Македонија е на пат да ги зајакне еколошките стандарди во рударството и да даде приоритет на ископот на критичните минерални суровини. Се очекува во март пратениците да одлучуваат по предлог законите за рударство и за геологија. Според програмата за работа на Владата за 2026 година, овие два закона се предвидени во делот за интеграцијата на Македонија во Европската Унија, означени со среден приоритет. Односно, со нивното усвојување во македонското законодавство ќе бидат вградени најсовремените европски практики и стандарди во областа на ископот на минерали и издавањето дозволи за геолошки истражувања.

Во програмата се наведува дека Законот за рударство е изработен во насока да ги разгледа препораките дадени од Конечниот извештај од извршената ревизија на концесиите за експлоатација на минерални суровини од Државниот завод за ревизија за Законот за минерални суровини и за целосно усогласување на рударство со законската регулатива со европските директиви.

„Очекувањата се подобрување на транспарентноста, ефективноста за постапките за доделување на концесии за експлоатација на минерални суровини, како и искористувањето на минералните суровини и поголема контрола на концесионерите“, пишува во Програмата.

Што се однесува до Законот за геологија, според властите, тој се прави во насока да ги разгледа препораките дадени од Конечниот извештај од извршената ревизија на концесиите за експлоатација на минерални суровини од Државниот завод за ревизија, како и целосно усогласување на геолошките истражувања со законската регулатива со европските директиви. Од Владата наведуваат дека со овој закон се врши усогласување со Регулативата 2024/1252 на Европскиот парламент и на Советот од 11 април 2024 година за воспоставување рамка за обезбедување на сигурно и одржливо снабдување со критични суровини.

„Очекувањата се зголемување на транспарентност и подобрување на постапките за доделување на концесии за геолошки истражувања на минералните суровини“, се додава во текстот.

Останува неизвесно дали ќе биде усвоена и Стратегијата за геолошки истражувања и одржливо искористување на минералните суровини на Република Северна Македонија 2025 – 2045, на чија изработка работеше и МАНУ. Во нацрт текстот се истакна дека Македонија има ресурси во форма на руда и минерали и треба да има и отвореност во однос на нејзините геолошки ресурси, истражувањата да бидат на високо ниво и да има добро образована работна сила. Во текстот се додава дека проширувањето на рударската и минералната индустрија вклучува огромни инвестиции во делови од земјата каде што таквите инвестиции беа долго време видливо отсутни, што претставува добредојден развој.

„Македонија во моментот не е силно развиена рударска земја и нејзината визија за развој треба да се однесува на тоа да го зајакне овој сектор од стопанството и да искористи што поголем дел од своите природни ресурси, односно природни минерални богатства. Со одржливо користење на сите природни минерални богатства, а во хармонија со еколошките, културните и природните вредности, можеме да создадеме работни места низ цела Македонија“, се наведува во предлог-текстот на Стратегијата за минерални суровини.

За да ги исполни зацртаните цели од Зелената агенда, Европската Унија забрзано работи за самостојно да ги осигура т.н. критични минерали и да биде независна од трети страни. Унијата настојува до 2030 година самата да ги произведува 34-те минерали, како што се литиум, бакар, антимон, никел и други, потребни за нејзината зелена транзиција. Предвидено е 10% од своите годишни потреби да се задоволат преку рударството и 25% од рециклирањето. За оваа намена, на брза лента, веќе се одобрени десетици проекти за нови рудници и изградба на постројки за преработка и во голем дел од нив финансиски учествува во инвестицијата и Европската инвестициска банка. Во дел од документите ЕУ потенцира дека ќе работи на наменски инвестициски рамки за синџири за критични минерални суровини со Украина, Западен Балкан и т.н. „Јужно соседство“. Засега не е познато дали новите закони ќе дадат импулс на ваквата соработка со Брисел.

Во секој случај, освен Брисел, за геолошки истражувања во Македонија претходно интерес пројави и САД. Во отвореното писмо на доскорешната амбасадорка на САД во земјава, Анџела Агелер истакна дека во нејзината соработка со домашните власти имало заложба „за вистински економски раст, вистински напредок во инфраструктурните и енергетските проекти и соработува за обезбедување физибилити студии кои го олеснуваат развојот на ретки земни минерални ресурси, сајбер безбедноста и одговорното управување со животната средина“.

На почетокот на февруари од Брисел соопштија дека се еден чекор поблиску до договор за заеднички напори со САД и со Јапонија за „зголемување на економската безбедност и националната безбедност“ преку обезбедување заедничко снабдување со критични суровини.

„Подготвени сме и имаме намера да соработуваме со секоја држава за да ја пронајде својата улога. Ако немате минерали, можете да помогнете во нивното рафинирање, а државите собрани тука ги вклучуваат најголемите потрошувачи на критични минерални производи кои, заедно, имаат куповна моќ да изградат поотпорен и поразновиден глобален пазар“, изјави тогаш државниот секретар на САД, Марко Рубио.

Со новите законски решенија властите предвидувааат креирање на сопствена Листа на критични минерални суровини, но и на Листа на стратешки минерални суровини. Исто како и во САД и македонските власти на секои три години ќе треба да ја разгледуваат листата за можно ажурирање.

The post МАКЕДОНИЈА НАСКОРО СЕ ПРИКЛУЧУВА ВО ТРКАТА ЗА РЕТКИ МИНЕРАЛИ Во март пратениците ќе одлучуваат по предлог законите за рударство и за геологија appeared first on plusinfo.mk.

Претставници на Европската Унија ги повикаа сите заинтересирани компании да се пријават на повикот за стратешки проекти на ЕУ, кој трае до средината на јануари. Со вториот повик ќе се финансираат нови инвестиции во рудници и центри за преработка и рециклирање на минерални суровини, преку забрзано издавање дозволи за работа. Апелот го сподели Керстин Јорне, генералната директорка во Европската комисија задолжена за внатрешниот пазар, индустријата и претприемништвото, за време на десеттата конференција посветена на критичните суровини, која се одржува во Брисел под мотото „Изборот е Европа“. Јорне порача дека на ЕУ ѝ е потребна независност, отпорност и одржливост во пристапот до неопходните руди. Според неа, има напредок, зашто пред десет години се зборувало за проекти за геолошки истражувања, а сега се зборува за финансирање на стратешки проекти за критичните минерални суровини.

– Критичните минерали претставуваат само еден процент од нашиот БДП, но од нив зависи уште најмалку 15% од нашата економија. Минатата година на оваа конференција објавивме 60 стратешки проекти на тлото на Европа и надвор од границите, од ископ на руди до преработка и рециклирање. Имплементацијата на овие проекти ќе ги овозможи целите до 2030 година – зголемување на капацитетите за ископ за 10%, преработување за 40% и рециклирање за 25%. Ова веќе станува случај за одредени стратешки критични минерали, како што се алуминиумот, бакарот и литиумот за ископ, понатаму алуминиумот, бакарот и кобалтот за преработка. За ова да се случи, за да сечеме црвени ленти, го забрзавме издавањето на дозволи во земјите-членки и го помогнавме финансирањето на проектите – истакна генералната директорка во ЕК, Кирстен Јорне.

Таа истакна дека Унијата развива индустрија на критични минерали, бидејќи таа ја поддржува индустријата на ЕУ во поширока смисла. На конференцијата се обрати и германската европратеничка Хилгарде Рентел, која е шефица на Комисијата за критични суровини во Европарламентот. Европратеничката се осврна на влијанието на Кина и порача дека е време за брзо да се делува. Според неа, минералите се користат за геополитичка сигурност, а Европа мора да демонстрира отпорност и брзо да ги развива капацитетите.

– Политиките за критичните минерали се преместија од маргините во центарот на европските политики, зашто од нив сега се зависи сѐ – нашите климатски цели, иднината на нашата индустрија, нашата дигитална транзиција и зголемувањето на нашата економска и воена сигурност. Батерии, магнети, развојни материјали, одбранбени технологии – ништо од ова не е можно без да се обезбеди пристап до стратешките минерални суровини. Во Германија, на состанокот на новоформираниот Национален совет за безбедност првите две точки се политиките за критичните минерали и зависноста од Кина. Конечно мојата земја ќе размислува стратешки – вели европратеничка Рентел.

Рентел додаде дека Европа го има потребниот геолошки капацитет за да успее, па затоа сега се потребни инвестиции и политичка храброст, бидејќи брзото издавање дозволи за работа не е само технички услов, туку и политички избор. На ова се осврна и Роман Штифтнер, претседателот на Европската конфедерација за минерални ресурси, според кого ако запрат критичните суровини, цела Европа ќе запре. Оттаму, истакна Штифтнер, политичката храброст не се однесува само за политичарите, туку и за индустријата и цивилното општество.

– Треба да бидеме стратешки автономни и да ја зајакнеме сигурноста на Европа. Секогаш е некој од нешто зависен, но светот драматично се промени. Тоа што некогаш беше синџир на снабдување сега е стратешка потреба. Тоа што беше проток во трговската размена, сега се темели и геополитичко прашање – потенцира Штифтнер.

Од друга страна, стратешки проекти во рударската индустрија се очекува да одредат и македонските власти и земјава да се усогласи со европските цели и директиви. Летово беа презентирани нацрт текстовите на Законот за рударство и Законот за геологија, кои сѐ уште чекаат на усвојување. Нивната цел беше усогласување со европските политики.

– Стратешките минерални суровини се сметаат за критични поради нивната висока економска важност и нивната изложеност на висок ризик за снабдување, често предизвикан од висока концентрација на понуда од неколку трети земји. Со оглед на клучната улога на многу вакви критични суровини во реализацијата на зелените и дигиталните транзиции и во светлината на нивната употреба за одбранбени и воздушни намени, побарувачката веројатно ќе се зголеми експоненцијално во наредните децении. Во исто време, ризикот од прекини во снабдувањето се зголемува во позадината на зголемените геополитички тензии и конкуренцијата во ресурсите – се наведува во нацрт Законот за рударство.

Брисел годинава веќе утврди 47 стратешки проекти на тлото на Унијата, односно голем број рудници, во 13 земји-членки: Белгија, Франција, Италија, Германија, Шпанија, Естонија, Чешка, Грција, Шведска, Финска, Португалија, Полска и Романија, за ископ на критични минерални суровини и за нив се предвидени забрзани процедури за дозволи. Забрзана процедура е предвидена и во нацрт законот кај нас, а од критичните минерали по кои трага ЕУ, Македонија може да се пофали со бакар, никел, антимон и други.

The post РУДИТЕ СЕ ПРВА ТОЧКА НА СОВЕТОТ ЗА БЕЗБЕДНОСТ НА ГЕРМАНИЈА Европа забрзано издава дозволи, Македонија сѐ уште чека нови закони appeared first on plusinfo.mk.

Турција се стреми да биде еден од петте најголеми производители во светот на ретки земјени елементи и е на пат да отвори десетици рудници. Овие минерали се неопходни во голем број индустрии, а засега примат во производството има Кина. Според турскиот претседател Реџеп Таип Ердоган, направени се геолошки истражувања на повеќе од 310 локации и се откриени најмалку 10 од ретките елементи. Освен ископ, Ердоган најави и центар за преработка на рудата со капацитет од околу 1.200 тони годишно.

– За да го претвориме овој пилот-центар во заокружена индустрија, Турција ќе продолжи да развива технологии за прочистување на рудата – истакна турскиот претседател.

Министерот за енергетика Алпарслан Бајрактар истакна дека во регионот Бејликдузу се идентификувани 694 милиони тони на резерви од овие вредни ресурси, кои се клучни за производство на електрични возила, батерии и високотехнолошка опрема.

– Критиките за „претворање на целата земја во рудник“ не е точна. Одбиени се речиси 97.000 барања, а во моментов има околу 8.000 активни дозволи. Всушност, рударските области зафаќаат само 0,1% од територијата на Турција. Турција сè уште е нето увозник на минерали иако е на седмо место по најголемо минерално богатство во светот. Новиот закон за рударство има за цел да го направи секторот попривлечен за инвеститорите – потенцира министерот Бајрактар.

Иницијативата беше поздравена од Асоцијацијата на рудари, од каде укажаа да се поддржи ископот и на критичните минерали како бакар, графит, кобалт, литиум, никел и други.

– Ограничувањата на Кина создаваат значителни ризици од геополитичка зависност во енергетската трансформација и производството на напредна технологија во големите економии. Ќе бидеме сведоци на големи трговски војни поради ризиците од снабдување со суровини во следните три до пет години. Турција е богата со геолошки ресурси и минерална разновидност, па затоа би било во наша корист побрзо да ги спроведеме потребните акциски планови што моментално се подготвуваат – изјавил Чабер Занбак, претседател на турската Асоцијација на рудари.

Доколку Турција успее во намерата да ја индустријализира преработката на руди, земјата може да очекува приходи од 220 милиони долари, со годишно производство од околу 570.000 тони руда.

Домашните експерти исто така нагласуваат дека Македонија треба да обезбеди континуитет во инвестирањето во минералната индустрија и да се одржи позитивен раст на инвестициите во оваа гранка. Според нацрт текстот на Стратегијата за минерални суровини која ја изработуваше МАНУ, „имајќи ја предвид континуираната висока побарувачка за метали и минерали, Македонија треба добро да се постави за да може соодветно да одговори на идните зголемувања на потреби за снабдување со суровини“.

„Денешниот силен меѓународен фокус на суровините значи дека е важно Република Северна Македонија да биде поистакната како рударска нација и активно и успешно да учествува во меѓународните дискусии и активности кои се занимаваат со идната продажба на суровини и нивното користење. Посебен фокус треба да се стави на следење и влијание врз работата на ЕУ во областа на минералите и суровините и на внатрешниот пазар за овие стоки. Важно е да се задржи оваа атрактивност наспроти конкуренцијата, бидејќи и другите земји спроведуваат слични иницијативи за зајакнување на нивните минерални индустрии“, се вели во нацрт текстот на Стратегијата.

Според авторите, Македонија треба да се промовира како лидер во овој дел на Европа во полето на рударството и истражувањето на минералите, а македонските претпријатија треба да работат во многу ефикасни кластери во партнерство со универзитети и истражувачки институти. Во Стратегијата се потенцира дека властите треба да иницираат повеќе геолошки истражувања и додаваат дека земјава поседува минерали како бакар, олово, цинк и други. Сепак, во Македонија нов сериозен рудник се нема отворено во изминатите четириесет години. Нов стимул се очекува со најавените закони за рударство и геологија, кои би поттикнувале нови инвестиции во рударството со запазување на безбедносните стандарди.

The post ЌЕ СЕ ПРОМОВИРА ЛИ МАКЕДОНИЈА КАКО РУДАРСКА НАЦИЈА? Турција најави драматичен пресврт во индустријата appeared first on plusinfo.mk.

Геолошкиот институт на САД официјално ги додаде бакарот и среброто на листата на критични минерали, со што практично ја прошири листата на метали кои се витални за американската економија и за националната безбедност. Листата на критични минерали на САД не беше ревидирана од 2022 година, а сега на неа се најдоа уште десет минерални суровини. Од Институтот (USGS) информираа дека листата е ревидирана врз основа на економски модел кој ги проценува потенцијалните ефекти од пречките во надворешната трговија со минерални суровини. Ваквата мерка на администрацијата на Доналд Трамп беше поздравена од индустријата.

– Цврсто ја поддржуваме одлуката на Геолошкиот институт да го додаде бакарот на Листата на критични минерални суровини. Во бакарот е клучот за постигнување на главните политички цели на САД, вклучувајќи ја енергетската доминација, лидерството во вештачката интелигенција, националната безбедност и реиндустријализацијата – оцени Адам Естел, претседател на Американската асоцијација за развој на бакарот.

Листата на критични минерали служи како основа на администрацијата на Трамп за тоа кои стоки би можеле да подлежат на потенцијални даноци и трговски ограничувања, како што беше случај со бакарот претходно оваа година во спорот со Кина. Листата, исто така, е основа за инвестиции во рударството, за залихи на металите, за даночни олеснувања за преработка на минерали во САД, како и за поедноставено издавање на дозволи за нови рудници. Ажурирањето на листата доаѓа само неколку дена откако САД и Кина се согласија да го решат проблемот за трговија за 15 ретки минерали.

– Бакарот стана главен индустриски метал, рангирајќи се на трето место по железото и алуминиумот во однос на потрошените количини. Употребата на бакарот во електриката, вклучувајќи го преносот и производството на енергија, телекомуникациите и електричните и електронските производи, учествува со околу три четвртини од вкупната употреба на бакар – соопштија од Институтот.

Инаку и Македонија е на пат да креира сопствена Листа на критични минерални суровини, но и Листа на стратешки минерални суровини. Ова е предвидено во новиот нацрт текст на Законот за рударство. Исто како и во САД и македонските власти на секои три години ќе треба да ја разгледуваат листата за можно ажурирање.

„Минералните суровини, вклучително и во необработена форма, во која било фаза на преработка и кога се јавуваат како нус производ на други процеси на експлоатација, преработка или рециклирање, наведени во Листата, се сметаат за критични суровини. Владата на предлог на органот на државната управа надлежен за работите од областа на енергетиката, рударството, и минералните суровини донесува Листа на критични минерални суровини. Владата ја разгледува и доколку е потребно, ја ажурира листата на критични минерални суровини на секои три години“, се наведува во членот 45 од предложениот текст на Законот.

Засега е неизвесно кои минерали би се нашле на Листата на критични минерални суровини кај нас и дали и Македонија ќе го вреднува бакарот на начинот на кој тоа го направи американската администрација, но и Европската Унија. Од она што е познато од нацртот на Стратегијата на минерални суровини која ја изготуваше МАНУ е дека земјава треба да го следи примерот на Брисел.

„Пристапот до метали како што се железото, бакарот, среброто и високотехнолошките метали како елементите од групата на ретки земји (REE) е предуслов за производство на модерни технологии вклучувајќи и технологии за животна средина, технологии за производство на електрична енергија од ветер, соларни ќелии, осветлување со ниска потрошувачка на енергија и каталитички конвертори во автомобили“, се истакнува во нацрт Стратегијата на експертите од МАНУ.

Во неа се додава дека Македонија поседува големо количество на бакар. Сепак, кај нас бакарна руда произведува единствено рудникот Бучим, заедно со поновиот капацитет во Боров дол. Од она што е познато од геолошките истражувања кои ги спроведе инвеститорот во Иловица е дека на локацијата се проценети 700.000 тони бакар. Освен оваа, во моментов нема нови инвестиции за експлоатација и производство на бакар, а претходно неостварени останаа вложувањата во ископи на бакар во Казандол и Кожуф.

The post МАКЕДОНИЈА НАСКОРО СО СВОЈА ЛИСТА НА РЕТКИ МИНЕРАЛИ Америка го потврди бакарот како критична суровина appeared first on plusinfo.mk.

Заврши јавниот увид во Законот за рударство, кој беше објавен на платформата ЕНЕР. До 28 август 2025 година траеше увидот, а во период од 30 дена јавноста имаше можност да го разгледа првичниот текст на Законот за рударство. До Министерството за енергетика, рударство и минерални суровини (МЕРМС) се пристигнати бројни мислења, предлози и забелешки од компании, институции, стручната и од граѓанската јавност.

– Јавната расправа ни овозможи вредни препораки и забелешки за Нацрт-законот. Паралелно започнуваме со следната фаза од усогласување на законскиот предлог. Ги разгледуваме сите доставени предлози и забелешки и ќе организираме работни средби со оние кои се изјасниле за предлог-текстот. Нашата цел е да добиеме усогласено, јасно и спроведливо законско решение кое ќе обезбеди заштита на животната средина, висока безбедност при работа и предвидлива инвестициска рамка – изјави министерката за енергетика, рударство и минерални суровини Сања Божиновска.

Со ова, Министерството уште еднаш потврдува дека е отворено за дијалог, соработка и заедничко креирање на законски решенија, со единствена цел – модерна и правична рамка за рударството во Македонија. Во наредниот период, МЕРМС ќе ги разгледа детално сите пристигнати предлози и ќе ги прифати оние кои се во насока на подобрување на законското решение, во интерес на државата и на граѓаните.

Министерството останува цврсто определено во подготовката на законот да се води според највисоките европски стандарди, со цел да обезбеди современа и одржлива рамка за развој на рударството.

Финалниот закон ќе овозможи одржлива експлоатација и преработка на минерални суровини според највисоки стандарди, засилена контрола и транспарентност во сите процеси, задолжителни мерки за рекултивација и заштита на локалните заедници, јасна и правично поставена регулатива за сите учесници во секторот.

Министерството нагласува дека инсистира на строга примена на правилата и нулта толеранција за прекршувања, во интерес на безбедноста, заштитата на животната средина и добросостојбата на локалните заедници.

The post СТАСАЛЕ ПОВЕЌЕ ОД 100 ПРЕДЛОЗИ ЗА ЗАКОНОТ ЗА РУДАРСТВО Министерството ќе ги прифати конструктивните appeared first on plusinfo.mk.

Законот за минерални суровини наскоро ќе замине во историја. Него се очекува да го заменат Законот за рударство и Законот за геологија. Нацрт-текстовите на новите законски решенија веќе се наоѓаат на јавен увид и, како што соопштија од Министерството за енергетика, рударство и минерални суровини, тие се целосно усогласени со европската регулатива. Од ресорното Министерство истакнаа пет главни цели на новите закони, меѓу кои и подобрена заштита на животната средина, преку строги еколошки стандарди за експлоатацијата и преработката на минералните суровини, како и обврска за санација и рекултивација на теренот.

Се најавува засилена поддршка на локалните заедници, но и поголема контрола и транспрентност, со засилен надзор врз работата на рудниците од страна на државните институции. Од новите закони поголеми економски придобивки ќе има и државата, зашто се зголемуваат таксите и рударските надоместоци, а воедно се поттикнуваат рударството и одржливите инвестиции. Дополнително, се очекува и засилена борба против „дивите рудници“ и нелегалната експлоатација на минерални суровини.

Една од најголемите новини е прифаќањето во домашното законодавство на директивите на Европската Унија, кои се однесуваат на критичните минерални суровини и т.н. стратешки проекти во рударството. Поконкретно, усогласувањето е со минатогодишната директива на ЕУ, која цели кон енергетска независност на Унијата од трети земји, особено за минерали како што се литиумот, бакарот, кобалтот и други минерали кои се неопходни за исполнување на целите од зелена агенда. Односно, за снабдување со критични материјали без кои не би можело да се градат ветерници, електрични возила и генерално да се создава зелена енергија, а за што ЕУ во најголема мера зависи од Кина и од САД. Согласно новото законско решение кај нас, пристапот до стратешките минерални суровини е од суштинско значење за економијата на државата.

„Стратешките минерални суровини се сметаат за критични поради нивната висока економска важност и нивната изложеност на висок ризик за снабдување, често предизвикан од висока концентрација на понуда од неколку трети земји. Со оглед на клучната улога на многу вакви критични суровини во реализацијата на зелените и дигиталните транзиции и во светлината на нивната употреба за одбранбени и воздушни намени, побарувачката веројатно ќе се зголеми експоненцијално во наредните децении. Во исто време, ризикот од прекини во снабдувањето се зголемува во позадината на зголемените геополитички тензии и конкуренцијата во ресурсите“, се наведува во нацрт Законот за рударство.

За оваа цел, со новото законско решение македонските власти исто така се обврзуваат да изработат Листа на стратешки минерални суровини и Листа на критични минерални суровини, кои Владата ќе може да ги ажурира на секои три години.

„Листата на стратешки минерални суровини ќе вклучува, од проценетите суровини, суровини кои се меѓу највисоките во однос на стратешкото значење, предвидениот раст на побарувачката и тешкотијата за зголемување на производството“, се истакнува во новиот нацрт-текст.

По чекорите на Европската Унија, и Македонија ќе се приклучи кон идејата за т.н. стратешки проекти. Брисел годинава веќе утврди 47 стратешки проекти, односно голем број рудници, во 13 земји-членки: Белгија, Франција, Италија, Германија, Шпанија, Естонија, Чешка, Грција, Шведска, Финска, Португалија, Полска и Романија, за ископ на критични минерални суровини и за нив се предвидени забрзани процедури за дозволи. Со новите решенија кај нас, се изготвуваат критериуми за препознавање на стратешки проекти, но ќе се формира и Комисија која ќе постапува по барањата, а во фокусот ќе биде поставена заштита на животната средина.

„…проектот би се спроведувал одржливо, особено во однос на мониторингот, превенцијата и минимизирањето на влијанијата врз животната средина, спречувањето и минимизирањето на социјално негативните влијанија преку употреба на општествено одговорни практики, вклучувајќи почитување на човековите права и работничките права, особено во случај на присилно преселување, потенцијал за квалитетно создавање работни места и релевантен ангажман на локалната заедница адекватни политики за усогласеност за да се спречат и минимизираат ризиците од негативни влијанија врз правилното функционирање на јавната администрација, вклучително и корупција и мито“, се потенцира во Законот.

Покрај Македонија, во утврдувањето на одреден проект како стратешки улога ќе има и Европската комисија.

„Доколку Република Северна Македонија не се согласи предложениот проект да добие статус на стратешки проект, истиот го одбива Европската комисија“, се додава во предлог-текстот.

Покрај двата закона, паралелно се работи и на финализирање на Стратегијата за минерални суровини 2025-2045, на чиј текст работеше МАНУ. Со неа се стимулираат геолошките истражувања, бидејќи, како што се нагласува „Република Северна Македонија има особено значење како производител на метали како што се олово-цинк, бакар и никел и игра значајна улога во поширокиот европски, па и светски контекст како клучен извор на овие критични минерали во регионот“. Засега е неизвесно дали и каков импулс ќе имаат новите законските решенија и Стратегијата на македонското рударство, со оглед на фактот дека оваа гранка има сѐ помало учество во индустриското производство и во Македонија се нема отворено нов значаен рудник за минерални суровини во изминатите 40 години. Од Листата на критични минерални суровини која ја изготви Европската Унија, според геолошките истражувања, Македонија најмногу може да се пофали со бакар, но инвестициите најчесто се соочуваат со низа бариери. Па така, остана нереализирана инвестицијата за рудникот за бакар во Казандол на англиско-украинскиот конзорциум Сардич, кој неофицијално веќе го има добиено спорот против Македонија во меѓународна арбитража. Претходно не се оствари ниту проектот за рудник за бакар на Кожуф на канадската фирма „Резервоар минералс“. Засега единствено тапка во место инвестицијата на „Еуромакс ресоурцес“ во проектот за рудник за бакар во Иловица.

The post МАКЕДОНИЈА ЌЕ СЕ ПРИКЛУЧИ КОН СТРАТЕШКИ ПРОЕКТИ НА ЕУ ЗА ИСКОП НА РЕТКИ МИНЕРАЛИ Со новите закони ќе се раздвижат инвестициите во рударството appeared first on plusinfo.mk.