Техничката влада мора да остане и СДСМ ќе ги искористи сите демократски механизми за таа да не се укине – порача претседателот на СДСМ Венко Филипче на денешната прес-конференција.

– Ако целокупниот механизам, начин на владеење е само една имитација на механизмот со кој што владееше Никола Груевски до 2016 година, кога сите институции беа узурпирани од него лично, од негови блиски луѓе, од партиски луѓе, сега е истиот систем. Тогаш обвинители, судии од тефтерче. Сега повторно имаме исти луѓе за судии, обвинители, како и премиер, Христијан Мицкоски, кој што најавува, со чувства, како треба да работат судиите и обвинителите. Ваков притисок судството досега нема видено. Ова го нема во ниту една европска држава – рече Филипче.

Како дел од аргументите зошто не треба да се укине техничката влада, Филипче го посочи и поставувањето на новиот директор на Националниот јавен сервис МТВ, човек близок до премиерот Мицкоски, што е уште еден удар врз слободата и демократијата на медиумите.

– Ова е само уште еден сегмент, уште еден аргумент во прилог на тоа зошто Пржинската влада треба да остане. Новиот директор на МТВ е последниот сегмент во тој мозаик. Еден од темелите кои се сериозно поткопани. Националниот информативен сервис треба да биде независна институција. Не раководена од човек кој што слепо ќе извршува насоки и директиви од премиерот и дополнително е личен негов пријател – рече Филипче.

Тој додаде дека еден од клучните сектори, Министерството за внатрешни работи, власта веќе брутално го депрофесионализира и партизира.

– Со новиот Закон за полиција и со новата систематизација се укинува кариерниот напредок во МВР. Министерот за внатрешни работи со дискрециско право ќе може да назначува свои луѓе кои што не ги исполнуваат досегашните критериуми за напредок во службата. На тој начин МВР, целата полиција, ќе се депрофесионализира и брутално ќе се партизира – рече Филипче.

Дополнително, Филипче укажа дека нема заштитни механизми за податоците од снимките од системот Сејф сити.

– Не знаеме кој ги чува, на кои начин се складираат и како се користат сите информации од тој систем. Имајќи ја предвид историјата на ВМРО-ДПМНЕ со злоупотреба на безбедносните служби, прислушкувањето, разговорите кои што цела држава ги слушаше, не знаеме дали и сега повторно нема да се злоупотреби тој систем и да се следат членови на опозицијата – рече Филипче.

The post ТЕХНИЧКАТА ВЛАДА МОРА ДА ОСТАНЕ Ќе ја браниме со сите демократски средства, вели Филипче appeared first on plusinfo.mk.

Министерот за внатрешни работи Панче Тошковски остро реагираше на, како што ги нарече, „лажни и тенденциозни тврдења“ на опозицијата во врска со предложените измени на Законот за полиција.

Во јавна објава на својот официјален профил на Фејсбук, Тошковски категорично ги отфрли обвинувањата дека новиот закон ќе дозволи лица без стаж да бидат поставувани на високи позиции во Министерството.

– Целосно е неточно дека некој без стаж ќе стане началник. Новите измени воведуваат строги критериуми, обуки и тестови кои го онеспособуваат секое политичко унапредување – посочи Тошковски.

Тој објасни дека во Предлог-законот се воведува ограничување со кое може да се напредува само до две позиции нагоре во хиерархијата, и тоа исклучиво ако се исполнети сите стручни и етички услови.

– За првпат, секое унапредување во раководна позиција бара обука и елиминаторен тест. Тоа е гарант за професионализација, а не политизација – додаде министерот.

Тошковски истакна и дека законски не е можно распоредување на лица без соодветно искуство на раководни позиции, а дека тврдењата на опозицијата произлегуваат од неразбирање на законската структура.

Во однос на функцијата заменик-директор на Бирото за јавна безбедност, министерот рече дека таа е системски одговор на потребата од континуитет и стабилност во управувањето, а не нов начин за партиски вработувања.

– Ова не е политичка фотелја. Ова е гаранција дека институцијата ќе функционира дури и во отсуство на директорот – изјави Тошковски.

Министерот апелираше до опозицијата да не ја користи безбедносната политика за дневнополитички цели, истакнувајќи дека МВР останува фокусирано на изградба на ефикасен, транспарентен и непартиски систем.

The post „НЕМА НАЧАЛНИЦИ БЕЗ СТАЖ“ Тошковски ја демантираше опозицијата, законот не дозволува партиски унапредувања appeared first on plusinfo.mk.

Бројките за семејно насилство во државата се алармантни и побаруваат темелно и итно решение, истакна денеска министерот за внатрешни работи, Панче Тошковски.

– Семејното насилство е секојдневен криминалитет кој нѐ погодува како општество, а загрижувачки е што многу жртви во втората фаза од процесот се повлекуваат од страв и притисоци, што ја отежнува целокупната борба против овој феномен – рече Тошковски по средбата со литванскиот министер во Скопје.

Министерот нагласи дека Министерството активно работи на промените во процесирањето на овие случаи, со цел да се намали бројот на жртви.

– Не можеме целосно да го искорениме семејното насилство, но мораме да најдеме начини како да ги заштитиме жртвите и да го намалиме бројот на страдања – додаде министерот.

Во однос на работата на Одделот за внатрешна контрола, Тошковски изјави дека е задоволен од постигнатите резултати во изминатата година, иако призна дека има простор за унапредување и професионализација.

– Резултатите се значително подобрени во споредба со периодот пред нашето доаѓање на власт. Зголемувањето на бројот на пријави и контроли говори дека Одделот работи посветено, но треба да продолжиме со професионализација и подобрување на ресурсите – изјави Тошковски.

Тој додаде дека со измените во новите Закони за внатрешни работи и полиција се овозможува подобра мултилатерална соработка со полициите од регионот и Европа, што ќе придонесе за уште поефикасно делување во иднина.

– Министерството ќе продолжи да се фокусира на професионализација и посветеност во рамките на Одделот за внатрешна контрола, со цел да ја зголеми довербата и ефикасноста во справувањето со криминалитетот, особено со семејното насилство – заклучи Тошковски.

The post СЕМЕЈНОТО НАСИЛСТВО ВО МАКЕДОНИЈА РАСТЕ Тошковски вели дека бројките се алармантни, потребни се итни мерки appeared first on plusinfo.mk.

Уредбата за двојазичност на полициските униформи стапи во сила минатата недела, а вицепремиерот Артан Груби на својот фејсбук профил тоа го нарече „уште една победа“ и објави фотографии од изгледот на новите униформи.

Левица лани поднесе иницијатива до Уставниот суд за оценување на уставноста и законитоста на оваа уредба, која Уставниот суд сè уште ја нема ставено на разгледување.

Во иницијативата Левица наведува дека со оглед на тоа што постои единствен состав на полицијата на територијата на целата држава, правењето разлики во униформите значи директна закана врз унитарниот карактер, суверенитетот, територијалниот интегритет и независноста на државата.

„Уставот ја предвидува употребата на македонскиот јазик и неговото кирилско писмо на целата територија на државата како службен јазик и писмо [Амандман V, т. 1 од Уставот на РМ]. Значи, секое дејствување во рамките на државата кое има унифициран карактер, т.е. кое се потпира на принципот на целовитост и територијалност мора да ја следи оваа уставна одредба. Оваа уставна обврска се однесува и на Полицијата, која функционира врз основа на територијалниот принцип, кој неминовно ја обврзува Полицијата да функционира на територијата на целата држава уницифирано т.е. законот со кој се уредува нејзината надлежност мора да се применува потполно исто и подеднакво на целата државна територија“ – укажува Левица.

Според Левица ниту во Законот за внатрешни работи, ниту во Законот за полиција, како единствени закони со кои непосредно се уредува работата на Министерството за внатрешни работи и на полицијата, не е предвидена можност за отстапување од принципот на единственост на униформата.

„Владата со подзаконски пропис го уредува изгледот на униформата и ознаките на униформата на Полицијата во целина, алудирајќи на единствен изглед, без предвидување на можност за промена на изгледот на униформата или ознаките, во зависност од секторската припадност на службеникот. Спротивно на законската и подзаконската регулатива, оспорениот контроверзен владин акт овозможува, противправно да се зобиколи основниот принцип во полицијата на единственост на униформата. Со тоа оспорената уредба го нарушува системот на нормативна хиерархија и овозможува заобиколување на Уставот и законите“ – соопшти Левица.

Оваа партија ја повикува ВМРО-ДПМНЕ и нејзиниот лидер Христијан Мицкоски да соопштат официјален став откако Уредбата за двојазични униформи стапи во сила.

The post ДВОЈАЗИЧНИТЕ УНИФОРМИ СЕ ПРОТИВЗАКОНСКИ И ПРОТИВУСТАВНИ Левица тврди дека е прекршен принципот на униформност на полицијата appeared first on plusinfo.mk.

– Сметаме дека ваквата уредба, како општ подзаконски акт на владата, е во спротивност со Уставот, со други подзаконски акти, со Законот за јазици, Законот за внатрешни работи, како и со Законот за полиција. Постојат многу формално-правни и материјално-правни причини овој акт на владата да биде целосно укинат и тоа е образложено во нашата иницијатива која ја поднесовме до Уставниот суд – рече Исмаил – Хактан

Тој оцени дека ова е деградрање на македонскиот јазик и удар врз македонскиот идентитет.

– Владата на Република Македонија, не само што го миноризира македонскиот јазик и го деградира македонскиот идентитет под притисок на меѓународните односи, односно прифаќање на великобугарските шовинистички барања, туку самоиницијативно, без да биде притисната од никого од надвор, со умисла прави омаловажување на македонскиот јазик и го става во подредена позиција, а тоа директно го нарушува македонскиот идентитет. Практично, сите лажни ветувања на владата за ‘европеизација’ тука паѓаат во вода – рече членот на Президиумот на Левица.

The post ДВОЈАЗИЧНИТЕ УНИФОРМИ НА УСТАВЕН ТЕСТ Иницијатива на Левица за уставна проверка на владината уредба appeared first on plusinfo.mk.