ЕУ се состои од држави кои активно соработуваа со Хитлер, изјави претседателот на Хрватска Зоран Милановиќ на одбележувањето на Денот на антифашистичката борба во Брезовица, јавија хрватските медиуми.

Тој истовремено го нагласи придонесот на хрватските Срби во антифашистичкото движење и порача дека Хрватска мора да го зачува својот идентитет.

Хрватскиот претседател изјави дека Европската Унија има смисла само додека останува мировен проект.

– И додека функционира како мировен проект во секоја од нејзините конститутивни точки и елементи, таа е добра и е точна. Без тоа, не е – рече тој.

Потоа следуваше најостриот дел од неговиот говор.

– ЕУ се состои од држави кои активно соработуваа со Хитлер, беа негова десна рака, во кои илјадници млади мажи беа мобилизирани на Исток против азиските орди, Русите, Украинците – рече Милановиќ.

Според него, денешната Унија не може да ја претставува историската синтеза што антифашистичката борба ја создала меѓу хрватскиот и меѓу српскиот народ.

Говорот на хрватскиот претседател Зоран Милановиќ во Брезовица отвори историски и политички теми кои силно одекнаа во јавноста. Одбележувањето на Денот на антифашистичката борба го искористи за да потсети на улогата на хрватските Срби во востанието од 1941 година.

„Нераскажана приказна“ 

– Да немаше хрватски Срби во Банија, Кордун и во помала мера во Лика, тоа треба да се каже и повтори илјада пати, бидејќи без таа синтеза целата оваа приказна е едноставно нераскажана приказна, ќе останеше нераскажана приказна – рече Милановиќ.

Тој нагласи дека односите меѓу Хрватите и меѓу Србите не можат да се сведат на приказни за вековна омраза. Според него, политичката соработка постоела и пред Втората светска војна, а токму војната ја донела катастрофата што ги разурнала тие односи.

Осврнувајќи се на настаните од 22 јуни 1941 година, Милановиќ потсети дека тогаш нацистичка Германија го нападнала Советскиот Сојуз, по што група од околу 70 комунисти од Сисак почнале да го организираат отпорот.

„Мачки без глава“ и загубен компас

Милановиќ оцени дека е невозможно од толку различни држави во ЕУ  да се создаде единствена политичка целина.

– Португалија, Финска, Словенија, земјите од оваа област, ние сме толку различни што е невозможно од нас да се направи земја. Тоа е катастрофа. Мора да го задржиме нашиот идентитет – рече тој.

Шефот на Хрватска додаде дека Европската Унија денес личи на „група мачки без глава или водач“ и ја обвини дека премолчува појави поврзани со величење на формации од СС во делови од Европа.

Во завршницата на говорот тој предупреди дека хрватското општество сè уште нема усогласен однос кон сопственото минато и дека без јасен вредносен систем може да го изгуби моралниот компас.

– Мора да ги зачуваме нашите права, да се грижиме за сопствените интереси, да бидеме себични во водењето на нашите работи, но не и зли, нелојални и непријателски настроени кон другите. Ова е хрватски императив – рече Милановиќ.

The post ДРЖАВИТЕ ОД ЕУ СОРАБОТУВАЛЕ СО ХИТЛЕР За Милановиќ Унијата е збир на „мачки без глава“ appeared first on plusinfo.mk.