Со својата репутација на рај за забави, омилен кај познати личности и меѓународни ѕвезди од А-листата, островот Миконос постепено се етаблира како една од најбараните луксузни дестинации за недвижности на Медитеранот.

Вилите за продажба на Миконос се одлична инвестиција, идеални за зголемување на капиталот.

Луксузот се плаќа и 30.000 евра по квадрат

Луксузните вили со клуч на рака на врвни локации на брегот како што се Алеомандра, Свети Јован, Свети Лазарос моментално се продаваат во просек по 11.500 евра по квадратен метар. Новите вили подалеку од брегот се продаваат по 7.500 евра по квадратен метар.

Но, тоа не е сè кога е во прашање луксузот. Богатите нудат и повисоки цени, ако вилата или куќата ги задоволува нивните барања.  Според студијата на GEOAXIS (грчка агенција за проценка на имоти), просечната цена за луксузни домови во Миконос е 16.790 евра за квадратен метар и е повисока за 4,9% од пред една година. Студијата наведува и оглас на кој се бара и цена од 30.000 евра за квадратен метар, што го рангира островот во најскапите луксузни дестинации на пазарот на недвижнини во светот. Вакви цени има само Монако, кој се смета за најскап пазар на недвижнини.

Миконос е една од најскапите дестинации за изнајмување вили во светот. Просечната цена за изнајмување е околу 20 евра за метар квадратен месечно. Премиум вилите се изнајмуваат за суми од 10.000 до над 50.000 евра неделно во шпицот на сезоната.

Златна виза и погодности за странските купувачи

Атрактивноста на недвижностите на Миконос се должи на уникатен спој од економски фактори, социјален статус и географски предности кои тешко можат да се реплицираат на друго место во светот. Даночните олеснувања на грчката влада за посебни инвеститори и строгите правила за градба и ограничувањата придонесуваат за постојано високата вредност на недвижностите и влијаат на атрактивноста на имотите.

Имотите брзо ја зголемуваат својата пазарна вредност. Студијата на GEOAXIS, оценува дека цените на недвижностите постојано растат (за речиси 5% годишно), што значи дека имотот брзо ја зголемува својата пазарна вредност. Во текот на изминатите десет години, цените на куќите во Миконос се зголемиле за приближно 38,7%.

Грција нуди и погодности за странските државјани кои ќе инвестираат на Миконос и на други места. Доколку вредноста на имотот надминува одреден праг (кој за популарните острови како Миконос изнесува 800.000 евра), автоматски купувачот се стекнува со  право на грчка златна виза. Таа му овозможува постојан престој во Грција и слободно патување низ целата Шенген зона за него и за неговото семејство.

Големи даночни олеснувања

Грчката влада воведе неколку исклучително силни даночни олеснувања и привремени суспензии на даноците со цел да ги привлече странските инвеститори на пазарот на недвижности, особено во луксузниот сегмент како на Миконос.

Најголемото олеснување за купувачите на нови објекти е целосната суспензија на ДДВ од 24%, кое важи до крајот на оваа година. Тоа значи дека наместо 24% ДДВ, купувачите на луксузни новоградби плаќаат само стандарден данок на пренос на имот од околу 3,09%. За вила од 2 милиони евра, ова заштедува над 400.000 евра.

Исто така овие купувачи не плаќаат данок од 15% на профитот што го остваруваат.

Доколку инвестирате повеќе од 500.000 евра во недвижности во Грција и ја пренесете вашата даночна резиденција таму, се квалификувате за т.н. Non-Dom статус. Наместо да плаќате прогресивен данок во Грција до 44% на вашите глобални приходи, плаќате фиксен паушален данок од 100.000 евра годишно, без разлика колку заработувате низ светот. Овој статус трае до 15 години.

Едно од олеснувањата е и тоа што годишниот данок ENFIA кој го плаќа секој сопственик на имот може да се намали преку осигурување односно се добива 20% на овој данок. Државата нуди и даночен кредит ако се купи постар имот и се вложи во негово реновирање или енергетска ефикасност.

Каква е постапката за купување имот на Миконос?

Постапката за купување и пренос на имот во Грција (вклучително и на Миконос) не е комплицирана. За странските државјани процесот е целосно легален и јасен, но не е брз и може да трае од неколку недели до неколку месеци.

Како и секаде треба да се ангажира адвокат кој ќе ја проверка сопственоста, хипотеките и дали имотот е изграден според законот. Потребно е и да се обезбедите и грчки даночен број (AFM) кој се добива брзо во локалната даночна управа со пасош. Исто така треба да се отвори и сметка во грчка банка бидејќи сите трансакции за купувањето во Грција одат преку сметка за да се докаже потеклото на парите. Се плаќа и 10% депозит за да се резервира имотот додека траат проверките. Дополнително е ангажирање на нотар за финалниот договор.

Адвокатот го регистрира договорот во катастарот, со што официјално станувате сопственик. Купувањето вклучува и неколку задолжителни давачки: данок на имот од фиксни 3% од вредноста на имотот, а треба да се платат и нотарски и катастарски такси кои се движат од 1,5% до 2%.

Влијанието на Оназис и на Џеки Кенеди

Главни купувачи на недвижности на Миконос доаѓаат од Британија, Германија, Франција, Швајцарија, САД и од Израел.

Голем број светски познати личности имаат или поседувале луксузни имоти на Миконос, додека други се редовни гости во строго чувани приватни вили.

Тод Боли, американски милијардер и косопственик на фудбалскиот клуб Челси, поседува суперлуксузен имот на островот. Чарлс Вортингтон, познат британски фризер на славните и козметички тајкун изгради една од најскапите вили на Миконос, вредна околу 50 милиони евра. Меѓу сопствениците се и холивудски ѕвезди и уметници како Џефари Стар, Харисон Форд, Лејди Гага.

Еден од најзначајните сопственици на имоти на Миконос е Аристотел Оназис, познатиот грчки бродски магнат, кој практично го претвори Миконос во глобален центар на богатството во 1960-тите, заедно со сопругата Џеки Кенеди Оназис. Тие имале огромно влијание таму и го изградиле локалниот аеродром.

Иако Оназис го поседувал приватниот остров Скорпиос (каде што се венчал со Џеки и каде што е погребан), тој и неговата сопруга одиграле клучна улога во историјата на Миконос.

Во 1960-тите и 1970-тите, Оназис често ја закотвувал својата луксузна јахта „Кристина О“ на бреговите на Миконос. Со него доаѓал светскиот крем – од Винстон Черчил и Грејс Кели до Елизабет Тејлор.

Посетата на Џеки Кенеди Оназис на островот во 1961 година (и нејзините подоцнежни престои со Оназис) буквално го ставиле Миконос на светската туристичка мапа. Нејзиното воодушевување привлекло река холивудски ѕвезди и милијардери кои сакале да го искусат истиот рај.

Но, не сите богаташи купуваат имот на Миконос, дел од нив изнајмуваат вили. Такви се Леонардо Ди Каприо, Илон Маск, Бијонсе и Ким Кардашијан.

Недвижностите на Миконос се најскапи меѓу блиските грчки острови. По него следуваат Санторини со просечна цена од 13.943 евра и Парос со 10.026 евра за квадратен метар. На Кеа, просечната цена достигнува 6.549 евра, а на Серифос – 3.984 евра.

Миконос е познат грчки остров во Егејското Море, дел од групата на Кикладите, главно препознатлив по својот луксузен туристички амбиент, белите куќи и активниот ноќен живот.

The post КВАДРАТ НА МИКОНОС ДОСТИГНА 12.000 ЕВРА Како омилениот остров на Оназис и на Џеки Кенеди се претвори во рај за забави на богатите? appeared first on plusinfo.mk.