„Работата е најдобра ресоцијализација. На тој начин што ќе оспособиме осудени лица или осуденички и ќе им дадеме занает, ние ќе им дадеме начин како кога ќе излезат од затворите да приходуваат за сопствениот живот, а да не се враќаат на криминалот“.

Вака вели директорот на Управата за извршување на санкции Александар Пандов и нагласува дека веќе година и половина, како е на функцијата, работат да се смени начинот бидејќи „за жал сега доаѓаат да ја одлежат пресудата, а не да ја одработат“.

Пандов, кој денеска заедно со претседателот на Затворот „Идризово“ Зоран Јовановски оствари средба со Претседателката Гордана Сиљановска-Давкова, посочи дека првпат во историјата на Република Македонија, претседател на држава е дојден во посета да види работно ангажирани осуденички.

– И тоа е голема чест и за затворскиот систем, за Управата за извршување санкции, за самиот затвор Идризово. И јас, ќе ми дозволите повторно да го кажам она што го кажа и претседателката, а тоа е дека сум длабоко уверен, а сега после овие година ипол директорување во Управата имав можност да посетам неколку држави и повеќе затвори. Работата е таа којашто е најдобра ресоцијализација – изјави Пандов.

Пандов посочи дека во секој затвор има работно ангажирани луѓе коишто се грижат околу самиот затвор, меѓутоа економски a има во помалку повеќе во секој затвор, посочувајќи дека со реконструкцијата на Затворот „Идризово“, освен шивална, ќе имаат работилници и за столарија и за  металургија.

– И сега ако имало претходно наследени три, да речеме, три добитока, сега има, зголемена е таа бројка, потребно е време. Ако немало никаква фарма, сега е изградена фарма. Она што постојано го кажував. Ние претходно како затворски систем едно јајце не произведуваме што е едноставна работа. Треба да се направат кокошарници, и да се купат кокошки, да се ранат. Сега тоа е сменето во не толку мал дел од затворите веќе тоа е придвижена работа. И јас ве уверувам дека тоа од година во година ќе биде сè поголем број, а со завршување догодина кога ќе почне да се гради втората фаза во затворот Идризово, предвидени се и објекти каде што ќе имаме и столарија и металургија, текстилна фабрика, каде што ќе се произведуваат и облеки, и за затворениците и за затворската полиција. Можеби во идно време постелнини, сето тоа. Секакви потреби коишто имаат затворите, самите затвори да го произведуваат тоа – изјави Пандов.

Претседателката Гордана Сиљановска-Давкова ја посети шивачката работилница, којашто функционира во рамките на женското одделение во КПУ-КПД Идризово, Скопје, каде оствари разговор со осуденичките, кои се вклучени во процесот на шиење и везење.

Осуденичките ја запознаа претседателката со нивните работни активности, мотивацијата и желбата за работа, инспирацијата и стекнатите вештини, и лично ги претставија своите изработки – торби, марами и несесери коишто се продаваат надвор од затворот под логото „везење надеж зад решетки”.

Шивачката работилница, којашто за првпат е отворена на иницијатива на модната дизајнерка Ирина Тошева, истовремено и менторка на осуденичките, Сиљановска-Давкова ја оцени како позитивен модел на ресоцијализација, самоодржлив, но и профитабилен.

Според претседателката, ресоцијализацијата е една од клучните цели на казнено-поправниот систем, посочувајќи дека казната не е само изолација, туку и подготовка на осудените лица за одговорно и активно вклучување во општеството.

The post ДА ИМ ДАДЕМЕ ЗАНАЕТ ЗА ДА НЕ СЕ ВРАЌААТ НА КРИМИНАЛОТ Работата е најдобра ресоцијализација за затворениците appeared first on plusinfo.mk.

Според пишувањата на граѓаните, станува збор за пушкаџијата Пецо Кузмановски попознат како Сандокан, кој речиси 40 години се занимава со поправка на секаков вид оружје и кој е познат по својот занает кај сите ловџии во Македонија, но и пошироко.

„Ај сега шала на страна, еве го чоечево што најлегално, лиценцирано и со сите дозволи, работи (сервисира) оружје, занает за кој и јавно зборува пред години. Кој е од Крушево, го познава Сандокан. Абе она што го викате држава ви се распаѓа и хоризонтално и вертикално, пичлемиња и копиљаци ви се расфрлаат со милиони и раскурцуваат сѐ до пепел, купена администрација, министри, судство, псеудо премиери и претседатели, а вие се фативте на чесен занаетчија да покажувате сила? Ах бре, ах… Полудено е сѐ таму, повеќе од очигледно…“, напиша на Фејсбук новинарот Игор Филевски-Филе.

„Пронајдоа оружје, а што помислиле дека ќе најдат при претресот на лиценциран занаетчија, кој го поправал оружјето од целата земја и пошироко, заврши огромна работа…“, пишува во еден од коментарите.

„Сабајле веројатно како и сите вие, ја видов веста за крушевчанец П.К. (71) за поседување над 60 пушки и над 60 пиштоли и околу 2.000 парчиња ловечка и боева муниција. Си викам, немогуче е ова, цајканиве да не влегле у некој МУЗЕЈ, не е можно ова… И додека станав кафе ова она заборавив да проверам… Иииии сега гледам кај Игор на ѕид и што да видам, сум погодил бар 90%. Се работи за Петко Кузмановски мајстор занаетчија со над 30 години работно искуство за поправање оружје за кого е снимена емисија пред најмалку 8 години. Ние немаме ПОЛИЦИЈА, искрено НЕМАМ ЗБОР за да ги опишам. Кој срам за Македонија, резил над резилите…“, се вели во коментарот на еден скопјанец кој го споделува Фејсбук статусот на Игор Филевски.

Да биде уште поинтересно, како што коментираат корисниците на Фејсбук, Кузмановски бил началник на полицијата во Крушево, дури честопати во својата работилница го поправал оружјето на МВР.

Кузмановски дури јавно пред камерата на ТВ Алфа пред речиси 10 години јавно говори дека повеќе од 25 години се занимава со поправка на секаков вид оружје, занает кој самиот го научил.

Инаку, за потсетување, вчера преку соопштение МВР информираше дека над 60 пушки, над 60 пиштоли и околу 2.000 парчиња ловечка и боева муниција од различен калибар, како и разни делови за пушки и пиштоли биле запленети од страна на полицијата во домот на П.К (71) од Крушево.

– Криминалистичката полиција на СВР Битола во заедничка акција со полициски службеници од ОВР Крушево, по претходно добиена судска наредба изврши претрес во дом и простории на П.К. од Крушево – вели портпаролката на СВР Битола.

Од СВР Битола велат дека за случајот е известен Јавен обвинител. По целосно расчистување и документирање на случајот против лицето ќе биде поднесен соодветен поднесок.

ЦЕЛ АРСЕНАЛ И МУНИЦИЈА НАЈДЕНИ ВО КРУШЕВО Пензионер дома чувал над 60 пиштоли, над 60 пушки и 2.000 парчиња муниција

The post НА КОГО МУ ПРЕЧЕШЕ САНДОКАН ПУШКАЏИЈАТА? Занаетчија поправал оружје во својата работилница во Крушево, полицијата му го заплени appeared first on plusinfo.mk.

Претседателот на ЗКРСМ, Агрон Фазлји изјави дека ако се донесе овој закон како што сега е предложен ќе придонесе за зголемување на сивата економија и ќе затвори огромен дел од микро, малите и занаетчиските дејности.

– Покрај кризите со кои се соочивме, пандемската, економската, енергетската криза сега, последен удар за нас е и овој предложен закон. Нашите членки реагираат и укажуваат дека наместо државата да се бори со сивата економија, да обезбеди услови за формалните дејности, на овој начин иницира формалните дејности кои и онака тешко опстојуваат на пазарот да преминат во непопуларната и никому од корист сива економија – изјави Фазлији.

За занаетчиските дејности е важно да има даночни олеснувања, пред сè паушално оданочените занаетчии да имаат 50 проценти помалку данок во однос на претходната година. Реално оданочените занаетчии да не плаќаат данок до три милиони денари на годишно ниво.

Како што појасни Фазлији, од 2023-та година занаетчиите очекувале да се зголеми прагот на плаќање на ДДВ од сегашни два на три милиони денари и да бидат ослободени од плаќање на данокот за да може да ја придвижат економијата.

– Ние не сме против даноци, напротив, бараме да има фер услови за работа и лојална конкуренција – изјави Фазлији.

ОД ЗКРСМ најавија дека ќе поднесат свои предлози за даночни реформи.

Собранието веќе ги усвои измените на Законот за данокот на личен доход, со што од 1 јануари 2023 година ќе продолжи да се применува рамниот данок од 10 проценти, односно се укинува прогресивното оданочување и се одложува даночењето на каматите на заштедите до влезот на државава во ЕУ. Во наредниот период треба да се усвојат измените и дополнувањата на Законот за ДДВ и Законот за данокот на добивка, кои исто така се дел од Концептот на даночна реформа.

The post ЗАНАЕТЧИИТЕ НЕЗАДОВОЛНИ ОД ИЗМЕНИТЕ ЗА ЗАКОНОТ НА ДОБИВКА „Наместо власта да се бори со сивата економија, ударот е врз нас“ appeared first on plusinfo.mk.