На предлог на Министерството за транспорт, Владата ги усвои измените на Законот за градење и Законот за градежно земјиште, со кои се поттикнува економскиот развој на државата и на општините, се овозможуваат подобри и поквалитетни услуги за граѓаните и се овозможува рационално користење на јавните добра.

Со измените на Законот за градежно земјиште конечно се воспоставува ред во линиската подземна инфраструктура (оптички кабли, телекомуникациска мрежа, водоводни и канализациони системи, гасоводни мрежи, нафтоводи, итн.) и за прв пат ќе се овозможи нивно впишување во евиденцијата во Катастарот на инфраструктурни градби во Агенцијата на катастарот за недвижности. Целта е да се има јасен увид во целокупната линиска инфраструктура во државата заради соодветно и рационално планирање на нови градби од овој тип.

Со измените се овозможува општините да можат да располагаат со градежното земјиште предвидено со урбанистички план за Технолошки индустриски зони со цел да имаат економски развој и можност за домашните компании полесно да ги реализираат своите инвестициски планови. Дополнително со измените се врши усогласување на Законот за градежно земјиште со Законот за урбанистичко планирање.

Во однос на Законот за градење, со измените се предвидува подобрување на условите за регулирање на имотно правниот статус на базните станици на телекомуникациските компании, а преку тоа и поквалитетни и поефикасни телекомуникациски услуги за граѓаните.

Дополнително со измените во Законот за градење се подигнува нивото на квалитет на технички преглед на градбите од прва категорија, преку зголемување на критеруимите за формирање Комисија за технички преглед и професионален пристап за спроведување на техничките прегледи на градбите од прва категорија.

The post ПОДЗЕМНАТА ИНФРАСТРУКТУРА ЌЕ СЕ ВПИШЕ ВО КАТАСТАР Ќе се регулира и статусот на базните станици appeared first on plusinfo.mk.

Ќе се одглават заглавените инфраструктурни проекти, чија изградба со години е сопрена. Владата денеска ги усвои измените на Законот за градење, кои ќе бидат испратени на разгледување и усвојување во Собранието.

Министерството за транспорт соопшти дека ги направило законските измени со цел заштита на државниот капитал и државните интереси. Со нив се овозможува остварување на правата на градење кон јавните органи, односно се овозможува реализација на веќе започнатите градби на државните органи.

„Овие измени се насочени кон унапредување на процесите за издавање на одобренијата за градење и поедноставување на постапките за инфраструктурни проекти, доминантно спрема јавните органи. Целта на предложените измени е да се решат сите затекнати проблеми во текот на градбите, како и да се олесни користењето на објектите, со што ќе се овозможи побрза и поефикасна реализација на инфраструктурните проекти. На тој начин се овозможува реализација на веќе започнатите градби од страна на државните органи преку нивна доизградба и делот на ставање на употреба“, информираат од Министерството.

Со измените, исто така, се олеснуваат постапките за изградба на патна и железничка инфраструктура финансирани од буџетски средства.

Со предложените измени се прави и усогласување на Законот за урбанистичко планирање со Законот за градење во делот на новите градби за складирање на енергија до 1 и над 1 мегават. Со измените се прави законско регулирање на таквите градби преку издавање на одобрение за градење, а досега за нив немаше реулирана процедура.

Министерот за транспорт и вицепремиер, Александар Николоски вели дека голем дел од наследените проекти од претходните влади се заглавени, започнати и недовршени, а ова е неопходен чекор во заштита на државниот капитал.

– И заради тоа измените на законот се суштински, за да можеме да ги доизградиме патиштата, зградите на Универзитерскиот кампус, зградата на Народна банка, желеницата и сите други проекти кои се платени со народни пари, а стојат недовршени – вели Николоски.

Министерството за транспорт овие измени ги направи во тесна соработка со општините и јавните претпријатија, а со цел да се поедностави постоечката регулатива во областа на градежништвото и инфраструктурата.

Од Министерството додаваат дека со овие измени ќе се создадат поповолни услови за реализација на капитални проекти.

The post ЌЕ СЕ ДОГРАДАТ ФАКУЛТЕТИТЕ, ЗГРАДАТА НА НАРОДНАТА БАНКА, ЖЕЛЕЗНИЦАТА… Со законски измени ќе се одглават заглавените државни проекти appeared first on plusinfo.mk.

– Тоа е реалност, законите мора темелно да се изменат, но од друга страна имаме бурни реакции од поединци во јавноста кога ќе се споменат измени на овие два закона. Без да се прочита текстот се прави хистерија дека секоја измена ќе направи хаос во градењето. Да потсетам имавме измени на законот за урбанистичко планирање и се крена хистерија. И што се случи? По три месеци никаков хаос не се случи. Се случи дека градинки, училишта и болници се градат под олеснети услови. Сега нема општина која не почнала да гради или планира да гради вакви објекти – рече Николоски.

Тој информира дека во Министерството за транспорт веќе се работи на измени на двата закона и кога ќе бидат готови текстовите ќе се дадат на јавна расправа.

– Овие закони апсолутно мора да се сменат и ние работиме на тоа. Апелирам јавноста кога ќе бидат готови текстовите и дадени на расправа да ги следи измените онака како што се подготвени и да даде мислење, а не да се приклучуваат на хистеријата која ја предизвикуваат одредени кругови – рече Николоски.

Тој не кажа какви измени се подготвуваат во двата закона и кога јавноста ќе може да даде свое мислење за измените.

The post ЌЕ СЕ МЕНУВААТ ЗАКОНИТЕ ЗА ГРАДЕЊЕ И ЗА УРБАНИСТИЧКО ПЛАНИРАЊЕ Николоски повика да не се крева хистерија дека нешто лошо ќе се случи appeared first on plusinfo.mk.

На седницата, како што информира претседателот на Комисијата Владо Мисјаловски, се прифатени три амандмани, еден не е прифатен, 12 се повлечени, а пет се комисиски усвоени.

На седницата присуствуваше и министерот за транспорт и врски Благој Бочварски.

Со измените се предвидени поедноставени процедури за поставување фотонапонски централи.

Измените и дополнувањата се за ублажување на последиците од енергетската криза, со кои граѓаните и деловната заедница ќе може да постават најбрзо и по најповолни услови фотонапонски електроцентрали за производство на струја.

Предложените измени предвидуваат, фотонапонските електроцентрали да може да бидат поставени на објекти во индивидуална сопственост до 6 киловати и од страна на сите субјекти потрошувачи – производители до 40 киловати.

Новиот Закон предвидува поедноставување на процедурите и клучно е што на граѓаните нема да им биде потребно решение од општината за поставување на фотонапонските централи.

The post ЗАВРШИ КОМИСИСКАТА РАСПРАВА ЗА ФОТОНАПОНСКИТЕ ЦЕНТРАЛИ 12 амандмани повлечени, 3 прифатен, еден неприфатен appeared first on plusinfo.mk.

Колку во Скопје и во земјава се гради сеизмички? Ова прашање посебно се поставува денеска на годишнината од скопскиот земјотрес од 1963 година кога во урнатините од зградите загинаа 1070 жители, беа урнати 15.800 станови, а оштетени 28.000.

Поучени од оваа голема несреќа, градежниците велат дека посебно внимание посветуваат на стандардите кои треба да ги исполнат при градење на конструкцијата. Архитектите велат дека многу е важен надзорот при градбата во сите фази, посебно на конструкцијата, да не се брза со роковите и да се почитуваат стандардите при вградување на секој градежен материјал. Важна е и совеста и знаењето на лицата вклучени во процесот на контрола на градбата.

Земјава има и одредби во Законот за градење во кои на инвеститорите им се дава обврска да го градат објектот според одредени стандарди кои треба да обезбедат механичката отпорност, стабилност и сеизмичка заштита на објектот. Процесот на градење се следи од проектирање до завршување на објектите, и нема употребна дозвола без соодветно стручно мислење на стручни лица од инженерската сеизмологија.

Но, регулативата треба да се почитува во целост за да може објектите кои се проектираат и градат да се сметаат за сеизмички отпорни. Дали сето ова се почитува на терен?

Архитектот Никола Велковски сопственик на компанијата „Инком инженеринг“ кој е член на Градежната комора која дејствува во рамките на Стопанската комора, вели дека нема градежник кој не сака да изгради безбеден објект, но смета дека дел од градежните инвеститори не ја сфаќаат добро надзорната улога во процесот на градба главно на конструкцијата, а таа е најважна за стабилноста на конструкцијата на објектот што се гради.

– Секој објект се проектира со стручно мислење од Институтот за земјотресно инженерство и инженерска сеизмологија (ИЗИИС) и на уште еден субјект. После тоа во текот на изведување на објектот овие институти издаваат мислење од самото место. Но во законот има една фалинка, според која надзорниот одбор дава мислење пред ИЗИИС дека објектот се изведува според стандардите, бидејќи луѓе од институтите не можат дневно да бидат присутни на објектите и да гледаат како се реализира градењето. Затоа сметам дека на надзорот треба да му се пристапи многу сериозно, а не паушално, како што се прави кај некои инвеститори. Надзорниот орган мора да биде присутен на објектот во текот на целиот период на изградба на конструкцијата. Притоа треба да се почитуваат роковите и квалитетот на материјалите кои се вградуваат во конструкцијата – вели Велковски.

Според него, поучени од минатото, инвеститорите сега повеќе внимаваат како градат и дали ги задоволуваат стандардите при градење на конструкцијата.

– Ниту еден инвеститор не смее да ризикува со градењето на конструкцијата која е најважна за стабилноста на објектот. Но, би апелирал младите инвеститори кои немаат соодветно образование да не брзаат со градење на објектите и да ги почитуваат роковите на зреење на материјалите кои се вградуваат за да не се случат несакани пропусти кои подоцна би биле кобни за објектот. Пропишани се стандарди, на пример, за квалитетот на бетонот што се вградува. Од секој процес на вградување бетон треба да се има коцка која треба да оди на испитување. Има стандарди и за другите материјали кои треба да се почитуваат и рокови за нивно зреење пред почеток на нова фаза во градењето и тоа треба да се почитува. Тука главна улога има надзорниот орган. Мислам дека ниту еден градежен инженер не би сакал да потпише нешто што знае дека подоцна ќе влијае на квалитетот на изведената конструкција на објектот на кој врши надзор – додава Велковски.

Тој предупредува навреме да се реагира при пропусти во градбата за да не мора подоцна објектот кој покажува фалинки да се санира или руши.

– Знаете, санацијата подоцна е поскапа од градбата и во случај на поголем проблем при градењето на конструкцијата подобро е таа да се сруши отколку да се санира. Затоа, како што реков, е најважно да се прави вистински, а не паушален надзор на градбата. И би ги советувал инвеститорите кои не се стручни лица да не штедат на овој сегмент, бидејќи од стручноста и знаењето на надзорот зависи безбедноста на градбата. Сметам дека ниту еден инвеститор не би сакал да гради објект кој подоцна ќе мора да го санира или руши, бидејќи на сите им е целта да заработат од објекот, а не да вложуваат дополнително за санација или рушење – додава тој.

За испитување на стабилноста и цврстината на градежната конструкција, вели Велковски, иако законски не е дадено како обврска, по желба на инвеститорот може објектот да се изложи на еден вид земјотрес и да се увери дали притоа ќе се појават одредени пукнатини во конструкцијата сѐ со цел да се обезбеди сигурност на луѓето кои ќе живеат во тој објект.

Од Сојузот на стопански комори во која е активна и Градежната комора велат дека како деловна мрежа е насочена кон промоција на највисоки стандарди за проектирање и градење.

– Без следење и имплементација на најновите трендови и стандарди не може да се постигне квалитет кој е клучен за одржливо и континуирано зголемување на конкурентноста на компаниите. Ние веруваме дека сите компании во нивните деловни политики како врвен приоритет го поставуваат квалитетот на градбата, кој е регулиран и загарантиран и со соодветни правни прописи кои посебен акцент ставаат на безбедноста на градбите – велат од ССК.

Оттаму додаваат дека Потврда за безбедноста даваат институциите кои согласно законската регулатива ја вршат контролата и тие би требало одговорно да ја вршат работата.

Според Законот за градење (член 4), секоја градба треба да е проектирана и изведена на таков начин што во текот на градежните работи и во текот на употребата нема да дојде до нарушување на механичката отпорност, стабилност и сеизмичката заштита, а особено до: уривање на целата или дел од градбата, оштетување на делови од градбата, темелната основа или опремата како резултат на големи деформации на конструкција на градбата и несразмерно големи деформации и оштетувања во однос на причината од која настанале.

Секој инвеститор треба да има поднесено сеизмичко мислење за да може да добие дозвола за употреба на објектот. Оваа обврска ја имаат сите градежници за објекти поголеми од 300 метри квадратни. Вакво мислење не треба да се обезбедува за градби наменети за индивидуално домување со бруто развиена површина до 300 м². Но тоа не значи, според Велковски, дека овие градби треба да се изведуваат паушално и без надзор на конструкцијата.

За утврдување на исполнетоста на овие услови, законот предвидува секој инвеститор да обезбеди позитивно мислење за проектираниот и изведениот степен на механичка отпорност, стабилност и сеизмичка заштита на градбата, од страна на субјект кој врши научноистражувачка дејност – научен институт специјализиран во областа на заштита на градби од сеизмички влијанија.

„Мислењето за изведениот степен на механичка отпорност, стабилност и сеизмичка заштита на градбата се обезбедува од страна на изведувачот во текот на изградбата и по изградба на целиот конструктивен систем на градбата“ се наведува во законот.

Според законот, доколку по завршувањето со изградбата и ставањето во употреба на градбата дојде до оштетување на градбата поради неисполнетост на условите за механичка отпорност, стабилност и сеизмичка заштита на градбата, обврската за надомест на штета ќе биде на товар на субјектот кој врши научноистражувачка дејност.

Во земјава мислење за механичка отпорност, стабилност и сеизмичка заштита даваат Институтот за земјотресно инженерство и инженерска сеизмологија (ИЗИИС), а контрола на квалитетот на проектирање и на материјалите дава Заводот за испитување на материјали и развој на нови технологии „Скопје“.

The post ДАЛИ МОЖЕМЕ ДА СПИЕМЕ МИРНО? Градежниците тврдат дека градат според сеизмички стандарди appeared first on plusinfo.mk.

Ќе се донесе нов закон за градење за кој веќе е изработена нацрт- верзија и во тек се консултации со стручната јавност. Во него, меѓу другото, се предвидува скратување на постапките за издавање на актите за градење со воведување обединета постапка за сите видови акти, укинување на прекумерниот број позитивни мислења и согласности за градење, како и категоризација на сите градби.

Потребата од донесување на нов закон, како што денеска изјави министерот за транспорт и врски Благој Бочварски, произлегува од фактот што актуелниот е менуван повеќе од 30 пати и што одредбите во него реално прават проблеми во сите постапки на градењето.

Според него, најважно е во новото законско решение да се пронајдат сите – и оние од високоградбата и и оние од нискоградбата, како и секоја фела што работи во овој сектор.

– По секој цена не сакавме да креираме закон кој би бил штетен како и претходните. Затоа изминатиов период, целата стручна јавност, граѓанските организации и сите други чинители вклучени во оваа проблематика учествувавте во креирање на овој нов закон со свои предлози и решенија – истакна Бочварски.

Стручната јавност смета дека постои можност да се подобри законот во некои негови членови со цел да се направи законско решение кое ќе биде применливо во пракса.

– Како стручна фела оценивме дека постои начин да се подобрат перформанските на овој закон во некои одредени членови со појаснувања и дполнувања и на тој начин да придонесеме и да направиме применлив закон којшто нема да дозволи да се јавуваат недостатоци како претходниот закон – изјави  проф. д-р Горан Мијоски од Градежниот факултет и претседател на Друштвото за патишта.

Со Предлог-законот се уредува материјата на изградба на градби преку која се стимулира просторниот и економскиот развој на државата. Во исто време се стимулира инвестирањето во градење, се зајакнува улогата на стручната јавност и правата на странките и се овозможува разрешување на наталожените децениски проблеми во градежната дејност.

Градежништвото учествува со над 30 проценти во Бруто домашниот производ, вработува преку 40 илјади работници, а поддржува уште 36 други стопански гранки.

The post Бизнисот го бараше со години: Ќе се носи нов закон за градење appeared first on plusinfo.mk.