Аеродромот „Св. Апостол Павле“ во Охрид денеска ги пречека првите 239 патници од Вроцлав, Полска, кои пристигнаа со новата авиолинија на авиокомпанијата Wizz Air. Со ова официјално започна сообраќањето на новата редовна линија меѓу Охрид и еден од најатрактивните полски градови.

По повод првиот лет, ТАВ Македонија организираше свечен пречек за патниците, кои беа послужени со традиционално охридско ѓомлезе од хостеси облечени во македонски народни носии, претставувајќи дел од локалната култура и гостопримство.

Новата авиолинија Охрид – Вроцлав ќе сообраќа двапати неделно, секоја среда и недела. Од ТАВ Македонија најавија дека веќе на 9 јуни ќе започне и новата линија од Катовице, која ќе се реализира двапати неделно, а во шпицот на летната сезона и трипати неделно.

Генералниот директор на ТАВ Македонија, Неџат Курт, истакна дека новите авиолинии претставуваат значаен чекор во зајакнувањето на меѓународната поврзаност на Охрид и развојот на туризмот.

-Новите линии од Вроцлав и Катовице до Аеродромот „Свети Апостол Павле Охрид“ претставуваат силен поттик за понатамошен развој на туризмот во Охрид, како и за продлабочување на економските и културните врски меѓу Македонија и Полска. Очекуваме овие дестинации значително да придонесат за зголемување на бројот на посетители и за подобрување на видливоста на Охрид на европската туристичка мапа. Исто така, ги охрабруваме македонските патници да ги откријат двата живописни полски градови- изјави Курт.

Вера Јардан, менаџер за корпоративни комуникации во Wizz Air, оцени дека новите линии ќе понудат повеќе можности за патување и ќе придонесат за раст на туристичката размена меѓу двете земји.

-Со задоволство го прославуваме отворањето на двете нови авиолинии на Wizz Air што го поврзуваат Охрид со Вроцлав и Катовице, дополнително зајакнувајќи ја поврзаноста на Охрид со Полска. Овие нови услуги ќе обезбедат повеќе можности за патување за патниците, а воедно ќе придонесат и за пораст на туризмот меѓу двете земји. Уверени сме дека обете линии ќе бидат топло пречекани од патниците на двата пазари и сме благодарни на сите патници што продолжуваат да го избираат Wizz Air и да летаат со нас за да откриваат нови дестинации- изјави Вера Јардан.

Авиокомпанијата моментално опслужува летови од аеродромот во Охрид до осум дестинации, вклучувајќи ги и двете нови рути: Вроцлав, Катовице, Дортмунд, Меминген/Минхен, Базел-Милуз, Штутгарт, Милано-Малпенса и Братислава.

Во текот на летниот распоред на летови, 8 авиокомпании ќе опслужуваат летови до 17 дестинации од Аеродромот „Свети Апостол Павле“ Охрид. Од нив, 14 се редовни и сезонски авиолинии, додека три се чартер-летови.

The post 239 ПОЛСКИ ТУРИСТИ СЛЕТАА ВО ОХРИД Визер ја стартуваше авиолинијата од Вроцлав appeared first on plusinfo.mk.

– Заемната определба да се вложува во перспективите за македонистиката во Полска дава конкретни резултати. По одбележувањето на јубилејот 35 години Лекторат по македонски јазик на Факултетот за хуманистика во Сосновјец при Шлезискиот универзитет во Катовице, од следната академска година, македонскиот јазик ќе се изучува и на додипломските студии на Универзитетот во Вроцлав. Определбата македонскиот јазик уште посилно да одекнува во светот не е само желба, туку секојдневно е стварност – истакна директорката на Меѓународниот семинар за македонски јазик, литература и култура при Универзитетот „Св. Кирил и Методиј“ (МСМЈЛК при УКИМ), проф. д-р Весна Мојсова-Чепишевска по завршување на 11. Македонско-полска конференција во Катовице и по чествувањето на јубилејот на Лекторатот по македонски јазик во Сосновјец.

Наставата во Вроцлав ќе ја изведува полската македонистка, д-р Марија Стришевска, која е семинаристка на школите на Меѓународниот семинар за македонски јазик, литература и култура при Универзитетот „Св. Кирил и Методиј“.

– На Универзитетот на кој великиот Блаже Конески, кој е меѓу најзаслужните за воспоставувањето и развивањето на македонско-полските културни врски во минатиот век, во 1973 година бил прогласен за doctor honoris causa, половина век потоа ќе се одвива настава по македонски јазик уште од почетно рамниште на додипломските студии. Се случува нешто на што нè обврзува историјата, затоа што на овој Универзитет, интересот за македонистиката е континуиран и потоа, особено заради успешната работа на Македонистичката работилница основана од еден од најистакнатите полски македонисти, акад. Јан Соколовски, кој и денес е постојано посветен на македонистиката што се потврди и на Конференцијата. Но, особено ни е драго што наставата во Вроцлав ќе ја изведува полската македонистка д-р Марија Стришевска. Таа е семинаристка на школите на МСМЈЛК при УКИМ и сето она што преку лекторската настава и предавањата на школите во текот на изминатите години го вложивме во неа сега постанува влог во нови генерации полски македонисти. Ова е конкретен пример дека вложувањата во актуелните генерации странски македонисти не се само за сегашноста, туку пред сè за иднината на странската македонистика – нагласи Мојсова-Чепишевска.

Веста за отпочнувањето со академска настава по македонски јазик на Универзитетот во Вроцлав ја соопшти амбасадорот Илија Псалтиров.

Според директорката на МСМЈЛК при УКИМ, значајно е што веќе се видливи дипломатските заложби за статусот на македонистиката на странските универзитети и за поддршка на заложбите за развој на странската македонистика.

– Се надевам дека тоа не е привремена пројава, туку дека ќе биде постојана, секојдневна практика, затоа што странската македонистика мора да биде државен приоритет – рече Мојсова-Чепишевска.

Таа додаде дека и онаму каде веќе има традиција на интерес и посветеност за македонскиот јазик, потребни се вложувања и посветеност за таа да продолжи да се развива.

– Затоа, во рамки на чествувањето на јубилејот на Лекторатот по македонски јазик во Сосновјец, со колегите од Полска и натаму разговаравме со конкретни предлози за унапредување на наставата по македонски јазик, литература и култура на Шлезискиот универзитет, со цел поттикнување и поголем интерес за македонистиката кај новите генерации студенти. Верувам дека и сето она за што разговаравме и го споделивме како предлог ќе се оствари, како што се оствари и сето она што го планиравме во рамките на чествувањето на јубилејот – истакна Мојсова-Чепишевска.

The post МАКЕДОНСКИ ЈАЗИК И НА ДОДИПЛОМСКИ СТУДИИ ВО ВРОЦЛАВ Наставата ќе ја изведува полската македонистка д-р Марија Стришевска appeared first on plusinfo.mk.