Министерот за правда, Јетон Шасивари, денеска оствари работна средба со претставничката на УНИЦЕФ Лесли Милер, на која беа разгледани клучни прашања поврзани со унапредувањето на системот за правда за децата.

Како што соопшти Министерството за правда, на средбата било истакнато дека најдобриот интерес на детето останува главен приоритет, во согласност со Конвенцијата за правата на детето.

Особено внимание било посветено на имплементацијата на Законот за правда за децата и на потребата од континуирано зајакнување на капацитетите на сите субјекти во системот за правда за децата.

„Новиот закон ја нагласува потребата од специјализација на професионалците кои работат со деца, поради што од особено значење е продолжувањето на обуките за правните професионалци за соодветен третман и заштита на децата – жртви или сведоци на насилство и криминал, како и за примена на пристапите на ресторативната правда. Подзаконските акти се уште еден важен чекор во практичната имплементација на Законот, бидејќи обезбедуваат јасни процедури, стандарди и алатки за доследно спроведување на неговите принципи “ соопшти Министерството за правда.

Во соопштението се додава дека соговорниците се согласиле дека на секое дете му е потребен правосуден систем што ги препознава неговите потреби, ги штити неговите права и му овозможува реален и еднаков пристап до правда.

„Министерството за правда останува посветено на унапредувањето на системот за правда за децата и на создавањето институционални услови во кои правата на секое дете ќе бидат целосно почитувани и заштитени“, порачаа од Министерството.

The post ПРАВОСУДЕН СИСТЕМ ШТО ГИ ШТИТИ ДЕЦАТА ЖРТВИ ИЛИ СВЕДОЦИ НА КРИМИНАЛ Средба на министерот Шасивари со претставничка на УНИЦЕФ appeared first on plusinfo.mk.