Османи претходно на средба со неговиот бугарски колега Николај Милков рече дека ќе предложи Македонија да го испрати законот на анализа во Венецијалската комсија, иако таквата можност не беше претходно спомнувана во македонската јавност.

На разговорот со Османи во седиштето на ГЕРБ, вчера во Софија, Борисов го потегнал прашањето за регистрацијата на бугарските клубови во Македонија. Според неговиот кабинет, Борисов рекол дека „не е негова работа да се меша во внатрешните работи на земјава“, но нагласил дека усвојувањето на измените на законите за политички партии и за здруженија на граѓани и фондации предизвикале остра реакција во Бугарија.

Според лидерот на ГЕРБ, ваквата постапка се одразува негативно врз добрососедските односи и побара примената на измените да се одложи сè додека за нив не се произнесе Венецијанската комисија, извести неговата партија по средбата со Османи.

Засега нема потврда од македонската влада дека ставовите што ги изнесува Османи во Софија, за барање супервизија на измените во Законот за здруженија на граѓани и Законот за политички парти, се ставови на владата, или само негови лични најави за иницијатива. За ова не успеавме да добиеме потврда од македонските институции.

Директен одговор на прашањето дали овие закони ќе бидат испратени на анализа во Венецијанската комисија денеска избегна и премиерот Димитар Ковачевски.

– Измените на Законот за здруженија ги донесе Собранието со консензус, но без разлика дали одат на Венецијанска комисија или не, сите наши закони ќе бидат разгледани во текот на билатералниот скрининг што го имаме со ЕУ и потоа ќе претрпат усогласувања – изјави денеска премиерот Ковачевски.

Во одговор на новинарско прашање на денешната прес-конференција Ковачевски нагласи дека не очекува овој Закон да претрпи измени, бидејќи алудира само на тоа дека треба да се внимава на чувствата на нашите граѓани што се однесуваат на користење на имиња од периодот на Втората светска војна при организирање какви било клубови или трговски друштва.

– Мојот став е дека нам ни треба нов закон за здруженија на граѓани и Министерството за правда работи на изготвување на комплетен закон, што ќе ги вклучи сите политички партии и експерти. Уште стојам на ставот дека како основа треба да биде земено германското законодавство, кое на многу висок степен ги има решено здружувањата на граѓаните – истакна премиерот.

Измените на Законот за здруженија на граѓани, како и на Законот за политички партии, беа донесени со широка поддршка во парламентот, од сите партии, и со него покрај другото се воспоставуаат ограничувања за употреба на имиња за здруженија на граѓани и фондации, кои се однесуваат на историски личности поврзани со фашизам и нацизам, или соработка со нив, антисемитизам, расизам и тн. Повод за овој закон беше именувањето на два клуба во Битола и Охрид на бугарското малцинство во Македонија со имињата на Иван Михајлов и Цар Борис Трети.

Инаку Венецијанската комисија е советодавно тело на Советот на Европа, составено од врвни независни експерти од областа на уставното право, кое ужива голем авторитет.

Според дел од македонските аналитичари, нема никаква потреба Венецијанската комисија да дава мислење за Законот за здруженија. Тие велат дека нема ништо спорно во измените на законот, со оглед на тоа што речиси во сите европски земји има ограничувања за именувања на здруженија според личности и организации од фашистичи, профашистички, како и нацистички карактер.

Според други аналитичари, како Маргарита Цаца Николовска, поранешна судијка во Европскиот суд за човекови права во Стразбур, добро е да се има предвид стручното мислење на Венецијанската комисија, со оглед на тоа што овој закон предизвика лавина коментари, како во Македонија, така и во соседна Бугарија, каде што сметаат дека со овој закон се кршат човековите права. Мислењето на Комисијата, рече Цаца во изјава за Сител, може да ги амортизира таквите реакции, и законските измени да добијат поголем легитимитет.

The post БОРИСОВ БАРА ЗАКОНОТ ЗА ЗДРУЖЕНИЈА ДА СЕ ОДЛОЖИ Ковачевски, пак, најавува сосем нов закон!? appeared first on plusinfo.mk.

„Посебен проблем е одлуката на Собранието на Северна Македонија воопшто да не го вклучи комунизмот како тоталитарна и репресивна идеологија во спроведувањето на усвоените измени. Сè уште нема законска мерка или механизам за рехабилитација и обештетување на убиените и повредените за време на комунистичкиот режим во поранешна СР Македонија, прогонувани и репресирани исклучиво поради нивниот бугарски идентитет“ – се вели во соопштението на бугарското МНР.

Од бугарското МНР потсетуваат дека ограничувања од ваков карактер веќе им биле наметнати на Бугарите во Македонија во минатото. Потсетуваат и на забраната на организацијата „Радко“ во 2001 година. Сметаат дека „Консултативното тело“ на Министерството за правда ќе врши еднострана интерпретација на дадено име, презиме, прекар, псевдоним, кратенка или иницијали на историска личност. Овој пристап, пишува во соопштението на бугарското МНР значи неподготвеноста да се деблокира работата на Заедничката мултидисциплинарна експертска комисија за историски и образовни прашања.

Министерството за надворешни на Бугарија оценува дека овие законски измени го попречуваат ефективно и сеопфатно спроведување на Договорот за добрососедство. Ги повикуваат македонските власти во духот на стратегијата „Едно општество за сите“ да обезбеди услови за претставниците на етничките заедници да ја задржат и развиваат својата култура, идентитет и традиција.

The post СОФИЈА ЗАГРИЖЕНА ОД ИЗМЕНИТЕ ВО ЗАКОНОТ ЗА ЗДРУЖЕНИЈА Ова води кон дискриминација на Бугарите во Македонија, смета бугарското МНР appeared first on plusinfo.mk.

За измените на Законот за здруженија и фондации „за” гласаа 67 пратеници, ниту еден против и воздржани, а ист број пратеници гласаа „за” и за Законот за полититички партии, без ниту еден против и воздржани.

Во образложение за измените на Законот за здруженија и фондации, пратеничката од ВМРО-ДПМНЕ Рашела Мизрахи рече дека во последните осум месеци сме сведоци за обиди на ревидирање и извитоперување на историските вистини во државата.

– Човештвото сè уште носи лузни од геноцидот и етничкото чистење, расизмот, антисемитизмот и ксенофобијата, а меѓународната заедница како и сите ние имаме голема одговорност во спречување на овие зла. Страшната вистина за фашизмот и нацизмот мора сите заедно да ја браниме од оние коишто ја негираат. Мора да ја зајакнеме моралната и политичката посветеност на нашата влада и институциите за да обезбедиме можност идните генерации да ги разберат причините за пандемијата на омраза и лудилото од Втората светска војна, во која Македонија даде повеќе од 25.000 жртви, од кои 7.144 Евреи – рече Мизрахи.

Токму од овие причини, додаде Мизрахи, денеска ќе донесеме мал, навидум незначителен закон, што ќе биде употребен за да го заштити антифашистичкото минато, и историската вистина на нашата земја.

Пратеничката Соња Мирковска од НСДП рече дека во потполност го поддржуваат предлогот на опозицијата за измените на овој закон.

– Како владејачка партија учестувавме во изработката на овој закон за да стане пооперативен и практично го носиме заедно. Сметам дека после се она што се случуваше е исклучително важно да се оградиме од таквите случувања, да не дозволиме да ни се формираат такви здруженија во државата, и ова е начинот како може да се стави браната – рече Мираковска.

Во образложението за измените и дополнувањата на Законот за политички партии, пратеничката од СДСМ Снежана Калевска Ванчева рече дека и двата закона имаат една иста цел.

– Таа цел произлеува и од членот 20 од Уставот, но се надополнува на она што значи предизвици на новите времиња, што придонесуваат да се создаде потребата од ваквите измени, и целта на предлог законот што содржи две одредби е золемување на транспарентоста и дистанцирање од се она што значи фашизам, нацизам, национал-социјализам и гарантирање на правната сигурност на граѓаните, својствени на една демократска, цивилизирана и правна држава.

Предложените законски измени на двете партии успедија по отворањето бугарски клубови во земјава со имињата „Ванчо Михајлов” на 16 април во Битола и „Цар Борис Трети” на 7 октомври во Охрид. Пратениците на 17 октомври дадоа поддршка по скратена постапка да се донесе Предлог-законот за изменување и дополнување на Законот за здруженија и фондации, поднесен од опозициската ВМРО-ДПМНЕ.

Со усвоните измени и дополнувања, во Законот за здруженија и фондации членот 4, став 2 се менува и гласи „Се забранува основање на организација ако програмата, целите, дејностите и нејзиното дејствување е насочено кон насилно уривање на уставниот поредок на Република Македонија, поттикнување и повикување на воена агресија и разгорување на национална, расна, верска омраза или друга нетрпеливост, нетолеранција, омраза, геноцид, екстерминација, ширење или поддршка, поттикнување и одобрување на фашизам, нацизам, националсоцијализам и Третиот Рајх, преземање на активности поврзани со тероризам, преземање на активности кои се спротивни на Уставот или закон и преземање на активности со кои се повредуваат слободите и правата на други лица”.

„Како име, скратено име и/или назив на организација не можат да бидат употребувани имиња, презимиња, прекари, псевдоними, кратенки и иницијали, на лица кои по кој било основ, начин или форма во минатото се поврзани со расна, верска, национална, етничка и друга нетрпеливост, нетолеранција, омраза, геноцид, екстреминација, ширење или поддршка на фашизам, нацизам, националсоцијализам и Третиот Рајх“ – се вели во новиот став во членот 8 од Законот.

Според Законот, за употреба на име, презиме, прекар, псевдоним, кратенка или иницијали на историска личност, согласност дава министерот за правда по претходно добиено позитивно мислење на Комисијата за употреба на имињата на историски личности, а која ја формира самиот министер.

Во преодните и завршните одредби на измените и дополнувањата на Законот е наведено дека организации, здруженија, фондации, сојуз и други форми на здружување регистрирани согласно одредбите на Законот за здруженија и се должни во рок од три месеци од стапување во сила на овој закон, да го усогласат своето име и/или назив, цели и дејности согласно одредбите од овој закон, пред Централниот регистар. Здруженија и фондации регистрирани согласно одредбите на Законот за здруженија и фондации кои нема да ги усогласат одредбите согласно став 1 од овој член, се бришат од Регистарот, за што министерот за правда донесува одлука. Министерот за правда е должен да донесе одлука за престанок на истите, во рок од четири месеци од денот на влегување на сила на овој закон.

Со измените, пак, на Законот за политички партии, ќе се овозможи поголема транспарентност, како на постоечките така и на идните политички партии, гарантирање на правната сигурност на граѓаните својствени за една демократска, современа и цивилизирана правна држава, стоеше во предложениот текст.

Со членот 1 се допрецизира одредбата за програмата, статутот и дејствувањето на политичките партии да не можат да бидат насочени разгорување на национална, расна или верска омраза,нетрпеливост,етничка нетрпеливост, нетолеранција, омраза, геноцид, екстреминација, ширење или поддршка на фашизам, нацизам, националсоцијализам и третиот рајх или повикување на личности и настани од минатото поврзани со фашизам, нацизам, националсоцијализам и Третиот Рајх.

Со членот 2 се дополнува членот 16 со два нови става во кои е уредено дека: (4) Статутот на политичката партија не смее да содржи одредби кои предизвикуваат расна, верска, национална, етничка и друга нетрпеливост, нетолеранција, омраза, геноцид, екстерминација, ширење или поддршка на фашизам, нацизам, националсоцијализам и Третиот Рајх.

– Името и ознаките на политичката партија не смеат да содржат симболи, зборови, кратенки кои предизвикуваат расна, верска, национална, етничка и друга нетрпеливост, нетолеранција, омраза, геноцид, екстерминација, ширење или поддршка на фашизам, нацизам, националсоцијализам и Третиот Рајх, е предложено во еден од ставовите.

Политичките партии ќе треба да ги усогласат своите имиња со овој закон во рок од три месеци.

The post ФАШИСТИЧКИТЕ ИМИЊА ЌЕ ГИ „КАЧИ“ ЗАКОН Што содржат измените на законите за здруженија и за политички партии што ги усвои Собранието денеска appeared first on plusinfo.mk.