Изминаа две недели откако, асоцијациите на приредувачите на игри на среќа во автомат клубови, казина и спортски обложувалници, АПИС и АСОМ доставија официјално барање до Собранието за организирање јавна расправа во врска со Предлог законот за игри на среќа, но не добија одговор. Согласно член 129 став 2 од деловникот, барањето е упатено до претседателот на Собранието, претседателката, членовите на Комисијата за финансирање и буџет и до координаторите на сите пратенички групи.

– Убедени сме дека ваквата демократска алатка ќе овозможи претставници на асоцијациите и вработените во легалните објекти да ја споделат сопствената експертиза и професионално искуство со пратениците. За жал, не само што не добивме ниту позитивен ниту негативен одговор, туку денеска на дневен ред на пленарната седница е ставен Предлог законот за игри на среќа во прво читање. Се засилува нашиот впечаток дека за некого брзината е поважна од суштината – рече Горан Стоименов, претставник на Асоцијацијата на приредувачи на игри на среќа (АПИС).

Тој нагласи дека станува збор за закон кој се однесува на економски сектор со повеќе од 10.000 вработени што вкупно гледано е најголемиот приватен работодавец.

– Зборуваме за регулатива од која зависат повеќе од 350 милиони евра буџетски приливи на годишно ниво. Закон со толку сериозни последици, особено што содржи уставно спорни одредби и решенија е недозволиво да се носи набрзина. Вака подготвен закон на среден рок ќе направи хаос во општеството кој тешко ќе може да се спречи. Затоа, сметаме дека е неопходно во законодавниот дом да ги соочиме аргументите и најважно од сѐ, јавноста да добие точна претстава за тоа какви штета ќе предизвика усвојувањето на овој Предлог закон – рече тој.

Долг период игрите на среќа се цел на негативна кампања во која се нафрлаат разни клевети. Стоименов повтори дека легалните објекти не се закана за младината. Закана за младината е популизмот кој затворајќи го овој економски сектор ќе ги направи младите лесен таргет на незаконски играчници кои ќе се одвиваат по подруми, а државата ќе нема никаква контрола.

– Голем дел од нашите членки имаат капитал од ЕУ, станува збор за општествено одговорни компании кои донираат во јавното здравство, спортот, културата, покровители се на многу хуманитарни акции и до сега низ различни примери покажале дека се искрен и стабилен партнер на заедницата. Доколку не бидеме ислушани и нашата експертиза и знаење не биде уважено со цел изработка на одржливо законско решение во согласност со највисоките европски и светски стандарди за организирање игри на среќа, ќе бидеме принудени да ги користиме сите демократски средства и правни механизми да ја истераме правдата до крај – рече претставникот на АПИС.

The post НЕДОЗВОЛИВО Е ЗАКОНОТ ЗА ИГРИ НА СРЕЌА ДА СЕ НОСИ НАБРЗИНА Приредувачите на игри на среќа реагираат на игнорантскиот однос appeared first on plusinfo.mk.

Долго време во општеството е отворено прашањето што треба државата да стори за да се намали бројот на обложувалници, автомат-клубови и казина. Од една страна државната каса на годишно ниво инкасира повеќе од 350 милиони евра, но од друга страна различните политички структури кои владеат во последните десетина години, се под притисок на критичката јавност која бара целосно затворање на игрите на среќа и „продавниците“ за брзи кредити.

Жестоките критичари го наметнуваат мислењето дека младината во моментот е изложена на искушенија за стекнување зависност од игрите на среќа, кое според нив, ги има на секој чекор. Многу често се користи формулацијата дека Скопје заради светлечките реклами на игрите на среќа наликува на Лас Вегас. Актуелната Влада не е имуна на овој притисок и затоа предложи нов закон за игри на среќа кој веднаш предизвика жестоки реакции на вработените во овој сектор и асоцијациите на приредувачите, кои тврдат дека со ваквото решение ќе се затворат легалните објекти заради што младината ќе стане лесна мета на диви играчници. Се повикуваат на примерот со Албанија каде нивниот премиер се откажа од четиригодишната забрана на игрите на среќа заради масовно отворање на играчници на црно и големи буџетски финансиски загуби.

Што содржи новиот предлог закон за игри на среќа? Се актуелизира одредбата за воведување дистанца од 500 метри на објектите за приредување игри на среќа од училишта, се забранува секаков вид медиумско рекламирање на приредувачите и се намалуваат светлечките реклами на големина од 100 сантиметри ширина и 30 сантиметри должина. Ова може да се каже дека е обид за тројна заштита од игрите на среќа. Сепак, анализите укажуваат сериозен потенцијал за покренување уставно правни прашања.

Да анализираме едно по едно. Со темелните вредности на Македонскиот Устав, но и во членот 55 во главата 4 – „Основи на економските односи“, се гарантира слободата на пазарот и претприемништвото. Државата мора да обезбеди еднаква правна положба на сите субјекти за пазарот и не може да ги ограничи слободата на пазарот и претприемништвото освен ако не е загрозена одбраната на Републиката, зачувувањето на животната средина, природата или здравјето на луѓето.

Доколку предлагачите на законот сметаат дека игрите на среќа се штетни по здравјето на луѓето, тогаш тоа мора да го докажат во правосудна постапка и потоа целосно да ги забранат. Вака, со дистанцирање 500 метри од училишта се прави противуставна дискриминација, и тоа на урбанистичка околност која не е фиксна. Имено, 500 метри во 2026 не значи дека ќе биде 500 метри и во 2028 година. Било кој градоначалник може да одлучи да гради училиште на помалку од 500 метри од постоечки автомат клуб и со тоа да создаде правна претпоставка за негово затворање. Уште повеќе што дистанцата од училишта не важи и за кафулиња, ресторани и тобака каде младината по истата логика (преку очи и магнетна привлечност на светлечките украсени излози) може да стекнува зависност од алкохол и никотин.

Доволен е примерот во Општина Центар, каде на „Боемската улица“ има основно училиште каде ученици од школскиот двор секојдневно се соочуваат со кафеанските обичаи. Најголем фаул на дистанцата прави одредбата од предлогот на Владата со кој државата го задржува правото да организира онлајн игри на среќа. Едноставно, се губи смислата на мерката за наводна заштита на младината кога преку мобилните телефони и интернетот тие ќе бидат изложени во секое време на онлајн игри на среќа.

Забраната за медиумско рекламирање е парадоксална, затоа што истата не се однесува и не важи за рекламите на спортската опрема и рекламите на спортските терени на називите на приредувачите на игри на среќа. Тоа значи дека кога на медиумите ќе се врши пренос на фудбалски, ракометен натпревар или спортски автомобилизам целокупната јавност ќе се соочува со рекламите на дресовите и називите на приредувачите на игри на среќа, ама за истите медиуми ќе важи забрана според која нема да може самите комерцијално да издаваат рекламен простор за овој економски сектор. Ова е повторно правен потенцијал за противуставна дискриминација.

Конечно, во октомври 2024 година Врховниот Суд на Шпанија ја укина забраната за рекламирање игри на среќа преку ТВ и интернетот. Пресудата ги истакна приоритетите за регулаторите во ЕУ. Судот заклучи дека забраната нема правна и уставна основа и наложи да се најде рамнотежа меѓу загарантираната слобода на деловното работење на приредувачите на игри на среќа и заштита на потрошувачите – играчите. Истиот Суд како повреда на слобода на говорот ја оцени и ја укина забраната за познатите личности (инфлуенсери) да рекламираат игри на среќа.

Анализата укажува дека министерството за финансии како овластен предлагач на новиот Предлог закон за игри на среќа на Владата треба сериозно да го земе предвид потенцијалот на оспорување на клучните одредби пред Уставниот суд што секако може да предизвика тужби кои драматично би го оштетиле буџетот на државата.

The post ТРОЈНАТА ЗАШТИТА ОД ИГРИТЕ НА СРЕЌА ЌЕ СТАНЕ УСТАВНО-ПРАВЕН ПРОБЛЕМ Слободата на пазарот и претприемништвото се гарантирани со Уставот appeared first on plusinfo.mk.

Мерката за оддалеченост од 500 метри предвидена во новиот предлог-закон за игри на среќа не е обична просторна регулација, туку директен налог за ставање клуч на врата и затворање на легалната индустрија. Претседателот на Асоцијацијата на спортски обложувалници на Македонија (АСОМ), Васко Илијевски, при своето гостување во емисијата „Студио 10“ на ТВ 24, предупреди дека ваквото законско решение ќе предизвика верижен економски удар, банкрот на приредувачите и експлозија на нелегалната црна економија.

Според Илијевски, физичката дислокација во урбаните средини е апсолутно невозможна, а дополнителните огромни финансиски давачки во законот свесно ја туркаат индустријата кон уништување.

– Повеќе од 10.000 директно вработени луѓе преку ноќ ќе останат без својата егзистенција, што значи дека заедно со нивните семејства, преку 35.000 луѓе стануваат идни можни кандидати за иселување од нашата држава. Дополнително, ќе бидат загрозени меѓу 50.000 и 100.000 луѓе од придружните дејности кои зависат од овој сектор, како агенциите за обезбедување, ИТ секторот и добавувачите на опрема – истакна Илијевски.

Ударот ќе го почувствуваат и други дејности, но и самиот државен буџет. Околу 350 милиони евра на годишно ниво се прибираат во буџетот од целокупното работење на легалните игри на среќа.

– Со затворањето, тие пари нема да исчезнат, туку директно ќе се трансферираат на црниот пазар, а државата нема да има никаков приход. Истовремено, ќе се случи огромен крах на пазарот на недвижности, бидејќи повеќе од 800 објекти кои сега се под закуп ќе останат празни – потенцира Илијевски.

Претседателот на АСОМ посочи дека легалните приредувачи се првата бариера која апсолутно го почитува законот, врши контрола на лични карти и не дозволува пристап на малолетници.

– Кога државата ќе ја забрани таа бариера, го остава просторот чист за нелегалниот пазар кој работи само за профит и не знае за лични карти и заштита на децата – смета Илијевски.

Илијевски потсети на албанското сценарио од 2018 година, кога по затворањето на игрите на среќа се случи огромен подем на криминалот, па по четири години државата мораше да го врати законот назад, иако до ден денес се соочува со полициски акции во диви коцкарници каде се запленува оружје и дрога.

Бидејќи предлог-законот е закажан за прво читање во Собранието на 10 јуни, АСОМ испраќа јасна порака до пратениците и бара итно повлекување на законот и отворање дијалог со засегнатите страни. Доколку законот помине во прво читање, Асоцијацијата најави дека ќе ги искористи сите механизми да го одбрани легалниот сектор, вклучително и масовни протести со илјадници вработени, за да се спречи овој упад кој значи монополизација и штитење на лични интереси.

Асоцијацијата на спортски обложувалници на Македонија никогаш не била против системска и одржлива регулација на пазарот, но реагира на фактот дека институциите упорно ги носат законите зад затворени врати, целосно исклучувајќи ги легитимните претставници на индустријата.

Во обид да се дојде до функционално законско решение кое навистина ќе ги заштити граѓаните, а нема да значи уништување на легалниот сектор, АСОМ во континуитет нуди конструктивен предлог базиран на три основни столба.

– Првиот столб од предлогот на АСОМ се однесува на дополнително заострување на казнената политика. Иако легалните приредувачи доследно ги почитуваат протоколите и спроведуваат строги контроли за забрана за влез на малолетници, Асоцијацијата предлага воведување на уште повисоки и поригорозни финансиски казни за сите приредувачи кои евентуално нема да го почитуваат овој дел од законот. Во легалните објекти правилата мора да важат за сите без исклучок. Вториот клучен столб е целосната либерализација и отворање на пазарот за онлајн приредување игри на среќа за веќе лиценцираните легални компании – појасни Илијевски.

Според него, ова е единствениот начин да се создаде природен баланс на пазарот според европски терк, каде што домашните компании ќе ги развиваат своите платформи со највисоки стандарди за заштита на играчите. Наместо тоа, новиот предлог-закон предвидува воспоставување на државен монопол, со што целосно се исклучуваат приватните приредувачи.

– Третиот столб предвидува сериозни инвестиции во превенцијата преку организирање масовни национални едукативни кампањи. АСОМ веќе инвестира сопствени ресурси во кампањи за одговорно играње и континуирана едукација на вработените – вели Илијевски.

Асоцијацијата смета дека е неопходно во овој процес активно да се вклучат Владата и специјализираните државни институции. Целта на овие заеднички кампањи е да се едуцира јавноста дека игрите на среќа се исклучиво форма на забава со мали влогови, а не начин за остварување профит преку компулсивно играње, потенцира Илијевски.

The post 10.000 ЛУЃЕ БЕЗ РАБОТА И 800 ДЕЛОВНИ ОБЈЕКТИ ПРАЗНИ! Предупредување од АСОМ дека новиот закон за игри на среќа носи економски крах appeared first on plusinfo.mk.

Здружението на вработени во секторот игри на среќа „Сакам да работам“ испрати рекација по повод предложените измени на Законот за игри на среќа.

„Слушнавме дека Предлог законот за заштита од пушење поминал серија консултации на извршната власт со еснафските здруженија и претставниците од тутунската индустрија за да постигнат компромис. За разлика од овој пристап, за Предлог законот за игри на среќа, извршната власт постапува обратно и ги игнорира засегнатите страни, иако станува збор за економски сектор кој вкупно гледано е најголем приватен работодавец во Македонија. За жал, никој од надлежните не смета дека ние вработените кои секојдневно ја спроведуваме регулативата за игри на среќа треба да дадеме идеи и предлози за подобар закон.

Осум години сме заложници на различни политички структури кои си поигруваат со нашите судбини тогаш кога мислат дека може да печалат гласови преку жртвување на нашите работни места. Осум години живееме во грч, неизвесност, заедно со нашите семејства се тресеме дали ќе останеме на улица, со нецелосно исплатени кредити, со активирани хипотеки и со авионски карти за еден правец – иселување во странство.

Ние не сме гости во сопствената држава. Албанските дипломирани правници бараат да полагаат правосуден испит на мајчиниот јазик, на највисоко ниво веднаш им се ветува решение. Ние испраќаме писма, протестираме, нема никаков ефект. Власта треба да одговори, зошто игнорира над 10.000 вработени во игрите на среќа? Дали причина за тоа е што 90 проценти од вработените сме Македонци кои можеби треба станеме жртви на политичко-етнички инженеринг? До кога легалните игри на среќа и вработените ќе страдаат заради негативната кампања на дежурните критичари, кои никогаш нема да преземат одговорност кога ќе се отворат играчници на црно по подруми каде младината ќе биде лесна цел?

Како здружение сме подготвени со сите демократски средства да го заштитиме нашето уставно загарантирано право на работа. Надлежните кои предлагаат затворање на легалните објекти за игри на среќа ни должат одговор каде ние да се вработиме, со поминати професионални обуки и работно искуство за приредување игри на среќа по највисоки светски и европски стандарди?“, се наведува во реакцијата на Здружението Сакам да работам која ја пренесувме во целост.

The post ЗОШТО ЗА ПУШЕЊЕТО ИМА КОНСУЛТАЦИИ, А ЗА ИГРИТЕ НА СРЕЌА НЕ? Здружението Сакам да работам бара одговор зошто се игнорираат 10.000 вработени appeared first on plusinfo.mk.

Претставници на Здружението на вработени во секторот игри на среќа „Сакам да работам“ денеска излегоа на предупредувачки протест против новиот предлог закон за игри на среќа.

– Причината за денешниот протест е Законот за игри на среќа кој Владата набрзина му го предложи на Собранието. Тие што го подготвувале законот не сметале дека треба да го чујат нашето мислење и искуство пред да го предложат. Сигурно се прашувате зошто протестот е овде во трговскиот центар Лептокарија? Токму оваа локација е потврда дека предлогот на Владата за дистанца од 500 метри е предлог за затворање на легалните објекти за игри на среќа. Затоа, ние вработените во овие објекти протестираме овде половина час како прво предупредување за тоа што ќе следи – рече Оливера Костова, претставничка на Здружението.

Таа предупреди дека ако се усвои предлогот на Владата, 10.000 вработени во овој сектор ќе останат на улица, а тоа ќе значи дека заедно со нивните семејства ќе станат 35.000 нови кандидати за иселување надвор од земјата.

– Тоа е социјална бомба. Каде ние да се вработиме? Актуелните наши работодавачи ни обезбедија обуки, професионално усовршување по највисоки европски и светски стандарди за организирање игри на среќа. Ако овој економски сектор престане да постои во Македонија ние ќе немаме друг избор освен да аплицираме во странство, во ЕУ, во западните земји за да работиме на работни места за кои сме се обучиле. Сакаме да упатиме јасна порака. Нашите протести се демократска битка за вистината. Долг период игрите на среќа се цел на негативна кампања. Ние не сме закана за младината. Закана за младината е популизмот кој затворајќи ги легалните објекти ќе ги направи младите лесен плен на играчници на црно кои ќе се одвиваат по подруми, каде државата ќе нема никаква контрола. Ние се бориме со аргументи и факти. Јавноста треба да види кој е подготвен да преземе одговорност за тоа што следи доколку се затвори овој легален економски сектор. Ние знаеме дека сме во право и стоиме зад секој искажан збор. Доколку надлежните и натаму мислат дека можат да нѐ игнорираат, ние сме подготвени да организираме масовни протести – рече Костова.

Нејзиниот колега Стеван Крстевски порача дека ако Владата итно не најде решение за нивните работни места, масовно ќе излезат на улица, со сите нивни вработени и семејства, сè додека некој не ги сфати сериозно.

– Денес стојам тука пред вас, во придружба на моите колеги, како еден обичен работник од индустријата за игри на среќа. Сакаме до сите надлежни институции, по кој знае кој пат, да испратиме една порака: Ние сме вкупно 10.000 вработени во оваа индустрија и ова што ни се случува е навистина срамота. Но, нема повеќе да молчиме! Ова денеска е само предупредувачки собир. Излезени сме во помал број за да покажеме дека сме спремни. Цели 8 години сме жртви на секоја политика, на секоја Влада, за нечии лични бизнис интереси. Секој што сака да ќари евтини политички поени, удира по нашиот грб. 8 години секој што ќе стигне нè држи во заложништво. Оставени сме во целосна неизвесност и секој ден живееме во страв дали утре нашиот објект ќе биде затворен и дали нашите работни места ќе постојат – рече тој.

Крстевски праша дали некој се запрашал какво е чувството да се живее во таква агонија и постојан немир?

– Од оваа работа ние чесно го вадиме нашиот леб. Ова е за нас единствен стабилен приход и надлежните мора да разберат дека овој предлог-закон удира врз реални човечки судбини. Сите ние имаме кредити за плаќање, подмируваме кирии и сметки, издржуваме семејства. Недозволиво е оние кои седат во удобните фотелји, вака да си поигруваат со нашата егзистенција. Затоа, нашата порака е јасна: Нема да дозволиме преку ноќ да нè избркате на улица. Оставете нè конечно на мир чесно да работиме! Ако не бидеме слушнати сега, следниот чекор се масовни блокади низ целата држава и нема да отстапиме сè додека нашите работни места не бидат безбедни – заклучи тој.

The post ОСТАВЕТЕ НЀ НА МИР, ЧЕСНО ДА РАБОТИМЕ Вработените во игрите на среќа бараат да бидат сфатени сериозно appeared first on plusinfo.mk.

Предлог-законот за игри на среќа и за забавните игри веќе влезе во собраниска процедура. Во јавноста овој потег гласно се продава како мерка за заштита на младите и воведување ред во општеството. Но, ако се тргне настрана политичката реторика и се погледне реалноста на терен, станува јасно дека зад ова се кријат моќни политички и бизнис интереси. Намерата е едноставна: да се жртвуваат десетици илјади работни места во легалниот сектор на игрите на среќа, со цел да се префрли целата контрола врз оваа индустрија во еден единствен центар.

Прашањето што се наметнува не е дали индустријата треба да биде регулирана, бидејќи таа и сега е меѓу најстрого контролираните во земјата. Вистинското прашање е кој ќе ја преземе одговорноста кога над 10.000 луѓе ќе останат на улица, додека капиталот, наместо во буџетот, ќе завршува во нелегални играчници и во строго контролирани монополи? Ова не е закон за заштита на општеството, туку класичен пример за прераспределба на моќта и пазарот преку институционална сила.

Она што е најспорно во предлог-законот и процесите што претходеа на ова законско решение е двојниот аршин околу онлајн обложувањето. Предлагачите постојано повторуваат дека сакаат да ги тргнат децата од пороците и од мобилните телефони. Сепак, со новиот предлог-закон државата си го зема ексклузивното право целосно да го преземе приредувањето на игри на среќа преку интернет. Тезата дека ова се прави за заштита паѓа во вода токму тука. Добро е познато дека во интернет просторот не постои строга физичка контрола и задолжително покажување лична карта пред вработен, каква што е секојдневната практика на вратите во легалните објекти за игри на среќа.

Овој начин на функционирање всушност никогаш не ни престана, иако власта во изминатата година прикажуваше дека го стега обрачот околу онлајн игрите на среќа и затвори повеќе од 300 сајтови, додека државната онлајн платформа „Мегавин“ никогаш не престана да работи и јавно да се рекламира. Тоа јасно покажува дека главната цел не е да се искорени обложувањето од општеството, туку да се исчисти пазарот од легалната конкуренција.

Колку е опасна оваа политика на затворање на легалниот систем, најдобро покажува примерот со соседна Албанија. Деновиве таму повторно гледаме масовни полициски акции (како акцијата „Fair Play“) во кои се апсат луѓе за нелегално онлајн обложување по угостителски објекти и се запленува огнено оружје.

Вакво слично сценарио може да се повтори и во Македонија, бидејќи кога државата ќе ги забрани или драстично ќе ги ограничи игрите на среќа, играњето не престанува. Тоа само се сели во темните подруми и на небезбедни канали. Кога ќе се затворат легалните објекти кои работат според строги правила, играчите и малолетниците завршуваат во сивата зона која е под контрола на криминалното подземје.

Сметката за ваквиот закон нема да ја платат политичарите, туку повеќе од 10.000 работници кои ќе останат на улица. Реалноста е дека со овој потег воопшто не се штитат граѓаните. Напротив, државата само си го чисти теренот за да воведе свој монопол, свесно оставајќи широк простор за развој на црниот пазар. Ова тешко може да се нарече европска регулација, бидејќи многу повеќе наликува на грубо преземање на еден легален бизнис преку институционален притисок.

The post ЗАД МАСКАТА ЗА ЗАШТИТА СЕ КРОИ ДРЖАВЕН МОНОПОЛ НА ИГРИТЕ НА СРЕЌА Класичен пример за прераспределба на моќта и на пазарот appeared first on plusinfo.mk.

Асоцијацијата на спортcки обложувалници на Македонија (АСОМ) испрати отворено писмо до пратениците во кое ги повикува да не го поддржуваат законот за кој предупредуваат дека ќе остави на улица 10.000 луѓе.

„Почитувани пратеници во Собранието на Република Северна Македонија,

Откако на 14 мај, Предлог-законот за игрите на среќа и за забавните игри и официјално пристигна во Собранието, ви се обраќаме со ова отворено писмо за јавно да ги разобличиме сите напади врз нашата индустрија и подмолната операција за уништување на легалниот сектор која се турка зад затворени врати.

Прво, јавно ве прашуваме: Зошто со години бегате од јавна дебата за овој важен закон? Зошто повторно, по толку многу верзии на законот пуштени до Собранието изминативе години, тој се пишува и се турка тајно, без вклучување на експертите и без објава на ЕНЕР? Ние, како легитимни претставници на 95% од легалниот пазар на приредувачи на игри на среќа во обложувалница, немаме што да криеме и сакаме јавно, пред граѓаните, да ги соочиме аргументите. Прашањето е дали Владата и Собранието имаат нешто да кријат? До кога ќе ја користите нашата индустрија за политички пазарења, држејќи 10.000 вработени во страв за сопствената егзистенција? АСОМ постојано нуди конструктивни решенија за европска регулација, но очигледно намерата не е суштинска заштита, туку политизација и остварување на прикриени лични интереси.

Второ, зошто бегате од фактите кои укажуваат на економска катастрофа? Алармираме дека предложените рестриктивни мерки се економски неодржливи и нивната имплементација неминовно ќе резултира со принудно затворање на целата легална индустрија. Воведувањето на оддалеченост од 500 метри од училиштата, како и астрономските давачки кои се дизајнирани со цел финансиско исцрпување и банкрот на легалните приредувачи. Со ваков закон се бришат 280 милиони евра од државниот буџет и се загрозуваат над 50.000 индиректни работни места во поврзаните гранки.

Трето, дали намерно го туркате општеството кон ‘албанското сценарио’? Кога ќе ја затворите легалната индустрија, нема да ја искорените навиката за играње, туку ќе ја префрлите во темните подруми.

Како Асоцијација директно се обраќаме до албанските политички партии и до сите пратеници и прашуваме: Зошто не учите од искуството на Албанија? Таму затворањето на индустријата предизвика враќање на нелегалното играње и пораст на криминалот, по што државата мораше повторно да го врати легалниот систем. Рестриктивните закони никаде во светот не решиле проблем, туку само создале црн пазар кој не познава правила и не ги штити малолетниците.

Четврто, нели е крајно лицемерно да зборувате за ‘заштита’, а истовремено да воведувате државен монопол? Државата јасно воспоставува монопол со тоа што самостојно ги приредува интернет игрите на среќа, со што приватните лиценцирани приредувачи целосно се исклучуваат од можноста да приредуваат посебни игри преку интернет. Ова не е пазарна економија, ниту заштита на играчите, туку насилно преземање на бизнисот за богатење на државата и на поединци.

Секоја власт лицемерно го злоупотребува нашиот легален бизнис сектор за сопствени агенди. Сите компании кои се членки на АСОМ се врвно професионални и доследно ги почитуваат законите. Сè друго е политичка игра за оцрнување на оние кои чесно придонесуваат во економијата.

АСОМ цврсто порачува: Законот за затворање на легалните игри на среќа не смее да се изгласа. Бараме итно повлекување на предлог-законот од собраниска процедура и отворање на широка јавна расправа за конечно да се донесе европски и одржлив закон. Во спротивно, подготвени сме со сите расположливи средства, вклучително и масовни протести на десетици илјади наши вработени, да ја браниме нашата легална индустрија од политичките напади.“

The post СПОРТСКИТЕ ОБЛОЖУВАЛНИЦИ ГИ ПОВИКАА ПРАТЕНИЦИТЕ ДА НЕ ОСТАВАТ 10.000 ЛУЃЕ НА УЛИЦА Бараат итно да се повлече предлог-законот за игри на среќа appeared first on plusinfo.mk.

Здружението на вработени во секторот игри на среќа „Сакам да работам“ за во петок во Скопје најави предупречувачки протест.

„Пратениците во македонското Собрание вчера и официјално го добија владиниот Предлог закон за игри на среќа, со кој се предвидува затворање на легалните објекти. Земајќи предвид дека нашите работни места и официјално се загрозени ние сме принудени да ги користиме сите демократски средства за борба за нашето уставно загарантирано право на работен однос. Во таа насока во петок ќе го одржиме првиот предупредувачки протест на вработените.

Одговорно тврдиме дека како здружение не сме консултирани за предлогот на Владата, ниту сме биле запознаени со неговата содржина. Нема никаква дилема дека овој Предлог закон за игри на среќа ни ја запечатува судбината. Подготвени сме на официјални средби со пратеничките групи да им ги презентираме сите факти, аргументирано да ги увериме дека со нивното евентуално гласање ‘за“ ќе остават најмалку 10.000 луѓе без работа и ќе создадат 35.000 нови кандидати за иселување од Македонија.

Нашето здружение одамна ѝ предочува на јавноста дека со воведување дистанца ќе се предизвика целосно затворање на легалните објекти, што по автоматизам ќе создаде епидемија на диви играчници по подруми, над кои државата ќе нема никаква контрола, а младината ќе биде под далеку поголем ризик. Доволно е да се погледнат примерите од соседството. Вчера излезе веста дека во Тирана тамошната полиција разбила голема мрежа на нелегално коцкање во местото Вора кое се одвивало во угостителски објект во кој при акцијата биле запленети поголем износ на пари. Сето ова е последица на четиригодишната забрана на легалните игри на среќа во Албанија. Иако, албанскиот премиер се повлече од забраната, сѐ уште не може да се справи со нелегалните играчници кои согласно неговото признание никнувале како печурки и сериозно му наштетиле на нивниот државен буџет.

Во Македонија се применува Закон за игри на среќа, кој е еден од најстрогите во регионот и пошироко и содржи европски и светски стандарди за регулирање на оваа економска гранка, а особено за забрана на влез на малолетници во сите легални објекти со лиценци за приредување игри на среќа. Пратениците не треба да влезат во замката на дежурните критичари на игрите на среќа кои многу долг период водат офанзивна битка против овој економски сектор. Легалните игри на среќа веќе со години се предмет на невидена негативна кампања во која се користат сите дозволени и недозволени средства за оцрнување.

Излегуваме на серија предупредувачки протести во одбрана на вистината. Бараме институционално соочување со дежурните критичари на игрите на среќа. Крајно време е да ги соочиме фактите и аргументите пред целокупната јавност и да видиме кој е подготвен да преземе одговорност за штетните последици кои брзо ќе се случат ако ваквото законско решение стапи на сила. Ние знаеме дека сме во право и стоиме зад сите наши тврдења. Доколку нашиот глас и понатаму се игнорира подготвени сме да организираме масовни протести“, се наведува во најавата за протест на Здружението Сакам да работам.

The post ПРЕДУПРЕДУВАЧКИ ПРОТЕСТ ВО ПЕТОК НА ВРАБОТЕНИТЕ ВО СЕКТОРОТ ИГРИ НА СРЕЌА Не биле ниту консултирани, ниту запознаени со владиниот Предлог закон appeared first on plusinfo.mk.

Неразбирливо е како Владата по секоја цена се обидува да донесе закон што ќе има низа негативни последици врз граѓаните и општеството. Овој закон нема да реши ниту еден проблем, туку ќе создаде огромни нови проблеми. Со него, де факто, се затвораат легалните игри на среќа и широко се отвора вратата за нелегално обложување по подруми, со што државата се враќа во деведесеттите години, се вели во соопштението на Асоцијацијата на спортски обложувалници на Македонија (АСОМ) издадено како реакција на денешните изјави во врска со Предлог-законот за игрите на среќа и за забавните игри од страна на Владата.

„Со затворањето на легалните објекти ќе почне да царува криминалот и нелегалното обложување, што ќе претставува огромен ризик за граѓаните и за играчите. Ова веќе се случи во Албанија, а истото ќе се случи и кај нас.

Понатаму, 10.000 лица директно вработени во индустријата ќе останат без работа, а уште 50.000 индиректно поврзани работни места ќе бидат загрозени. Повеќе од 800 деловни објекти под закуп ќе останат без закупци. Во буџетот ќе недостигаат над 280 милиони евра по различни основи.

Целта на овој закон не е заштита на играчите и граѓаните, туку обезбедување монопол на власта во овој сектор. Ние, како приредувачи на игри на среќа, нема да го дозволиме тоа. Најавуваме масовни протести и целосно ќе ја изнесеме вистината пред јавноста.

Жално е што ниту една институција не се обиде да организира јавна дебата, ниту се одважи да се соочи со нас и да ги слушне аргументите. Не е точна изјавата дека сме биле повикани или дека законот бил подготвуван низ широк консултативен процес. Напротив, законот е целосно изготвен без каква било консултација со нас.

Нашиот став е дека е потребен европски закон кој вистински ќе ги штити играчите, ќе го либерализира пазарот на онлајн обложување и ќе обезбеди соодветна заштита и едукација на играчите. За тоа сме подготвени да разговараме, а ваков закон сме понудиле повеќепати и во минатото.

Во наш интерес, како Асоцијација, е да имаме долгорочно и одржливо решение што ќе биде во интерес и на граѓаните и на индустријата. Тоа би требало да биде интерес и на институциите. Сè друго отвора сомнеж дека зад овој закон стојат политички интереси, за што нема да молчиме“ – се вели во реакцијата на Асоцијацијата на спортски обложувалници на Македонија (АСОМ).

The post НИКОГАШ НЕ СМЕ БИЛЕ ДЕЛ ОД ПРОЦЕСОТ НА ИЗРАБОТКА НА НОВИОТ ПРЕДЛОГ- ЗАКОН Реакција на Асоцијацијата на спортски обложувалници на Македонија appeared first on plusinfo.mk.

Претседателот на Владата Христијан Мицкоски во врска со новиот закон за игри на среќа рече дека се става ред и дисциплина во игрите на среќа и дека не може државата да наликува на Лас Вегас. Смета дека нема да има нелегални приредувања на игри на среќа и дека ќе се изгубат работни места.

-Имаме чувство дека државата полека но сигурно наликуваше на Лас Вегас. Буквално на секој чекор гледавме дуќани во кои со силни светлечки реклами се рекламира овој тип на среќа, пред се, мислам на казината и коцкањето и некако како правило до нив веднаш имате канцеларија за брзи кредити, па веднаш до нив имате заложувалница. Тоа е некако еден систем, којшто мораме да го регулираме и претставува систем којшто е за жал причина за многу семејни и човечки несреќи. Со овој закон се регулира оваа дејност. Повеќе нема да има таков тип на реклами коишто привлекуваат внимание. Во некои места дури цели маала имаше по неколку казина такви. Со овој закон, свесни за последиците, можеби и за фискалниот ефект, но ние цениме дека со овој закон мора да се стави ред и дисциплина во игрите на среќа и дека не може државата да наликува на Лас Вегас- изјави Мицкоски.

За Асоцијацијата на игри на среќа, премиерот, кој денеска беше во Виница, вели дека не се согласува со констатацијата дека законот бил донесен нетранспаретно, не мисли дека ќе има нелегални приредувања на игри на среќа и дека ќе се изгубат работни места.

-Не би се согласил со оваа констатација. Мислам дека законот беше донесен ултратранспаретно. Беа повикани буквално сите засегнати страни да учествуваат во неговата изработка. Нормално е дека ние не можеме да се усогласиме 100% со оние што се дел од тој бизнис во моментот бидејќи тие имаат свој интерес. Ние го штитиме интересот на државата и граѓаните. Не мислам дека ќе има нелегални приредувања на игри на среќа и не мислам дека ќе се изгубат работни места. Едноставно се става дисциплина и поинаков лик, поинаква перцепција ќе имаат македонските градови – рече Мицкоски.

The post МАКЕДОНИЈА НЕМА ДА НАЛИКУВА НА ЛАС ВЕГАС Мицкоски оцени дека новиот закон става ред во игрите на среќа appeared first on plusinfo.mk.