Министерството за образование и наука и Град Скопје наскоро ќе ги презентираат мерките со кои ќе се намали и спречи врсничкото насилство меѓу децата и учениците, најава денеска скопскиот градоначалник, Орце Ѓорѓиевски.

– Спремаме уште еден поголем сет мерки заедно во соработка со министерката за образование, Весна Јаневска, со која имаме одлична соработка, но и силна, силна поддршка во тој дел, така што во наредниот период ќе излеземе со цел сет мерки и ќе бидете сведоци на она што ќе го започнеме како процес, а ќе влијае. Убеден сум, на долг рок за што помалку случаи такви да имаме – изјави Ѓорѓиевски на новинарско прашање за сузбивање на врсничкото насилство откако 13-годишно момче беше прободено со нож и се бори за живот.

Тој истакна дека во процесот имаат вклучено и многу експерти и најави дека за Град Скопје скоро време ќе излезат со сериозна и јасна платформа. Експертските тимови ќе работат со учениците, но ќе работат и со родителите.

– Некогаш вината би рекол е кај дел од децата, но многу почесто е вината кај родителите, кои што за жал на таков начин дозволуваат да се однесуваат децата. Но, ќе дадеме сè од себе за да помогнеме во тој процес. Знаете дека јас како градоначалник на Скопје една од оние работи кои што ја направив изминатиов период е да нема телефони присутни на наставата во средните училишта – изјави Ѓорѓиевски, по промоцијата на новите возила за собирање комунален отпад.

The post ГРАД СКОПЈЕ ЌЕ ОБЈАВИ МЕРКИ ПРОТИВ ВРСНИЧКО НАСИЛСТВО Ѓорѓиевски се надева дека ќе има што помалку такви случаи appeared first on plusinfo.mk.

Македонски Телеком започнува широка национална иницијатива за создавање средина без насилство и интернет без омраза којашто обединува кампања за подигнување на свеста, партнерства со институциите и конкретни активности за едукација и активно вклучување на младите.

Со почетокот на новата учебна година започнува и кампањата „Скрши го кругот на насилството. Не биди публика.“, којашто се реализира во партнерство со Министерството за образование и наука, со заедничка цел превенција на врсничкото насилство и омразата во дигиталниот простор. Во фокусот е улогата на сведоците – оние што гледаат, коментираат, снимаат или споделуваат, а со тоа, понекогаш и несвесно, му даваат дополнителна сила и публика на насилството. Пораката е едноставна: не биди публика – реагирај и помогни да се прекине кругот на насилството. Порака со која младите, но и родителите, наставниците и целата заедница се поттикнуваат да ја препознаат сопствената улога во неговото спречување.

– Веруваме дека технологијата треба да ги поврзува луѓето, а не да биде простор во кој насилството и омразата добиваат нова публика. Ова за нас не е само кампања, туку и долгорочна заложба. Преку партнерства, едукација, активно вклучување на младите и конкретни дигитални решенија сакаме да придонесеме за побезбедна средина за секое дете, онлајн и офлајн – изјави Горан Марковиќ, главен извршен директор на Македонски Телеком.

Министерството за образование и наука работи на создавање национални стандарди за училишта без насилство. Стандардите ќе воспостават единствена рамка и јасни критериуми за безбедна училишна средина, а ќе следува и едукација на наставниците, стручните служби и ученичките заедници за нивна примена во пракса.

– Како министерство спроведуваме бројни системски и проектни мерки за превенција и справување со врсничкото насилство. Но, предизвикот е голем и потребна е висока општествена одговорност, вклученост и проактивност на сите – училиштата, семејствата, институциите, бизнис заедницата и општеството во целина. Важно е заедно да испратиме јасна порака дека насилството не смее да има публика – изјави Весна Јаневска, министерка за образование и наука.

Истовремено, Фондацијата Телеком за Македонија и УНИЦЕФ, преку долгогодишното партнерство, продолжуваат да работат на создавање побезбеден дигитален простор за децата и младите. Преку националното младинско движење „Нет без хејт“, коешто го водат деца и млади од 13 градови низ Македонија, се развиваат иницијативи за врсничка поддршка, едукација на родители, детски правобранител во училиштата, младински дигитални содржини и прирачник за превенција. Активностите ќе се спроведуваат во училишта и заедници низ цела Македонија.

Како дел од пошироката заложба за побезбеден дигитален свет, Телеком креира технологија што придонесува за поголема заштита на децата. Новата апликација Safe Family е создадена за да им помогне на родителите и децата да останат поврзани и да се чувствуваат посигурно во секојдневието. Апликацијата континуирано ќе се надградува со нови функционалности за дополнителна сигурност и поддршка на семејствата.

Со сите овие активности и партнерства Телеком продолжува да работи на една заедничка цел – дигиталниот свет да биде простор за поврзување, учење и растење, а не простор за омраза и насилство.

The post НЕ БИДИ ПУБЛИКА, РЕАГИРАЈ И ПОМОГНИ ДА СЕ ПРЕКИНЕ НАСИЛСТВОТО! Голема кампања на Телеком против врсничко насилство appeared first on plusinfo.mk.

Албанскиот премиер Еди Рама објави дека првите 20 училишта во Тирана се комплетно опремени со системи на интелигентни камери со вештачка интелигенција, како почетна фаза од големиот државен проект за радикално зајакнување на безбедноста во образовните институции низ цела Албанија.

Оваа технолошка модернизација доаѓа како директно исполнување на ветувањето кое шефот на албанската влада го даде по потресниот настан во кој 14-годишниот ученик Мартин Цани го загуби животот по физички конфликт со врсници во близина на училиштето „Фан Ноли“ во Тирана. Рама призна дека претходните системи за видеонадзор биле застарени и целосно немоќни навремено да сигнализираат за инциденти или да помогнат во расветлување на нивната динамика.

Мартин, талентиран млад фудбалер во подмладокот на клубот Партизани, го загуби животот откако беше нападнат и избоден со нож за време на физички конфликт помеѓу врсници. Во истиот инцидент со тешки повреди заврши и негов соученик. Нападот го изврши негов врсник (Марио Прлешај), кој во тоа време исто така имаше 14 години. Судот во Тирана го прогласи сторителот за виновен за кривичното дело „убиство под отежнувачки околности“. Во јули 2026 година, Апелациониот суд ја потврди пресудата со која тој е осуден на 16 години затвор.

Оваа трагедија предизвика масовни граѓански протести во Албанија, остар револт против институциите поради безбедноста во училиштата, и беше директен повод албанската влада и премиерот Еди Рама итно да го започнат проектот за инсталирање на вештачка интелигенција и паметни камери во училиштата.

Реално време и директна врска со полицијата

За разлика од старите камери кои само пасивно снимаа, новата генерација паметни камери работи со софтвер базиран на вештачка интелигенција (ВИ), изработен од страна на Министерството за внатрешни работи. Системот автоматски детектира сомнителни однесувања и аномалии, испраќајќи аларми во реално време до три клучни точки: до училишните директори и раководството, до официрите за безбедност во самите објекти и до државната полиција и Националниот центар за мониторинг.

Ова овозможува итна реакција и интервенција на надлежните уште пред препирките да ескалираат во сериозно насилство. Покрај физички пресметки и влез на неовластени лица од надвор, камерите имаат способност автоматски да идентификуваат и помали прекршоци, како што е пушењето тутун во училишните дворови.

– Овие 20 училишта се само авангарда на целиот процес. Обврската што ја презедовме ќе ја спроведеме до крај – училиште по училиште низ целата земја. Технологијата мора да биде во служба на човештвото, а безбедноста на нашите деца пред сè – рече Рама.

На удар се само заедничките простории, не и училниците

За време на посетата на гимназијата „Партизани“, премиерот Рама појасни дека новите камери се поставени исклучиво во заедничките простории – како дворовите, ходниците и влезовите, но не и внатре во училниците.

Ова е направено со цел строго да се почитуваат стандардите за приватност усогласени со регулативите на Европската Унија. Во првата фаза се опфатени училиштата со најголем број ученици, каде што фреквенцијата и ризикот се највисоки. Во зависност од големината на објектот, во секое училиште се инсталирани помеѓу 11 и 31 камера.

Пакет мерки за почетокот на учебната година

Воведувањето на камерите е само еден сегмент од пошироката стратегија на Министерството за образование за новата учебна година. Заедно со технологијата, воведени се и следните засилени мерки:

– Строг училиштен кодекс за облекување и однесување.

– Забрана за употреба на мобилни телефони за време на настава.

– Забрана за нездрава храна во училишните простории.

– Повеќе безбедносен кадар, односно дополнителни 90 обучени офицери за безбедност ќе бидат сертифицирани и распоредени во училиштата.

– Полициски патроли. Државната полиција ќе воспостави редовен физички надзор околу училиштата во три клучни периоди од денот – пред почетокот на наставата, за време на големиот одмор и по завршувањето на часовите.

The post ПАМЕТНИ КАМЕРИ ВО УЧИЛИШТАТА ВО ТИРАНА ПО УБИСТВОТО НА УЧЕНИКОТ МАРТИН Ќе алармираат за препирки меѓу децата пред да ескалираат во насилство appeared first on plusinfo.mk.

Не можеме да контролираме како ќе се однесуваат другите деца кон нашето дете, но можеме да му помогнеме да развие вештини со кои полесно ќе се справи со непријатните ситуации. Учителката и мајка Џули Фрањито издвојува три вештини кои, според неа, можат да им помогнат на децата полесно да реагираат кога некој ги исмева, понижува или малтретира.

Таа предупредува дека децата често не им кажуваат на родителите кога некој бил груб кон нив или ги повредил. Она што за возрасниот може да изгледа како обично задевање, кај детето може да прерасне во мисла дека можеби навистина нешто не е во ред со него. Затоа, важно е детето да знае дека туѓото навредливо однесување не кажува ништо за неговата вредност.

Краток и смирен одговор

Еден од советите е родителите да вежбаат со детето краток одговор кој не покажува силна емоционална реакција. На пример, детето може едноставно да каже „ОК“ или „Чудно што го кажа тоа“, а потоа да се сврти и да си замине.

Идејата е детето да не му ја даде на оној што го провоцира реакцијата што можеби ја очекува. Сепак, ова не значи дека детето треба да трпи или да молчи кога насилството продолжува.

Сигурен говор на телото и одлучен глас

Не е важно само што ќе каже детето, туку и како ќе го каже тоа. Учителката советува детето да стои исправено, да воспостави контакт со очите и со мирен, но одлучен глас да каже: „Престани. Не ми се допаѓа тоа.“

Ваквите ситуации може да се вежбаат и дома преку глума и различни сценарија. Со повторување, детето може полесно да реагира кога навистина ќе се најде во непријатна ситуација.

Важноста на способноста детето јасно да ги изрази своите граници и самоуверено и мирно да се спротивстави, е препознаена и во препораките за спречување врсничко насилство. Притоа, тоа не значи агресија или возвраќање со насилство.

Да знае дека барањето помош не е „тужакање“

Многу деца избегнуваат да му кажат на возрасен што им се случува затоа што се плашат дека другите ќе ги наречат „тужибаби“. Но, постои важна разлика меѓу тужакање и барање помош кога некој го повредува детето или друго дете.

Затоа, важно е родителите да му објаснат на детето дека обраќањето кај наставник, родител или друг возрасен за да се заштити себеси или некого друг не е слабост, туку начин да побара помош.

Експертските препораки исто така нагласуваат дека децата треба да учат социјално решавање проблеми, препознавање и регулирање на емоциите, емпатија и асертивност. Ако детето се соочува со сериозно или повторено насилство, одговорноста не е на него само да го реши проблемот – неопходно е да се вклучат возрасните и училиштето.

Најважно е детето да знае дека, ако некој го повредува или малтретира, не мора само да се справува со тоа.

 

View this post on Instagram

 

A post shared by Julie Fragnito, MS Ed. (@transformingparenthood)

The post 🎥 НАУЧЕТЕ ГИ ДЕЦАТА КАКО ДА СЕ СПАСАТ ОД ВРСНИЧКО НАСИЛСТВО Три вештини што можат да му помогнат на детето да избегне булинг appeared first on plusinfo.mk.

Околу 50 случаи на врсничко насилство годишно се пријавувале во училиштата во последните 3 учебни години, обзнани министерката за образование и наука Весна Јаневска. Таа предупреди дека бројот не пораснал, но дека дел од случаите станале побрутални.

Таа говореше на панел-дискусијата „Меѓуврсничко насилство и вандализам“ во Охрид. Настанот беше организиран по повод Меѓународниот ден на младите, 12 август.

Превенцијата почнува во училиштата

Јаневска ја посочи превенцијата како еден од клучните начини за справување со проблемот. Законските измени од минатата година донесоа нови обврски за училиштата.

Годишните програми треба да содржат активности за добросостојба и за заштита на учениците. Предвидени се и мерки против насилството и против дискриминацијата, како и за подобра комуникација.

Стручните служби во училиштата се зајакнуваат. Повторно се воведени и дежурствата на наставниците за време на одморите, во ходниците и во училишните дворови.

Со Телеком и со УНИЦЕФ е изработен прирачник за справување со сајбер-булинг. Со Макпетрол е подготвен прирачник за врсничко насилство, заснован на реални ситуации.

МОН и Коалицијата на младински организации СЕГА работат и на национални стандарди за безбедни училишта.

Проблемот понекогаш почнува дома

Според Јаневска, анализите покажале дека меѓу причините се семејното насилство и недоволната грижа за децата во дел од семејствата.

МОН затоа соработува со МВР, Министерството за социјална политика, демографија и млади и со Комората на психолози. Целта е наставниците и училишните психолози подобро да препознаваат семејно насилство и занемарување.

Досега биле одржани директни средби со наставници и со родители во околу 30 општини. Активностите ќе продолжат.

Казни и за родители што одбиваат соработка

Јаневска информираше дека во собраниска процедура се и нови законски измени. Тие предвидуваат парични казни за родители и за старатели на ученици за кои ќе се утврди дека извршиле врсничко насилство.

Казни се предвидуваат и за родители што одбиваат да соработуваат со училиштата.

Министерката упати и порака до учениците.

– Укажувајте, спречувајте обиди за булинг, пријавувајте насилство, бидете емпатични, заштитете ги послабите и помогнете им на оние на кои им е потребна помош – порача Јаневска.

The post НЕ РАСТЕ ОБЕМОТ, ТУКУ БРУТАЛНОСТА ВО ВРСНИЧКОТО НАСИЛСТВО Јаневска најави казни и за родителите appeared first on plusinfo.mk.

Во последните три учебни години, просечно се пријавуваат по околу 50 случаи на врсничко насилство годишно во училиштата. Тоа покажува дека обемот на насилството не расте, но загрижува фактот што расте бруталноста во дел од пријавените случаи. Затоа, институциите на централно ниво, со поддршка на локалните самоуправи, граѓанскиот сектор и меѓународните партнери, ги зајакнуваат и превентивните и казнените механизми.

Ова го истакна министерката за образование и наука проф. д-р Весна Јаневска на денешната панел-дискусија на тема „Меѓуврсничко насилство и вандализам“, организирана во Охрид по повод утрешниот Меѓународен ден на младите – 12 Август, од Советот за млади, кој работи под покровителство на претседателката на државата, проф. д-р Гордана Сиљановска-Давкова.

– Очигледно е дека имаме предизвик и мораме да го решаваме. Ценам дека најважни во борбата против врсничкото насилство се превентивните активности. Затоа, со законските измени од минатата година ги задолживме училиштата во своите годишни програми да планираат активности за промоција на добросостојбата на учениците, заштита од насилство, злоупотреба и запуштање, спречување дискриминација, подобрување на комуникацијата и слично – рече Јаневска.

Таа посочи дека се зајакнуваат и стручните служби преку ангажирање кадар таму каде што недостигал, а се вратени и дежурствата на наставниците за време на одморите во ходниците и училишните дворови, наместо оваа обврска да ја извршуваат ученици.

Министерката информираше дека во соработка со „Телеком“ и УНИЦЕФ е изработен прирачник за справување со сајбер-булингот. Иако во МОН досега нема пријави за ваков вид насилство, прирачникот претставува корисна алатка за учениците, наставниците и родителите во препознавањето и спречувањето на интернет-насилството.

Со Коалицијата на младински организации – СЕГА, МОН работи на подготовка на национални стандарди за безбедни училишта.

– Анализите покажуваат дека една од главните причини за врсничкото насилство е семејното насилство, како и недостигот од соодветна грижа за децата во дел од семејствата. Затоа, заедно со МВР, Министерството за социјална политика, демографија и млади и Комората на психолози, неодамна започнавме иницијатива за надградба на компетенциите на училишните психолози и наставници за препознавање семејно насилство и занемарување преку однесувањето на децата и спречување на нивна понатамошна трансформација во насилство насочено кон врсниците – информираше Јаневска.

Таа додаде дека се реализираат и директни средби со наставниците и родителите на учениците. Досега се посетени околу 30 општини, а активноста ќе продолжи и кон крајот на месецов.

Во собраниска процедура се законски измени со кои се предвидуваат парични казни за родителите и старателите на децата за кои ќе се утврди дека извршиле врсничко насилство во училиштето, но и за родителите кои одбиваат да соработуваат со училишните служби.

– Очигледно е дека негативните вредности полесно се наметнуваат и прифаќаат во општеството. Но, младите треба да го менуваат светот, а тоа е можно само преку промена на начинот на размислување и однесување. Укажувајте, спречувајте обиди за булинг, пријавувајте насилство, бидете емпатични, заштитете ги послабите и помогнете им на оние на кои им е потребна помош. Прифаќајте ги вистинските вредности – почитта, толеранцијата, единството и солидарноста – порача Јаневска, обраќајќи им се на младите учесници на настанот.

The post РАСТЕ БРУТАЛНОСТА ВО СЛУЧАИТЕ НА ВРСНИЧКО НАСИЛСТВО Наставниците се обучуваат да препознаат семејно насилство и занемарување appeared first on plusinfo.mk.

Кумановската полиција поднесе кривична пријава против П.А. (18) од селото Лојане, општина Липково, како и против две малолетнички на возраст од 14 и 15 години од Куманово, поради сомнение дека сториле кривично дело „насилство“.

Според информациите од полицијата, инцидентот се случил на 13 март 2026 година, околу 18 часот, кога осомничените повикале 14-годишно девојче да излезе од својот дом.

Потоа ја убедиле да влезе во просторија во близина на спортскиот центар „Соколана“ во Куманово, каде најпрвин ја навредувале, а потоа физички ја нападнале.

Според пријавата, целиот напад го снимале со мобилен телефон.

По насилството, осомничените ѝ се заканиле на малолетничката да не го пријавува случајот и да не зборува за видеото, предупредувајќи ја дека во спротивно „ќе ѝ се случи нешто уште полошо“.

По целосното документирање на случајот, против трите осомничени е поднесена кривична пријава.

ДЕВОЈЧЕТО БРУТАЛНО ГО ПРЕТЕПАЛЕ ДВЕ МАЛОЛЕТНИЧКИ И ЕДНА ПОЛНОЛЕТНА ДЕВОЈКА Првични наоди за видеото со врсничко насилство во Куманово

ТРИ ДЕВОЈКИ БРУТАЛНО ИСТЕПАЛЕ ДЕВОЈЧЕ ВО КУМАНОВО Се појави снимка, МВР го расчистува случајот

The post ЈА НАМАМИЛЕ, ЈА ПРЕТЕПАЛЕ И СÈ СНИМАЛЕ Расчистен случајот во Куманово, кривични за трите насилнички appeared first on plusinfo.mk.

Ново вознемирувачко видео од физичко насилство меѓу малолетници пристигна од Куманово. На снимката се гледа како три девојки брутално  тепаат едно девојче, влечејќи го за коса, удирајќи го со шлаканици и клоци, а во еден момент го фрлаат во ѕид.

Според достапните информации, инцидентот се случил пред околу еден месец, а видеото првично било објавено на „Снепчет“ со опис „кога ќе ме пцуеш, ќе јадеш и ќотек“. Жртвата вчера се обидела да го пријави случајот во полициска станица Куманово, а денеска била примена на разговор.

Од Министерството за внатрешни работи за „Слободен печат“ потврдиле дека СВР Куманово, во координација со Основното јавно обвинителство, преземаат мерки и активности за целосно расчистување на случајот.

Претходно во јули, во скопската населба Аеродром, беше објавено видео на кое девојче беше натерано да клекне, да се извинува и да ветува дека нема да го пријави настанот, додека беше удирано и снимано од поголема група малолетници.

The post 📽️ ТРИ ДЕВОЈКИ БРУТАЛНО ИСТЕПАЛЕ ДЕВОЈЧЕ ВО КУМАНОВО Се појави снимка, МВР го расчистува случајот appeared first on plusinfo.mk.

Само еден ден по случајот со 12-годишното девојче од скопски Аеродром, кое беше понижувано, принудувано да клекне на колена и претепано од врснички, во полиција се пријавени уште два нови случаи на врсничко насилство врз малолетници.

Според информациите од Министерството за внатрешни работи, првиот случај бил пријавен утрото, кога 38-годишна жена во СВР Скопје пријавила дека нејзиниот малолетен син бил физички нападнат од неколку малолетници.

Нападот, според пријавата, се случил на 21 јуни околу 21 часот на подрачјето на Карпош, а оштетениот познавал двајца од напаѓачите.

Вториот случај бил пријавен доцна вечерта, околу 23:35 часот, кога во СВР Скопје било пријавено дека на подрачјето на Центар малолетничка била физички нападната од две други малолетнички кои ги познавала.

Од МВР информираат дека се преземаат мерки за целосно расчистување на двата случаи и утврдување на сите околности.

Новите пријави доаѓаат во период кога јавноста е особено вознемирена поради серијата случаи на врсничко насилство, а институциите се под зголемен притисок за побрза и поефикасна реакција.

The post НЕ ЗАПИРА БРАНОТ НА ВРСНИЧКО НАСИЛСТВО По случајот во Аеродром, уште две деца нападнати во Скопје appeared first on plusinfo.mk.

Врсничкото насилство може да запре само ако сите, и институциите и наставниците и целата заедница, се ангажираме со целосна сериозност, но, посебно важна е улогата на родителите, порача министерката за образование и наука Весна Јаневска на едукативниот панел за родители и старатели на ученици на тема врсничко насилство, што денеска се одржа во Домот на културата „11 Октомври“ во Гази Баба.

Недостасува поголема грижа и посветеност од многу семејства кон своите деца, додаде Јаневска, не од сите, но од многу семејства недостасува токму таа воспитна компонента, што е основа за здраво растење.

– Последниот случај на врсничко насилство покажа деца со недостиг на емпатија и со изобличени вредности. Едни се изживуваат врз дете, а други стојат настрана, снимаат и се забавуваат, наместо да му помогнат и да го заштитат. Ова насилство е аларм за целото општество. Тоа е плод на недостиг на воспитна врска меѓу родителите и децата. Без ангажирање на родителите, секоја иницијатива за справување со врсничко насилство е неефикасна – додаде Јаневска.

Министерката посочи дека токму затоа на национално ниво се иницирани директни средби со родителите на децата и со наставниците, каква што е денешната средба. Целта е отворено да се предочат проблемите, да се слушнат предизвиците со кои се соочуваат семејствата и училиштата, како и да се разменат идеи и иницијативи за заедничко делување против врсничкото насилство.

Јаневска најави одлучност во справување со, како што рее, злото што возрасните им го наметнуваат на децата и ригорозен системски одговор.

– Одговорност мора да има и за родителите. Разговарав со министерот за внатрешни работи, ќе следат санкции за сите инволвирани и за нивните родители. Најчест причинител на врсничко насилство е семејното насилство и занемарувањето на децата – истакна таа.

Во моментов, во собраниска процедура се законски измени кои предвидуваат парични казни за родителите и за старателите на децата за кои ќе се утврди дека извршиле врсничко насилство во училиште.

Министерството за образование и наука минатата година подготви и реализираше сет мерки за справување со врсничкото насилство. Со законски измени ги задолжи училиштата во годишните програми за работа да предвидат активности за промоција на добросостојба на учениците, заштита од насилство, од злоупотреба, спречување дискриминација, подобрување на комуникацијата и слично. Беа изработени прирачници за наставници за справување со врсничко физичко насилство во училишта и за пријавување на сајбер насилство. Стручните служби во училиштата беа зајакнати со ангажирање на кадар онаму каде недостигаше, и беа вратени дежурствата на наставниците за време на одморите во ходниците и во училишните дворови.

Како што информира МОН, средбите со родителите ќе продолжат, а продолжуваат и обуките за стручните соработници за препознавање на семејно насилство преку однесувањето на децата на училиште и за спречување на понатамошно трансформирање во врсничко насилство.

Досега се реализирани обуки за стручни соработници од 30-тина општини во Македонија, во соработка со Комората на психолози, МВР и со Министерството за социјална политика, информира МОН.

The post БЕЗ АНГАЖМАН НА РОДИТЕЛИТЕ НЕМА СПРАВУВАЊЕ СО ВРСНИЧКОТО НАСИЛСТВО Според Јаневска во многу семејства недостасува посветеност кон децата appeared first on plusinfo.mk.