„Кога ќе кажеме дека ќе се зајакне примарното здравство во некоја општина, истакна Алиу, точно ќе знаеме колку лекари и сестри треба да има таму, кога ќе кажеме дека нема да дозволиме да има градови со двојно помалку лекари по жител, ќе знаеме како да го исправиме тоа“.

Вака вели министерот за здравство на денешна прес-конференција. Алиу најави дека министерството почнало анализи за формирање регистар за човечки ресурси во здравство од достапните податоци.

Во анализата се земени предвид пензионирањата, новите вработувања, специјализациите, па сè до трансферите на работници во установите, појаснува министерот. Исто така, се анализираат и јавните и приватните здравствени установи во Македонија.

Министерстово достави и линк до веб-страницата на МОЈ ТЕРМИН каде што се претставени сите јавни здравствени установи (ЈЗУ) и приватни здравствени установи (ПЗУ), кои нудат услуги покриени од Фондот на здравствено осигурување.

На оваа страна може да се пронајдат податоци за лекари по специјалност и опрема.

https://mojtermin.mk/map/specijalist

Според анализата, во државата има вкупно 3.779 здравствени установи од кои 2.942 се во мрежата на здравствени установи, а надвор од мрежата се 837 установи.

– Од 2.942 здравствени установи 2.830 се приватни (ПЗУ), а 112 се јавни установи – од кои 108 се јавни здравствени установи (ЈЗУ) и 4 институции кои даваат јавни здравствени услуги, како што се Воено медицински центар, МАНУ, Универзитет Св. Кирил и Методиј-Медицински Факултет и Фармацевтски Факултет – Скопје. Бројот на вработени во јавен и приватен сектор изнесува 32.383, од кои 18.536 се во ЈЗУ, а 13.847 во ПЗУ. Од 13.847 вработени, 9.040 се лекари и членови на тимот во примарно здравство, а останатите 4.807 се вработени во приватни здравствени установи (сите вработени во здравствен сектор), рече Алиу.

Од 18.536 вработени во јавното здравство, посочи министерот, 4.746 се лекари и медицински соработници на секундарно и терциерно ниво. Во јавните здравствени установи има 7.003 медицински сестри, како и останат медицински и немедицински кадар.

Тој истакна дека не верува во политики без податоци и затоа го почнале овој процес, го воделе како проект на вкрстување на податоците од јавните здравствени установи и приватните здравствени установи и ги поврзале сите нивоа на здравствената заштита, односно примарно, секундарно и терциерно ниво, ја анализирале дистрибуцијата во сите општини и региони, податоците ги класифициравме по специјалност, по профил и по тип на установа.

Според него, ова е почеток на воспоставување регистар на работници во областа на здравството каде податоците ќе може да ги гледаат во реално време и да креираат здравствени политики базирани на точни и навремено ажурирани податоци.

– Оваа анализа произлезе од еден темелен институционален процес на вкрстување на податоци од повеќе институции, како што се Централен регистар, Агенција за вработување, Лекарска комора, Стоматолошка комора, Фармацевтска комора, Управа за електронско здравство и Фонд за здравствено осигурување. Здравството не може да се реформира „на слепо“, не може да се планираат дежурства, листи на чекање, специјализации, интервентни тимови и здравствени услуги блиску до домот на секој граѓанин, ако не знаете точно колку луѓе работат во системот, каде работат, со каква стручност – додаде Алиу.

The post НЕМА ВЕЌЕ ХАОС, ТОЧНО ЌЕ СЕ ЗНАЕ КАДЕ НЕДОСТАСУВААТ ЛЕКАРИ Алиу спрема онлајн регистар на работници во здравството appeared first on plusinfo.mk.

Не станува збор за неисполнети ветувања, туку за процес што е започнат и е при крај, рече министерот за здравство, Азир Алиу за вработувања во здравството, меѓу кои и 150-те вработувања во Клиничката болница во Тетово.

– Ние не ветивме, туку реализиравме. Процесот не е целосно завршен, но сите чекори за вработување на овие лица се завршени, освен потпишувањето на договорот и завршната средба со директорот. Ова е процес што веќе е во тек и не може да се поништи. Ниту министерот, ниту директорот не можат да одлучат да го откажат по локалните избори – едноставно тоа не е можно – изјави министерот Алиу во гостување на Алсат М.

Сите кандидати се тестирани и конечната листа е составена, додаде тој.

– Сега останува само последната административна фаза, што вклучува кратка средба со директорот и потоа потпишување на договорот – рече Алиу.

Министерот најави дека покрај овие вработувања што се во процес, ќе има и нови вработувања, поради големиот недостиг на кадар во здравствениот сектор во Македонија.

– Здравствениот сектор е екосистем што се соочува со сериозен недостиг на медицински сестри, технички кадар и лекари. Ние не можеме да го планираме буџетот врз основа на минатото, туку според реалните потреби. Во моментов го изработивме првиот нацрт-скен на состојбата и имаме две сценарија: институции со сериозен недостиг и институции со повеќе кадар отколку што е потребно – рече министерот Алиу.

Министерството подготвува внатрешна реорганизација за балансирање на медицинскиот кадар во согласност со потребите, како и за зголемување на транспарентноста и ефикасноста на услугите, додаде тој.

– Ќе има реорганизација на услугите и на кадарот. Ќе биде потребно време, но целта е здравството да стане поквалитетно и потранспарентно. Со дигитализацијата како трета столбна точка на реформата, граѓаните ќе имаат пристап до информации во реално време за секоја услуга и процес, вклучително и за случаите кога има доцнења или пречки – рече министерот Алиу.

The post ЌЕ ИМА ВРАБОТУВАЊА ВО ЗДРАВСТВОТО И ПРЕРАСПРЕДЕЛБА НА ЛЕКАРИТЕ И НА СЕСТРИТЕ Има болници со повеќе кадар и болници со недостиг на персонал, вели Алиу appeared first on plusinfo.mk.

Во рок од 45 дена и за рекордно време се реализирани повеќе од 1.250 вработувања во 85 јавни здравствени установи низ државата, како дел од стратешкиот процес на кадровско зајакнување на здравствениот систем, соопшти Министерството за здравство.

До овој момент, во рамките на процесот се спроведени над 1.700 тестирања.

– Ова е значајно и историско зајакнување на кадарот во рекордно време во здравствениот сектор – дополнителна мотивација, конечно решен статус на сите овие лица кои со години немаа сигурност, здравствено осигурување, формален работен однос и беа под континуиран стрес. Сега, со овој чекор, добија достоинствено место во системот – рече министерот Азир Алиу.

Со оваа кадровска стабилизација, Министерството за здравство испраќа силна порака за континуирана грижа и вложување во човечкиот капитал, како предуслов за подобри здравствени услуги за сите граѓани, се додава во соопштението од Здравство.

The post ЗА 45 ДЕНА 1.250 НОВИ ВРАБОТУВАЊА ВО ЗДРАВСТВОТО Министерот Алиу се пофали дека се решава статусот на ангажираните appeared first on plusinfo.mk.