Министерството за животна средина и просторно планирање соопшти дека во изминатите два дена, на мерните станици во Скопје – Центар, Гази Баба, Карпош, Лисиче и кај Ректоратот, се регистрирани концентрации на ПМ10 честички над дозволените 150 микрограми на кубен метар, што е законскиот праг за алармирање.

Според податоците, највисоки вредности се измерени во Лисиче, каде концентрациите достигнале дури 266 микрограми на кубен метар, додека во Центар, Карпош и Гази Баба вредностите континуирано се движеле далеку над дозволеното ниво.

Поради ваквата состојба, автоматски стапуваат на сила низа мерки за заштита на здравјето на граѓаните и намалување на загадувањето. Ќе се засилат вонредните инспекциски контроли кај индустриските капацитети со еколошки дозволи, како и контролите на терен кај помалите инсталации и градилиштата.

Дополнително, ќе се вршат интензивни контроли на возилата, со посебен фокус на дизел автомобилите и нерегистрираните возила, а строго е забрането и секое горење на отворено.

Министерството препорачува работодавците да ги ослободат од работни обврски бремените жени, лицата над 60 години и граѓаните со хронични заболувања, како и да го прилагодат работното време за оние што работат на отворено – од 11 до 17 часот. Воедно, се апелира да не се организираат спортски и културни настани на отворено додека трае алармантната состојба со воздухот.

Властите апелираат граѓаните да го ограничат движењето на отворено, особено во утринските и вечерните часови, кога загадувањето е најизразено.

The post ОПАСЕН ВОЗДУХ ВО ГЛАВНИОТ ГРАД Надминат прагот за алармирање, државата воведе итни ограничувања appeared first on plusinfo.mk.

Во пресрет на зимата и очекуваните денови со густ смог, Град Скопје упати низа препораки до граѓаните со цел да се намали загадувањето и да се подобри квалитетот на воздухот во главниот град.

Од Секторот за заштита на животната средина потсетуваат дека одржувањето на грејните уреди и избегнувањето на штетни материјали за согорување може значително да влијае на чистиот воздух.

Од Градот апелираат редовно да се чистат оџаците и да се сервисираат печките, котлите и клима уредите. Граѓаните се предупредуваат да не палат отпадни материјали – стиропор, гуми, ПЕТ-амбалажа, лакирано дрво и прегорени масла, бидејќи тие го зголемуваат загадувањето и го загрозуваат здравјето.

Дополнително се советува користење суво и чисто дрво без земја и нечистотии, како и правилно одржување на печките според упатствата на производителите.

Од Град Скопје најавуваат дека во наредниот период ќе следат засилени инспекциски контроли на постројките кои имаат елаборати за животна средина или Б-интегрирани дозволи. Инспекторите ќе бидат фокусирани особено на откривање и спречување на незаконско палење отпад.

The post ПОДГОТВЕТЕ ГИ ОЏАЦИТЕ ВО ПРЕСРЕТ НА ЗИМАТА Град Скопје апелира да не се палат отпадни материјали appeared first on plusinfo.mk.

Владата размислува за нов сет на мерки за намалување на загадувањето пред почетокот на зимската грејна сезона. Премиерот Христијан Мицкоски денеска најави дека на владина седница ќе биде разгледана иницијативата за поставување филтри на оџаците на домаќинствата и државните институции што се греат на фосилни горива.

– За еден месец започнува грејната сезона. Денеска на владина седница ќе отворам значајна точка. Гасификацијата ќе трае подолго, затоа треба да разгледаме можност, како што субвенционираме клими и топлотни пумпи, да обезбедиме филтри на оџаците за 5 до 10 илјади домаќинства. Лично работев на оваа проблематика и видов дека во голем дел од градовите на тој начин е намалено загадувањето – изјави Мицкоски.

Покрај граѓаните, мерките ќе ги опфатат и околу 500 државни објекти, кои според Владата најчесто користат дрва како енергенс.

– Постои можност и таму да се инсталираат филтри. Очекувам повторно од ноември невладини организации да се активираат и да се борат за почист воздух, иако во изминативе седум години ги немаше. Оваа мерка би била вонредна, но мора да видиме како законски да ја реализираме, бидејќи сме во изборен период – додаде премиерот.

Најавените мерки се дел од напорите на Владата за подобрување на квалитетот на воздухот, кој традиционално е најзагаден токму во зимските месеци.

The post ЗАГАДУВАЊЕТО ЌЕ СЕ НАМАЛУВА СО ФИЛТРИ Владата ќе помогне на 10.000 семејства и 500 државни објекти appeared first on plusinfo.mk.

Просечната концентрација на суспендирани цврсти честички (PM10) во Трубарево, измерена во периодот од 21 септември во 08:30 часот до 22 септември во 08:30 часот, изнесувала 14.2 µg/m³, соопшти Министерството за животна средина.

Највисоката вредност регистрирана во истиот период е 44.1 µg/m³, додека тековното ниво на мерење изнесува 11.9 µg/m³.

Од Министерството нагласуваат дека овие резултати се во рамки на дозволените и не ја надминуваат 24-часовната гранична вредност пропишана за заштита на здравјето на граѓаните, согласно Уредбата за квалитет на амбиентниот воздух.

„Податоците од мерењата потврдуваат дека состојбата со квалитетот на воздухот во Трубарево во наведениот период е стабилна и не претставува ризик по здравјето на населението“, велат од Министерството.

The post ВОЗДУХОТ ВО ТРУБАРЕВО НЕ Е ОПАСЕН Новите мерења не го загрозуваат здравјето на граѓаните appeared first on plusinfo.mk.

Анализата покажува дека зголеменото загадување на воздухот е поврзано со зголемената отпорност на антибиотици во секоја земја на сите континенти. Тоа, исто така, сугерира дека врската помеѓу двата фактори се зајакнала со текот на времето и зголемување на нивото на загаденост на воздухот се совпаѓа со поголем пораст на отпорноста на антибиотици.

„Нашата анализа претставува силен доказ дека зголеменото ниво на загаденост на воздухот е поврзано со зголемен ризик од отпорност на антибиотици. Оваа анализа е прва што покажува како загадувањето на воздухот влијае на отпорноста на антибиотици на глобално ниво“ – напишаа истражувачите од Кина и Велика Британија во студијата што е објавена во списанието Lancet Planetary Health.

Отпорноста на антибиотици е една од најбрзо растечките закани за глобалното здравје. Тоа може да влијае на луѓето од која било возраст во која било земја и  според проценките, веќе убива 1,3 милиони луѓе годишно.

Главните двигатели сѐ уште се злоупотребата и прекумерната употреба на антибиотици, кои се користат за лекување на инфекции. Но, студијата сугерира дека проблемот се влошува со зголеменото ниво на загаденост на воздухот.

Доказите сугерираат дека честичките PM2.5 можат да содржат бактерии отпорни на антибиотици и гени за отпорност, кои може да се пренесат помеѓу околината и директно да се вдишат од луѓето, велат авторите.

Загадувањето на воздухот веќе е најголем еколошки ризик за јавното здравје. Долготрајната изложеност на загаден воздух е поврзана со хронични состојби како што се срцеви заболувања, астма и рак на белите дробови, со што се намалува животниот век.

Краткорочната изложеност на високи нивоа на загадување може да предизвика кашлање, отежнато дишење и напади на астма.

Според студијата, спречувањето на загадувањето на воздухот може да помогне да се намали отпорноста на антибиотици. Исто така, истражувачите истакниуваат дека контролирањето на загадувањето на воздухот може во голема мера да ги намали смртните случаи и економските трошоци кои произлегуваат од инфекциите отпорни на антибиотици.

„Отпорноста на антибиотици и загадувањето на воздухот се сами по себе меѓу најголемите закани за глобалното здравје. Досега, немавме јасна слика за можните врски меѓу двете, но оваа работа сугерира дека придобивките од контролирањето на загадувањето на воздухот би можеле да бидат двојни: не само што ќе ги намали штетните ефекти од лошиот квалитет на воздухот, туку и играат голема улога во борбата против порастот и ширењето на бактериите отпорни на антибиотици – вели професор Хонг Чен од Универзитетот Жеџијанг во Кина.

Иако воздухот е препознаен како директен пат за ширење на отпорност на антибиотици, постојат ограничени податоци за различните патишта на кои гените отпорни на антибиотици се пренесуваат преку загадувањето на воздухот.

Потенцијалните патишта вклучуваат болници, фарми и капацитети за третман на отпадни води кои испуштаат и шират честички отпорни на антибиотици низ воздухот.

Досега имаше ограничени податоци за тоа колкаво влијание има загадувањето на воздухот со ПМ2.5 – кое се состои од честички 30 пати помали од широчината на човечко влакно – врз отпорноста на антибиотици на глобално ниво.

Изворите на PM2.5 вклучуваат патен сообраќај, индустриски процеси и домашно согорување на јаглен и дрва. Податоците покажуваат дека 7,3 милијарди луѓе на глобално ниво се директно изложени на небезбедни просечни годишни нивоа на PM2,5.

Авторите создадоа обемна база на податоци за да истражат дали PM2.5 е клучен фактор што ја поттикнува глобалната отпорност на антибиотици, користејќи податоци за 116 земји од 2000 до 2018 година. Изворите на податоци ги вклучија Светската здравствена организација, Европската агенција за животна средина и Светската банка.

Наодите покажуваат дека отпорноста на антибиотиците се зголемува со PM2,5, при што секој пораст на загадувањето на воздухот од 10%  е поврзан со зголемување на отпорноста на антибиотици за 1,1%.

Промените во нивоата на PM2.5 доведоа до поголемо зголемување на отпорноста на антибиотици во последниве години. Анализата покажува дека отпорноста на антибиотици како резултат на загадениот воздух е поврзана со околу 480.000 предвремени смртни случаи во 2018 година.

Моделирањето на можните идни сценарија покажува дека доколку нема промени во сегашните политики за загадување на воздухот, до 2050 година нивото на отпорност на антибиотици ширум светот би можело да се зголеми за 17%. Годишниот број на предвремени смртни случаи поврзан со отпорноста на антибиотици може да се зголеми на околу 840.000.

Авторите ги признаа ограничувањата на нивната студија. Недостигот на податоци во некои земји можеби влијаеше на целокупната анализа, велат тие.

Студијата беше набљудувачка, така што не можеше да се докаже причината и последицата. Идните истражувања треба да се фокусираат на истражување на основниот механизам за тоа како загадувањето на воздухот влијае на отпорноста на антибиотици, посочуваат научниците.

The post ЗАГАДУВАЊЕТО НА ВОЗДУХОТ ГО ЗАГРОЗУВА ЗДРАВЈЕТО Колку поголема загденост, толку поголема отпорност на антибиотици appeared first on plusinfo.mk.

Пустинската прашина во воздухот со мал прекин ќе ја имаме и во текот на следната недела. Од Управата за хидрометеоролошки работи (УХМР) велат дека само од утре до понеделник ќе дишеме почист воздух, но од вторник до крајот на седмицата повторно со зголемување на температурите ќе се врати и пустинскиот песок. Ова значи дека одговорните за следење на загадувањето на воздухот можат да бидат мирни уште една недела, бидејќи сѐ уште виновникот за загадениот воздух на кој се жалат граѓаните е пустинската прашина.

Од УХМР за Плусинфо изјавија дека од утре ќе можеме да се надеваме на почист воздух бидејќи ќе има поповолни струења во атмосферата.

– Во текот на денот сѐ уште има присуство на прашина во погорните слоеви на атмосферата каде што се транспортира. Во текот на утрешниот ден прашината ќе почне да се намалува, а во недела и во  понеделник нема да има прашина во воздухот – велат од УХМР.

Сепак, земјава нема да се спаси од пустинскиот песок ни следната недела.

– Во вторник со зголемување на температурите ќе се зголеми и присуството на пустинската прашина која поради југозападните струења на висина ќе се зголеми. Така ќе биде до крајот на следната седмица – појаснуваат од УХМР од каде велат дека ќе ја следат состојбата и во наредниот период.

Денеска, според податоците на Министерството за животна, сѐ уште средно високо ниво на ПМ10 честички во воздухот (од 90 до 180 микрограми на квадратен метар) има во Велес, Кавадарци и во Струмица. Средно ниво на присуство на овие честички (од 50 до 90 микрограми на квадратен метар) има во останатите градови во земјава каде што се поставени мерни инструменти. И денеска воздухот во Лазарополе е исто така загаден со ПМ честички.

Присуството на другите елементи во воздухот (CO, NO2, O3, PM2,5 I SO2) кои се мерат е на ниско и многу ниско ниво во однос на дозволеното.

Во текот на вчерашниот ден на сите мерни места присуството на ПМ10 честички во воздухот е пониско од оние кои се измерени на 23 јуни.

Во Скопје во средата загадувањето зависно од мерното место се движело од 70,0 микрограми на кубен метар во Гази Баба до 92,9 микрограми на кубен метар во општина Центар.

Вчера во Скопје повисоки вредности од дозволените 50 микрограми на квадратен метар се измерени  на сите мерни места, освен во Центар и во Карпош за кои нема податоци. Во Гази Баба се измерени 67,6 микрограми на квадратен метар, во Лисиче – 73,9, во Миладиновци – 75,6 и во Ѓорче Петров – 65,6 микрограми на квадратен метар.

Граѓаните изминатите денови се жалат дека воздухот е загаден.

– Толку се чувствува загаденоста на воздухот што мислиме дека има магла во одредени периоди на денот. Поради високите температури помалку излегувам од дома, но од балконот можам да видам дека видливоста е намалена во овој период. Исто како во зима не можат да се видат одделни делови од градот кои во летниот период многу добро сме ги гледале – вели скопјанка, која додава дека надвор изгледа како да е затемнето од облаци, но не е.

Пред два дена Министерството за животна средина запрашано за причините поради кои се чувствува загаденост на воздухот која не е својствена во овој период рекоа дека тоа било пустинска прашина, а инспекциите за животна средина не дадоа никакво објаснување.

The post Пустинската прашина се надви над земјава, ќе ја дишеме и следната недела appeared first on plusinfo.mk.