Владата не мислеше на болните кои треба да одбегнуваат или не смеат да јадат бел и полубел леб кога ја замрзна цената само на овој тип леб, реагираат болни од дијабет, стари лица и оние кои не треба да јадат храна со глутен. Тие велат дека се изложени на голем трошок за лебот кој го користат секојдневно, а чија цена остана висока. Дополнително имаат и трошоци за лекови кои не се мали.

Според нив, Владата требаше да побара компаниите да ги намалат цените и на другите типови леб за да ѝ олесни и на оваа категорија луѓе или да спроведува посебна политика за нив.

– За нас нема никакво значење тоа што полубелиот и белиот леб се со цена од 33 денари, бидејќи воопшто не го користиме тој леб. Имаме дијабетичар дома и купуваме леб кој треба да го јаде. Цената на овој вид леб не е ниту намалена, ниту замрзната а трошокот е висок и заедно со лековите ни создава проблем, бидејќи имаме ниски примања. Но, кога се носат одлуки во Владата никој не се сеќава на болните луѓе кои треба да користат друг вид леб. Бројот на овие луѓе не е мал – вели Марија А.

Со оглед дека дијабетичарите постојано треба да водат грижа за одржување на нивото на шеќер во крвта, што значи и посебен режим на исхрана, тие користат одреден видови леб, главно интегрални или леб наменет за дијабетичари. Овие лебови имаат цена од 72 до 120 денари.

Од здруженијата на дијабетичари велат дека проблемот е многу поголем кај семејствата кај кои дијабетесот е генетски и има заболени повеќе членови на семејството.

– Замислете овие луѓе треба да купат 2 или 3 леба дневно. Тоа не се малку пари, бидејќи најголемиот број од семејствата се со ниски плати, дел се и со пензионери. Во Скопје, на пример, може да се најде специјален леб за дијабетичари, а во другите градови ние користиме интегрален или леб сличен на него. Затоа сметам дека е добро и овој леб да има некоја подостапна цена – вели Митко Митевски, претседател на Здружението на дијабетичари од Кавадарци.

Ваквата идеја ја поздравуваат и од Здружението на лица со дијабетес „Алегрија“ од Скопје.

– Супер би било да има и таква мерка. Како и тоа да не биде само како мерка туку како политика на државата, лебот и печивата за дијабетес за нас да се со пониски (реални) цени – велат од Здружението.

Од ова Здружение потсетуваат дека лицата со дијабетес можат да јадат секаков леб, само ако добро го дозираат инсулинот, но него го нема.

– За жал, инсулинот и тестерите за инсулин уште недостигаат во делови од земјава што е дополнителен проблем за болните – велат од Здружението.

Во Македонија 170.000 луѓе страдаат од дијабетес, а околу 48.000 имаат дијабетес тип 1 и користат инсулинска терапија. Според анализите, еден од тројца луѓе во земјава имаат пред-дијабетна состојба. Вкупно 800 деца и млади лица до 18-годишна возраст имаат дијабет тип 1 и користат инсулинска терапија.

Но, не само дијабетичарите, за високата цена на лебот се жалат и други болни кои треба да користат одделни видови леб како луѓето кои се болни од целијакија, хронична автоимуна болест што се карактеризира со неподносливост на организмот на глутен. Тие велат дека безглутенската храна е поскапа за повеќе од 100 отсто од глутенската.

– За нас болните од целијакија државата воопшто не води грижа. Ние не ги користиме лебовите од житарки но оние кои ги користиме се многу скапи. На пример, безглутенскиот леб со додатоци на ленено семе или чиа чинат од 315 до 395 денари и повеќе. Овие пари мора да ги издвоиме дневно, но никого не го интересира дали можеме да си го дозволиме тоа. Ако се сведете на леб од хељдино брашно тогаш во продавниците тоа чини од 73 до 84 денари. Секако, можеме и да набавиме безглутенско брашно кое исто така е скапо иако го земаме на рецепт, но не секогаш го има. Тоа сега во аптеките чини 150 денари, но процедурата е компликувана и ретко кој го зема од аптека. Во продавниците цената на безглутенското брашно се движи од 199 денари до 1.378 денари зависно од составот и дали е органско, па одете и купете, ако имате минимална или просечна плата. Велат ги намалуваат и цените на тестенините, па безглутенските, најевтините кои се од ориз чинат 95 денари, а зависно од составот чинат и до 302 денари – вели Маргарита од Скопје.

Таа додава дека употребата на глутенски леб кај овие болни и во мали количини предизвикува проблеми.

– Една студија покажа дека кај болните веќе еднократна доза на 1/5 од обично парче леб (околу 625 милиграми на глутен) е доволно да предизвика сериозни симптоми, вклучувајќи тешка дијареја и повраќање, да ја влоши атрофијата на цревните ресички на тенкото црево. Присуството на горенаведените симптоми и зголемувањето на воспалението на цревата има покажано и кај луѓето кои имаат внесено само 24-30 милиграми глутен – околу 1/145 од парче класичен леб (количината одговара на една трошка). Дури и дневна доза мали количини глутен – повеќе од 50 mg, или околу 1/70 од споменатите парчиња леб, доведува до постепено влошување на симптомите и оштетување на цревата – појаснува таа.

Денес се смета дека 1 процент од целокупната популација на планетата боледува од глутенска ентеропатија, односно во Европа дури 1 од 130 до 1 од 300 луѓе во различни земји ја имаат оваа болест. Во земјава не се знае точниот број на овој вид болни, но има податок дека еден од 4.000 пациенти во земјава ја има оваа болест. Кај голем број луѓе сè уште не е дијагностицирана. Се смета дека на еден дијагностициран има 7 кои не се дијагностицирани. Ризикот за болеста кај членовите на семејство, каде што има болен од целијакија, е 10 пати поголем. Оваа болест може да биде здружена со низа автоимуни болести како дијабетес мелитус тип 1, псоријаза, Сјоргенов синдром, автоимун хепатитис, автоимун тироидитис, витилиго, артритис и сл.

Реагираат и пензионери кои имаат повеќе болести и поради тоа треба поздраво да се хранат.

– Зошто Владата не помисли на болните пензионери кои не можат да јадат бел или полубел леб. Зарем ние не сме дел од граѓаните на кои треба да им се помогне. Најавија повисоки пензии, ама лебот што треба да го јадеме поради низа болести е три пати поскап од оној на кој му ја замрзнаа цената. Значи, ние со ниски пензии само бел леб треба да јадеме или треба да купуваме само неколку дена во месецот и да го мирисаме поскапиот леб – вели пензионерка.

Владата за да го зачува стандардот на населението на крајот од февруари ја замрзна цената само на полубелиот и белиот леб на 33 денари.

The post САМО ЗДРАВИТЕ ЌЕ МАЧКААТ НА ЛЕБ Дијабетичарите и алергичните на глутен ќе сонуваат таква гозба appeared first on plusinfo.mk.

Тој рече дека овие компании требаше да го испочитуваат „џентлменскиот договор“ со владата и сега да не се  правдаат дека ќе имаат загуба со замрзнатата цена на лебот. Владата, рече тој,  нема да дозволи никој да прави екстра профит на грбот на граѓаните.

– Ние на последната прес-конференција ги објавивме пресметките за производната цена на лебот во овие компании. и тие можат да бидат пониски од замрзнатата. Нејасно е како на малите пекарници им се исплати да произведуваат леб по цена од 33 денари, а на големите компании тоа не им се исплата. Според законитоста на обем на производство големите компании можат да произведуваат и леб по многу пониска цена од замрзнатата, но не го прават тоа – рече Ковачевски.

Тој појасни дека сите мерки кои ќе ги преземе во однос на замрзнатата цена на лебот ќе бидат законски. Моментално се вршат инспекции и се изрекуваат казни за тие кои не го почитуваат законот.

– Владата ќе ги искористи Законот за трговски друштва, Законот за заштита на потрошувачите и Законот за заштита од конкуренција за да ги преземе новите мерки кон компаниите и да ги казни. Инспекторите кои се на терен и компаниите ги знаат казните кои следуваат за непочитување на законите.

Премиерот веќе е информира дека ноќе во Скопје се продава леб за цена од 50 денари.

-Морам да кажам дека сум разочаран од компаниите кои дење не испорачуваат леб, а ноќе произведуваат и го продаваат по 50 денари и ја користат кризата да профитираат. Да се заработува на грбот на граѓаните во вакво време кога сите треба да покажеме солидарност, тоа по мене е нешто најлошо што може да го направи која било компанија– рече Ковачевски.

Тој им се заблагодари на компаниите кои беа коректни во однос на договорот меѓу владата и компаниите за субвенционирана струја и намалени цени на производите и најави дека владата може да замрзне цени и на други основни прехранбни производи.

– Во Министерството за економија се прават анализи и за другите прехранбени производи, па е можно да бидат замрзнати и други цени. Сега нема да соопштам детали, но ќе го направиме тоа откако ќе ги видиме анализите-рече премиерот.

The post ВЛАДАТА ЌЕ НОСИ И ДРУГИ МЕРКИ ЗА ДА ГИ ВРАЗУМИ ПЕКАРНИЦИТЕ Ковачевски е разочаран од дуќанџиите кои ноќе продаваат леб по 50 денари appeared first on plusinfo.mk.

Граѓаните, пак, очекуваат владата да најде решение за да има леб во продавниците, а пекарската индустрија денеска молчејќи почна да ја реализира заканата за бојкот. Во многу продавници изутрината не можеше да се најде леб.

Државата мора да го штити јавниот интерес

Професорот Здравко Савевски смета дека владата треба итно да реагира со мерки кои ѝ стојат на располагање и да спречи натамошен недостиг на леб во продавниците.

– Владата треба да го штити јавниот интерес и итно да реагира со мерки за да го спречи бојкотот на приватните пекарници кои го штитат својот капитал на штета на јавниот интерес и граѓаните. Една од мерките е воведување принудна управа во компаниите кои бојкотираат. Искуството од случајот со парното и приватната компанија БЕГ од пред една година е доволно тоа да се направи по итна постапка, бидејќи граѓаните не смеат да останат без еден од главните егзистенцијални производи – лебот повеќе од ден или два – вели Савевски.

Според него, владата многу задоцни со запирањето на субвенциите за струја за овие компании и замрзнувањето на цената на лебот.

– Иако многу задоцни со овие мерки Владата донесе нужна и логична одлука за безобразното однесување на пекарската индустрија – да земаат пари од државата, а да не испорачуваат ништо за возврат на тоа – вели тој.

Според него и пекарската индустрија треба да ги почитува законите во државата кои се однесуваат на штрајкот или бојкотот.

– Во услови на штрајк или бојкот, на пример, на работниците во сектори од јавен интерес, како здравство, пропишано е да се овозможи процес на работа за да не се наштети на јавниот интерес односно на граѓаните. Во овој случај пекарската индустрија треба да обезбеди одредена количина на леб за граѓаните. Токму ова е причина за итна реакција на Владата со воведување на принудна управа во компаниите. Овој механизам е законски и владата го има на располагање – додава тој.

Пекарската индустрија треба да се преиспита 

Маријанчо Николов, економист и поранешен пратеник смета дека пекарската индустрија треба да се преиспита во однесувањето и да признае дека вети, но не одговори соодветно на договореното со владата и дека сега се штити со уцени кога владата го почитува договорот.

– Тие во ноември на преговори со владата отидоа со направени пресметки за тоа колку би можеле да ја намалат цената на лебот, ако владата им ја субвенционира струјата. Тогаш изјавија дека ќе има намалување на цената од 10 отсто, ако не се променат другите влезни трошоци во производството. Владата им ги исполни барањата, но тие не ги намалија цените за договорениот процент. Имаше одредени намалувања, но тие не беа на ниво на договорот од 10 отсто колку што ветија. И владата пресече. Сега треба да бидат искрени и да ги објават јавно пресметките и да дадат образложение што се променило од ноември лани до март годинава што било причина да не се намалува цената. Граѓаните кои ја финансираа нивната поевтина струја треба да ги знаат деталите – вели Николов.

Според него, доколку условите во меѓувреме се промениле, пекарската индустрија навреме можела да побара нови преговори со владата и да се донесат други решенија.

– Не смееше да се дозволи сето ова да се истури врз грбот на граѓаните на кои овој леб им е значаен за преживување. Решенија секако дека има, а едно е да се користи поевтино брашно од државните резерви за производство на лебот со замрзната цена. Најавата дека немаат работници или дека ќе ги затворат фирмите и ќе отпуштат работници ги гледам само како форма на притисок и уцена за да се издејствува револт кај граѓаните и да се преговара за нови привилегии што требаше да почнат и да завршат пред реакцијата на владата – вели тој.

Податоците за работата на пекарската индустрија минатата година, додава тој, се повеќе од добри односно сите оствариле профит.

И граѓаните бараат итна реакција на владата

– Владата мора да реагира бидејќи без леб повеќето од нас не можат да поминат ниту ден, а не да чекаат пекарите да бојкотираат. Каде е сега министерот Крешник Бектеши да ги пушти инспекторите и да утврди зошто нема леб во продавниците. Не барам да им попуштаат на пекарниците, туку да најдат начин како да им се обезбеди леб на граѓаните – вели револтирана граѓанка.

Дел од граѓаните веќе почнаа да купуваат брашно и сами да печат дома леб.

– Неодамна добив на подарок машина за печење леб. Некако не успевав да одлучам да почнам сама да правам леб, но сега ќе мора тоа да го направам за да не зависам од пекарниците. Купив и брашно. Вака да се живее во неизвесност е срамота. Добиваа пари од државата не ги намалија цените на лебот и сега се лути на владата што им ги секна парите. Мисли некој на граѓаните како ќе истераат без леб денеска. Не ли забораваат дека сите не можат да купат од скапите лебови, туку трчаат по основниот полубел и бел леб – вели скопјанка.

Плусинфо праша во владата и во инспекциските служби дали се подготвуваат други мерки и инспекциски контроли.

-Владата нема да дозволи неоправдано покачување на цените. Одлуката за замрзната цена на белиот и полубелиот леб е донесена откако беше оставен доволен период за усогласување на цените по последниот пакет антикризни мерки со навремена и реална помош од државата. Иако производителите на основните прехранбени производи добиваа субвенционирана електрична енергија, инспекцијата констатираше дека дел од производителите не ги намалија цените или ги намалија незначително. Инспекторите на Државниот пазарен инспекторат се на терен за утврдување на фактичката состојба и контрола на грамажата и цената, а за резултатите од увидот, јавноста ќе биде информирана. Одлуката на Владата, што е во интерес на граѓаните, останува. Институциите ќе реагираат соодветно за да ги заштитат – одговорија од владата.

Бектеши вети инспекции

Пред една недела, кога најави дека владата ќе ја запре субвенцијата за струјата во прехранбениот сектор и ќе ја замрзне цената на основниот леб, министерот за економија Крешник Бектеши рече дека владата има на располагање повеќе мерки ако пекарниците бојкотираат и ќе ги преземе. Но основно е, рече,  дека прво ќе ги пушти инспекторите на терен.

– Ние како Министерство за економија и Влада имаме механизми да донесеме заклучоци за другите институции, кои треба да бидат независни. Така сме поставени, вклучувајќи го Државниот пазарен инспекторат, но и Комисијата за заштита на конкуренцијата. Во согласност со нашите податоци, во Скопје има голема разлика на цената само на овие два производа, а пазарот го покриваат не повеќе од 3-4 компании. Комисијата за заштита на конкуренција и Државниот пазарен инспекторат во согласност со Законот за трговијата и Законот за заштита на потрошувачите има одредби што треба да ги утврдат од надзорот што би ги направиле. Вие знаете кои се тие одредби – рече Бектеши.

Пекарите велат, кажавме што имавме да кажеме

Пекарниците на ова се заканија дека ќе престанат да произведуваат леб и да го носат на пазарот ден по објавувањето на одлуката за замрзнување на цената на лебот во Службен весник.

Оваа индустрија смета дека замрзнувањето на цената на 33 денари неминовно води кон затворање на компаниите оти сите веќе бележат загуби или се на нула.

Претседателот на групацијата на мелничко пекарската индустрија Горан Малишиќ утрово не сакаше да ги коментира настаните.

– Нашата одлука ја кажавме пред три дена. Немам што да кажам сега. Треба да одржиме состанок по што ќе излеземе во јавност – изјави тој за Плусинфо откако утрово во продавниците во Скопје немаше свеж полубел и бел леб.

Николовски: Ги штитиме граѓаните 

Министерот за земјоделство Љупчо Николоски денеска изјави дека владата ја донела одлуката за да ги заштити граѓаните.

– Граѓаните мора да се заштитат. Станува збор за само два продукти што ги произведуваат пекарниците во време кога е намалена цената на електричната енергија и брашното. Со месеци сите ние плаќаме за голем дел од компаниите да добиваат повластена електрична енергија која во последниот период е со намалена цена, а со намалена цена е и брашното. Сето тоа доведе до одлуката која ги штити граѓаните–рече министерот за земјоделство.

Тој додаде дека граѓаните очекуваа пониски цени на основните прехранбени производи, односно резултат од државната поддршка што ја добија компаниите преку субвенционираната струја.

ВМРО-ДПМНЕ: Ковачевски го остави народот без леб

Реагираше и опозициската ВМРО-ДПМНЕ според која е срамно и жално е што владата го остави народот без леб.

– Македонија со оваа власт со СДСМ и ДУИ е единствена држава не само би кажала во регионот, туку и во Европа во која на народот му се под знак прашалник основни егзистенцијални работи – изјави портпаролката на ВМРО-ДПМНЕ, Марија Митева. Таа истакна дека апсурдна е ситуацијата со СДСМ, нема леб, храната е скапа, а на земјоделците им скапува родот, затоа што немаат пласман.

– Државата е вратена 70 години назад како во време на транзицијата кога немало леб, млеко или други продукти, па се чекало ред или се купувало со бонови – изјави портпаролката на партијата Марија Митева.

The post СО ПРИНУДНА УПРАВА ИЛИ СО ИНСПЕКЦИИ, ЛЕБ МОРА ДА ИМА! Експерти предлагаат мерки против бојкотот на пекарите appeared first on plusinfo.mk.