Иако американскиот министер за здравство, Роберт Ф. Кенеди Помладиот, пред десетина дена изјави дека епидемијата на паразитот „Cyclospora cayetanensis“ е ставена под контрола, во САД и натаму се бележат нови случаи на заболени.

Според податоците на американскиот Центар за контрола и превенција на болести (CDC), само во периодот од 21 до 28 јули биле регистрирани околу 2.500 нови случаи. Од 1 мај досега се потврдени повеќе од 6.700 инфекции, додека уште над 11.500 случаи чекаат лабораториска потврда или дополнителна анализа.

Иако симптомите можат да бидат многу непријатни, досега не е регистриран ниту еден смртен случај. Во болница завршиле 423 лица, а здравствените власти сè уште се обидуваат да го утврдат изворот на заразата со паразитот што предизвикува силна и продолжена дијареа.

Првично, сомневањата беа насочени кон компанијата „Тејлор Фармс“, еден од главните снабдувачи на синџирот ресторани „Тако Бел“, откако Американската агенција за храна и лекови (FDA) соопшти дека во пакувана сечкана зелена салата биле откриени траги од паразитот.

Подоцна, FDA ја повлече таа информација, наведувајќи дека станувало збор за лажно позитивен лабораториски резултат. Сепак, компанијата доброволно ја повлече спорната салата од продажба.

Од Центарот за контрола и превенција на болести предупредуваат дека вистинскиот број заболени веројатно е значително поголем, бидејќи многу лица закрепнуваат без лекарска помош и воопшто не се тестираат за циклоспороза.

Најпогодени се сојузните држави Мичиген и Охајо. Според здравствените власти, случаи сè уште не се регистрирани единствено во Монтана, Ново Мексико, Мејн, Јужна Каролина и на Хаваите.

Експертите препорачуваат овошјето и зеленчукот темелно да се мијат пред консумирање или храната да се подложи на термичка обработка, бидејќи високите температури ги уништуваат микроорганизмите.

The post ОПАСЕН ПАРАЗИТ ПОВТОРНО СЕ ШИРИ НИЗ САД Илјадници нови случаи за само една недела, експертите сè уште го бараат изворот appeared first on plusinfo.mk.

Прогласување епидемија во Гостивар засега нема да има, сè додека не се утврди што е причината за зголемениот број граѓани кои во изминатите денови се јавуваат со стомачни тегоби, изјави министерот за здравство Сашо Клековски по посетата на Општата болница во Гостивар.

Тој информираше дека бројот на пациенти кои бараат лекарска помош останува речиси ист како и претходните денови, без значително зголемување или намалување.

– Првите пациенти се јавија во ноќта на 13 јули и од тогаш бројката е прилично константна. Над 200 граѓани дневно се јавуваат во болницата за интервенција. Во последните 24 часа имало 100 побарани интервенции на педијатрија и 160 на инфективното одделение – рече Клековски.

Според него, клиничката слика кај пациентите е слична. Најчесто станува збор за благи стомачни проблеми, дијареја и повраќање, а кај дел од заболени има и покачена температура.

Најголем дел од пациентите, како што посочи министерот, се третираат поради дехидратација, со примена на инфузија, витамини и друга симптоматска терапија, по што се пуштаат на домашно лекување.

Клековски по разговорите со раководството на гостиварската болница оцени дека медицинскиот персонал успешно се справува со состојбата и дека има доволно лекови и медицински материјали за третман на пациентите.

Тој упати апел до граѓаните да соработуваат со епидемиолошките служби и да ги пополнуваат анкетите, бидејќи тие се клучни за откривање на можниот извор на заразата.

– Од вчера се земаат копрокултури и се прават сите неопходни лабораториски анализи. Проширена е можноста да се бараат траги од адено и рота вируси. Вклучени се повеќе институции и се прават повеќе видови истраги – од можност за тешки метали, паразити, вируси и бактерии. Ни требаат многу повеќе епидемиолошки анкети за да го најдеме причинителот и да ги поврземе можните извори – изјави Клековски.

Во однос на изјавите дека храната би можела да биде причина за заболувањата, а не водата, министерот посочи дека конечниот збор треба да го имаат епидемиолозите.

– Ниту јас, ниту директорот на јавно претпријатие можеме да кажеме кој е причинителот. За тоа постојат епидемиолозите, Центарот за јавно здравје и Институтот за јавно здравје. Треба да ја очекуваме нивната оценка – рече Клековски.

Тој додаде дека според неговото лично мислење, можноста толкав број луѓе да се затрујат од ист вид храна е помалку веројатна, особено затоа што симптомите траат веќе неколку дена.

– За мене, логички, храната е помалку веројатен извор, но тоа мора да го потврдат анализите – додаде министерот.

Клековски очекува дополнителни резултати од анализите на водата од гостиварскиот водовод да бидат достапни од понеделник, по што ќе може да се има појасна слика за причините за заболувањата.

The post ПРОДОЛЖУВА МИСТЕРИЈАТА СО СТОМАЧНИТЕ ПРОБЛЕМИ ВО ГОСТИВАР Клековски бара повеќе анализи пред одлука за епидемија appeared first on plusinfo.mk.

Водечката африканска агенција за јавно здравје денеска потврди дека во покраината Итури, во Демократска Република Конго, избувнала епидемија на ебола.

Африканските центри за контрола и превенција на болести соопштија дека поради ситуацијата ќе одржат итен состанок, додека здравствените власти предупредуваат на ризик од понатамошно ширење.

Според првичните податоци, пријавени се околу 246 сомнителни случаи и најмалку 65 смртни случаи, најмногу во здравствените зони Монгбвалу и во Рвампара.

Не е најсмртоносниот сој

Агенцијата соопшти дека првичните анализи укажуваат на сој на вирусот што не припаѓа на Заир, најчестиот и најсмртоносен тип на ебола.

Во тек е дополнително секвенционирање за попрецизно утврдување на карактеристиките на вирусот.

– Постои ризик од понатамошно ширење поради урбаното опкружување и интензивното движење на населението – предупреди Африканскиот центар за контрола и превенција на болести.

Здравствените власти се особено загрижени поради мобилноста поврзана со рударските активности во регионот.

Смртоносен вирус

Еболата е тешка вирусна болест што често има фатален исход. Се пренесува преку директен контакт со телесни течности од заразени лица, контаминирани предмети или тела на починати пациенти.

Конго со години се соочува со периодични епидемии на ебола, а здравствените системи во делови од земјата остануваат под силен притисок.

The post ПОТВРДЕНА Е ЕПИДЕМИЈА НА ЕБОЛА ВО КОНГО Умреле најмалку 65 лица, 246 се заразени appeared first on plusinfo.mk.

Светската здравствена организација соопшти дека се потврдени 11 случаи на хантавирус поврзани со крузерот „Ем-Ви Хондиус“, меѓу кои и три смртни случаи. Девет од заразените се инфицирани со реткиот сој Андите, единствениот вид хантавирус што може ограничено да се пренесува и од човек на човек.

Здравствените власти ширум светот сега трагаат по десетици патници од 12 држави кои по симнувањето од бродот патувале низ повеќе континенти без да знаат дека можеби го носат вирусот. СЗО засега го оценува ризикот за јавното здравје како низок, но предупредува дека ситуацијата може дополнително да се развива поради долгата инкубација на вирусот, која трае од една до осум недели.

Двајца холандски државјани, 70-годишен маж за кој се верува дека е „нултиот пациент“ и неговата сопруга, починаа како последица на хантавирусот. Третиот заразен Холанѓанец е лекар од бродот кој бил итно евакуиран и се лекува во изолација.

Интересно е што во моментов во Холандија е во карантин црногорски државјанин, инаку член на екипажот на крузерот, на кого не му е дозволено да го напушти хотелот во Ајндховен додека не се завршат пропишаните мерки.

 

View this post on Instagram

 

A post shared by Roya News English (@royanewsenglish)

Потврдени случаи има и во Шпанија, Велика Британија, САД, Швајцарија, Јужна Африка и други земји. Во неколку држави патници и членови на екипажот се ставени во карантин или под строг здравствен надзор, додека американските власти следат контакти во најмалку седум сојузни држави.

Особено внимание предизвика случајот на Французинка евакуирана од бродот, чија состојба според директорот на СЗО, Тедрос Аданом Гебрејесус, е „многу критична“. Таа првично не била тестирана за хантавирус, бидејќи симптомите биле припишани на стрес и анксиозност, иако на бродот веќе имало потврдени инфекции и смртни случаи. Дури по наглото влошување на нејзината состојба за време на летот кон Париз, тестовите покажале дека е позитивна на вирусот.

Инфекцијата е потврдена кај двајца Британци. Две лица се самоизолираат дома без симптоми, но мора да избегнуваат контакт 45 дена.

Откако евакуираниот авион слета во Небраска, еден американски државјанин беше позитивен на вирусот, но без симптоми, додека друго лице покажува симптоми и е примено во болница во Атланта. Здравствените службеници во најмалку седум американски држави ги следат контактите, вклучително и оние од комерцијални авиони.

Меѓу загинатите е и германски патник, чие тело беше заробено на бродот со денови пред да биде транспортирано. Во исто време, Швајцарец кој го напушти бродот и патуваше дома со летови преку Јужна Африка и Катар разви симптоми по враќањето и сега е позитивен на сојот на Андите. Тој се лекува во строг карантин во болница во Цирих.

Мрежата на „сомнителни“ контакти се протега низ целата планета: од Јужна Африка и Сенегал. Патниците од овие африкански земји, исто така, се позитивни на смртоносниот сој на Андите. Во Полска едно лице е итно ставено под епидемиолошки надзор и сè уште не покажува симптоми.

Еден евакуиран маж во Грција ќе помине 45 дена во задолжителен болнички карантин, во посебна комора со негативен притисок во Атина. Патници во Данска (еден граѓанин) и Сингапур (две лица) се исто така под строг надзор и самоизолација. Исто така, 38 морнари од Филипините чекаат карантин во Ротердам пред да се вратат дома,

Случаите предизвикаа глобална тревога бидејќи станува збор за редок и потенцијално многу опасен сој на вирусот, а дел од патниците патувале со комерцијални летови низ Европа, Африка, Азија и Северна Америка пред да бидат идентификувани и ставени под надзор.

The post КАДЕ ДОСЕГА ГО ИМА ХАНТАВИСУРСОТ И КАКВИ МЕРКИ СЕ ПРЕЗЕМААТ Поради долгата инкубација, карантинот може да трае до 8 недели appeared first on plusinfo.mk.

Институтот за јавно здравје (ИЈЗ) ја следи состојбата поврзана со пријавениот мултинационален кластер на случаи на инфекција со хантавирус поврзан со патување на крузерот MV Hondius во регионот на јужниот Атлантски Океан.

Според информациите објавени од Светската здравствена организација (СЗО), Европскиот центар за превенција и контрола на болести (ECDC) и националните здравствени власти на засегнатите земји, досега се регистрирани 8 потврдени, како и сомнителни случаи кај патници и членови на екипажот, вклучително и 3 смртни исходи. Епидемиолошките, клиничките и лабораториските испитувања се во тек, а меѓународните здравствени институции спроведуваат координирана истрага со цел утврдување на изворот на инфекцијата, можниот начин на изложеност и проценка на ризикот.

Според моментално достапните информации, изложеноста најверојатно е поврзана со активности и престој во области каде постои природно присуство на глодари – природни резервоари на хантавирусите. Во тек е дополнителна анализа за утврдување на точниот тип на вирусот и евентуалните фактори кои придонеле за појавата на кластерот.

– Во овој момент нема регистрирани случаи, патници или блиски контакти поврзани со Македонија, ниту постојат индикации за ризик по јавното здравје во државата. Хантавирусите претставуваат група на зоонозни вируси кои циркулираат кај различни видови глодари. Луѓето најчесто се инфицираат преку вдишување на аеросоли контаминирани со урина, измет или секрети од инфицирани глодари, како и преку директен контакт со контаминирани површини. Ограничен пренос од човек на човек е документиран само кај одредени типови на хантавирус и се смета за редок – соопштуваат од ИЈЗ.

Заболувањето може да се манифестира со различна клиничка слика, од лесна фебрилна болест до потешки форми со зафатеност на бубрезите или белите дробови.

Клинички најчесто се манифестираат во два основни синдрома: хеморагична треска со бубрежен синдром, која е регистрирана во нашата земја и хантавирусен белодробен синдром.

Хеморагичната треска со бубрежен синдром претежно се јавува во Европа и во Азија, а е предизвикана од вируси како Hantaan, Dobrava-Belgrad и Puumala. Болеста обично започнува нагло, со висока температура, главоболка, болки во грбот и стомакот, како и општа слабост, а подоцна се развиваат бубрежен синдром (намалено излачување или целосен престанок на излачување урина) и хеморагичен синдром (зголемена пропустливост на крвните садови и крварења во кожата, слузокожите и органите). Смртноста е релативно ниска и се движи од 1% до 15%.

Хантавирусниот белодробен синдром, познат и како хантавирусен кардиопулмонален синдром, се јавува главно во Северна и во Јужна Америка, а најчесто е поврзан со Sin Nombre вирусот. За разлика од хеморагичната треска со бубрежен синдром, се карактеризира со доминантно зафаќање на белите дробови. Почетните симптоми се неспецифични и потсетуваат на грип (температура, малаксаност, болки во мускулите), но брзо се развива респираторна инсуфициенција. Има значително повисока стапка на смртност, често помеѓу 30% и кај повеќето хантавируси, вклучително и оние кои предизвикуваат хеморагичната треска со бубрежен синдром во Европа (на пример Puumala и Dobrava-Beograd вирус), не е докажан пренос меѓу луѓе.

– Инфекцијата речиси секогаш се случува преку контакт со излачевини од заразени глодари. Меѓутоа, кај Andes вирусот во Јужна Америка е потврден ограничен интерхуман пренос, најчесто при близок контакт (на пример членови на семејство, здравствени работници) преку респираторни секрети во раната фаза на болеста. Не постои специфична антивирусна терапија или вакцина за хантавирусна инфекција. Лекувањето е супортивно. Превенцијата на хантавирусните инфекции првенствено зависи од намалување на контактот помеѓу луѓето и глодарите. Според моменталните сознанија и проценките на меѓународните здравствени институции, ризикот за пошироката популација останува низок – вели Институтот.

Светската здравствена организација и Европскиот центар за превенција и контрола на болести во моментов не препорачуваат воведување дополнителни рестриктивни мерки за патување или трговија. Сепак, се препорачува зголемена внимателност при престој во области каде постои ризик од изложеност на глодари и нивни излачувања.

Институтот за јавно здравје останува во постојана комуникација со меѓународните здравствени мрежи за рано предупредување и одговор, континуирано ја следи состојбата и навремено ќе ја информира јавноста за сите нови сознанија, проценки на ризик и евентуални препораки.

Одделението за вирусологија при ИЈЗ располага со реагенси за детекција на оваа група вируси.

The post МАКЕДОНИЈА ИМА РЕАГЕНСИ ЗА ОТКРИВАЊЕ НА ХАНТАВИРУС Нема регистрирани случаи, патници или блиски контакти поврзани со земјава appeared first on plusinfo.mk.

Шпанија му дозволи на крузерот „Хондиус“, погоден од случаи на хантавирус со три смртни случаи, да се закотви на Канарските Острови, додека здравствените власти алармираат дека на бродот се случило пренесување на вирсуот од човек на човек.

Мадрид, исто така, се согласи лекарот на „Хондиус“, кој е во критична состојба, да биде пренесен со авион на Канарските Острови.

Одлуката е донесена во координација со Светската здравствена организација (СЗО) и Европската Унија, во согласност со меѓународното право и хуманитарните принципи, соопшти шпанското Министерство за здравство.

Крузерот „Хондиус“ (Hondius), со околу 150 патници и членови на екипажот, тргнал од јужна Аргентина и моментално е закотвен кај Зелено’ртските Острови (Cape Verde).

Светската здравствена организација (СЗО) верува дека се случило пренесување на хантавирус од човек на човек на крузерот во Атлантикот, изјави епидемиолог на СЗО, Марија Ван Керхове, на прес-конференција во Женева.

Тројца патници на крузерот „Хондиус“ починаа во сомнителната епидемија. Жртвите се постара двојка од Холандија и еден државјанин на Германија. СЗО моментално се сомнева на вкупно седум заразени со вирусот, додека лабораториските тестови се во тек.

Претходно, СЗО на платформрата „Икс“ објави дека „инфекциите со хантавирус обично се поврзани со изложеност на животната средина (изложеност на урина или измет од заразени глодари)“. Но, Ван Керхове рече дека пренесувањето меѓу луѓето е можно со варијантата „Андес“ (Andes), на која се сомневаат во овие случаи.

СЗО верува дека синџирот на инфекција почнал со холандската двојка, која можеби била заразена пред да се качи на бродот. Ван Керхове истакна дека многу патници на бродот оделе на излети за набљудување диви животни и слични активности. Таа сугерираше дека понатамошната инфекција можела да се случи во затворените простории на „Хондиус“, но не го исклучи ниту заразувањето од глодари на островите посетени за време на крстарењето.

Холандскиот оператор „Ошнвајд експедишн“ инсистираше на тоа дека на бродот нема стаорци. Бродот пловел од Аргентина кон Зелено’ртските Острови кога патниците се разболеле.

Холандија ги предводи напорите за евакуација на преостанатите патници и екипажот, бидејќи крузерот плови под холандско знаме. Според холандското Министерство за надворешни работи, три лица кои се разболеле, вклучително и еден холандски државјанин, треба да бидат евакуирани од „Хондиус“ и пренесени во Холандија „што е можно поскоро“.

Хантавирусот може да предизвика треска и тешки респираторни заболувања кај луѓето. Пренесувањето од човек на човек е ретко, според СЗО. Луѓето обично се инфицираат со вдишување прашина, на пример при чистење на правливи простории, или преку каснувања. Појава на вакво жариште на брод е невообичаено.

The post СЗО УТВРДИ ДЕКА ХАНТАВИРУСОТ МОЖЕ ДА СЕ ПРЕНЕСУВА ОД ЧОВЕК НА ЧОВЕК! Шпанија му дозволи на „заразениот“ брод да се укотви на Канарските Острови appeared first on plusinfo.mk.

Бројот на потврдени случаи на коронавирус во Германија повторно е во пораст. Според најновите податоци од Институтот Роберт Кох (RKI), во 37-та недела од 2025 година се пријавени 2.396 нови инфекции, што е повеќе од 2.153 случаи регистрирани во претходната недела.

Овој тренд на зголемување трае од крајот на август и се очекува да продолжи до крајот на септември.

Истовремено, расте и бројот на акутни респираторни инфекции кај сите возрасни групи. Иако повеќе луѓе бараат лекарска помош поради поблаги симптоми, бројот на потешки случаи кои бараат болничко лекување засега останува низок. Тоа покажува дека вирусот се шири, но не предизвикува сериозна епидемија, пренесува списанието Fenix.

Доминација на новиот сој „Stratus“

Главна улога во порастот ја има новата варијанта XFG, позната како „Stratus“. Според RKI, таа е откриена во 84% од анализираните примероци и моментално е доминантна во Германија.

За споредба, во 32-та и 33-та недела нејзиното учество било 65%. Светската здравствена организација (СЗО) наведува дека „Stratus“ е позаразен од претходните соеви, но нема докази дека предизвикува потешки форми на болеста.

RKI дополнително нагласува дека, покрај коронавирусот, во циркулација се и риновируси и параинфлуенца — слично како и по завршувањето на летните одмори во претходните години, кога респираторните инфекции стануваат почести.

Познатиот превентивен лекар и медицински новинар Кристоф Шпехт вели дека ваквиот развој е очекуван.

– Коронавирусот ќе остане со нас — ќе живееме со него долгорочно – изјави тој за германскиот медиум ntv.de.

Според него, зголемувањето на бројот на инфекции во септември е типично, бидејќи во постудените месеци луѓето поминуваат повеќе време во затворен простор, што го олеснува ширењето на вирусот.

Шпехт додава дека ситуацијата не може да се споредува со почетокот на пандемијата.

– Сега имунитетот е многу посилен, а симптомите што најчесто ги пријавуваат луѓето се благи — засипнатост, болно грло, класични симптоми на настинка.

Здравствениот систем засега стабилен

Иако болниците и ординациите засега не бележат значителен пораст на пациенти со коронавирус, експертите предупредуваат дека товарот може да се зголеми во следните недели, особено ако се поклопат сезоните на грип, RSV и COVID-19.

За општата популација се препорачува претпазливост, особено кај ризичните групи, вклучително и носење маски.

Сепак, Шпехт смета дека нема простор за паника:

– Коронавирусот веќе не е исклучок — ако некој се плаши од него, тогаш треба да се плаши и од другите вируси што кружат во есен и зима.

The post НОВИОТ СОЈ „СТРАТУС“ ДОМИНИРА ВО ГЕРМАНИЈА Расте бројот на новозаразени со коронавирус appeared first on plusinfo.mk.

Бројот на заболени од грип во Хрватска го достигна врвот со 24.498, при што минатата недела се пријавени 5.507 случаи, додека 30 лица починале од компликации, покажуваат податоците на Хрватскиот институт за јавно здравје, објави Танјуг.

На отворените одделенија има 30 заболени од грип, потврди раководителот на Клиниката за инфективни болести во Загреб „Д-р Фран Михаљевиќ“, Иван Пуљиз.

– Покрај тоа, имаме 6 пациенти на одделот за интензивна нега за возрасни. Станува збор за пациенти со најтешки компликации од грип. Повеќето од нив дојдоа од други клинички центри во Република Хрватска – изјави Пуљиз.

The post СМРТОНОСЕН БРАН НА ГРИП ВО ХРВАТСКА Животот го загубија 30 луѓе, илјадници се заразени appeared first on plusinfo.mk.

Директорката на Институтот за јавно здравје (ИЈЗ), Марија Андоновска, во изјава за медиумите рече дека се забележува зголемување на бројот на заболени од грип, кој сега го надминува прагот за средна активност. Таа нагласи дека резултатите од вирусолошкиот надзор на инфлуенцата покажуваат широка географска активност на грипот, а процентот на позитивност е над 10 проценти за петта недела по ред.

Според неа, во периодот од 5 до 9 февруари годинава, во Македонија се пријавени 2.880 случаи на заболени од грип или заболувања слични на грипот. Тоа е намалување од 5,1 проценти во однос на претходната недела, кога бројот бил 3.036. Најмногу заболени има во Скопје – 692 лица, следат Струмица со 333, Битола со 304, Свети Николе со 158, Охрид со 141, Радовиш со 122, Велес со 140 и Куманово со 109 заболени. Во другите градови низ земјата бројот на заболени е под 100.

– Според достапните податоци, Македонија во овој период има висок интензитет на вирусот на грип. Иако бројот е малку помал во споредба со претходната недела, сè уште има значително зголемување во однос на истата недела од минатата сезона, кога бројот на заболени беше само 1.875, што означува зголемување од 53,6 проценти – изјави Андоновска.

Според директорката, во споредба со шестата недела во последните 14 сезони, кога бројот на заболени бил 2.585, оваа недела се бележи зголемување за 11,4 проценти.

Во однос на возрасната дистрибуција на заболени, најголем дел се на возраст од 15 до 64 години – 1.552 лица, следуваат 685 деца на возраст од 5 до 14 години, 317 деца од нула до 4 години и 217 лица над 65 години.

Андоновска посочи дека оваа сезона се регистрирани вкупно 11.614 случаи на грип, што е зголемување од 10,2 проценти во споредба со истиот период минатата година. За последните 14 сезони, зголемувањето е 11,8 проценти.

– Ние сме во редовна комуникација со надлежните институции, кои ја следат ситуацијата. Министерот веќе издаде насоки за здравствените институции да ги почитуваат превентивните мерки со оглед на бројките што ги имаме – истакна Андоновска, одговарајќи на новинарско прашање во врска со препораките на Комисијата за заразни болести.

Во однос на состојбата во Европа, Андоновска нагласи дека стапките на заболени од грип и акутни респираторни инфекции во 29 од вкупно 33 земји се покачени над основните нивоа.

Таа апелираше на следење на препораките за превенција на заболувања слични на грип и истакна дека при појава на симптоми, заболените треба да ги почитуваат препораките за самоизолација и останатите мерки што се веќе познати.

The post ГРИПОТ СЕ ШИРИ НИЗ МАКЕДОНИЈА Досега биле заболени 11.600 лица, 2.880 нови случаи за една недела appeared first on plusinfo.mk.

Секој што ќе влезе во Кина од земји со случаи на мпокс, оние кои стапиле во контакт со заразени лица или тие симптоми ќе бидат тестирани. Исто така се предвидува возилата, стоките и другиот увоз од подрачја со мпокс да се дезинфицираат.

Светската здравствена организација (СЗО) пред два дена прогласи глобална вонредна состојба за јавно здравје поради новата варијанта на мпокс во Африка. Додека во Шведска е забележан првиот потврден случај надвор од Африка на новиот сој на мпокс.

Мајмунските сипаници се вирусно заболување кое предизвикува осип со меурчиња. Се пренесува преку физички контакт со заразени лица или животни, како и преку контакт со контаминирани материјали. Иако повеќето пациенти целосно оздравуваат, болеста може да биде опасна за деца, бремени жени и лица со ослабен имунитет. Според СЗО случаите на мајмунски сипаници се присутни во 13 африкански држави.

The post СЕКОЈ ШТО ЌЕ ДОЈДЕ ОД ЗЕМЈА СО МАЈМУНСКИ СИПАНИЦИ ЌЕ БИДЕ ТЕСТИРАН Кина воведе правила за следните 6 месеци appeared first on plusinfo.mk.