Клиничката болница во Штип е во завршна фаза со огласот за вработување на 18 лица, но неговата реализација ќе почека до завршување на локалните избори. Директорот на болницата, Владко Захариев, денеска изјави дека е донесена одлуката за новите вработувања, но Државната комисија за спречување на корупцијата (ДКСК) не дозволува потпишување на решенијата во текот на изборниот период.

– Процедурата за огласот со 18 вработувања е завршена, интервјуата се направени, одлуката е донесена, периодот за жалби помина, но останува да почекаме завршување на изборите за да може да се потпишат решенијата – изјави Захариев.

Тој најави дека е во тек уште еден оглас кој ќе овозможи нови 25 вработувања, главно во техничкиот и помошниот персонал, каде што болницата има најголем недостаток.

– Во Министерството за финансии веќе е испратена процедура за 25 вработувања. Акцентот е ставен на болничари, чистачки, технички персонал и медицински сестри – додаде Захариев.

Директорот најави дека до крајот на оваа година треба да биде распишан и трет оглас, со што се очекува почетокот на 2026 година Клиничката болница во Штип да ја дочека со подобра кадровска состојба.

– Недостаток на персонал има на сите одделенија. Но, со овие огласи очекувам дека 2026 ќе ја почнеме со подобра кондиција – оптимистички истакна Захариев.

Проблемот со недостиг на кадар во болницата трае со години, бидејќи дел од лекарите заминуваат во приватното здравство, а постапките за нови вработувања се долги. Со последните активности се прават напори да се стабилизира бројот на лекари и технички персонал и да се обезбедат подобри услови за пациентите.

The post ЗАХАРИЕВ ВЕТУВА НОВИ ВРАБОТУВАЊА До крајот на 2025 уште два огласи за Клиничката болница Штип appeared first on plusinfo.mk.

Во рекордно време реализиравме повеќе од 1.250 вработувања во 85 јавни здравствени установи низ државата, како дел од стратешкиот процес на кадровско зајакнување на здравствениот систем изјави Министерот за здравство, Азир Алиу во обраќањето на отворањето на 27. Синдикална школа на Самостојниот синдикат за здравство.

– Паралелно го спроведуваме и процесот за вработување на приватните специјализанти, со кој решаваме децениски егзистенцијален проблем на оваа категорија здравствени работници. Самостојниот синдикат за здравство, фармација и социјална заштита е наш партнер со кој со заеднички заложби работиме на унапредување на статусот на секој здравствен работник во државата – рече Алиу.

Тој додаде дека Владата реализира значајно зголемување на платите на  здравствените работници, и тоа во износ од 4.815 денари нето за сите здравствени работници, а за медицинските сестри ова зголемување изнесува дури 6.200 денари.

Заменик министерот Јовица Андовски во своето обраќање посочи дека Министерството за здравство е отворено за соработка со синдикатот.

– Го почитуваме достоинството на докторите и целиот персонал кои се чувари на здравјето на граѓаните. Министерството за здравство е отворено за соработка со синдикатот и заеднички продолжуваме да ги решаваме сите отворени прашања и предизвици, со цел да излезаме во пресрет на здравствените работници и секако на пациентите – рече Андовски.

The post ПОВЕЌЕ ОД 1.250 ВРАБОТУВАЊА ВО ЗДРАВСТВОТО Алиу вели дека здравствените работници добиле и повисоки плати appeared first on plusinfo.mk.