Градското собрание на Загреб вчера усвои резолуција со која го повикува градоначалникот да преземе мерки за спречување на употребата на фашистички и усташки симболи, слогани и пароли, вклучувајќи го и „За дом спремни“, на сите јавни површини и настани под надлежност на градот.

Одлуката се однесува на површините управувани од градските институции и комерцијалните компании, како и на сите јавни површини за кои Градот издава дозволи за одржување настани.

Советниците рекоа дека целта е да се заштити јавниот простор од пораки што поттикнуваат омраза, насилство и ексклузивност, објави Индекс.

Градоначалникот на Загреб, Томислав Томашевиќ, денеска изјави дека употребата на усташки симболи во просторите управувани од Градот Загреб ќе биде забранета, но дека концертот на Марко Перковиќ Томпсон, познат по промовирањето на усташките во своите песни, сепак ќе се одржи на 27 декември, бидејќи претходно е потпишан договор за него.

Претседателката на клубот на советници „Можеме“, Ива Ившиќ, истакна дека заклучокот се темели на антифашистичките вредности на Уставот на Република Хрватска, како и на ставовите на Уставниот суд и на Европскиот суд за човекови права.

– Уставниот суд јасно наведе дека „За дом спремни“ е усташки поздрав на Независната Држава Хрватска и дека не е во согласност со Уставот, додека Европскиот суд за човекови права во случајот „Шимуниќ против Хрватска“ утврди дека неговата јавна употреба не е заштитена со слободата на изразување, бидејќи поттикнува омраза – потсети Ившиќ.

Таа нагласи дека одлуката не се однесува на забраната за уметност, музика или слободата на изразување, туку јасно ја поставува границата дефинирана со член 39 од Уставот на Република Хрватска, кој забранува поттикнување на национална, расна или верска омраза и насилство.

– Во Градот Загреб не сме загрижени дали ќе има концерт или не, туку што е неуставно – а тоа е усташкиот поздрав „За дом спремни“. Ако има, тоа ќе биде одлука на Томпсон и на неговиот менаџмент – рече Томашевиќ.

Градоначалникот Томашевиќ изјави дека секој што смета дека заклучокот на Градското собрание е нелегален, може да користи законски механизми за да го оспори.

The post ЗАГРЕБ ЈА ЗАБРАНУВА УПОТРЕБАТА НА УСТАШКИ СИМБОЛИ И НА ПАРОЛАТА „ЗА ДОМ СПРЕМНИ“ Засега нема најави дека Томпсон ќе го откаже концертот appeared first on plusinfo.mk.

Напнатоста во Хрватска продолжува, откако навивачката група на Динамо, Бед блу бојси, во Вуковар ги облепила јавните објекти со фотографии од четници и припадници на ЈНА. Поводот е изложбата „Србинка, хероина на Големата војна“, која требаше да се отвори вечерва, но по реакциите и притисоците од владата и градските власти, таа е одложена за декември.

Изложбата беше закажана во организација на Српскиот културен центар Вуковар, Здруженото веќе на општините и Генералниот конзулат на Србија, по повод Денот на примирјето во Првата светска војна.

Притоа, на зградата на Здруженото веќе на општините биле поставени транспаренти со натписи „Ко о чему – Срби о херојима“ и „Влада РХ или РСК?!“.

На социјалните мрежи, Бед блу бојси објавиле дека „тешко е да се разбере зошто токму сега во Вуковар се отвора изложба за српски хероини од минатото, кога има многу ‘актуелни’ јунаци од поновите војни“.

„Овде не се работи за некаква игра, туку за подмолно смислена провокација“, напишале навивачите на својата страница.

Министерката за култура Нина Обуљен Коржинек изјави дека отворањето на ваква изложба „во овој момент не е соодветно, не поради содржината, туку поради впечатокот“. Слично мислење имал и потпретседателот на Владата на Хрватскса и министер за одбрана Иван Анушиќ.

– Со оглед на случувањата и барањето на градоначалникот, решивме да испратиме порака на мир и разбирање. Отворањето ќе го одложиме за декември – изјави претседателот на ЗВО, Дејан Дракулиќ.

Градоначалникот на Вуковар, Маријан Павличек, побарал изложбата да не се одржи во ноември, месецот кога градот се сеќава на жртвите од 1991 година.

Градоначалникот на Загреб, Томислав Томашевиќ, јавно соопшти дека го забранува користењето на поздравот „За дом спремни“ на сите јавни настани во градот, нарекувајќи го „печат на омразата од минатото што не смее да се врати“, јави Индекс.

Градското собрание ја изгласа забраната по итна постапка. Со ова се отвора можноста да биде забранет концертот на Томпсон закажан за 27 декември по јулскиот концерт на бендот на кој имаше инциденти со познатиот усташки поздрав.

Тимот на Марко Перковиќ Томпсон реагираше на зборовите на Томашевиќ со соопштение објавено на Фејсбук, во кое рече дека изведбата на песната „Бојна Чавоглаве“ била целосно легална и дека секоја забрана за концерт би претставувала прекршување на правосилна судска одлука.

Реакција за изгласаната забрана во Загреб стигна и од партијата ХДЗ. Градскиот комитет на ХДЗ денес ги обвини движењето „Можемо“ и партијата СДП дека воведуваат политичка цензура во Загреб под изговор дека наводно „воведуваат критериуми“ и се ставаат над законот и судовите со цел да го забранат концертот на Марко Перковиќ Томпсон.

Во меѓувреме се појави и информацијата дека снаата на Лепа Брена, пејачката Прија го претекнала Томпсон во бројот на продадени билети за еден ден за концерт, односно со бројки, 1,6 милиони купени карти за новогодишниот настап на Прија во споредба со околу 500.000 за Томпсон.

Се чини дека напнатоста околу усташтвото и поздравот „За дом спремни“ во Хрватска се разгори на 3 ноември во просториите на градската четврт Блатине во Сплит кога за време на одбележувањето на Денот на српската култура, што го организираше Српското културно друштво „Просвјета“.

Сплитската полиција приведе девет лица осомничени за инцидентот на Блатине, кога група екстремисти упадна на фолклорна приредба на Српското културно друштво „Просвјета“, јавува Далматински портал.
Меѓу приведените е и новоизбраниот претседател на месниот огранок на ХДЗ за тој кварт, Јаков Ќалета.

На 8 ноември вивачите од групата Торцида и ветераните од војната одржаа протест во Сплит поради апсењето на 9 лица кои учествуваа во инцидентот по повод Денот на српската култура. Секретарот на групата Стипе Лекиќ одржа говор на кој ги изнесе барањата.

Полицијата во Сплит извести дека протестот на навивачката група Торцида што се одржа на Рива помина мирно, без инциденти или потреба од интервенција, со полициски надзор и обезбедување на безбедноста на граѓаните.

На 7 ноември повеќе од педесет маскирани мажи, главно млади, беснееја пред Српскиот културен центар на улицата „Прерадовиќева“ во Загреб, каде што се одржува изложба. Тие се собрале очигледно како знак на протест против одржувањето на Деновите на српската култура.

Потоа започнала потерата на полицијата по нив. Една група од десетина мажи била запрена на улицата „Далматинска“. Полицијата им ги проверила документите и ги пуштила.Но потерата по учесниците во инцидентот продолжила и на други места во центарот.

Во еден момент, еден од маскираните хулигани плукнал кон фото-репортерката на „Индекс“.

The post УСТАШТВОТО ЈА ТРЕСЕ ХРВАТСКА, НОВ СКАНДАЛ СО ИЗЛОЖБА Виси во воздух и концертот на Томпсон во Загреб appeared first on plusinfo.mk.

Група млади луѓе во црни маици и качулки ја прекинала манифестацијата Денови на српската култура во сплитскиот кварт Блатине. Присутните биле избркани со повици „За дом спремни“ и „Смеќа српска“, пренесуваат хрватските медиуми.

Настанот веднаш предизвикал лавина реакции.

Меѓу нападнатите биле членови на културно-уметничкото друштво од Нови Сад кои дошле да настапат на вечерната програма. Според полицијата, во нападот не било извршено физичко насилство, но атмосферата била исполнета со страв и навреди.

Притоа, нападнатите напуштиле просторијата додека полицијата започнала истрага за идентификација на сторителите.

Сведоци потврдиле дека меѓу насилниците имало и возрасни мажи кои ги предводеле младите. Некои од нив ги подигале десниците и извикувале националистички пароли.

– Петмина упаднаа во салата и бараа да го прекинеме настанот, велејќи дека „нема место за вакви програми во месецот кога се обележува Вуковар“ – изјави Илија Борковиќ, потпретседател на сплитскиот пододбор на Просвета.

Според организаторите, пред објектот имало најмалку сто млади лица во маскирни униформи, кои го блокирале влезот и заплашувале.

Градоначалникот Томислав Шута остро реагирал на настанот. – Сплит мора да биде град на сигурност, толеранција и почитување кон сите граѓани, без оглед на нивната национална или верска припадност – истакна тој.

Пратеничката Маријана Пуљак од Центар нагласила дека очекува решителна реакција од градските власти и полицијата. Партијата Можемо оценила дека се работи за „срамна епизода“ во животот на градот и повикала на итна осуда.

Сепак, најсилна била реакцијата на премиерот на Хрватска Андреј Пленковиќ, кој на социјалната мрежа Икс објави:

„Нajoстро ги осудуваме инцидентите во Сплит за време на културната манифестација на српската национална заедница. Очекуваме дека надлежните органи ќе ги процесуираат одговорните во најкраток можен рок“.

Хрватскиот премиер додаде дека во хрватското општество нема место за исклучивост или нетолеранција кон националните малцинства.

Јавноста остро го критикува растечкиот национализам и бара засилено полициско присуство за време на културни настани од малцински заедници.

Во меѓувреме, Прoсвета најавила дека манифестацијата Денови на српската култура ќе продолжи во други градови, под зајакнати безбедносни мерки.

The post 📽️ ЦРНИ КАЧУЛКИ И „ЗА ДОМ СПРЕМНИ“ НА СРПСКА МАНИФЕСТАЦИЈА ВО СПЛИТ Пленковиќ порача дека нема место за нетолеранција appeared first on plusinfo.mk.

Бурата околу контроверзниот концерт на Марко Перковиќ Томпсон се сели од Хрватска во Австрија. Австриските власти прегледуваат снимки и фотографии од настанот барајќи австриски државјани и лица со привремен престој во Австрија кои можеби извикувале фашистички пароли, пренесе „Експрес“.

Се смета дека 18.000 карти на масовниот концерт кој го наполни Хиподромот во Загреб биле продадени во Австрија.

Австриската полиција има полни раце работа. Барањето до Австрискиот министер за внатрешни работи произлезе од измените во законот од 2018 година, со кои усташките симболи се споредуваат со симболи на екстремистички и терористички организации.

– Лицата идентификувани како сторители на прекршоци или кривични дела, особено ако се од Австрија, би можеле да се соочат со сериозни последици – рече човек запознаен со случајот, нагласувајќи можност за прекршочни и кривични мерки, забрана за влез и губење на работни дозволи.

На концертот на Томпсон беше извикуван проблематичниот слоган „За дом спремни“ и беа употребувани фашистички поздрави. Концертот го посетија речиси половина милион луѓе.

Во Хрватска, Општинскиот суд во Загреб потврди дека 17 лица биле приведени ден по концертот за нарушување јавен ред и „особено дрско“ однесување, казнети со по 700 евра.

Исто така, за расправии, тепачки и навреда хрватската полиција беа укажани глоби од 300–700 € .

Сепак, јавноста и многу интелектуалци во Хрватска се пожалија дека властите во земјата не реагирале соодветно и не ја осудиле јавно усташката симболика и фашистичката реторика кај делови од публиката за време на концертот.

The post АВСТРИЈА „ЧЕШЛА“ КОЈ КРЕВАЛ РАКА НА КОНЦЕРТОТ НА ТОМПСОН Дури 18.000 од картите биле продадени на австриски резиденти appeared first on plusinfo.mk.

Не запираат турбуленциите по концертот на Марко Перковиќ Томпсон во Загреб, на кој имаше усташка симболика. Овојпат, градоначалникот на Вуковар го покани Томпсон да настапи во градот со порака дека „луѓето од Вуковар се подготвени“, пренесува Телеграф.

Градоначалникот на Вуковар, Маријан Павличек, на Фејсбук објави дека официјално испратил покана до Марко Перковиќ Томпсон за концерт во 2026 година.

„Со оглед на денешните изјави на градоначалникот на Загреб дека Томпсон повеќе не е добредојден во метрополата, упатувам отворена покана до Томпсон да настапи во Вуковар. Градот Вуковар денес официјално упати покана до менаџерот на г-дин Перковиќ да настапи во Вуковар во 2026 година“, истакна Павличек.

Тој додаде дека очекува Томпсон да ги усогласи датумите за концертот.

„Луѓето од Вуковар се подготвени. Нека видат дека сме тука“, нагласи Павличек.

Ваквата покана уследи откако градоначалникот на Загреб, Томислав Томашевиќ, рече дека додека тој е на чело на градот, нема да има повеќе концерти како оној што се одржа на 5 јули на Хиподромот.

– Додека јас сум градоначалник, нема да има вакви концерти – порача Томашевиќ.

Во меѓувреме, фронтменот на познатите панкери Хладно пиво, Миле Кекин, се огласи за снимка од концертот во Домот на Спортовите од 2004 година што се појави на социјалните мрежи. На снимката дел од публиката возвраќа „Спремни“, а некои тврдат дека Кекин викал „За дом“.

Никогаш во животот не сум викал „За дом спремни“, вели Кекин на социјалните мрежи.

„Како човек, немам дилеми околу апсолутната осуда на усташкиот режим, а како уметник, се борев и ќе се борам против омразата, нетолеранцијата и враќањето на минатото со моите песни“, напиша тој на Фејсбук.

Кекин објавата ја заврши со „СФСН“, што значи смрт на фашизмот, слобода на народот.

The post „ВУКОВАР Е СПРЕМЕН ЗА КОНЦЕРТ НА ТОМПСОН ВО 2026 ГОДИНА“ Не престануваат турбуленциите во Хрватска, на мета е и бендот Хладно Пиво appeared first on plusinfo.mk.

Хрватскиот Сабор денеска расправаше за концертот на Томпсон, кој предизвикува контроверзи поради скандирањата на усташкиот поздрав „За дом спремни“, а пратеникот Дамир Билоглав од десничарската коалиција ДОМиНО од говорницата го изговори поздравот „За дом спремни“.

Милорад Пуповац од партијата на Србите, ги пофали државните и градските служби за сè што направија за време и по големиот концерт и праша „зошто не беше можно да се заштитат уставните вредности и вредностите на ЕУ?“

– Зопто тие вредности не беа заштитени од симболите, пораките, песните и скандирањата што ги величаа членовите на усташкото движење и ја поздравуваа НДХ со официјалниот поздрав ‘За дом спремни’ за време на концертот и по него? Дали ова има цел да го продлабочи и јазот во односите со соседните земји како што се Босна и Херцеговина или Србија. Хрватите надвор од Хрватска ќе претрпат штета, политичката стабилност на односите во регионот ќе претрпат штета – рече Пуповац.

Тој исто така праша дали немало реакција на усташките поздрави со цел да се „дисциплинира“ самата Хрватска, „земјата да се потчини на еден светоглед“, „да се гледа со сомнеж на сите што не биле на Хиподромот и да се прогласат за злонамерни“.

– Се надевам дека не е како што изгледа. Без разлика колку луѓето пеат, зборуваат и молчат, усташите и НДХ на Хрватска ѝ оставија наследство од голем криминал и ужасна потчинетост – рече Пуповац.

Неговиот говор предизвика остри реакции во Саборот.

– ХОС (парамилитарни сили во Хрватска на почетокот од 1990-те) гинеше и ја бранеше Хрватска од овие луѓе како што е Пуповац – рече независниот пратеник Јосип Јурчевиќ.

Нино Распудиќ рече: „500 илјади усташи во Загреб, а ниту еден Србин не изгуби ни влакно од главата. А во Србија, Србите се тепани секој ден, па се покажува дека Србите се побезбедни меѓу усташите отколку меѓу сопствениот народ“.

Дамир Билоглав, кој во одговор на оваа дискусија од говорницата возврати со поздравот „За дом спремни“, рече дека не видел усташи во Загреб.

– На младите луѓе што беа на концертот не им е грижа за партизаните, усташите и четниците. Тие дојдоа да изразат радост, среќа, патриотизам. Од овие собири испраќаат порака до сите нас стари луѓе – ‘ние не се грижиме за вашите приказни, стереотипи. Ние не сме носители на ничии хипотеки, не се согласуваме со ничии уцени, нема да дозволиме да ни ставате лудачки кошули. Родени сме во слободна Хрватска, ќе живееме во таа Хрватска како што сакаме, ќе пееме песни што ги сакаме, ќе се поздравуваме со поздравите што ги сакаме и нема да ни е грижа за вашите глупости’. Во име на сите овие млади луѓе, ги поздравувам овие господа со поздравот што тие би сакале да ви го испратат на сите вас, „За дом спремни“ – рече Билоглав.

Опозицијата бараше реакција од претседателот на Саборот, Гордан Јандроковиќ, но таа изостана, што дополнително ги зголеми тензиите.

Јандроковиќ рече дека поздравот „За дом спремнни“ има двојна конотација – некои го поврзуваат исклучиво со НДХ, а други го поистоветуваат со Татковинската војна и времињата на одбрана на Хрватска.

– Јас ги осудувам усташките симболи и сметам дека сè што е поврзано со НДХ заслужува осуда, но исто така ќе ја бранам честа на хрватските бранители – рече Јандроковиќ.

Ивица Кукавица од Татковинското движење рече дека младите не доѓле на концертот да предизвикуваат проблеми и да провоцираат, туку да им оддадат почит на вредностите што ги претставува Хрватска.

– Ме растажуваат негативните реакции од политичкиот спектар. Не можеме да ја закопаме Втората светска војна. Ако ХОС, песните и поздравите не беа непријатни за Туѓман и Рачан, зошто ни се непријатни нам 20 години подоцна? Зошто и во чие име го делиме ова општество? Зошто реакциите од нашиот левичарски спектар звучат како во Србија – рече Кукавица и ги повика сите да ги „намалат тензиите“.

Оваа расправа покажа дека темата за поздравот „За дом спремни“ и понатаму длабоко ја дели хрватската политичка сцена, а изостанокот на јасен и недвосмислен став од претседателот на Саборот предизвика дополнителни спорови за односот на државата кон наследството на НДХ и пораките што ги испраќа до јавноста и меѓународната заедница, пишуваат локалните медиуми.

Уставниот суд на Хрватска во март 2020 година објави соопштение дека поздравот „За дом спремни“ не е во согласност со Уставот на Република Хрватска, бидејќи претставува симбол на усташкиот режим на НДХ – режим кој бил тоталитарен, расистички и фашистички. Уставниот суд исто така наведе дека тој поздрав не може да се оправдува дури ни во околностите на Татковинската војна, во која го користеле некои единици на ХОС.

За концерот на Томпсон зборуваше и градоначалникот на Загреб, Томислав Томашевиќ. Тој рече дека е градоначалник, нема да има повеќе концерти од ваков обем.

Причините се безбедноста на граѓаните и квалитетот на живот на жителите на Загреб во тоа време, додаде тој.

– Усташкиот поздрав беше употребен на концертот, на мое големо жалење. Верувам дека граѓаните дојдоа поради патриотизам и концертот, а не за да го поддржат усташкиот режим. Исто така, во центарот на Загреб се пееја усташки песни. Полицијата не го спречи тоа, ниту ги идентификуваше прекршителите – рече тој.

„ОСТРО ГО ОСУДУВАМЕ СЕКОЈ ИЗРАЗ НА ФАШИЗАМ“ Европската Комисија ги осуди усташките скандирања на концертот на Томпсон во Загреб

The post ХРВАТСКИ ПРАТЕНИК ИЗВИКА „ЗА ДОМ СПРЕМНИ“ Саборот расправаше за концертот на Томпсон appeared first on plusinfo.mk.

За изведување и репродукција на песни и за носење и истакнување симболи, текстови и цртежи кои го нарушуваат јавниот ред и мир, досегашните глоби од 20 до 170 евра ќе се зголемат до 23 пати и ќе изнесуваат од 700 до дури 4.000 евра. Тоа е прекршокот врз основа на кој во Хрватска ќе се казнува истакнувањето на фашистички симболи, какви што се кукастите крстови, но и извикувањето на поздравот „За дом спремни“.

Истата казна ќе важи и за ширење лажни вести кои го нарушуваат спокојството на граѓаните, со кои јавноста често се среќаваше за време на пандемијата на корона, како и за неовластено пукање со огнено оружје и омаловажување или навредување службено лице, пишува Јутарњи лист.

Ова се предвидува во предлог-измените на Законот за прекршоци против јавниот ред и мир, што се на јавна расправа и кои треба да бидат донесени по итна постапка. Станува збор исклучиво за измени со кои се зголемуваат пропишаните казни, додека содржината на самите прекршоци не е променета.

Така, останува прекршокот за вршење проституција, со кој се казнуваат само проститутките. Од сите земји на ЕУ, само Хрватска има таков прекршок. И во предложените измени на Законот тој не се укинува, но не се зголемени казните за тој прекршок, па тие остануваат во опсегот од 20 до 100 евра. Но, казните за оние кои ќе дозволат проституција во нивните простории, односно за лицата кои изнајмуваат стан на сексуални работници, ќе се зголемат до 2.000 евра. Предвиден е и прекршок според кој едно лице може да биде избркано од местото на живеење, доколку продава сексуални услуги.

Во постоечкиот Закон за прекршоци против јавниот ред и мир, највисоката пропишана казна е 170 евра. За споредба, во Законот за јавен собир, на пример, глобите одат и до 6.630 евра. Законот за прекршоци против јавниот ред и мир е донесен во далечната 1977 година и тогаш максималните казни изнесувале 44 отсто од просечната плата, а сега се само 16,7 отсто. Новопредложените казни ќе изнесуваат дури 400 проценти од просечната хрватска плата.

По високите казни, Хрватска веројатно ќе биде рекордер во ЕУ. Така, на пример, Хрватска ќе изрече казна до 2.000 евра за тепачка, расправија или за викање на јавно место, додека во Словенија казната за таков прекршок е најмногу 1.252 евра, во Литванија 240 евра, во Словачка 300 евра, во Италија 309 евра, во Австрија до 500 евра итн.

Прекршокот навреда и омаловажување на моралните чувства на граѓаните ќе остане во законот, иако се помалку е јасно на што всушност се однесува таа законска одредба. Како и да е, наместо досегашните 100 евра, сторителите ќе бидат казнувани со парични казни од 300 до дури 2.000 евра. Од друга страна, за јавна злоупотреба на животните се пропишани двојно помали казни – од 200 до 1000 евра.

The post ЗА ДОМА СПРЕМНИ? Кога сте во Хрватска на море, не велете така, може да ве разберат погрешно и да ви пишат казна од 4.000 евра! appeared first on plusinfo.mk.