Во текот на општиот претрес за законот опозицијата обвини дека договорот за заемот е направен зад затворени врати, со крајно сомнителни намери и носи огромни политички и економски последици со енормно зголемување на јавниот долг. Наспроти нив, од ВМРО-ДПМНЕ порачаа дека постапката е транспарентна и оти првпат има заем за кој однапред се знае за што ќе биде потрошен и ќе се помогне на општините и на стопанството.

Заемот од Унгарската експорт – импорт банка, приватно друштво со ограничена одговорност, ќе се повлече во една транша, рокот за отплата е 15 години, со вклучен грејс период од три години, а каматната стапка е фиксна и изнесува 3,25 %. Ќе се отплаќа на 24 полугодишни рати, на 15 февруари и 15 август секоја година.

Заменик-министерот за финансии Николче Јанкуловски ги претстави условите за заемот и посочи дека државава ќе ѝ плаќа на унгарската Експорт импорт банка провизија за евентуално неповлечени финансиски средства во висина од 0,5% од заемот, на годишно ниво.

– По изгласувањето на законот и потпишување на указот од страна на претседателката планираме веднаш да се потпише договорот и овие провизии да не се плаќаат по овој основ – рече Јанкуловски.

Како што дополни, државава ќе ѝ плати провизија за извршени правни услуги на независна фирма избрана од  Унгарската експорт – импорт банка пред повлекување на траншата.

– Од она што го знаеме е дека таа провизија ќе изнесува околу 70.000 евра. Споредено со еврообврзницата што сме ја издале во 2023 година за ист износ на заем, сме платиле 880.000 евра, а во 2021 година 1,2 милиони евра – рече тој.

Целта на обезбедувањето на заемот, посочи Јнакуловски, е да ѝ се помогне на земјата да има одржлива надворешна финансиска состојба, истовремено поттикнувајќи ги економските прилагодувања и структурните реформи.

Пратеникот од опозициската СДСМ Фатмир Битиќи, истакна дека државата ќе биде и должник и ќе плаќа и провизии на фирма која нема сама да ја избере.

– Во случајов покрај провизијата од 0,5% добиваме и скриени трошоци за правни услуги, кои во суштина немаат никаква врска  за македонските институции. Се појавуваат скриени трошоци за кои многу малку или воопшто не можеме да слушнеме ниту прочитаме. Никаде не стои колку е износот на скриените трошоци кон избраната консултантска куќа, така што измислените 70.000 евра и можеби 700.000, или пак 7 милиони ги знае само Владата, но наскоро ќе видиме во отворени финансии – рече Битиќи.

Според него, со овој заем се остава простор за политички манипулации и корупција, а странските заемодавци може да поставуваат услови кои ќе бидат неповолни за нашата држава и ќе влијаат на нашите внатрешни и надворешни политики.

– Унгарската банка има историја за финансирање проекти кои отстапуваат од западно-европскиот вредносен корпус. Се поставува прашањето дали истото ќе се случи и кај нас и дали ќе бидеме приморани да правиме политички отстапки за овој заем, дали ќе бидеме ставени под влијание на надворешно политички агенди кои не се во согласност со демократските вредности на нашето општество – рече Битиќи.

Ова, оцени тој, е потенцијална замка која може да ја стави државата на патот на политичка подреденост и економска зависност од режими чии интереси не се усогласени со интересите на нашите граѓани и со демократските идеали.

– Ова задолжување носи огромен ризик за економската стабилност на државата, идните генерации ќе ги плаќаат последиците, а  граѓаните ќе се соочат со зголемени даноци и инфлација и намалена куповна моќ. Ова не е патот кон економски развој – рече Битиќи.

Најзагрижувачки рече дека е „недостатокот на транспарентност и брзината со кое ова задолжување е најавено и веќе се спроведува без никаква институционална контрола и јавен надзор“.

– Како е можно само пет дена по формирањето на новата Влада на 23 јуни  20204 година унгарската банка да достави писмо со намери за заем од половина милијарда евра. Уште позастрашувачки е фактот што преговорите се почнати со странска влада уште додека ВМРО-ДПМНЕ беше опозиција. Како, зошто и според кои правила. Ова е Договор направен зад затворени врати кој носи огромни политички и економски последици врз сите нас – наведе Битиќи.

Според него, образложувањето на потребата за законот од страна на пратеник а не од министерката за финансии отвора големи прашања дали оваа одлука е навистина во согласност со економските интереси  на граѓаните.

– Дали отсуството на министерката за финансии значи несогласување или уште полошо неподготвеност да преземе одговорност за оваа одлука и за нејзините последици? – праша Битиќи.

Обвинувајќи дека процесот се водел во тајност праша и „дали Владата се плаши од реакцијата на граѓаните ако вистината излезе на виделина и зошто овој заем не се објавил во предизборието, бидејќи, како што рече, веројатно стравувале дека гласачите ќе ја видат поврзаноста со претходното раководство на ВМРО-ДПМНЕ.

Реплицирајќи, Бране Петрушевски од ВМРО-ДПМНЕ, рече дека додека Битиќи бил вицепремиер за економски прашања неговата влада го дуплира јавниот долг од 4,7 милијарди евра на 8,9 милијарди евра.

– Да се зборува за тајност за едно задолжување кое што беше најавено уште во предизборниот период, за едно задолжување за кое што се дебатира со месеци е смешно. Тоа е така затоа што свесни се дека ова задолжување е далеку поевтино од сите нивни претходни задолжувања, затоа што неговата влада на овој поранешен вицепремиер замо од јануари до јуни 2024 година, за само шест месеци направија вкупни трошоци за камати во Буџетот од 182 милиони евра, а во истиот период во 2023 година биле 108 милиони евра, а во 2022 биле 83 милиони евра – рече Петрушевски.

Тој го праша Битиќи зошто не каже дека се работи за задолжување со каматна стапка од 3,25 проценти и поволностите кои што се однесуваат на три годишен грејс период и 15 години рок на отплата.

– Очигледно затоа што не ви оди во прилог. Повикот за општините е објавен, со коморите е договорено, парите ќе се инвестираат кај граѓаните и во македонската економија – рече Петрушевски.

Неговиот сопартиец Бојан Стојановски оцени дека првпат има најтранспарентен начин како ќе бидат потрошени средствата од заемот, кои, посочи дека „ќе влезат во Буџетот само како попатна станица додека не бидат испратени таму каде што треба“.

– Овој заем доминантно ќе биде искористен за две цели, за финансирање на инфраструктурни проекти на општините во износ од 250 милиони евра и за финансирање на евтини кредити кон стоанството од 250 милиони евра – рече Стојановски, посочувајќи дека  средствата нема да бидат управувани од Владата, туку од општините и од стопанството.

Претседателот на Собранието Африм Гаши ја прекина седница поради немање услови за работа по останатите точки на дневниот ред.

The post АИРЛИЈА РАБОТА НА ОПШТИНИТЕ И НА КОМПАНИИТЕ! Собранието го изгласа законот за унгарскиот кредит appeared first on plusinfo.mk.

Според она што е наведено во предлог законот за задолжувањето,  земјава се обврзува кредитот да го подигне во една транша, а ќе се отплаќа за 15 години, со вклучен грејс период од 3 години. Заемот ќе се отплаќа на 24 полугодишни рати, на 15 февруари и 15 август секоја година. Каматната стапка е фиксна и изнесува 3,25%.

Доколку не се повлечат парите земјава ќе треба да плати провизија за неповлечени средства во висина од 0,5% од заемот на годишно ниво.

„Провизијата за неповлечени средства ќе се пресметува на дневна основа на неповлечениот дел од заемот, пресметано од датумот на достапност на средствата и ќе се плати првиот работен ден по завршување на периодот на достапност“, стои во предлог- законот.

Во образложението на законот за задолжување се посочува дека дополнително, земјава пред да го подигне кредитот  ќе ѝ плати провизија за извршени правни услуги на независна фирма избрана од страна на Унгарската експорт – импорт банка приватно друштво со ограничена одговорност. Притоа не се наведува колкав ќе биде износот на оваа провизија.

„Дополнително, Република Северна Македонија ќе ѝ плати провизија за извршени правни услуги на независна фирма избрана од страна на Унгарската експорт – импорт банка приватно друштво со ограничена одговорност. Провизијата за извршени правни услуги ќе се плати пред повлекување на траншата“, се наведува во образложението.

Ваков услов досега немало при земањето на кредити на државава од странски банки.

По усвојување на Законот за задолжување и неговото објавување во „Службен весник“,  ќе може да се потпише  и Договорот за заем со унгарската приватна банка, кој во име на владата ќе го потпише министерката за финансии.

Владата смета дека со обезбедувањето на овој заем ќе се унапреди постојната и ќе се воспостави посебна економска соработка со Унгарија.

Средствата од заемот ќе се користат за буџетско финансирање и финансирање на општи цели согласно одредбите од Договорот за заем и важечките закони.

При најавата на овој кредит Владата соопшти дека парите ќе се користат за финансиски проекти на општините вкупно 250 милиони евра, а другата половина од парите ќе се дадат како поволни кредити на компаниите.

The post ВЛАДАТА СЕ БРЗА ДА ГО ЗЕМЕ УНГАРСКИОТ КРЕДИТ Законот за задолжување ќе се носи по скратена постапка appeared first on plusinfo.mk.