Европскиот парламент усвои нови правила за возачки дозволи што ќе важат низ целата Европска унија. Целта е да се зголеми безбедноста и да се хармонизираат прописите. Реформата воведува дигитална дозвола, построги правила за прекршителите и пониска старосна граница за професионалните возачи.

Одлуката е донесена по долги преговори во Брисел, а имплементацијата ќе започне постепено од 2028 година, додека дигиталната дозвола ќе стапи на сила до 2030 година. Промените ќе влијаат на сите возачи во ЕУ, носејќи и обврски и придобивки во секојдневниот сообраќај.

Европскиот парламент постигна договор за нови правила поврзани со возачките дозволи во рамките на Европската унија, носејќи низа промени што ќе влијаат на милиони возачи. Целта на реформата е да се зголеми безбедноста на патиштата, но и да се поедностават административните процеси и да се воведат посовремени решенија.

Според податоците објавени од Tagesschau, околу 20.000 луѓе умираат во сообраќајни несреќи во Европската Унија секоја година. Италијанскиот европратеник Матео Ричи рече дека ова е премногу, нагласувајќи ја потребата од унифицирани безбедносни стандарди.

Една од клучните иновации се однесува на забраните за возење. Во иднина возачите на кои им е забрането да возат во една земја-членка автоматски ќе го изгубат правото да возат во сите други земји на ЕУ. Ова значително ја зајакнува прекуграничната соработка меѓу земјите-членки.

Од друга страна, сообраќајните казни што не вклучуваат забрана за возење ќе останат одговорност на земјата во која е сторен прекршокот. Исто така, нема да се воведе единствен европски систем на бодување за прекршоци.

Голема промена доаѓа и во форма на дигитализација. Возачката дозвола повеќе нема да мора да биде физички документ – се воведува дигитална верзија до која може да се пристапи преку паметен телефон, слично на банкарските картички или личните карти.

Европратеникот Јута Паулус нагласи дека ова е особено корисна иновација за помладата генерација. Дигиталната возачка дозвола треба да биде достапна низ цела ЕУ од 2030 година, додека класичната верзија ќе продолжи да биде достапна по барање.

The post ЕП ГИ УСВОИ НОВИТЕ ПРАВИЛА ЗА ВОЗАЧКИТЕ ДОЗВОЛИ Забрана во една земја, ќе важи во цела ЕУ appeared first on plusinfo.mk.

Десет возачи завршија во полициска станица во изминатото деноноќие поради опасно и безобѕирно возење низ државата. Полицијата ги привела откако биле фатени како управуваат возило без дозвола, со активна забрана или под дејство на алкохол.

Од вкупниот број, дури седум возачи немале положено возачки испит. Двајца управувале иако имале изречена забрана, додека еден возач бил зад волан под дејство на алкохол.

Најмногу случаи имало во Куманово, каде што биле фатени двајца возачи без дозвола. По еден ваков случај е регистриран и во Скопје, Тетово, Крива Паланка, Кочани и Валандово.

Дополнително, по еден возач во Охрид и Дебар биле затекнати зад волан и покрај тоа што имале активна забрана за управување. Во Скопје, пак, еден возач возел под дејство на алкохол.

Од полицијата велат дека по целосното документирање на случаите ќе следуваат кривични пријави.

Воедно, апелираат до граѓаните да не седнуваат зад волан без дозвола, со изречена забрана или под дејство на алкохол, нагласувајќи дека ваквото однесување директно ја загрозува безбедноста во сообраќајот.

The post ПОЛИЦИЈАТА ГО СРЕДУВА ХАОСОТ НА ПАТИШТАТА Седум возачи немале возачка, двајца имале забрани и еден бил пијан appeared first on plusinfo.mk.

Полициски службеник од Битола се соочува со кривична пријава откако бил затекнат како вози со активна забрана за управување, значително над дозволената брзина и под дејство на алкохол.

Станува збор за Д.М., вработен како полицаец во Полициската станица за граничен премин и граничен надзор Меџитлија, против кого Одделот за внатрешна контрола, криминалистички истраги и професионални стандарди при МВР поднесе пријава до Основното јавно обвинителство Битола.

Инцидентот се случил на 1 април 2026 година на улицата 8 Септември во Битола, кога Д.М. надвор од работното време управувал патничко возило „бмв“ во негова сопственост, иако во тој момент имал активна забрана за возење од „Б“ категорија.

При контролата е утврдено дека возел со 98 километри на час во населено место каде дозволената брзина е 50 километри на час. Дополнително, кај него биле измерени 0,73 промили алкохол во крвта.

Од МВР соопштија дека, по насоки од јавен обвинител, возилото е одземено.

Истовремено, против него е поднесен и предлог за отворање дисциплинска постапка, а се изречени и мерки за одземање на службеното оружје и муниција, како и задолжителен психијатриски и психолошки преглед.

The post НАМЕСТО ДА БИДЕ ПРИМЕР, ПОЛИЦАЕЦ ГИ ПРЕКРШИЛ СИТЕ ПРАВИЛА Возел со забрана, бил пијан и „летал“ низ Битола appeared first on plusinfo.mk.

Во текот на вчерашниот ден, полициски службеници на целата територија на државата лишиле од слобода 10 возачи затоа што управувале возило без возачка дозвола. Станува збор за двајца возачи во Тетово и по еден во Куманово, Битола, Свети Николе, Штип и во Кочани.

По еден возач во Велес и во Свети Николе управувале возила иако имале мерка забрана за управување моторно возило од Б категорија. Еден возач во Гевгелиско управвуал возило под дејство на алкохол. Лицата се приведени во полициска станица, а по целосно документирање на случаите ќе бидат поднесени соодветни кривични пријави.

– Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај – велат од МВР.

The post КОЈ ВОЗИ БЕЗ ДОЗВОЛА, КОЈ ПИЕ КОГА ВОЗИ, КОЈ КРШИ ЗАБРАНА…  Полицијата привела уште 10 возачи appeared first on plusinfo.mk.

Полицијата во текот на вчерашниот ден приведе десет возачи на различни локации низ државата, поради сериозни прекршувања на сообраќајните правила.

По еден возач бил лишен од слобода во Скопје, Куманово, Велес, Кавадарци и во битолскиот регион, затоа што управувале возило без возачка дозвола.

Особено загрижува случајот во Куманово, каде што еден од возачите претходно со мотоцикл учествувал и во сообраќајна несреќа. Од него е одземен мотоциклот, а на останатите возачи кои немале дозвола им се одземени автомобилите.

Дополнително, по еден возач во Скопје, во општина Чашка и во прилепскиот регион биле фатени зад волан иако имале изречена забрана за управување моторно возило од Б-категорија. И на нив им се одземени возилата.

Во Кочани бил приведен возач кој управувал автомобил под дејство на алкохол, додека во радовишкиот регион полицијата затекнала возач кој возел со брзина далеку над дозволената.

Сите лица биле приведени во полициска станица, а по целосното документирање на случаите ќе бидат поднесени соодветни пријави.

Од Министерството за внатрешни работи апелираат граѓаните да не седнуваат зад волан без положен возачки испит, да не управуваат возило под дејство на алкохол и да ги почитуваат изречените забрани.

The post ВОЗЕЛЕ И БЕЗ ДОЗВОЛА И СО ЗАБРАНА, НО И ПИЈАНИ Приведени 10 возачи, полицијата им ги одзема возилата appeared first on plusinfo.mk.

Само во текот на вчерашниот ден полициски службеници при контроли во сообраќајот во повеќе македонски градови и села откриле 11 возачи, кои управувале возила без возачка дозвола или со активна забрана за управување моторно возило. Од нив двајца се малолетници, а по насока на јавен обвинител, на сите им се одземени возилата, и против нив ќе бидат поднесени соодветни кривични пријави, информира МВР на својата страница на Фејсбук.

На 05.02.2026 во 16:00 часот на ул.„Таше Милошевски” во Ресен, полициски службеници од ОВР Ресен го лишиле од слобода Д.К.(27) од с.Јанковец, ресенско. При контрола во сообраќајот, полициските службеници сопреле патничко возило „рено” со ресенски регистарски ознаки, управувано од Д.К., при што констатирале дека го управувал возилото без да се стекне со право за управување, односно без важечка возачка дозвола. Возилото било одземено.

На 05.02.2026 во 12:00 часот на регионалниот пат Прилеп-Македонски Брод, кај с.Ропотово, прилепско, полициски службеници од Полициското одделение Ропотово го лишиле од слобода И.Н.(28) од с.Гостиражни, општина Долнени. При контрола во сообраќајот, полициските службеници сопреле патничко возило „фолксваген голф” со прилепски регистарски ознаки, управувано од И.Н., при што констатираче дека го управувал возилото пред да се стекне со право за управување, односно без возачка дозвола. Возилото било одземено.

На 05.02.2026 во 19:30 часот на патот Ресен-с.Евла, ресенско, полициски службеници од ОВР Ресен лишиле од слобода 15- годишник од Штип. При контрола во сообраќајот, полициските службеници сопреле патничко возило „мазда” со ресенски регистарски ознаки, управувано од малолетникот, при што констатирале дека го управувал возилото без да се стекне со право за управување, односно без возачка дозвола. Возилото било одземено.

На 05.02.2026 во 16:45 часот на магистѕралниот пат Гостивар-Стража, полициски службеници од ОВР Гостивар го лишиле од слобода Ф.А.(24) од с.Чегране, гостиварско. При контрола во сообраќајот, полициски службеници запреле патничко возило „ауди“ со гостиварски регистарски ознаки, управувано од Ф.А и по извршени проверки е констатирано дека го управувал возилото без положен возачки испит. Возилото било одземено.

На 05.02.2026 во 14:30 часот на кеј „Димитар Влахов“ во Скопје, полициски службеници од СВР Скопје го лишиле од слобода Б.С.(23). При контрола во сообраќајот, полициски службеници запреле патничко возило „фолксваген поло“ со скопски регистарски ознаки, управувано од Б.С. и по извршени проверки било констатирано дека го управувал возилото без да поседува важечка возачка дозвола, односно без положен возачки испит.

На 05.02.2026 во 16:25 часот на регионален пат кај крстосница за село Ѓавато, гевгелиско, полициски службеници од СВР Струмица сопреле патничко возило „форд фокус“ со гевгелиски регистарски ознаки, управувано од А.З.(19) од Богданци. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи биле одземени.

На 05.02.2026 во 14:50 часот на локалниот пат с.Пиперево – с.Василево, полициски службеници од СВР Струмица сопреле патничко возило „фолксваген голф“ со струмички регистарски ознаки, управувано од 17-годишник од с.Пиперово, општина Василево. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи се одземени.

На 05.02.2026 во 19:00 часот на ул.„Цветан Димов“ во Струмица, полициски службеници од СВР Струмица сопреле товарно возило „мерцедес“ со струмички регистарски ознаки, управувано од К.П.(33) од с.Баница, струмичко. Притоа, било констатирано дека го управувал возилото без да поседува важечка возачка дозвола. По добиени насоки на јавен обвинител, возилото и возачките документи се одземени.

На 05.02.2026 во 10:15 часот на улица „Западен булевар“ во Кавадарци, полициски службеници од ОВР Кавадарци го лишиле од слобода Ш.Ј.(42) од Кавадарци. При контрола во сообраќајот било сопрено патничко возило „опел“ со кавадаречки регистарски ознаки, кое го управувал Ш.Ј., при што било констатирано дека возилото го управувал без положен возачки испит за управување на возило од Б категорија. Тој бил приведен во полициска станица, а возилото било привремено одземено.

На 05.02.2026 во 13:45 часот на улица „Народен Фронт“ во Кавадарци, полициски службеници од ОВР Кавадарци го лишиле од слобода Ј.В.(32) од Кавадарци. При контрола во сообраќајот било сопрено патничко возило „опел“ со охридски регистарски ознаки, кое го управувал Ј.В., при што било констатирано дека возилото го управувал без положен возачки испит за управување на возило од Б категорија. Тој бил приведен во полициска станица, а возилото било привремено одземено.

На 05.02.2026 околу 09:25 часот на регионален пат во с.Драслајца, струшко, полициски службеници од ОВР Струга сопреле патничко возило „фолксваген голф“ со струшки регистарски ознаки, управувано од Д.С.(32) од с.Корошишта, струшко. Притоа, било констатирано дека го управувал возилото со активна забрана за управување со моторно возило од Б категорија. По добиени насоки на јавен обвинител, возилото и возачките документи се одземени.

По целосно документирање на настаните, против лицата ќе бидат поднесени соодветни пријави.

The post ВО ЕДЕН ДЕН ФАТЕНИ УШТЕ 11 ШТО ВОЗЕЛЕ БЕЗ ВОЗАЧКА ДОЗВОЛА Возилата им се одземени appeared first on plusinfo.mk.

Двајца возачи од Охрид се соочуваат со кривични пријави откако предизвикаа сообраќајна несреќа, иако имале изречени забрани за управување со возило, а едниот од нив возел и под дејство на алкохол, соопшти МВР.

Несреќата се случила на 4 февруари 2026 година околу 20:30 часот на улицата „АСНОМ“ во Охрид. Во судирот учествувале три патнички возила – „фолксваген амарок“, „ланчија“ и „мерцедес“, сите со охридски регистарски таблички.

„Фолксвагенот“ го управувал 24-годишниот В.В.М. од Охрид, „ланчијата“ 37-годишниот Ј.П., исто така од Охрид, додека „мерцедесот“ го возел П.Н. (35).

По извршените полициски проверки било утврдено дека В.В.М. возел под дејство на алкохол, при што алкотестот покажал 0,71 промили алкохол во крвта. Дополнително, тој имал дури три активни забрани за управување со моторно возило од „Б“ категорија. И кај Ј.П. било констатирано дека има една забрана за возење од истата категорија.

За случајот бил известен јавен обвинител, по чии насоки полицијата ги одзела возилата на В.В.М. и Ј.П. По целосно документирање на настанот, против двајцата ќе бидат поднесени соодветни кривични пријави за „безобѕирно управување со возило“, по член 297-а од Кривичниот законик.

The post ПОЛИЦИЈАТА ОДЗЕДЕ ДВЕ ВОЗИЛА ОД ДВАЈЦА ВОЗАЧИ ОД ОХРИД Предизвикаа сообраќајка иако имале забрана за возење appeared first on plusinfo.mk.

Кој вози пребрзо, пијан или дрогиран, ќе остане без автомобил. Трајно и задолжително ќе им се одземаат возилата на дрските возачи кои значително ја надминуваат дозволената брзина и кои претходно веќе биле осудени за кривично дело против безбедноста на јавниот сообраќај, предвидуваат измените и дополнувањата на Кривичниот законик, кои група пратеници од ВМРО-ДПМНЕ ги предложија во Собранието.

Измените на Кривичниот законик (КЗ) следуваат откако Уставниот суд му наложи на Собранието да ги анулира штетните последици од измените на Законикот што се случија есента 2023 година, кога со измени во членот 353 за злоупотреба на службената положба и овластувања се овозможи да застарат повеќе кривични дела против поранешни функционери. Освен оваа корекција, во текстот на законските измени се опфатени и построги казни за кривични дела во сообраќајот, гонење по службена должност на семејно насилство, како и затворски казни за одмазничка порнографија.

Предлагачите наведуваат дека во измените се содржани „одредби за хармонизирање на кривичните дела против безбедноста во сообраќајот и одземањето на предмети, со пакетот предлог закони поврзани со проектот Сејф сити“.

Така, првата измена за сообраќајот е дека судот може да изрече престанок на важење на возачката дозвола од определена категорија во траење од една до 10 години, а за тоа време, а понекогаш и подолго, сторителот нема право да се стекне со возачка дозвола од истата категорија. Досега немаше престанок на важење на дозволата, туку забрана за управување со возило, која беше  ограничена на најмногу 5 години.

Измените предвидуваат казна затвор од 3 месеци до 3 години или парична казна за тој што не се придржува на прописите за безбедност и ќе го загрози јавниот сообраќај безобѕирно управувајќи со моторно возило со: концентрација на алкохол над 1,5 г/кг во крвта, со употреба на дроги, психотропни супстанции или прекурсори, возејќи во спротивна насока на јавен пат, претекнувајќи колона возила на непрегледно место или возејќи со брзина која ја надминува дозволената брзина за најмалку 50 километри на час во населено место или за најмалку 70 километри на час надвор од населено место. Со истата казна ќе се казни и тој што организира, учествува или на друг начин овозможува недозволени трки со возила, како и учесник во јавниот сообраќај кој управува моторно возило без положен возачки испит, без важечка возачка дозвола, или доколку му е изречена санкција забрана на управување со моторно возило.

За ваквите дрски возачи ново е што се предвидува задолжително изрекување на казната забрана на управување со моторно возило во траење од 6 месеци до 10 години и задолжително одземање на возилото, ако возат пребрзо или пијани, а веќе им е одземена дозволата.

Ако некој вози пијан или пребрзо туѓо возило, тоа ќе се одземе само ако сопственикот знаел или бил должен да знае дека возачот нема право да управува со моторно возило.

Возилото се одзема ако сторителот возел со брзина која ја надминува дозволената за најмалку 70 километри на час во населено место или за најмалку 90 километри на час надвор од населено место, под услов ако претходно е осудуван за кривично дело против безбедноста на јавниот сообраќај со истите надминувања на брзината.

Во образложението на законските измени се наведува дека санкциите се построги „имајќи ги предвид предизвиците со кои се соочуваме последните години во делот на сторени кривични дела во областа на сообраќајот“.

„Се утврдува задолжително изрекување на казната забрана на управување со моторно возило. Имено, од аспект на казнивите дела во областа на сообраќајот на патиштата, за низа прекршоци утврдена е задолжителна забрана за управување со моторно возило, а во однос на кривичните дела, оваа казна е дадена само како можност за судовите, што само по себе говори за своевиден апсурд – за полесни казниви дела, односно за прекршоци забраната за управување со моторно возило е облигација, а за кривичните дела е само факултативна основа за изрекување. Со предложената измена се утврдува надминување на наведената состојба на начин што се пропишува облигаторно изрекување на овој вид казна за кривичните дела од членовите 297 кои се однесуваат на загрозување на безбедноста на сообраќајот и на безобѕирното управување со моторно возило, како и на член 300, кој се однесува на тешки дела против безбедноста на луѓето и имотот во сообраќајот. Се регулира и прашањето за одземање на моторно возило со кое е сторено кривично дело, односно, во некои случаи се предвидува можност за одземање на моторно возило, а под строго утврдени услови одземањето е задолжително. Имено, можност за одземање на возилото е пропишана за случаите кога сторителот возел со брзина која ја надминува дозволената брзина за најмалку 70 километри на час во населено место или за најмалку 90 километри на час надвор од населено место. Облигаторно одземање на возилото е предвидено ако возилото е сопственост на сторителот и само доколку тој во моментот на сторување на делото немал право да управува со моторното возило. Ако возилото е во сопственост на трето лице ќе се одземе доколку тоа лице знаело или било должно да знае дека сторителот немал право да управува со моторно возило. Задолжително одземање на возилото е пропишано и доколку сторителот возел со брзина која ја надминува дозволената брзина за најмалку 70 километри на час во населено место или за најмалку 90 километри на час надвор од населено место, ако возилото е во негова сопственост, под услов тој и претходно да е осудуван за кривично дело против безбедноста ја јавниот сообраќај кое го сторил со надминување на наведените дозволени брзини во населено и надвор од населено место. За предложената одредба користени се и компаративни искуства од Словенија и од Австрија“, се наведува во образложението на измените на Кривичниот законик.

The post КОЈ ВОЗИ ПРЕБРЗО, ПИЈАН ИЛИ ДРОГИРАН, ЌЕ ОСТАНЕ БЕЗ АВТОМОБИЛ Возилата ќе се одземаат трајно под строго определени услови appeared first on plusinfo.mk.