените водостои по обилните дождови создаваат опасност од поплави во повеќе региони, поради што Агенцијата за храна и ветеринарство (АХВ) им препорачува на граѓаните максимално да внимаваат на безбедноста на храната, водата за пиење и здравјето на животните.

Од Агенцијата велат дека ситуацијата бара зголемено внимание, особено во местата каде што реките веќе се излеале и има поплавени домови и земјоделски површини.

– Наш апел е граѓаните редовно да ги следат информациите за водотеците и да не користат заматена вода за пиење или готвење се додека не се добие лабораториска потврда дека е безбедна – порачуваат од АХВ.

Посочуваат дека во регионите со излевање на реките, домаќинствата што се снабдуваат со вода од индивидуални системи мора да бидат особено внимателни.

– Редовната хигиена на рацете е клучна, особено по контакт со поплавена вода или предмети што биле поплавени. Храната што била во контакт со поплавата мора да се фрли – предупредува Агенцијата.

Дополнуваат дека овощјето и зеленчукот што се користат свежи треба двапати да се измијат, да се исчистат и по можност да се термички обработат. Во домаќинства со мали деца се препорачува користење индустриски подготвена храна.

Во однос на животните, АХВ нагласува дека сопствениците имаат обврска да обезбедат безбедно место, храна и вода.

– Доколку мора да се напушти домот, животните треба да се префрлат на повисоко и безбедно место. Ако се држат врзани, важно е да се одврзат и да се преместат каде што ризикот од поплавување е помал – наведуваат од Агенцијата, додавајќи дека одгледувачите треба да бидат во постојан контакт со ветеринарите.

The post „НЕ КОРИСТЕТЕ МАТНА ВОДА, ХРАНАТА МОРА ДА СЕ ФРЛИ“ Предупредувања за жителите на поплавените региони appeared first on plusinfo.mk.

Грчки суд донел историска пресуда против 68-годишен маж од островот Евбеја, кој затворил 58 мачки во трошна зграда и ги оставил без храна и вода. Сите животни биле во критична состојба, некои и со повреди, кога полицијата влегла во просторијата по пријава од случајни минувачи, јави Катимерини.

Обвинетиот, кој се обидел да објасни дека ги „собирал скитниците од сочувство“, бил прогласен за виновен за суровост кон животните. Судот го осудил на парична казна од 1,7 милиони евра, највисока досега изречена во Грција за ваков случај.

Неговите адвокати тврделе дека тој бил ментално болен, но судските експерти заклучиле дека бил целосно свесен за своите постапки.

Понатаму, судот земал предвид и негови претходни дела – злоставување на кучиња – што влијаело на тежината на пресудата.

– Ова е значаен чекор за заштита на животните и пример дека правдата може да биде строга кога е неопходно – изјавиле претставници од Сојузот за заштита на животните, кој сега се грижи за спасените мачки.

The post МИЛИОНСКА ГЛОБА ВО ГРЦИЈА ЗА ЧОВЕКОТ КОЈ ИЗМАЧУВАШЕ 58 МАЧКИ Бил целосно свесен за своите постапки appeared first on plusinfo.mk.

59-годишниот З.М. од Крива Паланка заработи пријава откако на социјалните мрежи се појавија фотографии како влече куче врзано за автомобил.

Според информациите од Министерството за внатрешни работи, на магистралниот пат од селото Жидилово кон Крива Паланка, лицето управувало патничко моторно возило марка „Фиат Панда“ на кое било врзано куче што го влечел по патот.

Лицето било повикано на службен разговор вчера во 14:45 во ОВР Крива Паланка. По преземените мерки и целосно документирање на случајот, против З.М. е поднесена соодветна пријава за стореното дело.

(ВОЗНЕМИРУВАЧКО) ВРЗАЛ КУЧЕ ЗА АВТОМОБИЛ И ГО ВЛЕЧЕЛ ПО УЛИЦИ Полицијата го фати насилникот, животното е на сигурно

The post ПРИЈАВА ЗА ЛИЦЕТО КОЕ МАЧЕШЕ КУЧЕ ВРЗАНО ЗА АВТОМОБИЛ Полицијата го санкционираше 59-годишниот жител на Крива Паланка appeared first on plusinfo.mk.

Тој што ќе остави домашно животно, домашно милениче, одгледувано диво животно и друго животно што треба да се чува под надзор, ќе се казни со затвор до една година.

Доколку, пак, дошло до смрт на животно поради напуштање или биле напуштени поголем број животни, сторителот ќе се казни со затвор до две години.

Тоа е историска одлука за животните и резултат на големата вклученост на здружението Пријатели на животните, кое во 2021 година покрена петиција со барање чинот на напуштање на животните да се третира со затворска казна.

Здружението е задоволно и затоа што Министерството за правда и администрација покажа дека е во чекор со заштитата на животните во другите европски закони. Имено, го прифати нивниот предлог и во Кривичниот законик воведе нова безбедносна мерка – мерка забрана за чување и стекнување животни во период од една од пет години. Судот може да му изрече на лицето кое сторило кривично дело врз животно доколку постои опасност да стори исто или слично дело.

– Вклучувањето на оваа мерка е од исклучителна важност бидејќи многупати бевме сведоци дека насилниците по извршувањето на најтешките кривични дела врз животните набрзо се стекнуваат со ново животно, кое исто така го злоупотребуваат и со тоа остануваат траен социјален проблем и закана – објаснија Пријатели на животните.

Дополнителна причина за задволство е зголемувањето на казните за нанесување непотребна болка на животните или нивно изложување на непотребно страдање, како и за убивање и жестоко малтретирање на животните. Досега максималната казна беше до една година затвор, но сега тоа ќе биде до две години, а доколку овие кривични дела се сторени од личен интерес, сторителот може да добие затворска казна до три години.

Активистите за заштита на животните очекуваат дека овие законски измени ќе овозможат полесна имплементација и поефикасна заштита на животните во Хрватска. Тие ги повикуваат граѓаните да продолжат да пријавуваат секое напуштање и злоупотреба на животните за да може во пракса да се спроведат измените на Кривичниот законик.

The post ЗА НАПУШТАЊЕ ЖИВОТНО – КАЗНА ЗАТВОР ДО ЕДНА ГОДИНА? Хрватска ги заостри законите за заштита на животните appeared first on plusinfo.mk.