Разгневени жители запалиле шатор во здравствен центар во источниот дел на Демократска Република Конго, во регион што е едно од жариштата на ебола, при што настанал хаос и дел од пациентите избегале, соопшти медицинскиот персонал. Станува збор за втор ваков напад во истиот регион во рок од само една недела.

Според првичните информации, во инцидентот нема пријавени повредени, но состојбата на теренот предизвикала паника. Пациентите успеале да се извлечат од објектот, а најмалку 18 лица за кои постои сомнеж дека се заразени со ебола го напуштиле центарот и нивната моментална локација засега не е позната, изјави директорот на локалната болница.

Нападот се случил во градот Монгбвалу, каде група жители упаднале во клиниката и запалиле шатор поставен од организацијата „Лекари без граници“, кој служел за згрижување на сомнителни и потврдени случаи на ебола, потврди д-р Ричард Локуди, директор на болницата.

– Категорично ги осудуваме овие постапки бидејќи предизвикаа паника кај персоналот, а како последица на тоа 18 сомнителни заразени лица избегаа меѓу населението – изјави Локуди.

Ова не е изолиран инцидент. Само неколку дена претходно, во градот Рвампаре беше запален друг центар за лекување, откако семејство на починат пациент не добило дозвола да го преземе телото.

Здравствените експерти предупредуваат дека ваквите случаи дополнително го отежнуваат контролирањето на епидемијата. Телата на починатите од ебола се сметаат за високо заразни, па затоа погребите се спроведуваат под строг медицински протокол, што често предизвикува отпор кај локалното население.

Во Рвампаре е организирано и масовно погребување под засилени безбедносни мерки, со присуство на вооружени сили и екипи на Црвениот крст во заштитна опрема, потврди Дејвид Базима од Меѓународната федерација на Црвениот крст и Црвената полумесечина.

Властите во регионот воведоа забрана за погребни бдеења и забранија собирања на повеќе од 50 лица, во обид да се спречи натамошно ширење на заразата.

Светската здравствена организација (СЗО) оцени дека ризикот од ебола во ДР Конго сега е „многу висок“, додека опасноста од глобално ширење останува ниска. Генералниот директор на СЗО, Тедрос Аданом Гебреисус, изјави дека се потврдени 82 случаи и седум смртни случаи, но дека реалниот број најверојатно е повисок.

Во меѓувреме, хуманитарните организации предупредуваат дека е можно епидемијата да започнала порано од првично утврденото, а дел од волонтерите на Црвениот крст се заразиле уште во март, пред да биде откриено целосното ширење на вирусот.

The post ХАОС ВО ЖАРИШТЕТО НА ЕБОЛА Запален центар, 18 заразени исчезнаа во шумите на Конго appeared first on plusinfo.mk.