– Пред да започнам со моите завршни зборови, дозволете ми да го констатирам беспрекорното водење на оваа судска постапка, силно верувајќи дека покренатото обвинените против мене за настаните од 27 април ќе биде побиено во целост. Истовремено, пред да почнам да навлегувам во суштината на оваа тема, чувствувам искрена потреба уште еднаш во целост и со индигнација да ги осудам овие настани и јавно да го манифестирам моето длабоко жалење, затоа што беа повредени мои колеги, независно од тоа на која политичка опција ѝ припаѓаат – рече Вељаноски во финалето на овој процес, кој, како што додаде, му предизвика голема лична штета на професионален и на приватен план, како и ненадоместливи семејни трауми.

– До денес, себеси, на моето потесно семејство, како и на пријателите не можам да им објаснам, ниту, пак, тие самите можат да разберат, како еден претседател на Собранието што девет години го водеше овој највисок законодавен дом, со закажани и одржани 361 седница со повеќе од 15.000 точки од дневен ред, доживеа да биде обвинет за тероризам и за обид за нарушување на уставниот поредок на држава?! – рече Вељаноски.

„Предлогот на Оливер Спасовски не беше деловнички“

Тој потоа педантно и темелно го побиваше наводите на обвинението кои се однесуваат на него и сумираше:

– Конститутивната седница на Собранието ја закажав согласно со Уставот и Деловникот на Собранието на 30 декември 2016 година. За непречен тек на седницата закажав подготвителен состанок на 29 декември 2016 и на состанокот инсистирав да се постигне договор за сите точки од дневниот ред со цел седницата да заврши непречено и во најкус можен рок со почитување на пропишаните процесни правила. На 30 декември 2016 година седницата имаше редовен тек по првата и втората точка. По третата точка седницата не можев да продолжам да ја водам бидејќи како претседавач не добив предлог за состав на Комисијата за прашања на избори и именувања потпишан од најмалку 10 пратеници како неопходен и неизоставен услов согласно со член 20 од Деловникот на Собранието.

Неспорно се утврди, рече Вељаноски, дека тој, како претседавач на конститутивната седница, ниту во јануари, ниту февруари 2018 година, а сè до 17 март, немал добиено никакво барање од овластен предлагач за продолжување на конститутивната седница. Тој како претседавач закажав и одржав подготвителни состаноци и тоа на 21 и 22 март, како и два состанока на 23 март, а со единствена неспорна цел да се постигне договор за состав на Комисијата за избори и именувања за да можам да продолжи да ја води конститутивната седница. Конечно, како резултат и врз основа на тие подготвителни состаноци се утврди и се достави предлог за состав на комисијата врз основа на член 20 од Деловникот. Тој предлог бил потпишан од 17 пратеници од различни партии и тоа од ВМРО-ДПМНЕ, СДСМ, ДУИ, БЕСА и Алијанса за Албанците и овој предлог е заверен во архивата на Собранието под арх. бр 08-830/1 од 23 март 2017. Согласно со постигнатиот договор на 27 март, Вељаноски ја продолжува конститутивната седница по третата точка и по оваа точка од дневниот ред се пријавуваат за збор голем број пратеници.

– Јасно е дека поднесениот предлог по член 78 став 2 од Деловникот, од страна на тогашниот пратеник Оливер Спасовски во текот на расправата по третата точка да се премине на расправа по четвртата точка, е неспорно спротивен на Деловникот и дека никогаш ниту пред, ниту по тој кобен 27 април бил применет на таков начин – рече Вељаноски, додавајќи дека ова е потврдени и со изјави на клучни сведоци, меѓу кои и Талат Џафери, Зоран Заев и други.

 „Пораката што ја добив од Груевски беше нерелевантна“

Кобниот ден, некаде околу 13 часот, пратеникот Зоран Заев на седницата зема збор процедурално и кажува: „Ќе се носи одлука во оваа сала, ќе се носи одлука во некоја од другите сали на Собранието, во ходникот, на скалите, во амфитеатарот на Правниот факултет, во МАНУ“. Час подоцна, за време на паузата, пратеникот Зоран Заев одржува прес-конференција во прес-салата на Собранието и претходно цитираното јавно го повтори на пресот.

– Се докажа пред овој суд дека тоа што го кажа пратеникот Зоран Заев јавно, со СМС порака ми беше пренесено од службата во кабинетот на претседателот на Собранието, што е нивна вообичаена и редовна пракса и задача. Во истата СМС порака ниту додадов, ниту одземав од содржината и целовита ја препратив до пратеникот Никола Груевски, кој истовремено беше и претседател на ВМРО-ДПМНЕ. Содржината на пораката е ноторна информација позната на јавноста непосредно по одржувањето на наведената прес-конференција – рече Вељаноски.

Како и во текот на процесот, така и во завршниот збор, Вељаноски потврдио дека тој ден околу 16 часот добил препратена СМС порака од Никола Груевски, а којашто тој ја добил од Панче Кралев.

– Содржината на таа порака за мене во тој момент беше без никакво значење и беше нерелевантна, бидејќи јас како претседавач знаев дека имаше пријавено голем број пратеници за збор, како и соодветни реплики и контрареплики на мониторот, а веќе го имав добиено формалното барање потпишано од 31 пратеник за продолжување на конститутивната седница за наредниот ден на 28 април – поентираше Вељаноски.

„Седницата ја водев беспрекорно, тоа го потврдија сведоците“

Во продолжение, тој продолжи со реконструкција на текот на седницата:

– Околу 17.10 часот дадов куса пауза од 5 минути и на таа пауза заедно со претставниците на политичките партии се договоривме и одлучивме седницата тој ден да трае до 18.00 часот, а да продолжи со работа наредниот ден на 28 април. Целосна невистина е, а со тоа погрешно е тврдењето на обвинителството дека на пратеникот Зеќирија Ибрахими сум му дал збор преку ред. Напротив неспорно се утврди дека пратеникот Зеќирија Ибрахими беше пријавен за збор процедурално како заменик кординатор, па според редоследот на пријавени добил право кое му следува согласно со Деловникот на процедурална забелешка. Јас, како претседавач, согласно со Деловникот, имав обврска да му дадам процедурална забелешка – објасни Вељаноски.

Како што е познато, по настапот на пратеникот Зеќирија Ибрахими и пеењето на албанската химна, Вељаноски во 18 часот ја прекинува седницата и нејзиното продолжение го закажува за наредниот ден.

– Исто така, во доказнатa постапка докажав дека во тоа време на 27 април пратеник кога збори од говорница, претседавачот нема механизам за да го исклучи микрофонот. Кога пратеник збори од место има копче кај претседавачот каде што може да го исклучи микрофонот. Ова го потврди и сегашниов претседател на Собрание Талат Џафери на 8 октомври 2020 година: „Немало можност ни до 27 април ни после 27 април од пултот да се исклучи пратеник кој говори од говорница“ – рече Вељаноски.

Првообвинетиот ги изнесе сите аргументи дека тој како претседавач стриктно ги почитувал и се придружувал кон одредбите на Деловникот, нешто што го потврдија и сведоците Зоран Заев, Петар Атанасов, Африм Гаши, Никола Тодоров и други пратеници кои сведочеа.

 „Не сум бил дел од некаков план или организатор, такво мислење искажа и Заев“

– Обвинителството со ништо ама баш со ништо ниту докажа, а ниту понуди докази за тој некаков план во кој јас сум учествувал, а тоа е затоа што нема план и нема мое учество во тој наводен план – изјави Вељаноски и се повика и на изјава на сведокот Зоран Заев.

Како што е познато, сведокот Заев на ден 27 ноември 2020 година на главната расправа, го кажа следново: „Како човек, којшто беше жртва на тој настан, верувам дека бев еден од првотаргетираните во делот на насилството на тој настан, логично мислам дека има организатори на тој настан, но како упатен човек, информиран човек во тоа време шеф на парламентарната позиција во Парламентот, односно претседател на најголемата политичка партија не мислам дека главни осмислувачи, мотиватори, организатори на настаните на 27 април се Миле Јанакиески, Спиро Ристовски, Трајко Вељаноски. Не ги познавам другите“.

Трајко Вељаноски кажа дека обвинителниот акт не е базиран на опширна и детална истрага туку брзоплето е поднесен со цел во јавноста спектакуларно да се прикаже дека се најдени некакви организатори на немилиот настан.

– За таа цел обвинението е поткрепено со изјава на дежурниот лажен сведок на Обвинителството, лице кое е веќе осудено за овој настан Александар Василевски – Нинџа и кој во неколку наврати опишува различни верзии на настанот во кој учествувал.

„За мене е сатисфакција што 46 сведоци застанаа на страна на правдата и чесноста“

За мене, додаде тој, во целава тешка состојба во која бев доведен, сепак е сатисфакција фактот дека големиот број сведоци во целост го потврдија она што го тврдам во текот на постапката.

– Во таа смисла, чувството на остварување на правдата е дотолку поголемо бидејќи сведоците, независно од фактот дали се од владеачките или од опозициските партии, дали сме биле политички противници или политички сојузници или дали се високи државни функционери или административни службеници, застанаа на страната на вистината, на правдата и на чесноста – поентираше обвинетиот Вељаноски.

Политичките тиради на Обвинителството за случувањата во конгресот на САД

Можеме да зборуваме за различни случувања во многу светски парламенти, но овој суд има задача да ја утврди фактичката положба врз основа на оценка на сите докази поединечно и во склоп на една доказна целина – рече обвинетиот Вељаноски во однос на наводот на обвинителството дека во САД сите конгресмени биле евакуирани, Мајк Пенс застанал во одбрана на Уставот, а на Трајко Вељаноски  единствена грижа му била неговиот кабинет и неговото столче.

– Столчињата на Трајко Вељаноски, но и на сите други функционери во секој случај се од времен карактер, но не се тема на оваа постапка. Ако случувањата во Конгресот на САД на било каков начин се поврзуваа во овој судски процес, тогаш пред судот ќе беа изведувани докази на таа тема. Меѓутоа заклучокот на обвинителството не коренсподира со ниту еден доказ – истакна Вељаноски.

Недозволиво е судската кривична постапка, додаде тој,  да се користи за лична јавна промоција, ниту пак во постапката пред судот да се коментираат настани врз основа на медиумски известувања.

– Пред сè тоа е несериозен и непрофесионален пристап во вршењето на одговорната јавнообвинителска функција. Како таков е насочен само кон моја јавна дискредитација, што не смее да биде улога на обвинителот во постапката согласно ЗКП. Затоа го молам почитуваниот суд при одлучувањето особено да ги почитува одредбите од членот 6 на Европската конвенција за заштита на човековите права и да ги занемари политичките тиради пласирани од застапникот на обвинението, и да одлучува непристрасно врз основа на правилна оценка на доказите – рече во завршните зборови Вељаноски.

The post Трајко Вељаноски: Многу пратеници, сојузници, но и политички противници, сведочеа и заедно докажавме дека не сум ни организатор ни виновник за настаните од 27 април! appeared first on plusinfo.mk.

Еленко Миланов, адвокат на обвинетите во судскиот предмет за организаторите на настаните на 27 април 2017 година во Собранието во своите завршни зборови на рочиштето денеска откри дека препратена смс порака од поранешниот премиер Никола Груевски, Обвинителството не ја прикажало целосно.

Станува збор за порака препратена од шефот на кабинетот на Вељаноски, во која тој информира дека Заев во прес-салата одржал конференција во која, опозицискиот лидер, вели дека ако треба тие ќе изберат претседател и на Правниот факултет.

– Она што треба да се знае е дека пораката не е целосна и дека има дел во кој дека СДСМ истиот ден ќе има ЦК и дека најверојатно изборот на претседател ќе биде направен следниот ден на 28 април – рече адвокатот Миланов.

Груевски во пораката посочува дека според негови сознанија изборот на претседател ќе биде направен тој ден. Но, во тој момент пред екранот на Вељаноски имало петнаесетина пријавени пратеници за збор, а за кои немал деловничка можност да ги прекине. Тоа го потврди и Оливер Спасовски во своето сведочење. Дури и Заев рече дека Вељаноски политички коректно ја водел седницата, потсети Миланов на сведочењата на функционери на власта.

Миланов во завршните зборови истакна дека обвинетитот Трајко Вељаноски, немал никаква комуникација со ниту еден од другите обвинети за наводно планирање на упадот во Собранието.

Од 30.000 пораки од Вељаноски, воопшто нема комуникација со обвинетите Атанасовски, Бошкоски или со Јанакиески.

– Од ниту еден сведок од обвинителството не слушнавме дека Трајко Вељаноски имал комуникација со Владимир Атанасовски и Никола Бошковски. Во овој период Вељаноски нема апсолутно никаква комуникација со Миле Јанакиевски. Има шест пораки меѓу него и обвинетиот Спиро Ристоски, кој во тоа време бил министер за образование – рече Миланов според кого од сите изнесени докази, и вербални и материјални, само се потврдило дека Трајко Вељаноски конститутивната седница во Собранието ја водел строго според Деловникот.

– Не може за ова да го прогласите Трајко Вељаноски за виновен – рече Миланов.

Тој додаде дека уставниот поредок во тој период во Република Македонија е парламентарна демократија и истиот е и по 27 април 2017 година и никаде не постои навод, дека некој сакал или се обидел да воспостави друг уставен поредок во земјата.

– Уставниот поредок пред 27 април 2017 година е парламентарна демократија. И по овој датум е парламентарна демократија. Не постои друг систем и овој прв и основен дел од обвинението – терористичко загрозување на уставниот поредок и безбедноста, што им се става на товар на овие обвинети овде, не е исполнет. Ниту со пожар, ниту со експлозии, или општо опасно дејствие, што е услов за терористичко загрозување на уставниот поредок и безбедноста, нема загрозување. Овие обвинети не направиле такво нешто. Со тоа не е исполнет првиот и основен дел од оваа инкриминација за да може да се тврди дека некој од овде обвинетите го сторил делото. Ништо такво ниту се става на товар на обвинението, она што се става на товар е насилство – изјави Миланов.

Судот, претходно го одби барањето на одбраната за враќање на судењето за организаторите на 27 април во главна расправа кое се случи откако во завршните зборови на обвинителката Вилма Русковска беше изменет диспозитивот на обвинението. Судијата Илија Трпков рече дека обвинетите и нивните бранители досега имале можност да ги оспорат доказите, а обвинението ниту е проширено, ниту пак е променета квалификацијата на делото.

Судскиот процес го води судијата Илија Трпков, а застапник на обвинението е обвинителката Вилма Русковска.

Судскиот процес е во тек. Се очекува да продолжи со завршните зборови на Трајко Вељаноски.

The post Адвокатот Еленко Миланов: Од 30.000 пораки, Вељаноски воопшто немал комуникација со обвинетите Атанасовски, Бошкоски и Јанакиески appeared first on plusinfo.mk.

– Јас најмалку сум имала мотив за овој монструизен чин на масовно кршење на човековите права. Јас и моето семејство трпиме огромни последици, јас како жртва добив обвинение. Мојата совест е чиста. Почитувани судии не дозволувајте нечија желба за одмазда да ја потисне правдата бидејќи само вие имате моќ да донесете праведна одлука – со растреперен глас рече Јанкулоска.

Објавувањето на приватни комуникации и разговори кои и денес се присутни како и медиумскиот линч кон мене, се само дел од последиците кои ги трпиме, додаде Јанкулоска, која е на издржување на затворската казна за случајот „Тенк“.

– Затоа што сум дел од оние кои биле прислушувани, имам многу силен мотив сторителите да бидат казнети. Но, наместо да добијам шанса да бидам во листата на жртвите, јас добив обвинение и барање за долгогодишна затворска казна – рече Јанкулоска и побара од судот ослободителна пресуда.

– Кривичното дело кое Јавното обвинителство ми го става на товар не сум го сторила. Имате доволно докази правилно да процените и да ја донесете единствената можна пресуда, а во мојот случај тоа е ослободителна пресуда.

Таа образложи дека нема докази во обвинението и дека како министерка за внатрешни работи не му наложила на Секторот за правни работи да подготви решение за да се формира Комисијата за попис, расходување, уништување и бришење од евиденција на системи и техничка опрема во УБК и дека спротивно на  Упатството за вршење на попис ја формирала Комисијата, со што го сторила кривичното дело – злоупотреба на службената положба и овластување.

– Јас лично сум жртва на незаконското прислушување и имам над 23 илјади прислушувани разговори од моите телефонски броеви и уште толку СМС пораки – додаде Јанкулоска.

Таа, повикувајќи се на изјави на сведоци дадени во текот на судскиот процес објасни дека Комисијата не работела самостојно, туку по насоки што ги давал Горан Грујевски, поранешен началник на Петтата управа во МВР кој е во бегство. Јанкулоска потсети на сведочењето на раководителката на правната служба Весна Доревска, пред да биде поднесен предлогот од УБК, дека Горан Грујевски се јавил во правниот сектор со забелешка дека не постапиле по нивното барање, но откако била направена проверка на деловодните книги се утврдило дека немало такво барање. Јанкулоска рече дека, дури откако вработена во УБК инервенирала во правната служба и откако настанала расправија, правниците го направиле решението за Комисијата, а дека тогашната министерка, немала никаква комуникација со Правниот сектор, ниту пак можела да знае дека станува збор за опрема за следење на комуникации, тоа не било наложено во решението за формирање на комисијата, што го потпишала.

Јанкуловска објасни дека потпишаното решение е за формирање на Комисија во УБК за попис, расходување и ништење од листата на задолжување на опрема и технички средства во УБК и доколку констатира нејзина застареност, да изврши и ништење на сета опрема, а не за уништување на конкретна опрема.

– Повеќе од јасно е дека од ова решение не произлегување дека Комисијата треба да прави уништување на конкретна опрема, туку да направи попис, па потоа ако утврди техничка застарност да изврши утврдување на таква опрема. Ако комисијата направи попис и не утврди постоење на застарена опрема, не требало да пристапи кон ништење на опремата. Самите членови на Комисијата, потврдија дека од мене не добиле никакви насоки  – рече поранешната министерка.

Јанкулоска рече дека прво треба да се докаже дека со ништењето на опремата е сторена злоупотреба, па потоа таа да биде обвинета дека им помагала на Грујевски и на Тони Јакимовски, тогаш заменик шеф на УБК. Јанкулоска додаде дека системите за прислушување за кои таа ставила потпис да се уништат, имале вредност 1 денар. Системот, како што потсети Јанкулоска на изјави на сведоци, не бил функционален, односно не можел да ја следи ниту комуникацијата на Фејсбук, Вибер, Телеграм, Ватсап.

– Сето ова го потврдија и вештите лица Кире Јакимовски, Мирослав Костовски и Орце Симов. Јакимовски ги образложи недостатоците на системот од аспект на застареност и од аспект на функционирање дека не можел да пресретнува никаков сообраќај преку интернет. Во заклучното согледување констатира дека „Најс трак“ сисемот не функционира, како што е понудено во договорот, туку со недостатоци. Костовски, напомена дека системот воопшто не бил надградуван и имал големи недостатоци во 2014 и 2015 година, бидејќи сите комуникации одат преку интернет, а тој воопшто немал можност да пресретне таква комуникација. Симов, пак разјасни дека клучните компоненти на системот имале истекување на сервисниот период во 2014, а некои во 2015 година, и дека ако еден од компонентите има завршен животен век, завршува животниот век на целиот систем – рече Јанкулоска.

Судењето за незаконското прислушување почна на 22 декември 2017 година.

Обвинителниот акт вели дека преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби, а 1.541 број и по завршување на траењето на важноста на судските наредби.

Прислушувани биле над 20 илјади граѓани. Обвинителството, во завршен збор на минатото рочиште, посочи дека и покрај сите пречки со кои се соочувале во истрагата успеале да докажат дека обвинетите ги извршиле делата за кои се товарат и побара максимални затворски казни.

Претставникот на Агенцијата за национална безбедност рече дека Агенција останува на имотно-правното побарување од 1.418.897 евра.

Процесот го води судијката Џенета Бегтовиќ, а застапници на обвинението се Ленче Ристовска и Трајче Пеливанов.

The post Јанкулоска во „Таргет Тврдина“: Мојата совест е чиста, јас сум жртва и сум немала мотив за овој монструозен чин appeared first on plusinfo.mk.

Мене не ми требаат црвени телефони. Мене ми е чист образот. Некој да сакаше да го урне СЈО јас не му требав. Јас сум во притвор за пари што не се докажаа за Камчев да се спаси. Грубо сум изманипулирана од една личност и од неговата сопруга, рече Катица Јанева на заршницата во судскиот предмет „Рекет“ за кој изрекување пресуда судијката Васка Николовска-Масевска закажа на 18 јуни.

Јанева зборуваше дека за четири години покажала како еден обвинител треба да биде одважен и сигурен во себе и нагласи дека никогаш самата не би ги одбрала тие обвинители што „после четири часот не можат без салатка и ракија“.

– Пијаници и неисполнети личности не ми требаат. Кога станав шеф на СЈО, многу обвинители сакаа да дојдат. Ама јас реков дека за борба против криминалот ни требаат чесни луѓе. Затоа ги исфрлив некои и останувам на тој став – рече Јанев и додаде дека и е срам што е дел од судскио процес поради неспособноста и немањето докази.

– Ова голо обвинение без докази ми е жал што овие два дена го распарталивме како баница, јавната обвинителка Вилма Русковска не е тука да го чуе и да се црвени. Да подигнеш обвинение без извршени вештачења и тоа да биде прифатено од тројца судии. Секоја чест. Јас се срамам што сум дел од ова. А каде се парите? – праша Јанева.

Според неа, Русковска не докажала ништо во овој предмет.

– Само произлезе дека била свесна уште од старт дека води предмет за кој нема докази, се покажа дека наместо да биде објективен критичар всушност дава едно малициозно критизерство не само кон мене, туку и кон целото СЈО – рече Јанева и додаде:

– Да работеше јавната обвинителка, како што треба ќе утврдеше дека нема докази за ова дело и не може да покрене обвинение. Но, брзаше да покрене обвинение за три месеци, водена по тоа јас да не излезам од притвор. Тоа беше осуетено, па дури и се закануваше на судии со „тресење од гаќи” – рече Јанева во своите завршни зборови.

Таа ги спореше доказите, односно фотографијата на која е снимена со снопче пари.

– Јас на таа слика се гледа дека сум болна. Не играм чочек – срамота– рече Јанева.

The post Јанева за некои обвинители: Не ми требаа пијаници, се срамам од ова голо обвинение appeared first on plusinfo.mk.