Медицинската документација, упатите, рецептите, извештаите и регистрите ќе се водат дигитално, а хартиената документација ќе се користи само во исклучителни ситуации, како привремено решение при прекин на системот. Ова се предвидува со измените и дополнувањата на Законот за евиденциите од областа на здравството, кои денеска на прес-конференција ги соопшти министерот за здравство Азир Алиу, а со кои се прави значаен чекор кон целосна дигитализација на здравствениот систем.

Тој рече дека една од клучните новини е регулирање на Електронското здравствено досие за секој пациент, кое ќе претставува централен извор на сите здравствени податоци – од прегледи и резултати до упати, рецепти и телемедицински услуги.

Со новите законски решенија, посочи министерот, значително се подобрува и пристапот на граѓаните до сопственото здравствено досие, преку електронски портал или мобилна апликација, со јасно утврдени правила за пристап кај малолетни лица и можност за овластување друго лице.

– Нашата цел е здравствените податоци да се водат модерно, безбедно и поврзано, со што ќе се подобри и квалитетот на здравствените услуги за пациентите. Со ова законско решение, кое деновиве ќе биде поставено на ЕНЕР, се надминуваат досегашните ограничувања во системот на здравствени евиденции и се овозможува нивно целосно електронско водење преку Националниот систем за електронски евиденции во здравството „Мој Термин“ – појасни Алиу.

Законот, потенцира Алиу, предвидува и техничка и семантичка интероперабилност на сите здравствени информатички системи, што значи дека сите јавни и приватни здравствени установи ќе мора да користат системи усогласени со Националниот систем, преку воведување сертифицирање на информатичките системи и задолжително евидентирање на секој пристап до здравствените податоци, со цел зголемување на безбедноста и транспарентноста.

– Дополнително, за првпат се регулира интеграцијата на телемедицината и мобилното здравство (mHealth) во националниот здравствен систем, при што телемедицинските услуги добиваат еднаква правна важност, како и физичките прегледи. Предлог-законот предвидува и можност за секундарна употреба на анонимизирани здравствени податоци, исклучиво за цели од јавен интерес, научни истражувања, статистика, образование и развој на здравствени политики, при што е строго забранета секоја употреба што би можела да доведе до дискриминација, профилирање или економска штета за поединец – истакна Алиу.

Со измените, како што рече, се предвидува и централизација и интеграција на здравствените регистри во рамки на Националниот систем, како и зајакнување на безбедносните стандарди, со обврска за здравствените установи да воспостават системи за управување со информациска безбедност и да пријавуваат евентуални безбедносни инциденти.

– Предложените законски измени се делумно усогласени со најновите европски регулативи во областа на дигиталното здравство, вклучително и Регулативата за Европскиот простор за здравствени податоци. Со овој закон се поставуваат темелите за модерен, сигурен и интероперабилен систем за управување со здравствените податоци, кој ќе придонесе за подобар квалитет на здравствените услуги, поефикасно функционирање на здравствениот систем и поголема достапност на услугите за граѓаните, следејќи ги трендовите во оваа област – посочи Алиу.

Тој додаде дека во финална фаза измените на 12 закони од областа на здравството, и како што се финализираат ги објавуваат и на ЕНЕР, каде веќе се поставени законите за здравствена заштита, за заштита од пушењето, за здравствено осигурување, а за Законот за заштита на населението од заразни болести се предвидени новини во рамки на заложбите за дигитализација.

The post СЕКОЈ ПАЦИЕНТ ЌЕ ИМА ЕЛЕКТРОНСКО ЗДРАВСТВЕНО ДОСИЕ Ќе се регулираат и телемедицинските услуги appeared first on plusinfo.mk.

Докторите на клиниките ќе можат да работат до 70-годишна возраст и да ја задржат пензијата со цел да се искористи нивната стручност и да се пополни недостигот на кадар, предвидуваат предложените измени на Законот за здравствена заштита. Предлагач на измените е Министерството за здравство и тие се објавени на страницата на ЕНЕР за разгледување и коментирање од заинтересираната јавност.

Измените се однесуваат на пензионирањето, специјализациите, вработувањето на најдобрите студенти и на изборот на раководен кадар во здравствените установи.

Ќе се вработуваат најдобрите кандидати

Во делот на вработување на здравствените работници и здравствените соработници во јавните здравствени установи, според постоечкиот закон пријавувањето на кандидатите се врши врз основа на оглас кој се објавува во дневниот печат со рок за пријавување од 5 дена. Според предлог-измените, за да се зголеми транспарентноста на огласите за вработување, тие ќе се објавуваат на интернет страниците на Агенцијата за администрација, Агенцијата за вработување и на јавната здравствена установа и ќе се зголеми рокот на пријавување. Со тоа ќе се овозможи поголем број заинтересирани кандидати да се пријават на огласите за вработување.

„Поради тоа што на огласите за вработување досега не се вработуваа најдобрите кандидати, се предлагаат измени во постапката за вработување, преку подигнувањето на нивото на комисијата за селекција на здравствен работник. Комисијата повеќе нема да ја предлага директорот, туку стручниот колегиум на здравствената установа и тоа за секое огласено работно место посебно. Комисијата за селекција ќе биде составена од редот на здравствените работници вработени во установата, од областа за која се врши селекција“, се вели во објаснувањето на причините поради кои се потребни законските измени.

Самата постапка за вработување ќе се спроведува во три фази и тоа административна селекција, прелиминарна селекција и интервју. Промена има и во делот на бодирањето на кандидатите, во зависност од успехот во високообразовната установа, односно во средното училиште, резултатите од стручниот дел кој се полага електронски, познавањето на еден од светските јазици и од интервјуто.

„Согласно резултатите од постапката за вработување, директорот е должен да го вработи најдобро рангираниот кандидат“, се вели во предлог-измените.

Забрана за преземање лекари од примарно во терцијарно здравство

Се предвидува забрана за преземање здравствени работници од примарното и од секундарното здравство во терцијарното здравство. Оваа забрана е воведена затоа што е утврдено дека има појава на краткотрајно вработување во примарното или секундарното ниво на здравствена заштита, а со крајна цел преземање во терцијарно ниво.

Во врска со постапката за вработување во здравствени установи на терцијарно ниво, таа се воедначува со постапката за вработување на примарно и секундарно ниво, при што останува дополнителниот услов кандидатите да имаат постигнат просечен успех од најмалку 8 од сите предмети на сите циклуси на универзитетски студии.

Најдобрите студенти ќе имаат приоритет

Поради досегашната практика и покрај постигнатиот успех во студирањето, најдобрите студенти да не можат да се вработат, се предвидува можноста за вработување на најдобрите по успех дипломирани доктори на медицина на медицински факултет во Македонија.

Доколку се пријават на оглас за вработување имаат приоритет и во тој случај не се спроведува постапка за селекција на кандидат, туку тие приоритетно се вработуваат во јавната здравствена установа, се наведува во предлог-измените.

Ограничено именување вршител на должност директор

Ако не е именуван директор на јавна здравствена установа врз основа на јавен конкурс, министерот за здравство именува вршител на должност директор.

„И покрај привремениот карактер на оваа функција која е предвидена да трае најмногу 6 месеци додека не се именува директор врз основа на јавен конкурс, во досегашната примена на законот имаше случаи на повеќекратно именување на вршител на должност директор. За надминување на оваа ситуација и за забрзување на постапката за именување директор на јавна здравствена установа се предвидува именувањето вршител на должност директор да биде најмногу 2 пати, по што управниот одбор на јавната здравствена установа именува вршител на должност директор“, се вели во законските измени.

Поради случаите здравствени работници да вршат здравствени услуги без поседување лиценца за работа или положен стручен испит, се предвидува прекршочна санкција за правното лице и за одговорното лице во правното лице.

Владата ќе одредува кои специјализации се потребни

Во делот на специјализациите има потреба од прецизирање на начинот на распределба на средствата кои специјализантите, односно супспецијализантите ги плаќаат на високообразовните установи. Согласно Законот, здравствените работници со високо образование за да специјализираат мора да имаат најмалку 6 месеци работа во примарна здравствена заштита или да се вработени во здравствена установа. Овој услов не важи за специјализации од областа на стоматологијата и фармацијата. Имајќи го предвид долгогодишното траење на студиите на медицинскиот факултет, од кои пред дипломирањето студентите го поминуваат на практична работа, а исто така услов за полагање на стручниот испит за лиценца е да имаат пробна работа од една година, односно 6 месеци, уште 6 месеци работа за студентите на медицина пред специјализација се непотребно оптоварување, се наведува во предлог-измените.

Во делот на кофинансираните специјализации се јавува потреба од прецизирање на одредбите.

„Со оглед на појавата специјализациите кои се плаќаат со лични средства да не ги следат реалните потреби, се предвидува Владата да донесува програма со која ќе се определи бројот на специјализации односно супспецијализации, соодветно на потребите во државата“, се прецизира во предлогот.

Ќе работат до 67 години само ако има потреба

Согласно член 204-а од Законот за здравствена заштита сега е предвидена можноста здравствен работник односно здравствен соработник да побара да го продолжи вработувањето најмногу до 67-годишна возраст, заради непречено вршење на здравствената дејност, по што директорот е должен да го продолжи вработувањето. Во практика има случаи кога продолжувањето на вработувањето не е неопходно за потребите на работата на здравствената установа, но директорот е должен да го продолжи вработувањето.

Од тие причини се предвидува продолжувањето на вработувањето до 67 години да биде само доколку навистина има потреба. За ова е потребно претходно позитивно мислење од стручниот колегиум, со согласност на вработениот, Министерството за здравство и Фондот за здравственото осигурување.

По потреба лекарите може да работат до 70 години

Поради недостиг на искусни кадри од одредени специјалности и искористување на стекнатата стручност на докторите на медицина – специјалисти, односно супспецијалисти, се предлага можноста истите од навршување на 67 години до навршување на 70 години возраст со договор да бидат ангажирани во здравствени установи и да ја задржат пензијата. Ангажирањето ќе биде врз основа на согласност од Министерството за здравство и од ФЗОМ, се наведува во предлог-измените.

Се предвидуваат измени и во делот на престанокот на закуп на простор и опрема на делови од јавните здравствени установи, така што тие ќе престанат со работа со денот на остварување на старосна пензија, а не со денот на исполнување на услови за старосна пензија на лекарот.

The post ЛЕКАРИТЕ ЌЕ МОЖЕ ДА РАБОТАТ ДО 70-ГОДИШНА ВОЗРАСТ Ќе се вработуваат најдобрите кандидати, нема веќе претрчување од примарно во терцијарно здравство appeared first on plusinfo.mk.

Министерот за здравство Арбен Таравари истакна дека со поставувањето двајца директори во болниците се создал паралелизам и поголеми трошоци. Целта на законот, рече Таравари, е рационализација и поголема ефикасност. Подоцна во одговор на пратеникот Димитар Ковачевски од СДСМ, чија пратеничка група го поддржа законот, објасни дека ова е почеток на реформите што следуваат најавувајќи спојување на Клиничкиот центар во Скопје, но и дека секој град ќе има своја општа болница.

Министерот за здравство најави дека максимум за една година, ќе има нов Закон за здравствена заштита.

Екс премиерот Димитар Ковачевски рече дека укинувањето на економските директори било дел и од анализа која неговата Влада ја спровела за рационализација во здравството.

Драгана Бојковска од ВМРО-ДПМНЕ истакна дека за овие 40 економски директори годишно се одвојувале 960.000 евра и уште толку за оперативни трошоци. Со овие средства, како што кажа, ќе може да се реконструираат или изградат нови здравствени домови и друго.

Со дополнувањето на Законот за катастар на недвижности ќе се овозможи зградата на ЕЛЕМ да стане Министерство за енергетика, рударство и минерални суровини.

The post СИТЕ ПРАТЕНИЦИ ГЛАСАА ЗА УКИНУВАЊЕ НА ЕКОНОМСКИТЕ ДИРЕКТОРИ Таравари најави нов Закон за здравствена заштита за една година appeared first on plusinfo.mk.

Со ова практично на мала врата се воведува можноста лекарите да работат и по завршувањето на работното време, а со тоа да заработат повеќе пари, но и да придонесат за подобрување на услугите за пациентите.

Според соопштението кое го објавија од Министерството за здравство, законските измени предвидуваат:

1. Лекарите специјалисти вработени во која било државна или приватна здравствена установа ќе може да дежураат, во која било здравствена установа ширум државата согласно дефицитот на нивната специјалност во одредена болница или регион;
2. Од крајот на следната година, општите лекари вработени во здравствените домови, и педијатрите и гинеколозите вработени во болничкиот сектор, ќе може да бидат и матични лекари, согласно дефицитот од тие матични лекари, во различни региони од државата, што ги утврдува Министерството;
3. Во ординациите на матичните лекари, пациентите остануваат во истата ординација доколку нивниот матичен лекар се пензионира, или го напушти тоа работно место. Со тоа пациентите лесно продолжуваат да се лекуваат во веќе избраната ординација;
4. На веќе вработените лекари, за шестмесечен стаж, како услов за специјализација се смета и времето поминато во здравствената установа каде се вработени;
5. Се регулира и вклучувањето на граѓанските организации во системот на здравствена заштита.

Откако поминаа на владина седница, предлог-измените треба да бидат усвоени и во Собранието.

The post ЛЕКАРИТЕ-СПЕЦИЈАЛИСТИ ЌЕ МОЖАТ ДА ДЕЖУРААТ ВО ДРУГА УСТАНОВА ПО РАБОТНОТО ВРЕМЕ Владата ги прифати измените во Законот за здравствена заштита appeared first on plusinfo.mk.