Министерот за надворешни работи и надворешна трговија Тимчо Муцунски, денеска одговарајќи на новинарски прашања пред почетокот на Македонско-словачкиот бизнис форум, рече дека над 60 проценти од новите кандидати за амбасадори се професионални дипломати од редот на вработените во Министерството за надворешни работи и надворешна трговија (МНРиНТ).

Тој потврди дека на последната владина седница предложил повеќе имиња, коишто ќе ги потврди по добивањето на агреманите.

– Процесот на именување и пополнување на местата на шефови на дипломатско конзуларни претставништва согласно Законот за надворешни работи го координирам јас, но целокупниот процес значи координација со претседателката на државата и со претседателот на Владата. По остварена таква координација со претседателката на државата и со претседателот на Владата, на последната седница на Влада можам да потврдам точно е дека предложив повеќе имиња, како министер за надворешни работи и надворешна трговија, за пополнување на повеќе места на шефови на дипломатско-конзуларни претставништва – рече Муцунски.

Тој посочи дека над 60 проценти од новите кандидати за амбасадори и генерални конзули се професионални дипломати од редот на вработените во МНРиНТ со богата дипломатска кариера од повеќе од 20 години, и како што нагласи „тоа се врзува со нашата заложба која почна со измените и дополнувањата на Законот за надворешни работи“.

– Бидејќи сакам да ја потсетам македонската јавност дека повеќе од 20 години голем дел од моите претходници зборуваа за потребата од професионализација на дипломатската служба. Но оваа Влада е првата Влада којашто направи конкретен исчекор во таа насока и ние го сменивме законот за надворешни работи најмалку 50 проценти од шефовите на ДКП-та да бидат амбасадори од професионалниот состав на Министерството за надворешни работи, а во пракса одиме со над 60 проценти и тоа се гледа по последната група да бидат, и тоа се гледа по последната група именувања – рече Муцунски.

Тој додаде дека поради фактот што оваа информација е од класифициран карактер не би можел да ги потврди имињата, но по добивање на агреманите и отпочнување на внатрешните процедури во државата, имињата ќе се потврдат и истите да ги одбранат своите тези пред Комисијата за надворешна политика во Собранието.

Владата на седницата во вторникот одобрила список од деветмина нови амбасадори и двајца генерални конзули, во Стокхолм, Букурешт, Приштина, Лондон, Хаг, Стразбур, Софија, НАТО и Софија, како и генерални конзули во Солун и во Мелбурн.

За амбасадор во Шведска е предложен Мухарем Јусуфи, кадар од МНРиНТ, додека Орхан Муртезани од функцијата министер за европски прашања заминува за амбасадор во седиштето на НАТО во Брисел.

Поранешниот амбасадор во Украина Крум Ефремов е предложен за амбасадор во Софија, во Романија е предложен Габриел Атанасов од Министерството за надворешни работи и надворешна трговија, а за амбасадор во Приштина е предложена Катерина Тодоровска.

Линда Салиеска Иљазоска од МНРиНТ е предложена за позицијата амбасадорка во Хаг, додека Илина Мангова која доаѓа од невладиниот сектор е предложена за амбасадорка во Лондон. Светлана Гелева е предложена за втор мандат во Советот на Европа во Стразбур. На листата се споменуваат и две имиња за генерални конзули – Томислав Димитровски во Солун и Александар Крстевски во Мелбурн, и двајцата кадар од МНРиНТ.

The post ПОВЕЌЕ ОД 60% ОД НОВИТЕ АМБАСАДОРИ СЕ ПРОФЕСИОНАЛНИ ДИПЛОМАТИ Се менува сликата за дипломатските претставници на Македонија appeared first on plusinfo.mk.

Собранието ги усвои измените на Законот за надворешни работи кои се суштински за да се професионализира дипломатијата, информираше министерот за надворешни работи и надворешна трговија, Тимчо Муцунски.

„Измените предвидуваат зголемување на процентот на амбасадори од редот на кариерните дипломати, продолжување на мандатот на упатените дипломати на четири години (наместо досегашните три), како и уредување на процедурата за именување амбасадори и улогата на Собранието во таа постапка. Дополнително, воведена е можност за назначување специјален државен претставник во странство, доколку постои посебен интерес за државата”, напиша министерот во објавата на Фејсбук.

Според Муцунски, по повеќе од една деценија се прават суштински измени, со кои се воспоставува јасна законска рамка за реализација на два клучни приоритета: професионализација на дипломатската служба и воспоставување на надлежностите на Министерството во областа на надворешната трговија и инвестициите.

„Со измените се овозможува Министерството системски да ги преземе обврските поврзани со креирање политики за надворешна трговија и инвестиции – сегмент кој досега не беше институционално прецизиран со ниту еден друг закон.

Ова претставува важен чекор кон професионализација на дипломатијата, подобрување на условите за работа на македонските дипломати во странство, како и соодветно позиционирање на Министерството за надворешни работи и надворешна трговија во делот на надворешната трговија и инвестициите”, заклучи министерот Муцунски во објавата.

The post ДОНЕСЕНИ ИЗМЕНИ НА ЗАКОНОТ КОИ ЗНАЧАТ ПОВЕЌЕ АМБАСАДОРИ И НИВЕН ПОДОЛГ МАНДАТ Се уредува и процедурата за именување амбасадори appeared first on plusinfo.mk.

Готова е нацрт верзијата на Законот за надворешни работи, кој што наскоро ќе биде презентиран пред јавноста во редовна постапка и којшто има за цел да ги интегрира новите формални надлежности коишто Министерството за надворешни работи и надворешна трговија (МНР и НТ) ги презеде со Законот за организација и работа на органите на државната управа.

– Излегуваме надвор од рамките на таа конвенционална политика и ќе работиме нешто многу повеќе од тоа што е економска дипломатија. Баш пред да бидам присутен на овој настан, бев на состанок на работна група во МНР и надворешна трговија каде што веќе имаме готова нацрт верзија на Законот за надворешни работи, кој што наскоро ќе биде презентиран пред јавноста во редовна постапка и којшто има цел да ги интегрира сите овие формални надлежности коишто се презедоа со Законот за организација и работа на органите на државната управа. И тоа е тоа што ќе ни овозможи полесно да ги ангажираме нашите дипломатско-конзуларни претставништва, за конечно тие да бидат поактивни и поангажирани во привлекувањето на инвестициите, но и во промовирањето на одредени извозни капацитети коишто државата ги има, за да создадеме повеќе работни места, повеќе добро платени работни места во државата – рече министерот за надворешни работи и надворешна трговија Тимчо Муцунски во рамки на Платформа: 100% посветени за тебе, на тема „Унапредување на дипломатијата и надворешната трговија, интеграцијата во ЕУ и дигитална трансформација“ што се одржа во Владата.

На настанот на кој учествуваат и министерот за европски прашања Орхан Муртезани и Стефан Андоновски, министерот за дигитална трансформација, Муцунски најави дека се работи и на спојување на Агенцијата на привлекување на странски инвестиции и Дирекцијата одговорна за ТИРЗ.

– Истовремено работиме на спојување на неколку агенции. Тоа е Агенцијата за привлекување странски инвестиции и Агенцијата која што е одговорна за ТИРЗ, односно Дирекцијата, во една институција која што ќе има надлежност усогласена со политиките коишто ќе се креираат во МНР и НТ, да ја промовира државата како потенцијална дестинација за привлекување инвестици, но истовремено таа една иста институција да соработува со сите други, со сите инвеститори по нивното присуство во државата. За жал, имавме до сега пристап еден којшто не овозможуваше најдобри услови за инвеститорите посебно по нивното доаѓање во државата. И затоа мораме да работиме на креирање добри политики од таа гледна точка. Јас гарантирам дека Министерството ќе биде креатор на политики коишто ќе обезбедат повисоки стандарди на ова поле, ќе имаме зголемен ангажман, нашите ДКП веќе од следниот период ќе бидат дополнително ангажирани – рече Муцунски.

Тој рече дека веќе имаат и голем број конкретни ангажмани коишто ги имаат преземено во последниот период, како разговори со повеќе инвеститори.

– Дел веќе се обврзаа за инвестиции во државата и работиме заедно со нашите стопански комори и со нашите претприемачи да ја промовираме македонската економија и сите извозни капацитети коишто таа ги има – рече Муцунски.

The post МУЦУНСКИ ЌЕ ГИ РАСТРЧА АМБАСАДОРИТЕ За да се најдат инвеститори треба да се излезе од удобните дипломатски фотелји appeared first on plusinfo.mk.