Плусинфо веќе објави дека Владата ќе му закачи европско знаменце на Законот за државјанство за да во експресна постапка биде донесен во Собранието.

– Законот е согласно декларациите за државјанство усвоени во ЕУ. Последните промени беа со кореспондентни табели – комплетно вградување на европските регулативи во нашето законодавство. Се прават пошироки критериумите за решавање на проблемот со државјанството. Генерално сме усогласени, власта и опозицијата. Законот е блокиран од мала политичка партија Левица која без разумно оправдување не дава одговор зошто тоа го прави, освен, според мене, да продуцира меѓуетнички проблеми и нетрпеливост што треба да го чуваме и негуваме, а не да го поттикнуваме и разгоруваме – рече Заев, одговорајќи на новинарски прашања.

Според Заев, иако законот е поднесен на иницијатива на Алијанса на Албанците и Алтернатива, договорено е Владата да го пушти.

– Се работи за буквално истиот текст поднесен од пратениците. Службите овие денови ќе го испратат до Парламентот – додаде премиерот.

The post Законот за државјанство со европско знаменце помина на Влада, потврди Заев appeared first on plusinfo.mk.

За експресно да биде донесен Законот за државјанство усогласен помеѓу власт и коалицијата Алијанса за Албанците и Алтернатива, веќе денеска Владата може да го достави до Собранието со европско знаменце, потврдуваат за Плусинфо од Владата.

И покрај договорот меѓу Владата и опозициските партии на Албанците, законот за државјанство остана блокиран во Собранието.

– Правиме напори денеска на владина седница да помине усогласениот текст на Законот за државјанство. Законот ќе биде со европско знаменце, бидејќи државјанствата на ниво на Европа се уредени со Европски регулативи. Што и да се менува во таквите закони е со европско знаменце – вели за Плусинфо функционер од Владата.

По бурните реакции прво, дали се потребни измени на Законот и второ, преговорите и договорот меѓу власта и АА-А за измени на Законот, тој сега е закочен во Собранието во фаза на комисиска расправа.

Дека Законот по брза постапка, односно со европско знаменце е можно да биде испратен во Собранието за да се надминат блокадите претходно најави пратеникот на Алијанса за Албанците, Халил Снопче. Тој ова го најави како варијанта Б, доколку се блокира расправата во Собранието.

– Се разбира, ако гледаме навистина, значи има блокади, сигурно ќе одиме на втората варијанта преку европско знаменце. Зошто? Затоа што прво, имаме согласност од страна на Владата и второ, навистина се работи за човекови права и трето, сигурно според сите европски и меѓународни конвенции нема логика да има луѓе без државјанство во ниту една држава, а ние имаме луѓе што се без државјанство – вели Снопче.

Овој проблем, како што рече, мора да се реши и според меѓународни стандарди, и смета дека нема пречка да се донесе овој закон со европско знаменце.

Од коалицијата АА-А велат дека тие го доставиле усогласениот текст на Законот со власта до Владата и дека сега на потег се од „Илинденска“.

Пратеникот од ВМРО-ДПМНЕ, Антонијо Милошоски, неодамна за „Утрински брифинг“ изјави дека класична злоупотреба на европското знаменце е доколку владата се реши на тој начин да го носи Законот за државјанство.

Милошоски потенцира дека ЕУ нема унифициран акт или резолуција во однос на државјанствата и затоа не може да се врши злоупотреба на европското знаменце и тоа е неделовнички и погрешно, исто како што е погрешно за истиот да одлучуваат само две или три партии, а не сите.

– Законот за државјанство е неусогласен помеѓу сите политички партии и не е соодветно тој да биде договорен помеѓу 2 или 3 партии, а да исклучи други 4 или 5. Тој ги опфаќа сите граѓани и треба да ги опфати сите партии во договарањето за дополнувања на тој закон. Владата реши да оди со помал број на партии во договарање и тоа не е во ред. Второ, тој закон има многу слабости кои се спротивни на европските практики како се стекнува државјанство – рече тогаш Милошоски.

Од ВМРО-ДПМНЕ не сакаат да коментираат што ќе преземат доколку Владата го предложи Законот со европско знаменце. Од таму велат дека прво ќе почекаат да видат што и како ќе помине на Влада.

The post Владата ќе му закачи европско знаменце на Законот за државјанство appeared first on plusinfo.mk.

Премиерот Зоран Заев неодамна посочи дека законот за државјанство доставен од коалицијата АА-А не одговара на договореното на лидерските средби.

Се очекува деновиве или најдоцна следната недела да има средба помеѓу министерот за внатрешни работи Оливер Спасовски и претставници на АА-А за да се види дали е можен договор за законот за државјанство за тој да влезе во собраниска процедура, по што Алијанса и Алтернатива би ги повлекле илјадниците амандмани.

Од власта велат дека прашањето за јазикот за нив е расчистено на средбите помеѓу Заев, Спасовски и Бојан Маричиќ со лидерите на АА-А Зијадин Села и Африм Гаши. Сега, велат е нејасно зошто се инсистира повторно на тоа прашање.

– Македонскиот јазик е службен и за домашна и за надворешна употреба. Не може со познавање само на албанскиот јазик да се добие македонско државјанство, тоа е спротивно на Уставот. Општењето на странци кои бараат македонско државјанство мора да е само на македонски јазик. Откако ќе добијат државјанство, тие, албанскиот јазик може да го користат како што е законски утврдено – вели функционерот.

Според власта, на Села и на Гаши на средбите им било укажано дека освен што тоа е противуставно, е и дискриминирачко за граѓаните од другите соседни држави кои бараат македонско државјанство. Аргументите се дека албанскиот е мајчин јазик на соседна држава и дека со тоа се ставаат во нерамноправна положба граѓаните од другите соседни земји кои аплицираат за македонско државјанство.

– Службен јазик надвор од државата е само македонскиот јазик. Алијанса и Алтернатива не би требало да инсистираат на поинакво решение, бидејќи институциите не ќе можат да потврдат закон кој е противуставен, и потоа, Уставниот суд да толкува. Впрочем од 2.700 баратели за македонско државјанство само 6 се одбиени врз основа на непознавање на македонскиот јазик. Оттука сметаме дека прашањето за јазикот е затворено – вели висок функционер од Владата.

Од власта објаснуваат дека спорна е и одредбата со која Села и Гаши бараат граѓаните кои порано веќе се откажале од македонското државјанство сега повторно да може да се стекнат со него. Барањето е во законот да се избрише одредбата матична земја.

Претежно станува збор за граѓани кои во поранешна Југославија во 50-те години заминале за Турција. Тогаш тие се откажале од југословенското државјанство, односно дале изјава дека Турција им е матична земја. Села и Гаши сега бараат тоа да не важи, односно тие граѓани или нивни потомци да можат да добијат македонско државјанство. Аргументите на лидерите на Алијанса и Алтернатива биле дека тие се откажале од државјанство бидејќи владеел режим и дека тие изјавите ги потпишувале под присила, а не по сопствен избор.

Ова барање го разгледуваат експерти и МВР дали и како може да се реши. Се анализира дали и какви последици за државата ќе предизвика доколку од законот се избрише одредбата матична земја. Односно дали синови и ќерки на граѓани кои тогаш за матична земја се изјасниле дека им е Турција сега ако аплицираат за македонско државјанство ќе бараат да наследат тоа што нивните родители го поседувале, дали нивните имоти биле национализирани и дали сега ќе си ги бараат и дали е можно да си ги вратат имотите.

Според власта, другите одредби од законот за државјанство се усогласени и од таму велат дека се надеваат оти АА-А нема да инсистираат за јазикот и да пропадне договорот за законот. Од власта потсетуваат дека направиле отстапки во интерес на граѓаните кои се без македонско државјанство да се стекнат со него, но повторуваат дека нема државјанство со сведоци туку со документи.

Претседателот на Алијанса, Села вчера во гостување во емисијата „Клан дебата“ откри детали од ќорсокакот за законот за државјанство. Тој рече дека Владата се спротивставува на нивниот предлог апликантите, покрај македонскиот јазик, да имаат можност да добијат државјанство со познавање само на албански јазик. Тој открива дека за ова барање не добил поддршка од партиите на Албанците во Владата.

– За жал, албанските партнери кои се дел од Владата, не се спротивставуваат на премиерот кога се борам за јазикот во тој член 7 точка 6 од Законот за државјанство во кој сега се вели дека апликантите за да добијат државјанство треба да знаат македонски јазик. Предложивме тие да познаваат еден од официјалните јазици. Неодамна испративме друга дефиниција, да го познаваат македонскиот јазик или јазикот што го зборуваат 20 отсто од граѓаните, во заграда, албанскиот јазик. За жал, ние како албанска опозиција останавме сами – вели Села.

Плусинфо веќе објави дека за законот за државјанство камен на сопнување ќе биде барањето на Алијанса и Алтернатива за познавање само на албанскиот јазик. Од власта и тогаш беа на позицијата дека тоа е противуставно, односно дека албанскиот јазик не е службен на целата територија на Македонија.

По изјавата на Села за „Клан дебата“ прашањето е дали на таа одредба тој и Гаши инсистираат за политички да поентираат на сметка на албанските партнери на Заев, Али Ахмети, Билал Касами и Мендух Тачи, ако поради непознавањето на македонскиот јазик од 2.700 граѓани кои аплицирале за македонско државјанство само 6 се одбиени.

The post Законот за државјанство запна на албанскиот јазик appeared first on plusinfo.mk.

Како што истакна Маричиќ вечерва во гостување на ТВ Сител, постигната е согласност дека треба да има предвидлив и проверлив начин на верификација дека некој ги исполнува условите за државјанство.

– Тоа со сведоци е опција што не влева многу доверба и може да биде потпрашање, а и ја нема никаде во Европа и во светот – посочи министерот.

Се разговарало само околу предлогот на Алијанса за Албанците кој предвидува измени на постојниот закон. За нов закон не станало збор.

– Состанокот беше многу конструктивен и добар, многу разумен и со аргументи. Се идентификуваа аргументите од постојниот Закон и од она што го предлагаше Алијанса каде е потребна дополнителна дискусија. Се утврди каде може да лесно да се постигне договор или согласност. Останаа неколку отворени прашања за кои и ние како Влада треба да обезбедиме информации. Не би било коректно јавно да преговараме за црвените линии. Имавме добар состанок од кој јасно е кој на која позиција е. Отворивме четири теми од кои за две – три рековме дека треба дополнително да се видиме, со проверка на компаративните искуства – како е во другите држави – рече министерот.

Тој смета дека ќе се најде решение зашто има и други, алтернативни начини освен со сведоци – како луѓето кои живеат долго во РСМ и се уште не го оствариле своето право на државјанство, а реално исполнуваат услови да го докажат тоа на некој соодветен начин и да го добијат државјанството

– Она со што се согласивме, сега јас не би влегувал во детали, меѓутоа се согласивме дека треба да имаме еден предвидлив и проверлив начин на верификација дека некој ги исполнува условите за државјанство. Тоа со сведоци е една опција која што не влева многу доверба и може да биде потпрашање, а и ја нема никаде во Европа и во светот. Она што беше многу важен дел на состанокот е тоа што сите се повикувавме на европските искуства и на Европската конвенција за државјанство и се договоривме дека ќе се држиме во тие рамки – потенцира Маричиќ.

Според официјалните бројки, околу 800 лица се без документи, а 2.500 поднеле барања за државјанство.

– Ние знаеме дека има околу 800 лица без документи и за нив е веќе направен закон според кој може да се регистрираат во системот, најпрво да добијат извод од матична книга, потоа и сите други документи, па да видиме дали остваруваат право на државјанство. Добивме и информација од МВР дека околу 2.500 барања има за државјанство. Тоа се бројките што ги слушнавме на маса, а се базирани според податоци од институциите се друго е на некоја политичка реторика. За оваа бројка на луѓе не би требало да има проблем, ниту за која било друга бројка ако ги направиме вистинските чекои и направиме закон за да се решат проблеми – информира министерот за правда.

The post Маричиќ: Ќе се постигне договор за законот за државјанство appeared first on plusinfo.mk.