Хрватска воведува значајни промени во системот за вработување на странски работници со цел воспоставување подобра контрола, намалување на нелојалната конкуренција и сузбивање на нелегалните практики, објави ХРТ.

Измените на Законот за странци воведуваат построги здравствени услови и го поттикнуваат учењето на хрватскиот јазик, а статистиката покажува дека оваа година, и покрај помалиот број издадени работни дозволи, бројот на осигурени лица е зголемен, што укажува на подобро планирање од страна на работодавачите.

Според предлогот, граѓанин на трета земја ќе мора со барањето за прва дозвола за привремен престој да приложи потврда за здравствена состојба и статус на вакцинација, кои не смеат да бидат постари од 90 дена.

Исто така, секој кој сака да работи во Хрватска ќе треба добро да го говори хрватскиот јазик, што се смета за основа за интеграција на странските работници.

– Ние го олеснивме учењето јазици, кофинансирано од Европскиот социјален фонд, но одѕивот беше слаб. Не постои ниво на свест што е потребно за да се убедат работниците да го научат јазикот- вели државниот секретар на Министерството за труд и пензиски систем Иван Видиш и додава дека граѓаните со право очекуваат лицето да покаже барем почетен интерес за јазикот.

Хrватска, исто така, ја зголемува контролата на вработувањето на странци со цел да го намали дивото вработување и да обезбеди подобро регулиран пазар на трудот.

– Системот е подобро контролиран и за странските работници и за работодавачите- вели Видиш.

Според него, Хрватска годинава евидентирала 17% помалку работни дозволи во споредба со истиот период минатата година, но во исто време 10% повеќе регистрирани работници во Хрватскиот институт за пензиско осигурување.

– Ова покажува дека работодавците подобро планираат, но и дека достигнавме продолжување на  40% од работните дозволи. Го намалуваме прометот и планираме посериозно со странските работници. Решивме да испратиме јасни пораки до оние кои се одлучиле за нелегални практики – рече Видиш.

Анита Мандиќ, раководител на Службата за законодавство во областа на престојот на странците, потврди дека трендот се менува.

– Досега добивме повеќе од 260.000 барања, а 167.000 се одобрени – вели таа.

Од нив, издадени се 69.000 продолжени дозволи, речиси 79.000 за нови вработувања и речиси 20.000 за сезонски работници. Најголем број дозволи оваа година им се издадени на граѓани на Босна и Херцеговина (околу 32.000), Непал (31.000), Србија (околу 24.000) и Филипините (околу 17 .000).

Повеќе од 11.000 работници од Македонија добиле работни дозволи во Хрватска.

The post НА РАБОТА ВО ХРВАТСКА САМО СО ЗДРАВСТВЕНА ПОТВРДА И ПОЗНАВАЊЕ НА ЈАЗИК Земјата ги заострува условите за вработување странци appeared first on plusinfo.mk.

Министерството за внатрешни работи подготви нацрт-измени на Законот за странци со кои се олеснува постапката за добивање дозволи за престој на странци кои се вработуваат кај стратешките партнери и нивно вработување по скратена постапка. Нацрт законот е објавен на ЕНЕР.

Цел на измените, како што се наведува во образложението, е да се усогласи Законот за странци со обврските преземени со Законот за утврдување на јавен интерес и номинирање на стратешки партнер за имплементација на проектот за изградба на инфраструктурниот коридор 8 и на коридорот 10 д во делот на ангажирање/вработување на лица-странци како работна сила. Дополнителна причина за измените е да се олесни процедурата поради сложеноста и обемноста на документацијата која е потребна во постапката за поднесување и одобрување на привремениот престој заради работа.

Според овие измени, компаниите кои реализираат стратешки проекти во земјава (како и „Бехтел и Енка“) ќе можат да ангажираат работници од странство без разлика дали е исцрпена државната квота за вработување странци и без мислење на Агенцијата за вработување, која дава мислење за вработување на странците. На странците што ќе ги ангажира стратешкиот партнер ќе им биде продолжен престојот со гаранција од работодавачот и со посебна потврда за стратешки партнер издадена од Министерството за економија и труд најмногу до една година наместо до 6 месеци како за другите странски работници. Стратешкиот партнер ќе треба да поднесе и доказ за тоа дека ги исплатил сите обврски кон работникот.

МВР ќе одобрува и привремен престој на странец вработен само во правниот субјект со статус на стратешки партнер и со приложување договор за работа склучен со правниот субјект со  образложение за потребата и соодветноста на работникот-странец за конкретното работно место за кое се ангажира.

Како едно од олеснувањата кои се предложени во измените на законот е тоа што барањето за привремен престој го поднесува правното лице кое го вработува странецот директно во Министерството за внатрешни работи, наместо во Агенцијата за вработување, со што се крати постапката.

Новина е и тоа што Агенцијата за вработување се прескокнува и во ситуацијата кога документацијата потребна во барањето за привремен престој која е доставена до Министерството за внатрешни работи е некомплетна. Сега известувањето за комплетирање на документацијата директно го доставува Министерството за внатрешни работи. Рокот за комплетирање на документацијата е 7 дена од денот на известувањето по што МВР го одбива барањето.

Правното лице кое бара привремен престој за вработени странци ќе треба да поднесе и гаранција за странецот што го вработува.

„Со гаранцијата правното лице поднесува писмена изјава дека ќе ги сноси трошоците за престојот и за присилното отстранување на странецот од територијата на Република Северна Македонија, како и трошоците за евентуалниот престој и сместување на странецот, доколку тие не можат да се наплатат од странец. Покрај изјавата гаранцијата треба да содржи и информации за странецот (име и презиме на странецот, датум на раѓање, државјанство на странецот, информации за патна исправа), информации за правното лице кое дава гаранција (назив на правно лице, седиште на правното лице, единствен матичен број на субјектот и единствен даночен број на субјектот, потпис и печат на одговорното лице во правното лице кое го повикува странецот, причината поради која се повикува странецот во Република Северна Македонија, како и други податоци кои се од важност во постапката. Гаранцијата мора да биде заверена од надлежен орган за заверка на писмени исправи“, стои во нацрт измените на Законот за странци.

Новина е и тоа што се скратува рокот за вработување на странецот кој добил дозвола за престој од најмногу 90 на најмногу 30 дена. Со предложените измени се крати и рокот за меѓусебно изведување на Министерството за внатрешни работи и Агенцијата за вработување кои водат евиденција на дозволите за привремен престој и вработувањето и отпуштањето од работа на странците.

Новина во овие законски измени е и тоа што странски осудени лица ќе можат да бидат вработени кај стратешките партнери на државата. Со измените привремен престој може да се добие ако странецот бил осудуван во државата чиј државјанин е, но ако дошол од друга земја каде што не е осудуван.

Бизнисмените од градежништвото велат дека овие измени се на штета на државата а во корист на еден странски стратешки инвеститор кој е привилегиран во однос на останатите компании, домашни и странски инвеститори, кои имаат потреба од увоз на работници.

– Факт е дека нема работници во градежниот сектор, а тоа го имал предвид и стратешкиот партнер кога конкурирал за работа во земјава. Затоа ние баравме домашната градежна оператива да биде вклучена во реализацијата на проектот. Градежниот сектор е засегнат со овие измени бидејќи компанијата која ги гради автопатиштата од коридорот 8 и 10 д е привилегирана при вработувањето на странски работници. Тоа посебно се однесува на деловите од законот каде што измените важат само за странските партнери, но не и за домашните. Посебно е проблематично тоа што ќе можат да се вработуваат странци во земјава кои се осудени во земјата на која се државјани. Тоа во сегашниот контекст на состојби во светот е многу ризично не само за работодавачите, туку и за земјата. Не смееме да дозволиме интересите на една компанија да бидат над интересите на целата држава – вели Никола Велковски, член на Градежната комора.

Дел од бизнисмените велат дека темелно ќе ги проучат измените и ќе реагираат до подносителот, доколку имаат забелешки.

Од Синдикатот за градежништво велат дека законските измени кои се предложени се дискриминаторски за домашните компании и странските инвеститори кои не се стратешки партнери на државата, а имаат потреба да вработат странци.

– Посебно е жално што странските работници кај стратешките партнери во случајов кај „Бехтел и Енка“ ќе работат во услови за работа каде што можеби Инспекторатот за труд нема да има пристап. Последните измени на Законот за работни односи кои се однесуваа за продолжувањето на прекувремената работа исто така беа поттикнати од потребата да се усогласат со договорите со стратешките партнери „Бехтел и Енка“, па работниците ќе мора да „црнчат“ 12 часа дневно без да им се признае прекувремена работа. Тогаш ВМРО-ДПМНЕ беше против овие измени а сега прави измени на закон со кој ги дискриминира останатите компании при вработувањето на странски работници, а на домашните работници им се влошуваат условите за работа и им се укинуваат стекнатите права. Дополнително со овие измени се дискриминираат домашните компании кои ќе треба да ги тераат сите процедури предвидени за вработување на странци како квоти, мислење од Агенцијата за вработување и многу други работи со кои им се усложнува постапката – вели претседателот на синдикатот на градежници Иван Пешевски.

Мислење за измените на Законот за странци ќе треба да даде и Владата по што ќе се знае дали тој ќе оди по редовна или по скратена постапка во Собранието.

The post „БЕХТЕЛ И ЕНКА“ ЌЕ ВРАБОТУВААТ СТРАНЦИ ПОД ПОСЕБНИ УСЛОВИ Се предлагаат измени со кои ќе може да се вработат и осуденици appeared first on plusinfo.mk.

И покрај најавата дека ќе се олесни постапката за вработување на странски работници во домашните компании, владата скоро ништо не направила во овој период. Актуелниот закон е строг, а не се работи за негова промена или за промена на другата регулатива која е поврзана со вработувањето странци во земјава. Бизнисот, пак, бара брзи промени за да не се зголеми бројот на компании кои се затвораат поради недостиг на кадри.

Потреба од работници има во скоро сите сектори кои се обидуваат да влезат во квотата од 5.000 работници утврдена од државата.

– Нема никакво помрднување во однос на олеснување на процесот за увоз на работници од странство. Компаниите се обидуваат самите да донесат работници, но иако на прв поглед процедурите се лесни има низа пречки кои го одолговлекуваат процесот, а нас ни треба брза реакција, бидејќи испораките за партнерите не можат да чекаат. Така се доведуваме во ситуација и онаму каде што можеме да постигнеме успех, тој да изостане. Институциите не сакаат да разберат дека невработените што останаа во земјава не сакаат да работат или чекаат вработување во јавниот сектор каде што мислат дека е полесно да се работи. Само во нашиот сектор има неколку компании кои се обидуваат со месеци да донесат по неколку работници, а странските партнери бараат да го прошират производството. Кај мене во „Мода“ засега издржуваме со привремени вработувања на постари лица кои не можат да одговорат квалитетно на работата, но по две години ќе мора да увеземе странци бидејќи ќе имаме поголем број пензионирања – вели Ангел Димитров, сопственик на конфекцијата „Мода“ од Свети Николе и член на Организацијата на работодавачи.

За него е неразбирливо зошто власта се плаши од увоз на странци и не сака да признае дека во земјава нема веќе работна сила која сака да работи, а економијата и државата тонат.

– Работниците заминаа, а тие што останаа не сакаат да работат, а тоа се гледа во сите сектори од преработувачката индустрија преку угостителството, земјоделството до градежништвото. Секаде се потребни работници, а владата се плаши да ги олесни процедурите за добивање виза и да ги зголеми квотите за странци, не размислувајќи дека со тоа ѝ штети на домашната економија и со тоа на државата која постепено тоне. Мислам дека потребите на конзорциумот „Бехтел и Енка“ од работници веќе го покажуваат проблемот – вели тој.

Андреа Серафимовски, претседател на Здружението за градежништво во Стопанската комора вели дека потребите на градежниот сектор се проценуваат на 20.000 работници кои во отсуство на интерес на државата компаниите сами се снаоѓаат да ги донесат за да можат да ги завршат проектите.

– Интересен е фактот што сега веќе имаме проблем со работници во компаниите од градежништвото за производство, а помалку во изведбата. Секоја компанија на свој начин го решава проблемот преку агенции од регионот. Нашите потреби се високи и затоа бараме зголемување на квотите за вработување странци за 10.000 до 20.000 само во секторот – вели Серафимовски.

Тој се надева дека со олеснувањето на процедурите за увоз на работници за изградба на автопатиштата кои треба да ги гради конзорциумот „Бехтел и Енка“ и нашите компании ќе добијат олеснувања за увоз на работници за сопствените потреби.

– Се надевам дека до крајот на годината владата ќе биде свесна со каков проблем се соочуваме и ќе го почне процесот на олеснување на процедурите и промена на законите, бидејќи одамна ние немаме работници во секторот, а и целата економија има потреба од работници кои ние ги немаме поради неправилните политики, условите во семјата, условите во компаниите и условите во кои живеат самите граѓани – вели тој.

Сегашните процени се дека увоз на работник од Далечниот Исток чини и до 2.000 евра бидејќи компанијата треба да обезбеди авионска карта, дозволи, медицински прегледи и сместување.

Во отсуство на интерес кај државните институции, коморите преку агенцијата „Коузон“ подготвуваат проект за олеснување на процедурите кој треба да биде готов наскоро и да се достави до институциите.

Зоран Кочоски од агенцијата „Коузон“ вели дека има огромни потреби за увоз на работници од странство, но и дека е потребна соодветна регулација на овој увоз почнувајќи од утврдување на потребите кои сега никој не знае колкави се, преку изработка на стратегија за тоа, па сѐ до остварување на правата на овие работници за здравствено осигурување и можност за останување во земјава.

– Ако Германија која е една од најсилните економии може поради потребите на компаниите од работници да ги олеснува процедурите секоја година, зошто Македонија која е слаба економија не може да го направи тоа. Според она што го согледав има потреба од измени на повеќе закони кои треба да ги направат неколку министерства координирано. Потребно е да се утврдат и потребите од работници кои треба да се увезат и да се подготви стратегија. Да се утврди нивниот статус дали ќе биде привремен или ќе има можност тие да останат подолг период и да се интегрираат во општеството, а се утврдат нивните права од работа и здравствено и пензиско осигурување и низа други активности кои не може да се реализираат ако државните институции не соработуваат – вели Кочовски.

Покрај другото, според него, треба да се дефинира под кои услови ќе треба да се прави интервентен увоз на работници и кој ќе утврдува дали треба тоа да се направи.

Кочоски вели дека процесот може да се заврши брзо, но се зависи од интересот на институциите кој моментално е на ниско ниво.

Агенцијата „Коузон“ моментално работи на обезбедување на 30 до 50 работници од странство за одделни компании кои, како што вели Кочовски, ќе обезбедат работа за другите 250 работници на кои работата им зависи од работните места кои треба да се пополнат со странци.

Во земјава не се знае точниот број на работници кои се потребни на економијата. Владата кога ја најави потребата од увоз на работници соопшти дека се потребни околу 10.000 работници годишно.

Се проценува дека земјава од осамостојувањето ја напуштиле повеќе од 700.000 луѓе. Процесот не запира, а главна причина за заминувањето покрај ниските плати и стандард се и условите за живот.

The post НА ДРЖАВАТА НЕ Ѝ ФАЛИ КАДАР, КАКО ДА ЈА РАЗБЕРЕ МАКАТА НА БИЗНИСОТ?! Компаниите се крстат дека „Бехтел и Енка“ ќе го пробие патот за увоз на странска работна сила appeared first on plusinfo.mk.