Министерот за дигитална трансформација, Стефан Андоновски, порача дека медиумите мора да останат сплотени и професионални, предупредувајќи дека политички притисоци врз новинарите се недозволиви и штетни за целото општество.

Во гостувањето во емисијата „За или против“ на телевизија Алфа, Андоновски истакна дека Владата направила важен исчекор со тоа што онлајн медиумите и интернет порталите конечно се препознаени во Законот за медиуми.

Според него, измените се направени по барање на здруженијата на портали, а резултатите веќе се видливи.

– Со една брза интервенција во Законот за медиуми, онлајн порталите се препознаени како медиуми и голем дел од најрелевантните веќе се регистрирани во Агенцијата за аудио и аудиовизуелни медиумски услуги – посочи Андоновски.

Тој нагласи дека ова значи поголема заштита за новинарите и порталите, имајќи предвид нивниот легитимитет и влијание во јавноста.

Министерот најави и дека за првпат ќе се изработи Стратегија за развој на медиумите во Македонија, документ кој, како што рече, треба да постави јасни насоки за иднината на медиумската сцена.

Во контекст на актуелните политички случувања, Андоновски предупреди дека кампањи против медиуми од страна на политички партии можат сериозно да ја нарушат сликата за слободата на медиумите во земјава.

– Недозволиво е политичка партија да води кампања против медиум. Тоа директно влијае врз оценките во извештаите на Европската унија и на „Репортери без граници“, и тоа не поради Владата, туку поради притисоците од политичарите – нагласи министерот.

На крајот, тој упати јасен апел до медиумската заедница да продолжи да дејствува единствено и професионално.

– Медиумите мора да останат сплотени. Охрабрува тоа што сите синдикати и здруженија застанаа заедно – така треба да се реагира секогаш кога некој ќе се заканува или ќе напаѓа медиум само затоа што не му се допаѓаат неговите ставови – порача Андоновски.

The post СКАНДАЛОЗНО Е ДА СЕ НАПАЃА МЕДИУМ Андоновски со остра порака до политичарите appeared first on plusinfo.mk.

Медиумската слобода е темел на демократијата и затоа мора да биде заштитена во сите земји членки. Значајниот европски акт за слобода на медиумите на ЕУ (EMFA) стапи на сила денеска, а целта е да обезбеди подобра заштита за новинарите и да ја направи сопственоста на медиумите по­транспарентна, пренесува „Еуроњуз“.

Европскиот акт за слобода на медиумите воведува нов сет правила за заштита на медиумскиот плурализам и независноста во ЕУ. Со нив ќе се обезбеди јавните и комерцијалните медиуми полесно да работат преку границите во внатрешниот пазар на Унијата, земајќи ја предвид дигиталната трансформација на медиумскиот простор.

Меѓу клучните одредби, законот предвидува заштита на уредувачката независност и на новинарските извори, како и изрична забрана за користење шпионски софтвер против новинари.

Законот гарантира независно функционирање на јавните сервиси, а ја зголемува и транспарентност во сопствеништвото на комерцијалните медиуми. Регулативата ги опфаќа и големите онлајн платформи (VLOPS) како Фејсбук, Икс и ТикТок и други со механизми на заштита од неоправдано бришење на содржини од нивна страна.

Важно е и тоа што обезбедува транспарентност во државното рекламирање, а ја зголемува транспарентноста во мерењето на публиката за медиумите и огласувачите.

Законот беше изготвен од Европската комисија и со големо мнозинство поддржан од Европскиот парламент на пленарно гласање во 2024 година.

– Со стапувањето во примена на европскиот акт за слобода на медиумите, медиумите и новинарите низ ЕУ добиваат досега невидени гаранции, а граѓаните можат да веруваат дека вестите што ги добиваат се водени од факти, а не од бизнис или политичка агенда – изјави европскиот комесар за демократија, правда и владеење на правото, Мајкл Мекграт.

The post ЕВРОПСКИОТ ЗАКОН ЗА ЗАШТИТА НА МЕДИУМИТЕ СТАПИ НА СИЛА Се заштитува уредувачката независност и новинарските извори appeared first on plusinfo.mk.

Самостојниот синдикат на новинари и медиумски работници (ССНМ) ги поздравува измените на Законот за медиуми, но истакнува дека за целосно стабилизирање на медиумскиот сектор потребен е нов закон целосно усогласен со Европскиот акт за слобода на медиумите.

Според ССНМ, со овие измени онлајн изданијата беа изедначени во правата и обврските со останатите медиуми, а новинарите и медиумските работници го изборија својот статус на рамноправни со колегите од другите медиуми, статус кој претходно беше мета на арбитрарни толкувања и создаваше проблеми.

„Уште со најавата на измените на Законот за медиуми минатата година ССНМ постојано укажуваше дека се потребни допрецизирања и пред сè, земање предвид на условите во кои работат локалните, но и специјализираните и непрофитните медиуми. Затоа ССНМ поднесе предлози до ЕНЕР (Единствен национален електронски регистар), а потоа низ повеќе средби со Министерството за дигитална трансформација, две панел дискусии и постојани консултации со најголем дел од медиумите кои не беа вклучени во процесот на донесување на Предлог измените на Законот за медиуми придонесе за корекции на измените, што и се случи преку амандмани во Собранието. Самостојниот синдикат на новинарите и медиумските работници ги сублимира и ги пренесе ставовите на важниот дел од медиумската сцена, како што се локалните и специјализираните онлајн медиуми до сите релевантни институции (Влада на РСМ, Собрание, Министерство за дигитална трансформација, АМВУ)“, се наведува во соопштението од ССНМ.

ССНМ останува на ставот дека овој потфат може само да се гледа како на дел од процесот што треба да заврши со донесување на комплетно нов Закон за медиуми преку сеопфатна јавна дебата во кој ќе бидат имплементирани сите елементи на Европскиот акт за слобода на медиумите (ЕМФА). Според Синдикатот, важни аспекти кои треба да се опфатат со новиот закон се механизмите за заштита на работничките и професионалните права на новинарите и медиумските работници, усогласување на дефинициите за медиум, сајбер безбедноста на новинарите и друго.

The post ССНМ ГИ ПОЗДРАВИ ИЗМЕНИТЕ ВО ЗАКОНОТ ЗА МЕДИУМИ, НО БАРА ЦЕЛОСНО НОВ ЗАКОН Синдикатот смета дека измените се дел од процесот appeared first on plusinfo.mk.

На годишното Собрание членовите на здружението Онлајнмедиа.мк ги прифатија предложените измени во Законот за медиуми кои Министерството за дигитална трансформација ги објави на ЕНЕР (Електронски национален регистар на прописи на Македонија).

Измените и дополнувањата на Законот за медиуми се во насока на усогласување на националното законодавство со законодавството на ЕУ, како и внесување на онлајн медиумите (интернет порталите) во законот.

„После повеќегодишни напори на поголем дел од професионалните онлајнмедиуми, преку нашето здружение успеавме да дојдеме до посакуваното законско решение за дефинирање и на онлајн медиумите-интернет порталите како медиуми, како што е тоа веќе дефинирано во законот за телевизиите, за дневните весници, за радио станиците… Нашите предлози станаа дел од овие измени и дополнувања, во согласност со европското законодавство. Според сите наши контакти со пратеничките групи во Собранието, очекуваме усвојување на овие измени“, информираат од здружението.

Еве ги предложените и прифатени измени: Во член 1 од Законот за медиуми, во член 2, став 1  во точката 1 после зборот „телевизијата,“ и пред зборот „телетекст“ се додаваат зборовите „онлајн медиуми – интернет портали“:

Точката 3 се менува и гласи: Издавач на медиум е правно лице кое врши дејност на издавање на печатен медиум, емитување на радио и телевизиски програми (радиодифузери) или публикување информативни содржини преку онлајн медиуми – интернет портали, како и физичко или правно лице кое врши агрерирање вести на посебни интернет страници или мониторирање на медиумите на начин што остварува приходи од давање на овие онлајн услуги.

Во член 5 по ставот (3) се додава нов став (4) кој гласи: Правно или физичко лице може во Република Северна Македонија да врши дејност на публикување информативни содржини во вид на текст, аудио или аудиовизуелен формат преку онлајн медиум – интернет портал, доколку дејноста ја впише во Централниот регистар на Република Северна Македонија, има седиште и уредништво во Република Северна Македонија, има најмалку две (2) лица во редовен работен однос и поседува мк-домејн.

По ставот (5), кој станува став (6), се додава нов став (7), кој гласи: Регистарот на издавачи на онлајн медиуми – интернет портали содржи податоци за фирмата и седиштето, односно назив и адреса на издавачот на онлајн медиум – интернет портал; име и презиме на одговорното лице на издавачот на онлајн медиум – интернет портал; името на онлајн медиумот – интернет порталот; податоци за сопственикот на мк-домејнот.“

Во член 6 се додава нов став (3) кој гласи: Издавач на онлајн медиум – интернет портал е должен да преземе соодветни мерки со помош на технички средства или со адекватна заштита за ограничување, да оневозможи пристап на малолетните лица до електронски публикации со порнографска содржина, како и текстуална, вербална или визуелна содржина со која се глорифицираат физички, вербални или психолошки облици на садизам и слични видови насилство.

Во член 14 во ставот (1) зборовите во заградата „на пример примерок од печатен медиум и телевизиска емисија“ се заменуваат со зборовите „на пример примерок од печатен медиум, телевизиска емисија и во делот за импресум на онлајн медиумот – интернет порталот“.

The post ИНТЕРНЕТ ПОРТАЛИТЕ КОНЕЧНО ВО ЗАКОНОТ ЗА МЕДИУМИ Здружението Онлајнмедиа ги поддржува предлозите на Владата appeared first on plusinfo.mk.

Читајќи ја статијата на новинарката Мери Јордановска, читателот може да стекне впечаток дека политичките партии користат (злоупотребуваат) државни пари само за финансирање на нивните кампањи во интернет порталите. А тие, порталите, нели, особено оние кои работат комерцијално и не се финансирани од странски фондации и амбасади, веќе се стигматизирани како извор на пропаганда, на неквалитет и на сите други зла во македонскиот журнализам.

Не ми е јасно зошто молчат колегите од порталите на оваа тема, но јас нема да молчам и јавно ќе кажам дека перцепцијата дека порталите зеле огромни буџетски пари, згора и нетранспарентно, не соодветствува со вистината. Или, попрецизно, таа е лага кога станува збор за професионалните интернет портали.

Законот е јасен: најмногу 25% за интернет порталите! Кој ги зел оние 75%?

Да појаснам.

Веројатно случајно, или можеби од недоволна информираност, авторката на анализата „заборавила“ дека Изборниот законик ги ограничува државните пари што можат да се потрошат во интернет порталите за изборните кампањи. Така, од вкупните буџетски средства што може да ги потроши една партија за изборна кампања, само 25% може да завршат во печатените медиуми и во онлајн медиумите заедно – другите 75% одат кај радиодифузерите и веројатно за рекламирање на билборди. Таа пропорција (25%) е утврдена арбитрарно (зошто не 24% или 28%, на пример). Таа е апсолутно нелогична, посебно во време на доминација на онлајн медиумите, непотребна е и треба да се избрише од Законот.

Како и да е, ако интернет порталите во кампањата за парламентарните избори зеле 811.000 евра државни пари, новинарски професионално и етички би било да се каже колку пари зеле телевизиите, печатените медиуми и другите. Или „колачот“ за нив не е „колач“?

Според словото на Изборниот законик, ако тие 811.000 евра се една четвртина, најмалку околу 2,5 милиони евра државни пари се потрошени во другите, т.н. традиционални медиуми. Зоран Трајчевски од АВМУ, во истата статија, вели дека вкупните државни пари за финансирање на кампањите на политичките партии биле 10 милиони евра. Тој веројатно мисли на претседателските и на парламентарните избори заедно (во анализата не е прецизирано), но прашањето се наметнува само по себе: ако навистина е така, како се потрошени другите 9,2 милиони евра?

Дали телевизиите и печатените медиуми парите за кампањите, својот многу помрсен дел од „колачот“, ги зеле потранспарентно? Дали со тие пари не се влијаело врз нивните уредувачки политики, како што се сугерира во статијата? Дали се влијаело само врз уредувачките политики на интернет порталите?

Важно е да се знае колкав дел од „колачот“ им припаднал и на радиодифузерите и на печатените медиуми – колку кому, бездруго – а тоа било потребно да се напише и во анализата на колешката Јордановска. Бидејќи, ако во легислатурата надвладее ставот дека не треба да се трошат државни пари за финансирање на кампањите на политичките партии во медиумите, како и дека воопшто не треба да се трошат државни пари во медиумите за било какви цели, тогаш тоа има да важи за сите – не само за интернет порталите, туку и за телевизиите, за печатените медиуми и за сите други.

Или планот е и во иднина само печатените медиуми и телевизиите да лапаат државни пари? Како до сега …

Кој навистина не сака законска регулација на интернет порталите?

Друга важна работа што треба да се каже во врска со оваа анализа, е прашањето за регулација на интернет медиумите, за кое се зборува во неа.

Читам, Зоран Трајчевски од АВМУ вели дека „порталите во нашето законодавство се сива зона, не се законски регулирани …“ Читам, во 2023 година (лани), имало иницијатива за промена на Законот за медиуми, дека експерти предложиле такви измени и дека новинарските здруженија ги поддржале тие промени, но ете, Законот не бил променет.

Сево ова е само делумно точно. Јас, како член на Управниот одбор на СЕММ кој таму ги претставува интернет порталите (Профимедиа) и потоа како член на здружението Онлајнмедиа, бев вклучен во тие активности околу можна промена на Законот за медиуми, па можам да посведочам за неколку работи и да упатам неколку пораки до колегите од новинарската заедница.

Прво, навистина постојат експерти што си ја завршиле својата работа. Ние, неколку претставници од интернет порталите, лани се сретнавме со нив најмалку два пати и јасно им кажавме дека професионалните интернет портали сакаат да бидат дел до Законот за медиуми. Верувам дека експертите поднеле добар предлог за измени на Законот, кој, ете, немал среќа да биде прифатен од ресорното министерство. Не било баш така, ама ајде, да веруваме малку и во бајки.

Второ, ние од Онлајмедиа лани три пати се сретнавме со ресорниот министер Азир Алиу, со претставници на бизнис заедницата, но и со лидери и со високи претставници на сите политички партии. Од сите добивме поддршка и уверување дека ја поддржуваат законска регулација на интернет порталите.

Трето, јас научив и кој е против законската регулација на порталите. Тоа се две групи луѓе: во првата група се оние портали и нивни газди кои не сакаат да работат професионално туку да грабаат и да перат пари (тие се нашата нелојална конкуренција); во втората група се некои газди, уредници и новинари од т.н. традиционални медиуми, кои во интернет порталите гледаат опасност што ги загрозува – порталите им ги земаат публиката, приходите од рекламирање, државните пари за кампањите итн. Така мислат тие. Погрешно, но секој има право на свое мислење.

Четврто, порталите ќе беа дел од Законот за медиуми кога тој беше донесен уште пред петнаесеттина години (така беше предложено), но тогаш ЗНМ се спротивстави, со тезата дека Никола Груевски сакал да заведе контрола врз онлајн медиумите. На Насер Селмани и компанија некако пологично им беше Груевски да ги контролира само телевизиите и печатените медиуми. Тој отпор кон регулацијата на интернет порталите и приказната за „саморегулацијата како спас“ тогаш беа поддржани од т.н. меѓународен фактор. Голема грешка. Како и да е, остатоците од тој отпор се препознаваат и денес, преточени во стравот од некаква „претерана регулација“.

Петто, не е вистина дека во 2023 година не се променил Законот за медиуми. Не знам зошто авторката Мери Јорданоска во статијата го превидела фактот дека Законот се промени. Итно, во 5 до 12 пред изборите, тајно, шверцерски, никој да не знае. И тогаш никој од новинарските здруженија не се побуни дека тоа се случило нетранспарентно. Да, Законот се промени, за да се регулира субвенционирањето на печатените медиуми со државни пари. Со кое, нели, не се влијае врз нивната уредувачка политика, бидејќи – добро де, сфативме веќе – може да се влијае само врз лошите интернет портали.

Шесто, ние од здружението Онлајнмедиа очекуваме иницијативите за законско регулирање на интернет порталите наскоро да вродат со плод. На луѓе од Владата неодамна детално им ги образложивме нашите предлози и наскоро треба да се очекува официјален предлог за измени во Законот за медиуми. Суштината на измените ќе биде интернет порталите да бидат запишани во делот од Законот каде што се дефинираат медиумите (да бидеме „признаени“ како медиуми и како новинари, бидејќи сега не сме) и да се воведе еден регистар на онлајн медиумите. Тоа е сè. Не постои никаква идеја за „претерана регулација“.

Предлогот на измените ќе биде јавно достапен. Јавно ги повикувам сите сопственици, директорите, уредниците, новинарите и другите медиумски работници во професионалните интернет портали, да ги поддржат измените, бидејќи тие се во наш заеднички интерес. Ги повикувам и сите други кои дејствуваат во интернет простор и кои нема да бидат опфатени со измените на Законот, да ги поддржат, бидејќи ниту некој сака, а ниту може да спроведе „банирање“ на портали или каква било друга законска цензура на интернет.

Македонската варијанта на „лудистичкото движење“ нема да успее

Конечно, за крај на ова писание што испадна малку подолго одошто планирав, сакам да ги повикам сите фактори од пошироката општествена заедница, да ја поддржат законската регулација на интернет порталите. Таа навистина е за доброто на сите.

Како секаде во светот, така и кај нас, онлајн медиумите се доминантен сегмент на медиумската индустрија. Во секој поглед. Веќе со никого не водам полемики на таа тема – кој при очи и при мобилен телефон тоа не може да го види, негов проблем. Тој тренд на доминација и зголемено влијание на интернет порталите нема да запре и во Македонија, наспроти сите обиди за оцрнување и за нивна стигматизација. Дури и да не се „признаат“ како медиуми во Законот, тие во иднина ќе бидат уште подоминантни и повлијателни. И поуспешни, побогати со реклами. Повеќе ќе заработуваат. Пуст сон е дека ќе опстанат само тие што имаат финансиска поткрепа од странски фондации и амбасади. И дека конците ќе им ги мрсат оние другите портали, кои ги нарекуваме „портали од спалната соба“ или „човек портали“, а кои служат за нечесни работи.

Жал ми е што морам да го кажам и ова, но заблуда е дека т.н. традиционални медиуми (печатот, телевизијата, радиото) им се конкуренција на онлајн медиумите. Не им се. Погледнете, ве молам, што се случува во нашите телевизии сега – тие забрзано „емигрираат“ на интернет, некои дури прават подкасти и се натпреваруваат со популарните подкасти кои ги нема во етерот, туку само на интернет. Не велам дека телевизиите и весниците нема да ја преживеат глобалната и драматична технолошка револуција што се случува во овој момент, но секако нема да успеат водејќи битка на туѓ терен, туку само со пронаоѓање свои „ниши“ на пазарот, со продуцирање производи за кои има и ќе има побарувачка.

Наскоро и интернет порталите ќе станат т.н традиционални медиуми. Ако веќе и не се. Нивната вистинска конкуренција се социјалните мрежи, кои веќе подолго, со право, се нарекуваат и социјални медиуми. А веќе и меѓу социјалните медиуми има такви што се „традиционализираат“ и со кои се поврзува само повозрасната публика, таа во заминување. Тоа е тоа. Технолошката револуција е немилосрдна.

Како и да е, во моментов, повеќе од половина од новинарите во Македонија се работно ангажирани во интернет порталите. Тие се тие што од „колачот“ за парламентарните избори добиле кравајче да мрсат и така ги вознемириле веле-етичните и веле-професионалните во нашава новинарска заедница …

Ве молам, почитувани читатели, секој од вас сам нека си направи едно истражување: нека ги напише имињата на 5 новинари за кои смета дека се најдобри и кои најмногу ги цени, а потоа нека се праша каде работат тие. Или, секој нека си постави вакви прашања: како дознавам јас дека утре ќе врне силен дожд, дека се случила трагична сообраќајка, дека Трамп рекол ова а Камала она, дека Мбапе си го повредил коленото итн – чекам вести во шест навечер да разберам?

Ма што да ви расправам … Ова што го читате сега, го читате на интернет портал. Мојата драга колешка Јордановска својата анализа ја објавила на интернет порталот кај што е вработена. А ниту Плусинфо и Мета, според Законот за медиуми, не се медиуми, како што ниту јас и Мери, според истиот Закон, не сме новинари. Анализата која ме поттикна да го напишав сево ова ја видов на Фејсбук. И моево писание ќе се сподели на Икс и на Фејсбук. Ако нешто вас ве предизвика, почитувани читатели, вие таму ќе коментирате, на социјаните мрежи. Сигурно нема да станете во шест сабајле и да чекате слободна линија да се јавите во утринските програми на телевизиите. Сфаќате што ви кажувам? Сето ова се случува на глобалната мрежа, на интернет, не во етерот, не на хартија.

Поентата ми е во тоа дека никакво наше локално „лудистичко движење“ нема да ја спречи доминацијата на интернетот, на порталите и и на другите онлајн медиуми и платформи. И затоа, наместо неразумни отпори кон законската регулација на порталите и наместо упорни обиди за нивна стигматизација, време е да се поддржи потребата со законска регулација да се поткрепи натамошната професионализација на новинарство во интернет просторот.

Всушност, не … Не е сега времето. Доцниме.

The post Некој се вознемирил што порталите добиле кравајче од „колачот“ за изборите – а колку се „омрсиле“ телевизиите и печатот, се знае ли? appeared first on plusinfo.mk.

За овие законски измени од ЗНМ, ССНМ и СЕММ велат дека повеќе пати му имаат укажано на Министерството за информатичко општество и администрација (МИОА) како надлежно министерство, но очигледно, како што велат од здруженијата, има недостиг на политичка волја за конструктивни законски решенија.

„Укажуваме дека во рамките на проектот ‘ЕУ за слобода на изразување: усогласување на националното законодавство за медиуми со правото на ЕУ и европските медиумски стандарди’, поддржан од ЕУ, нов Закон за медиуми е изготвен во декември 2023 година од страна на домашни и меѓународни експерти и предаден до МИОА. Зо овој нов предлог закон претходеа широки консултации со повеќе чинители од медиумскиот сектор. Основните цели на предлог законот, во согласност со европските стандарди, се:

– Формирање јавен регистар на онлајн медиуми со цел спречување или намалување на злоупотребите на овие медиуми од страна на политичките партии

– подобрување на социо-економскиот статус на новинарите и медиумските работници преку воведување на контролни механизми,

– зголемување на транспарентноста во медиумската сопственост и

–  поддршка за плурализмот во медиумите со цел да се заштити јавниот интерес.

Немањето на политичка волја за усвојување нов Закон за медиумите (што беше обврска до крајот на 2023) ќе се одрази негативно во однос на позицијата на Македонија на светските индекси за слободата на медиумите. Укажуваме дека усвојувањето на новиот Закон за медиумите во Собранието, а потоа и неговото спроведување ќе ја гарантира независноста на медиумите и правата на новинарите и ќе демонстрира дека МИОА и Собранието се ангажирани кон позитивни евро-интегративни процеси. Бараме политичките партии застапени во Собранието во најскоро време да пристапат кон разгледување и усвојување на новиот закон за медиуми“, се наведува во заедничкото соопштение на трите здруженија.

Еснафските организации остануваат на ставот дека политичките кампањи не треба да се финансираат од државниот буџет и дека платеното политичко рекламирање и понатаму може да биде предмет на партиско медиумска корупција или злоупотреба.

„Очекуваните измени во Изборната регулатива за кои се залагаа и се залагаат еснафските новинарски и медиумски организации не беа земени предвид за претстојниве избори. Останаа старите проблематични решенија во законот, и покрај забелешките кои беа дадени на креаторите на законските решенија на повеќе консултативни средби на работните групи. Актуелните решенија повторно се на штета и на професионалните медиуми и на граѓаните.

Како последица на ова, во моментов има пријавено 249 онлајн медиуми кај Државната изборна комисија за државно финансирање за партиско-политички реклами во изборната кампања. Сомнително е тоа што дел од нив се сајтови со непознат сопственик или без импресум, новоформирани портали за кои се отвора сомнеж дека се наменски формирани само за да добијат пари за кампањата, како и портали кои не објавуваат информации од поширок јавен интерес“, се додава во заедничкото соопштение.

The post „ДА СЕ НАПРАВИ РЕГИСТАР НА ОНЛАЈН МЕДИУМИТЕ“ Новинарски здруженија бараат итни измени во Законот за медиуми appeared first on plusinfo.mk.

Овој пат пари од даночните обврзници ќе добијат печатените медиуми. За таа цел владата усвоила измени на Законот за медиуми. „Аргументите“ во образложението се неодржливи и смешни. Бидејќи од авион се гледа дека е ова класична предизборна корупција!

Ај, настрана парите. Веќе се навикнавме владата да им дели народни пари на медиумите од ракав. Пред некој ден пари добија радиодифузерите. Сега печатените медиуми. И ете, тој криминал што се случува пред нашите очи, никому не му пречи…

Она што во случајов е уште побезобразно е што владата не почувствувала потреба во Законот за медиумите, во членот 2, каде што се дефинираат медиумите, да се внесат онлајн медиумите односно интернет порталите.

Здружението Онлајнмедиа цела една година лобира и буквално моли интернет порталите да станат дел од Законот за медиуми.

За разлика од здруженијата на радиодифузерите и на печатените медиуми, чии претставници постојано бараат некакви државни пари – и ете, добиваат! – ние, како претставници на онлајн медиумите, од никого не баравме државни пари.

Ние рековме вака: ако државата оценува дека има потреба да им помага на медиумите, нашиот став е државната поддршка да биде системска, неселективна и насочена кон медиумските работници, а не кон медиумските газди. Предложивме и конкретно решение како да се стори тоа.

Но, ние не баравме некакво палијативно решение или еднократна помош. Бидејќи сметаме дека тоа би било барање поткуп.

Сѐ што баравме е да бидеме дел од дефиницијата на медиумите, во членот 2 од Законот за медиуми. И ако евентуално Законот предвиди формирање Регистер на онлајн медиуми, рековме дека тоа ќе го поддржиме.

Со други зборови, она што ние го баравме државата нема да ја чини ниту 1 денар!

Баравме законски статус, а не пари од даночните обврзници!

И замислете, тоа барање упорно и упорно се игнорира.

Па добро бре, магариња едни владини, толку ли ви беше тешко во членот 2 од Законот за медиуми да додадете само два збора – интернет медиуми, или интернет портали, или онлајн медиуми?

Знаете ли вие дека во дефиницијата на медиумите сѐ уште стои телетекстот – видел ли скоро некој од вас телетекст, магариња едни! – а ги нема интернет порталите.

И што треба ние да сториме, за да ве убедиме дека интернет медиуми мора да бидат дел од Законот? Треба и ние да питачиме од вас народни пари, да ви се закануваме дека ќе ви ги спуштаме камерите и дека нема за вас да информираме, да ве лажеме дека со еднократна помош ќе се спасиме од пропаст?

Нема ние да пропаднеме и без вашите пари, магариња едни владини!

Ние веќе сме доминантен сегмент на вкупната медиумска индустрија и после изборите ќе бидеме тука да ве прашуваме како смеевте вака да делите народни пари. Сите поединечно ќе ве прашуваме!

Па како бре не ви е срам?!

Па како не им е срам на сите министри, на политичките партии коишто партиципираат во техничката влада, на новинарските здруженија и на сите други општествени фактори кои со години јадат трици дека порталите мора да се регулираат бидејќи наводно биле извор на неквалитет и на сето зло во македонскиот медиумски простор, а сега еве, се помируваат со тоа во очи на изборите, Законот за медиуми да се менува вака шверцерски, само со цел на печатените медиуми да им се дала еднократна помош за преживување?!

Овој пат нема да ги повикам новинарските здруженија да реагираат. Тие се дел од овие процеси на државно корумпирање на македонските медиуми. Со непостапување и со својот срамен молк.

Го повикувам техничкиот премиер Талат Џафери да го повлече усвоениот предлог за изменување на Законот за медиуми, за да се доработи, со цел да се регулира законскиот статус на онлајн медиумите.

Ако тоа не се случи, ги повикувам чесните политички партии да поднесат амандмани на предлог-законот за изменување на Законот за медиуми, со цел интернет порталите конечно да најдат свое место во овој закон.

Ако, пак, ништо од сето ова не се случи и доколку измените се донесат така како што се предложени, го повикувам актуелниот претседател Стево Пендаровски да не го потпише. Така на дело ќе го потврди она што го кажа пред некој ден, дека ќе повел разговор со здружението Онлајнмедиа за законска регулација на онлајн медиумите.

Здружението Онлајнмедиа и натаму стои на располагање за објаснување на своите предлози за законска регулација на интернет порталите.

The post Уште една шверцерска измена на Законот за медиуми – па не ви е ли срам, магариња едни?! appeared first on plusinfo.mk.

Група од триесетина влијателни интернет медиуми, сега членови на здружението „Онлајнмедиа“, повеќе од една година упорно водат разговори со сите релевантни фактори, во обид да го афирмираат барањето интернет порталите во Законот за медиумите да добијат статус на медиуми и да се пропише обврска за нивна регистрација според критериуми и во постапка утврдена со Законот.

„Во овој момент, за жал, не можеме да детектираме кој и со какви мотиви пружа неразумен отпор кон оваа иницијатива, наспроти општото јавно мислење дека е неопоходно законски да се регулира статусот на овој сегмент од медиумската индустрија, кој, како што потврдија и последните истражувања, има доминантно влијание во информирањето на граѓаните“, велат од Здружението.

Здружението „Онлајнмедиа“ предупредува и на фактот дека се предлагаат законски решенија за селективна финансиска поддршка на т.н. традиционални медиуми, кои се дискриминирачки кон интернет медиумите и неодржливи од аспект на намената на тие средства.

„Ја известуваме јавноста дека начелен и принципиелен став на здружението Онлајнмедиа е секој облик на насочување народни пари кон медиумите да биде разумен, неселективен, недискриминирачки, одржлив и наменет првенствено за поддршка новинарите и на другите медиумски работници, а не на сопствениците на медиумите. Исто така, ја информираме јавноста дека во измените на Изборниот законик, што ги подготвила работна група и ги испратила до политичките партии, сѐ уште се задржани одредби коишто се смислени со цел да ги дискриминираат интернет порталите, на тој начин што ги ограничуваат субјектите во изборната кампања финансиските средства добиени од државата слободно да ги насочуваат кон медиумите по сопствен избор. Така, во членот 76-д од овој закон, во точката 8 и натаму стои: ‘Вкупната сума која еден учесник може да ја потроши за медиумско претставување на сите електронски медиуми (интернет портали) и печатени медиуми, не може да опфаќа повеќе од 25% од распределените финансиските средства за платено политичко рекламирање’. Во разговорите со претставници на Владата и на повеќе политички партии, претставници на здружението Онлајнмедиа укажаа дека во ова законско решение евидентно се препознава намерата на законодавецот да фаворизира одредени медиуми на сметка на други, за што нема никаква основа во реалноста, а ниту пандан во респективните изборни законодавства во светот. Бараме оваа крајно волунтаристичка одредба од Изборниот законик целосно да се укине. Учесниците во кампањата треба слободно да одлучуваат во кои медиуми ќе се рекламираат“, наведено е во соопштението.

Од Здружението додаваат:

„Се противиме и на низа други постоечки решенија, но и на некои нови предлози за измени на Изборниот законик, чија цел е и понатаму да опстане добро познатата коруптивна практика на одлевање и перење народни пари преку нивно насочување кон предизборно клонирани и размножени интернет медиуми. Нагласуваме дека претставници на Онлајнмедиа на претседателот на Државната изборна комисија и на претставници на поголемите политички партии им укажаа на неодржливоста на овие законски решенија коишто ја поттикнуваат сивата економија во медиумите, а исто така им предложија и конкретни решенија за подобрување на Изборниот законик“, се вели во соопштението потпишано од претседателот на Здружението „Онлајнмедиа“, Владимир Кошевалиски.

The post ИНТЕРНЕТ-ПОРТАЛИТЕ ДА НАЈДАТ СВОЕ МЕСТО ВО ИЗМЕНИТЕ НА ЗАКОНОТ ЗА МЕДИУМИ Здружението „Онлајнмедиа“ бара да се отстранат дискриминирачките одредби од Изборниот законик appeared first on plusinfo.mk.

– Широката коалиција СДС-ДПМНЕ доминираше во Собранието. Сложно си го изгласаа груевистичкиот Закон за поткуп на медиуми (со европско знаменце) и уште посложно го одбија предлогот на Левица да се гласа за Законот за дијабетичарите! – напиша на својот Фејсбук профил пратеникот Апасиев.

Пратениците на Левица, Димитар Апасиев и Борислав Крмов минатиот ноември поднесоа 1.300 амандмани до собранискиот архив за Предлог-законот за аудио-визуелни медиумски услуги со што досега, овој закон беше блокиран токму од Левица.

За овој закон негодуваше и новинарската фела и тие се на ставот дека овој закон не е ништо друго, освен легално поткупување на медиумите за уредничка наклонетост кон власта.

„Вчера, со исклучок на Левица, власта и опозицијата, предводени од СДС и ДПМНЕ, во Собранието на Р. Македонија, на пленарната седница ја изгласаа потребата да се донесат измени во Законот за аудио и аудиовизуелни медиумски услуги, по скратена постапка, со злоупотреба на европско знаменце, со што СДС и ДПМНЕ сложно се согласија да се даде зелено светло за носење на законско решение со кое ќе може со народни пари да се финансира наклонетоста кон властите преку националните телевизиите, за што повеќепати претходно алармираше Левица.

Нашите пратеници опоменуваа повеќе од една година, дека со овој закон, јавниот простор и слободната мисла ќе бидат потиснати под чизмата на авторитарниот режим на СДС, кој ги враќа на голема врата најлошите политики од претходниот режим на ДПМНЕ, овој пат сложно, како широка коалиција“ – се вели во реакцијата на Левица.

The post „КОАЛИЦИЈАТА СДС-ДПМНЕ ГО ИЗГЛАСА ЗАКОНОТ ЗА ПОТКУП НА МЕДИУМИ“ Левица револтирана што со европско знаменце се заобиколија нејзините 1.300 амандмани appeared first on plusinfo.mk.

Го пренесуваме во целост соопштението на Здружението Онлајнмедиа:

Постои општо уверување дека онлајн медиумите и платформите на социјалните мрежи во Македонија се главниот извор на дезинформации, на говор на омраза и на прекршување на професионалните стандарди во новинарството. Оваа „дијагноза“ може да се прочита и во извештаите на Европската комисија. Дополнително, постојано се публикуваат алармантни апели да се „заведе ред“ во онлајн-медиумите, да се донесе „закон за порталите“, или тие, едноставно, да се укинат.

Причината за големата врева произлегува од фактот што кај нас сè уште тешко се признава, иако веќе и емпириски се потврдува – последното истражување на Евростат за 2021 година покажа дека повеќе од 70 отсто од граѓаните на Македонија се информираат на интернет. А тоа значи дека медиумите што публикуваат содржини на интернет, всушност, се доминантен сегмент на медиумската индустрија. Така е во целиот свет, така е и кај нас.

Големата врева, за жал, предизвикува и голема стигма. Македонските интернет портали се обвинети за сите „зла“ во македонското новинарство, без при тоа да се препознае и да се признае фактот дека најмалку педесеттина информативни интернет-портали секојдневно објавуваат огромен број вести, фотографии и разни други аудиовизуелни прилози, со што ја информираат јавноста за сите поважни настани и појави од сите области на општествениот живот, во земјата и во светот.

Публиката ги очекува и ги добива тие вести во т.н. реално време (брзо откако ќе се случат настаните, често и додека тие се во тек), претежно на победничката справа за читање, гледање и за слушање информативни содржини – смартфонот. Дополнително, една голема група портали специјализирани за одделни области и теми, објавуваат интересни прилози, збогатувајќи ја така вкупната понуда на информативни содржини на интернет.

Од поодамна, а поинтензивно во последната година, група од триесеттина влијателни интернет портали покренаа иницијативи за законско регулирање на овој сегмент од медиумската индустрија и за унапредување на саморегулацијата. Неодамна е оформено и Здружението за заштита и унапредување на интернет медиуми Онлајнмедиа, со амбиција да ги засили и да ги предводи тие иницијативи.

За почеток, Здружението бара итни промени во три закони: во Законот за медиуми, во Законот за авторски и сродни права и во Изборниот законик.

Во разговор со министерот за информатичко општество и администрација и со претставници на политичките партии СДСМ, ВМРО-ДПМНЕ, ДУИ и Левица, уште пред неколку месеци ја нагласивме потребата во Законот за медиумите, во дефиницијата на медиумите – каде што интернет порталите воопшто не се спомнуваат! – да се додадат и медиумите кои публикуваат содржини преку интернет. Така и за порталите и формално ќе почнат да важат сите законски обврски што важат и за сите други медиуми. При тоа, треба да се има предвид фактот дека голем дел од интернет порталите и „неозаконети“ ги почитуваат професионалните стандарди што ги предвидуваат и Законот за медиуми и респективните кодекси и документи на новинарските здруженија.

Покрај тоа, претставници на Здружението Онлајнмедиа изразија и согласност Законот за медиуми да пропише и постапка на регистрација на интернет порталите од страна на овластен државен орган, изразувајќи целосна доверба владиниот ресор да подготви и да предложи законски измени за тоа.

Здружението бара и многу важна промена во Законот за авторски и сродни права, согласно со Директивата на ЕУ 2019/790, која го уредува прашањето на авторските права на интернет. Имено, во опсежната дефиниција и во темелното набројување на делата коишто се сметаат за авторски и подлежат на заштита на авторските права, во нашиот закон не се спомнуваат медиумски содржини.

Од тие причини, преземајќи го целосното решение од Законот за авторски и сродни права на Република Хрватска од 2021 година (во кој е имплементирана наведената директива на ЕУ), предлагаме во дефиницијата за авторско дело во нашиот закон да се воведе и „новинарско дело“.

Како и повеќето други закони за авторски и сродни права, така и нашиот предвидува составните делови на авторското дело да подлежат на законска заштита. Во својот предлог за иновирање на Законот за авторски и сродни права, Здружението Онлајнмедиа предлага прецизирање и на таа одредба од законот, кога станува збор за новинарско авторско дело, при што под авторска заштита, освен целината на делото, ќе подлежат и насловот, насловната фотографија и лидот односно главата на веста (првата реченица односно првиот параграф на текстот).

Сите овие предлози, како и некои други кои се однесуваат на Законот за авторски и сродни права, се темелно образложени во студија што ја подготви Здружението, во која се анализирани релевантни искуства од светот. Таа студија му е предадена на ресорниот министер. Односите помеѓу интернет медиумите и државата и интернет медиумите, како и меѓу онлјан медиумите и глобалните и локалните агрегатори на вести, се теми кои се актуелни секаде во светот. Има различни искуства и добри законски решенија и практики кои можат да се имплементираат и кај нас.

И кога веќе доцниме со „внесувањето“ на интернет порталите во Законот за медиумите, зошто барем во нужните промени на Законот за авторски и сродни права (од аспект на медиумите) не би биле во чекор со земјите членки на ЕУ?

Конечно, Здружението за заштита и унапредување на интернет медиуми Онлајнмедиа укажа и на една многу сериозна слабост во Изборниот законик, која треба да се отстрани, во пресрет на двата нови изборни циклуса, во 2024 и во 2025 година.

За што станува збор?

Препознавајќи дека во денешно време изборните кампањи се незамисливи без рекламирање на интернет, Изборниот законик вовел дефиниција „електронски медиуми (интернет портали)“, како трет сегмент во медиумската индустрија, покрај „радиодифузерите“ и „печатените медиуми“. Но, во членот 76-д, кој зборува за средствата за платено политичко рекламирање што ги добиваат партиите од Буџетот, во точката 7 се вели: „Вкупната сума која еден учесник може да ја потроши за медиумско претставување на сите електронски медиуми (интернет портали) и печатени медиуми, не може да опфаќа повеќе од. 25% од распределените средства за платено политичко рекламирање согласно став (5) од овој член“.

На средбите со претставници на политичките партии и со претседателот на Државната изборна комисија, претставници на Здружението за заштита и унапредување на интернет медиуми Онлајнмедиа посочија дека оваа одредба мора да се укине како неодржлива во секоја смисла.

Дополнително, предложивме услови што мора да ги исполнат онлајн медиумите за да се квалификуваат за учество во платеното политичко рекламирање. Накусо, тоа се условите што професионалните онлајн медиуми си ги наметнаа самите на себеси како саморегулативни стандарди.

Ова се само дел од прашањата што ги покренаа претставници на Здружението Онлајнмедиа во досегашните разговори со повеќе субјекти од јавниот сектор, но и со претставници на стопанските комори, на бизнис заедницата и на други сектори со кои соработуваат интернет порталите.

Деновиве се води и дебата за начините на кои државата им помага на медиумите и како тоа законски се регулира, за таа пракса да продолжи и во иднина. Здружението со внимание ја следи таа дебата, но потсетува дека освен во еден кус интервал од три месеци за време на пандемијата од коронавирусот, интернет порталите досега на ниту еден начин не биле финансиски поддржани или субвенционирани од страна на државата. Начелниот став на Здружението за заштита и унапредување на интернет медиуми Онлајнмедиа за ова прашање е следниот: доколку постои големо ниво на согласност во политичката и во општествената заедница дека е нужно државата финансиски да ги поддржи медиумите со пари од даночните обврзници, најважно е таа поддршка да биде неселективна, недискриминирачка, системска и пред сè насочена кон медиумските работници, а не кон сопствениците на медиумите.

Во овој момент, сепак, професионалните онлајн медиуми ставаат акцент на прашањата на законската регулација и на подобрување на општествениот статус на овој сегмент од медиумската индустрија. За таа цел, Здружението бара сојузници, пред сè во новинарската заедница, но и пошироко. Се обидуваме да ја подигнеме свесноста за тоа дека темите што ги покренуваме имаат големо значење и заслужуваат активен и креативен ангажман на сите субјекти во општествено-политичкиот живот.

The post ИНТЕРНЕТ-ПОРТАЛИТЕ БАРААТ ИЗМЕНИ ВО ТРИ ЗАКОНИ Здружението Онлајнмедиа предлага конкретни решенија за законска регулација на онлајн медиумите appeared first on plusinfo.mk.