Според тоа што го дознавме од контактот со партиите, поканата на Тупанчевски сè уште не пристигнала. Во ВМРО-ДПМНЕ размислуваат да зедат активно учество во изготвувањето на новиот изборен законик, но порачуваат дека најнапред ќе треба заедно со владејачкото мнозинство да се изгласа предлогот за една изборна единица.

– До сега не сме биле контактирани ниту пак сме имало било каква комуникација на министерството за правда или владата со ВМРО-ДПМНЕ на темата работни групи. Предлогот на ВМРО-ДПМНЕ е ајде утре, еве привремено да ја тргнеме блокадата и да изгласаме сите заедно во парламентот една изборна единица, да не бидат шест, другиот ден веќе ќе ги добие Тупанчевски тимовите кои ќе работат на измените на изборниот законик согласно препораките ОБСЕ – вели нашиот извор во ВМРО-ДПМНЕ.

И од Левица се надеваат дека власта ќе изнајде сили да пронајде консензус во сопствените редови, за да биде изгласана една изборна единица, како вовед во донесувањето на новиот Закон за избори.

– Како што изминува времето, нè радува тоа што експертската јавност во целост, а сега и политичките партии, ја согледуваат неопходноста од измени во изборниот законик. Уште не знаеме во која насока измените ќе се движат, но, се надеваме дека политичките партии ќе имаат слух за потребата од воведување на една изборна единица. Прво, на тој начин ќе придонесеме за демократизација на општеството, и позитивно стимулирање на политичката култура преку диверсификација на политичките претставници на граѓаните. Ние, веќе поднесовме предлог законско решение, а со оглед на тоа дека постојат повеќе модели и рамки на кои во процесот можеме да се повикаме и да ги евалуираме, сметаме дека можеме заедно со останатите политички партии преку работните групи да стигнеме до консензус – вели портпаролот на Левица, Амар Мециновиќ.

Во изјавата дадена за Плусинфо, Мециновиќ додава и дека е крајно време да се сменат актуелните законски решенија, кога е во прашање изборниот процес во Македонија.

– Нема да го повлечеме предложеното законско решение, туку, отворени сме за амандманско дополнување и изменување, со заклучоци кои ќе бидат прифатливи за сите. Како и министерот кој ги најави овие измени, така и ние сметаме дека е крајно време за овие измени, за да може да се отклучат стегите врз демократските капацитети на земјата, и посебно ќе очекуваме поддршка за овие измени од номинално про-европските партии. Несомнено, не можеме да очекуваме дека процесот може да се реши брзо, но можеме да посочиме дека брзото решавање е од императивно значење. Особено кога сегашната Влада нема изборен легитимитет – додава Мециновиќ.

Една изборна единица е желба и на помалите партии од владината коалиција, а лидерот на Демократски сојуз, Павле Трајанов, неколкупати се закани со преминување во опозиција доколку не биде усвоен неговиот предлог.

Од СДСМ пред неколку дена повторија дека го прифаќаат предлогот за една изборна единица, нешто што долго време е дел од нивните заложби. Сепак, главен кочничар на реформите е партијата на Али Ахмети, ДУИ.

– Ова е нов, стар став, како и да го наречеме бидејќи сегашната законска рамка осудува таков модел, затоа не можеме да се водиме од потребите или желбите на разни политички партии кои зависно од околностите ги менуваат и ставовите. Нашиот став е конзистентен, непроменет до ден денес. Каков модел и да сакаме да воведеме, ќе биде потребен меѓупартиски консензус – посочи пред неколку дена Арбр Адеми од ДУИ.

Од Алијансата на Албанците се согласни да го менуваат Законот за избори, но наместо една изборна единица, тие предлагаат осум. Ова дополнително ја усложнува ситуацијата, односно консензусот го прави недостижен.

Министерот Тупанчевски појасни дека новиот закон ќе мора да биде донесен најдоцна шест месеци пред наредните избори.

The post АЈДЕ ДА ИЗГЛАСАМЕ ЕДНА ИЗБОРНА ЕДИНИЦА! Опозицијата постави услов, на власта ѝ фали консензус appeared first on plusinfo.mk.

Предлогот на ВМРО-ДПМНЕ за укинување на пржинска влада, за формирање на една изборна единица и за намалување на бројот на пратеници доби поддршка од помалите политички партии од владејачката коалиција, но засега резервирано се држат од СДСМ и од ДУИ.

Од ДУИ делуваат како да се против измените во законот, бидејќи промената на изборниот модел веднаш ја условија со други промени на Уставот, од кои најмногу интерес во јавноста предизвика укинувањето на потребата од 20 отсто Албанци за употребата на албанскиот јазик во земјава.

Премиерот Димитар Ковачевски, пак, порача дека од неговата партија се спремни да разговараат за предложените промени во законот, но тој смета дека е рано за тоа бидејќи не се планирани предвремени избори, па ќе може да се преговара во текот на наредните две години. Многумина овој негов став го протолкуваа како обид да се избегне промената на законот.

За политикологот Владимир Божиновски од ИПИС, од СДСМ бегаат од изјаснување бидејќи на нив воопшто не им одговара во моментов избори во една изборна единица.

– Проблемот е во тоа што имаме несериозен и неконзистентен став кај партиите од власт, со тоа што го ветувале и претходно го нуделе, а сега се обидуваат да се извлечат. Додека беше ВМРО-ДПМНЕ на власт, од СДСМ во кампањата ветуваа една изборна единица и како што стојат работите од партијата барем декларативно не се откажале од тоа. Но сега кога ВМРО – ДПМНЕ излезе со иницијатива за една изборна единица тие се најдоа во небрано. Од СДСМ имаат дополнителен проблем бидејќи се одржуваат на власт со коалиција составена од партии кои долг период бараат формирање на една изборна единица. Затоа тие не можат ништо да направат одвен да одолговлекуваат – вели Божиновски.

Најголема одговорност, според Божиновски, е кај малите партии од владејачката коалиција кои сега имаат историска шанса да избоксуваат договор за една изборна единица.

– Се зависи од малите партии. Тие сега имаат полуги да го променат законот. Пред некои десет години тоа не можело да се случи, тогаш владината коалиција била стабилна, но сега нема оправување. Во последните пет години главниот виновник беше ВМРО-ДПМНЕ, но сега од таму има комплетно поинаков предлог. Проблем е и што ДУИ не сака да дојде до промена на изборните правила, но и тоа може да се реши. Доколку од СДСМ имаат цврст став околу ова прашање, тогаш партнерот во власта тоа ќе мора да го прифати. Ќе повторам дека се е во рацете на помалите партии од власта, кои друг пат шанса за една изборна едница нема да добијат – додава тој.

Тој смета дека од ВМРО-ДПМНЕ направиле одличен потег со предлогот, бидејќи наметнале тема со која дефинитивно ќе се намали комодитетот на владината коалиција.

Ние побаравме став и од најголемата опозициска партија во врска со динамиката на меѓупартиските преговори, околу измените во изборниот законик. Од ВМРО-ДПМНЕ ни соопштија дека не постои единство во коалицијата на власт околу предложените измени.

„Има одлоговлекување на измените на изборниот законик во делот на укинување на пржинска влада, една изборна единица и намалување на бројот на пратеници поради тоа што власта на СДСМ-ДУИ помогната од ЛДП, ДОМ, ДС како што е единствена во криминалот и крадењето од тендери, немаат внатрешно единство за овие прашања важни за системот, демократијата и интересите на граѓаните. Впрочем со ова излегува на површина дека единствено врзивно ткиво на партиите на власт е токму желбата за злоупотреби и тендери. Ако беше спротивно тогаш многу лесно ќе излегоа со единствен став. Една изборна единица беше декларативно барање на ЛДП, ДС и ДОМ и тие ова го прифатија, впрочем декларативно и СДС го прифати ова барање, но еве гледаме дека сите овие барања ги ставаат под тепих, а помалите партии сеуште седат во скутот на СДСМ и ДУИ само за да ги уживаат придобивките на власта. Очигледно е неединството по овие прашања, но тоа се надминува со единството постигнато за само една точка, крадењето“, за Плусинфо соопштија од ВМРО-ДПМНЕ.

Веќе ги објавивме проекциите за составот на Собранието, од кои може да се заклучи дека доколку последните избори беа одржани во една изборна единица најмногу ќе профитираше Левица.

– Во денешниот формат на Собранието, при поинаков изборен модел, сите би изгубиле пратеник, додека Левица би имала три повеќе. Затоа, во контекст на нагорната тенденција за раст на Левица, секако дека ќе се избегнуваат овие промени за во иднина. Дополнително, со нашите пратеници тие нема да наидат на отвореност за договарање на апанажи, патни трошоци и легализација на дивоградби од интерес – што е и очевидно и од досегашното собраниско искуство – изјави за Плусинфо портпаролот на Левица, Амар Мециновиќ.

Од оваа партија сметаат дека актуелниот иборен модел не ја отсликува вистинката волја на граѓаните.

– Поразително е и тоа што при овој изборен модел не се отсликува волјата на граѓаните, што ја подјармува претставничката демократија, а со тоа и легитимитетот на избраните владини коалицирања. Но, кај нас политичкиот легитимитет се крои на основа на фиктивни начела во доменот на надворешната политика и внатрешни бизнис зделки, а не и демократските изборни принципи. Сегашните правила на игра го кочат понатамошното развивање на политичките односи и созревањето на политичката култура – додава тој.

Пред усвојување на дневниот ред на денешната 62. седница, пратениците не го прифатија предлогот на група пратеници од ВМРО-ДПМНЕ по скратена постапка да се донесе предлог законот за изменување на Законот за владата, со кој се предвидува укинување на „прижинската влада“. За предлогот гласаа 32 пратеници, 55 против, а немаше воздржани, по што претседателот на Собранието Талат Џафери констатираше дека предлогот не е усвоен.

The post ДАЛИ СДСМ БЕГА ОД ЕДНА ИЗБОРНА ЕДИНИЦА? Одговорот можеби се крие во популарноста на Левица? appeared first on plusinfo.mk.

Од ВМРО-ДПМНЕ се чини дека се најзаинтересирани за укинувањето на „пржинската влада“, што во пракса ќе значи дека повеќе нема да мора да се формира техничка влада на три месеци пред избори. Но, од најголемата опозициска партија се подготвени да ги прифатат предлозите на Демократски сојуз (ДС), од каде посакуваат комплетно менување на Изборниот законик. Претседателот на ДС Павле Трајанов посочи дека е битно да се прогласи една изборна единица, а бројот на пратеници да се намали на 90. Тој смета дека техничка влада може да функционира 20 дена пред изборите.

Коалицискиот партнер на ВМРО-ДПМНЕ, Алијанса за Албанците, пак, пред извесно време излезе со предлог за осум изборни единици.

Координаторот на пратеничката група на СДСМ Јован Митрески вели дека нивниот предлог за една изборна единица во 2016 година, бил блокиран токму од пратениците на ВМРО-ДПМНЕ.

– Ние и тогаш кажавме дека сме за една изборна единица и дека треба да разговараме со сите модалитети на таа една изборна единица, прво гледат дека и денес има различни ставови, едни зборуваат за една изборна единица со праг, други без праг, може да се отвори прашањето за колкав да биде тој праг дали 2%, 2.5%, дали од запишаните дали од излезените гласачи се отвара прашањето за помалите етнички заедници односно за загарантираните места за помалите еднички заедници, затоа викам дека тој е сложен процес за којшто треба да обезбедиме консензус од сите – порача Митрески.

Пред извесно време од ДУИ имаа предлог за три изборни единици, за вицепремиерот Артан Груби пред неколку дена да каже дека од неговата партија се подготвени да разговараат за промена на Уставот, но дека меѓу другото би сакале промените во Законот за избори да одат во пакет со употребата на албанскиот јазик во Македонија и бришењето на неопходните 20 проценти за неговата примена во државните и во општинските институции.

Левица добива најмногу од една изборна единица

Очигледно е дека консултациите и преговорите на политичките партии ќе траат долго и во моментов е неблагодарно да се прогнозира каков ќе биде крајниот резултат од договероното, па затоа ние ќе се обидеме да ги претставиме сите можни сценарија.

Го контактиравме политикологот Димитар Христов, кој за Плусинфо ги откри сите можни сценарија и последиците кои би следувале од нивната примена во Законот за избори.

– Една изборна единица ќе доведе до поголема шареноликост во парламентот и можно е да добиеме италијанско сценарио, па да не може долго време да се состави влада. Големите партии нема да изгубат нешто значително, можеби еден, а во одредени случаеви можно е и ниту еден пратеник. Малите партии спротивно од големите, може да добијат 1 до 2 места, но сепак тоа повторно не би значело ништо. Дефинитивно ќе се изгуби пропорционалноста, тоа можеме да го видиме и во резервираноста на албанскиот блок на оваа тема. Проблем ќе биде и водењето на кампањата каде што таа дефинитивно ќе биде насочена кон местата со поголема популација на население бидејќи таму ќе биде битката за гласови – објаснува Христов.

Тој ни испрати и графикон со манипулација на изборните резултати од последните парламентарни избори, пресметани како изборите да се одржале во една изборна единица.

Од графичкиот приказ може да се процени дека сите партии губат по еден пратеник, додека Левица ќе добие 5 наместо освоените 2, а во Собранието свој претставник би имала и партијата на Интегра.

Проблемот е во Донтовиот модел

Што се однесува до изборниот праг, односно поставување одреден минимален број освоени гласови при изборот на пратениците, Христов смета дека мора да се определи. Тој вели и дека Донтовиот модел на пребројувањето на гласовите би било паметно да се промени со т.н. Харе квота, со што би добиле многу пореална слика на волјата на гласачкото тело.

– Изборен праг дефинитивно мора да има за да се направи некаква селекција кој би можел да влезе во парламентот. Според мене, треба да се движи помеѓу 2 % до 2,5 %, нормално ако го воведат. Во моментов немаме изборен праг, но доколку хипотетички претпоставиме дека би имале бидејќи можеме да зборуваме за некаков вештачки праг, во моментов тој е меѓу 1,5 до 2. Проблемот е начинот на пребројување на гласови (Донтов модел). Според мене, оваа промена на една изборна единица со Донтов модел нема да донесе ништо, вистинско решение би биле шест изборни единици со Харе квота за пребројување гласови и делење на пратенички места – додава тој.

Со манипулација на изборните резултати од минатите парламентарни избори, во услови на шест изборни единици и употреба на Харе квота, би се добиле следниве хипотетички резултати:

Гледаме дека со пребројувањето на гласовите со помош на Харе квотата се доаѓа до позначителни измени во изборниот резултат.

Што се однесува до предлогот за отворени листи, Христов вели дека тие би внеле огромна збрка во кампањата.

– Отворени листи ќе биде најпромашената работа, прво поради комплицираноста на начинот на гласање, второ ќе има можност за раздор внатре во партиите, бидејќи кандидатите ќе се натпреваруваат и внатре меѓусебе, трето и да сакаме нема никаква теорија да можеме да разгледаме 120 кандидати само од една партија, а не па од повеќе – тврди Христов.

Од изложеното може да се заклучи дека најголемиот дел од партиите што во моментов се консултираат за измените на Изборниот законик, се свесни дека со секоја промена би можеле за загубат по некој пратеник на наредните избори.

The post ЕДНА ИЗБОРНА ЕДИНИЦА ЌЕ НИ ДОНЕСЕ ИТАЛИЈАНСКО СЦЕНАРИО? Тајната на успехот на големите партии е во Донтовиот модел appeared first on plusinfo.mk.

На средбата, Трајанов ги презентираше ставовите на Демократскиот сојуз во врска со реформите на изборните правила, кои треба да се одвиваат во три фази.

Во првата фаза да се донесат измените на Изборниот законик, со кои Македонија ќе биде една изборна единица и ќе се укине избониот праг.

Во втората фаза, да се направат коренити реформи на изборните правила, со кои ќе се отстранат системските предности на четирите партии, посебно во врска со медиумското претставување и финансирање на изборната кампања од Буџетот на државата и трета фаза во која се предвидени уставни промени со кои ќе се намали бројот на пратеници од 120 на 90, како определба на Демократскиот сојуз за рационализација не само со намалување на бројот на пратеници, туку и бројот на министерствата, бројните агенции, регулаторни тела и сл.

Од Демократскиот сојуз очекуваат наскоро да започне парламентарната расправа за измените на Изборниот законик, кои се веќе во парламентарна постапка.

The post ПАВЛЕ ТРАЈАНОВ ОСТВАРИ ВРСКА СО ВМРО-ДПМНЕ Изборниот закон ќе се менува во три фази? appeared first on plusinfo.mk.

-Предлог-законот се разгледува од нас како партија. Имаме време пред нас, за да се анализираат најдобрите решенија околу ова прашање, евентуално и други прашања кои би требало да се дорегулираат во Законот за владата – рече Адеми.  

Немаме против, вели Адеми и додава дека ДУИ има договор и со СДСМ и со ВМРО-ДПМНЕ за укинување на техничката или пржинската влада.  

-Вие знаете дека секогаш за ваквите законски решенија претходеле преговори, дискусии помеѓу политичките партии и затоа не е добро еднострано да се предлагаат. Затоа велиме дека врз основа на тој договор постигнат помеѓу ДУИ и двете најголеми политички партии од македонскиот блок треба да се реализира, но, секако за тоа треба консензус помеѓу политичките партии за да се преточи во конкретни законски одредби – изјави Адеми.  

Тој додде дека немале време да го разгледаат Предлог-законот, но, како што потенцира, за него или пак за измени и дополнување на Изборниот законик или за донесување на потполно нов изборен законик треба да има преговори, широк консензус – меѓуетнички и меѓупартиски.

-Ние избравме влада, максимално ѝ даваме поддршка на владата. Парламентарните избори се предвидени во 2024, така што ние сме концентрирани на реализирање на владината програма. За таа програма дадовме доверба, гласавме и за кадровските решенија, но и за програмските определби на владата, така што максимално сме фокусирани на политиките, на мерките и проектите кои се предвидени во владината Програма – рече Адеми.

The post НЕМА ПОТРЕБА ДА СЕ БРЗА СО УКИНУВАЊЕТО НА „ТЕХНИЧКАТА ВЛАДА“ И од СДСМ и од ДУИ се против организирање на предвремени избори appeared first on plusinfo.mk.

– Сега опозицијата бара да ја нема техничката влада и мене ми е драго што тие со овој чекор, дали свесно или несвесно потврдуваат дека оваа Влада и оваа коалиција може и организира фер и демократски избори и сметаат дека со овој чекор нема потреба од техничка влада што практично се докажа и во претходните изборни циклуси којшто ги организираше оваа Влада, а ОБСЕ/ОДИХР и сите релевантни институции потврдија дека беа фер, слободни и демократски – нагласи Богоев.

Тој додаде дека техничката влада, како влада којашто треба да организира избори, е резултат на договори и преговори помеѓу најголемите политички партии и е несериозно ВМРО-ДПМНЕ самоиницијативно да го прави ова, бидејќи не е дојдено така до решението за техничка влада.

– Изборен законик или во случајов Закон за влада каде што се во интерес измените на Законот за влада на организација на изборен процес апсолутно мора да биде со широк консензус, не само со политичките партии туку и со граѓанскиот сектор – нагласи Богоев, додавајќи дека има време до 2024 година кога може да се отпочнат овие процеси.

Тој истакна дека крупните чекори во изведувањето и начинот на изведување на изборниот процес е несериозно една партија да ги предлага, една да ги гласа, секогаш е потребно да има широк консензус и дебата за вакви промени за тие да резултираат со кредибилитет на целиот изборен процес и изборниот законик и партиите да учествуваат на избори.

The post ОПОЗИЦИЈАТА БАРА УКИНУВАЊЕ НА ТЕХНИЧКА ВЛАДА БИДЕЈЌИ ВЛАСТА ФУНКЦИОНИРА Изборите ни се фер, слободни и демократски appeared first on plusinfo.mk.