Уставниот суд денеска не поведе постапка за измените на Законот за пензиско и инвалидско осигурување кои се однесуваат на нерезидентните пензионери. Тие предвидуваат дека зголемувањата на пензиите од 2024 година нема да се исплатуваат на пензионери кои престојуваат надвор од земјата. Со иницијативите од петмина подносители се бараше оценка на уставноста поради наводна дискриминација и повреда на стекнатите права, но мнозинството судии одлучи дека не се исполнети условите за постапка, истакна претседателот на Уставниот суд Дарко Костадиновски.

Судијата известител Осман Кадриу, кој бил за поведување постапка, образложи дека овие одредби воведуваат дискриминација меѓу пензионери кои живеат во земјата и оние надвор од неа.

– Неважно е дали пензионерите живеат во нашата држава или во друга, тие правото на пензија треба да го остваруваат вклучувајќи ги сите зголемувања. Со оивие одредби кои се проблематизираат навистина застанавме на стојалиште дека на нашите пензионери надвор од државава им се скратува правото на зголемувањето на пензите и сите усогласувања – нагласи Кадриу, додавајќи дека одредбите се спротивни на уставните принципи за еднаковост, забрана на дискриминација и социјална правда, како и на Европската конвенција за човекови права.

Мнозинството, според Костадиновски, смета дека пензионерите се во иста правна, но различна фактичка состојба, па нема повреда на член 9 од Уставот.

– Ова е социјална, временска мерка за ублажување на инфлацијата и трошоците за живот во земјата, надградба на стечените права, а не нивно задирање – објасни претседателот на Уставниот суд, нагласувајќи дека по истекот на периодот законското усогласување на пензиите повторно ќе важи за сите.

За измените на Кривичниот законик, Костадиновски изрази критичност кон законодавецот кој пропуштил рок поставен од Судот.

– Собранието мора да покаже уставна дисциплина. Или ќе се заложиме за владеење на правото, или ќе глумиме правна држава – предупреди тој.

Судот констатирал усогласување со формалната уставност, но смета дека новото решение е „далеку од идеално“, иако подобро од претходното.

– Во три години имаме четири правни режими. Каква е тоа правна сигурност, праша Костадиновски, додавајќи дека постапката е запрена за да не се создаде правен вакуум и да се овозможи санкционирање на злоупотреби на јавни средства.

Судијата Кадриу потсети дека формалните процедури се почитувани, но материјалниот дел не е целосно усогласен со одлуката на Судот.

Костадиновски додаде дека Судот поништи два правилника на Општина Гостивар, вклучително и оној за сообраќајни знаци, налепници и сигнализација „НМК“.

– Поништувачката одлука значи дека дејствијата се сметаат како да не се случиле, знаците ќе се вратат на претходна состојба или ќе се донесе нов правилник – појасни претседателот, истакнувајќи дека ефектот е за враќање на уставноста.

The post УСТАВЕН ГИ „ЗАКЛУЧИ“ ЗГОЛЕМУВАЊАТА НА ПЕНЗИИТЕ ЗА НЕРЕЗИДЕНТИ Пензионерите во странство не се во иста ситуација, сметаат судиите appeared first on plusinfo.mk.

Пратениците на денешната седница во Собранието ја утврдија потребата по скратена постапка да се донесе предлог-законот за изменување и дополнување на Законот за пензиско и инвалидско осигурување, со кој, како што рече Дафина Стојановска од ВМРО-ДПМНЕ ќе се реализира предизборното ветување на владејачката партија за линеарно зголемување на пензиите. Предлог-законот со 71 глас „за“ стана дел од точките на дневниот ред на 14. седница, кој пратениците и по два часа од почетокот со работа сè уште го утврдуваат.

На барање на пратеникот од ВМРО-ДПМНЕ Бојан Стојановски дневниот ред е дополнет и со предлог-законот за задолжување на државата со 500 милиони евра кај Унгарската експорт-импорт банка. Во тек е пауза на барање на координаторот на пратеничката група на СДСМ Оливер Спасовски, кој реагираше дека законот се предлага по скратена постапка, без претставник на Владата.

На дневен ред се и измените на Законот за локалната самоуправа со цел да се спречат предвремените избори во трите општини, Аеродром, Сарај и Гостивар, чии градоначалници по изборите во април станаа дел од извршната и од законодавната власт. Пратениците на СДСМ се изјаснија дека нема да го поддржат овој закон со образложение дека на граѓаните треба да им се овозможи да гласаат.

Претходно, Аднан Азизи од Вреди ги повика пратениците од оваа коалиција да ја напуштат седницата, откако реплицираше на процедурална забелешка на координаторот на ДУИ Блерим Беџети.

Беџети ги обвини Вреди за хипокризија со тоа што дозволиле законот за бранителите по скратена постапка на предлог на Славјанка Петровска од СДСМ да стане дел од дневниот ред.

– Европскиот фронт нема да го поддржи овој закон, но вие сте парламентарно мнозинство и требаше да стопирате ова да не се изгласа – рече Беџети.

Азизи, пак, посочи дека ДУИ биле долги години на власт и не го донеле законот за инвалидите на ОНА и нивните семејства, како и дека се обидуваат да враќаат националистички теми продавајќи патриотизам.

The post ВРЕДИ ЈА НАПУШТИ СОБРАНИСКАТА СЕДНИЦА Пратениците два часа го утврдуваат дневниот ред, на кој е ставен и закон за бранителите appeared first on plusinfo.mk.