„На Блерим Ќосето Беџети сите дела му излегуваат на мегдан! Срамот почна да го обзема, а сега се обидува да го прикрие она што не може да го прикрие, со изговори и со алиби. Се обидува да се дистанцира, но неговите вистини излегуваат на виделина! Албанските граѓани очекуваат ДУИ да одговори, не со алиби, туку со факти“, соопшти денеска коалицијата Вреди.

• БЕЏЕТИ ЈА НЕГИРА СРЕДБАТА ЗА ВРАЌАЊЕ НА ГРУЕВСКИ Пратеникот не добил снимки, бара јавно извинување од медиумите

Ова дистанцирање на Беџети е промашен театар, се додава во соопштението, и изговор за прикривање на една срамна приказна поврзана со враќањето на Никола Груевски.

„Али, не молчи, излези и кажи им на граѓаните кои биле причините што те поттикнале да се вклучиш со целото твое битие, и со целата уморна екипа што ја водиш, само за да го вратиш пријателот Греувски во Скопје. Потсетуваме и на јавната изјава на поранешниот претседател Пендаровски дека некои политички експоненти го консултирале за можната амнестија на Груевски. А одговорот кои се тие експоненти може да го даде само Али Ахмети“, соопшти Вреди.

Коалицијата најавува дека ќе продолѓи јавно да ги прашува ДУИ и Али Ахмети од каде им е носталгијата за Груевски и што ги спојува.

„Албанците му веруваа на Али, тој ја злоупотреби оваа доверба и затоа беше казнет. Но, оваа казна не треба да помине само на тоа што е во опозиција. Сè уште талкајќи во дијаспората, на Албанците им должи краток и јасен одговор, што би добиле Албанците доколку Груевски се врати во земјава? Али, немој да се двоумите и не се плашете, бидејќи немате што повеќе да изгубите!“, соопшти владејачката коалиција.

The post ДИСТАНЦИРАЊЕТО НА БЕЏЕТИ Е ПРОМАШЕН ТЕАТАР Вреди инсистира Ахмети да одговори што би добиле Албанците со враќањето на Груевски appeared first on plusinfo.mk.

Редно е македонската јавност да слушне објаснувања, а веројатно и извинувања, од актерите на една многу грда приказна од нашата понова политичка историја, за која до скоро се шепотеше со половина уста, но сега веќе се зборува отворено и јавно. Во едно цивилизирано и демократско општество, какво што Македонија сака да биде, ваквите скандали мора да завршуваат со преземање морална, политичка, а кога е тоа неопходно и – законска одговорност.

Станува збор за тајната средба кај претседателот Стево Пендаровски, одржана во март 2023 година, на која шефот на државата, тогашниот премиер Димитар Ковачевски, Али Ахмети, Артан Груби, Бујар Османи и Бојан Маричиќ договарале како да го вратат осудениот и избеган поранешен премиер Никола Груевски од Унгарија во Македонија. Во својата последна објава, неделникот „Фокус“ ги именува и двајцата моќни западни амбасадори кои биле на средбата – американската амбасадорка Анџела Агелер и тогашниот амбасадор на Европската унија, Дејвид Гир.

Кога молкот зборуваше посилно од штурите изјави…

Јас за оваа средба прв пат пишував на 16 мај 2023 година:

„Наводно, кон крајот на април, за време на прославите на деновите на НАТО, на една средба ‘од нога’ меѓу луѓе од државниот врв, на претседателот Стево Пендаровски му било предложено да размисли за можноста Никола Груевски и некои други лица да бидат ‘амнестирани’, што би ‘помогнало’ во обезбедувањето на потребните гласови од пратеничката група на ВМРО-ДПМНЕ за изгласување на уставните измени“.

Во тој текст не ги соопштив имињата на другите присутни на средбата (одржана сепак во март, а не во април 2023 година), бидејќи немав потврда. Но, интересно е дека тогаш побарав и веднаш добив изјава од Груевски, кој рече:

„Немам информации за некакви притисоци било кому, ниту од некого сум барал такво нешто. Не се подготвувам за враќање во Македонија, од причина што политичкиот прогон на власта сѐ уште трае со ист интензитет како пред околу шест години. Никој не барал од мене да ослабнам нечии позиции за било кое прашање, ниту би прифатил некој да води таков тип на дискусија со мене“.

НИКОЈ НЕ БАРАЛ ОД ГРУЕВСКИ ДА ГО СКРШИ ОТПОРОТ НА ВМРО-ДПМНЕ ПРОТИВ УСТАВНИТЕ ИЗМЕНИ „Не би прифатил некој да води таков тип дискусија со мене“, вели поранешниот премиер

Освен партијата ДУИ, сите други лица инволвирани во оваа средба и во поширокиот план за враќање на Груевски во Македонија, тогаш ја одмолчаа оваа информација. Јас се повикав на неименувани извори, кои тврдеа дека Пендаровски енергично ја одбил таквата можност.

Втор пат за оваа средба пишував во напис во Плусинфо за битката на Зоран Заев со раководството на СДСМ. Написот беше објавен на 7 ноември 2023 година и во него, меѓу другото, се вели:

„Реакцијата на Заев несомнено значително ја ‘поскапела’ операцијата за враќање на Никола Груевски во земјата. Особено што таа доаѓа после еден сериозен гаф на првата неформална средба на која лидерот на ДУИ, Али Ахмети, пред претседателот Стево Пендаровски, пред премиерот Ковачевски и пред други лица и ја промовирал својата иницијатива за амнестија на Груевски и за негово враќање во земјата. Се зборува дека деталите од таа средба, на која присуствувале и двајца влијателни амбасадори на земји од Запад, протекле во политичките кулоари на еден несекојдневен и скандалозен начин. За своите сознанија за тој гаф, Плусинфо ќе ја извести јавноста кога ќе ги потврди деталите“.

„БЕРЕТЕ УМ, ЌЕ МУ КАЖАМ НА НАРОДОТ ШТО ПРАВИТЕ!“ Плусинфо ексклузивно открива детали за разговорите на Заев со Ковачевски и со Зечевиќ за планот за враќање на Груевски

„Фокус“ ги откри имињата на двајцата западни амбасадори

Капак на ова стави неделникот „Фокус“, во статија, во која, меѓу другото, се вели:

„На оваа средба, одржана лани во март, присуствувале Стево Пендаровски, Димитар Ковачевски, Али Ахмети, Бојан Маричиќ, Артан Груби, Бујар Османи, Анџела Агелер и Дејвид Гир. Притоа, Ахмети посочил дека Груевски може да се врати на два начина – преку помилување од претседателот или преку судовите. Всушност, ова бил најсензитивниот дел на средбата, кој бил пробиен од страна на рамковно вработен административец. Додека траеле ‘тајните’ разговори, ова лице влегло во кабина на преведувач, успеало да го сними разговорот со телефон и на крајот снимката му ја предава на Блерим Беџети, кој тогаш е дел од ‘огнената група’ во ДУИ. На тој начин, содржината од аудио-снимката, претходно симната на хартија, завршува во раце на Христијан Мицкоски, бидејќи во тоа време ‘огнените’ се во конфликт со Груби, Османи, па и со Ахмети. Откако Пендаровски одбива да го помилува Груевски, а Ковачевски на средба со Ентони Блинкен во САД вели дека без нивна помош не може да се истуркаат уставните измени, од амбасадата на САД излегува нон-пејпер, кој, меѓу другото, предвидува активирање делови од поранешното раководство на ВМРО-ДПМНЕ. Иако не бил конкретно споменат, очигледно се алудирало на Груевски, поради кој практично се донесени измените на Кривичниот законик, со цел да се охрабри да почне да дејствува уште од Будимпешта. Меѓутоа, тој барал целосно чиста ситуација за да може да се врати во земјава, по што ДУИ почнува да ја турка амнестијата на Ѓорге Иванов преку Врховниот суд. Сепак, интегративците прават лоша проценка дека ќе придобијат доволен број врховни судии, па целата работа почнува да се компликува и да излегува од контрола и на крајот операцијата пропаѓа, а своја улога и придонес за тоа имале и Зоран Заев и Виктор Орбан…“

Присутните на средбата да дозволат да го видиме транскриптот

Што можеме да заклучиме од сите овие написи? Најмалку пет работи:

Прво, познати се имињата на сите учесници на средбата на која се разговарало за можното помилување или амнестија на Груевски и за неговото враќање во земјата. Никој од спомнатите досега не демантирал дека бил на средбата.

Второ, јавно се соопштени имињата на двајцата моќни западни амбасадори – Анџела Агелер и Дејвид Гир – кои биле на средбата.

Трето, поголем дел од актерите молчат за тоа што било кажано на средбата и за поширокиот план за враќање на Груевски во земјата. Ако не се огласат, јавноста молкот ќе го прифати како потврда на шпекулациите.

Четврто, неспорно е дека постоела скандалозна идеја за враќање на Груевски во земјата, со цел да се поткопаат позициите на ВМРО-ДПМНЕ, не само заради уставните измени, туку и поради очекуваниот триумф на Христијан Мицкоски на претстојните избори.

И петто, постојат снимка и транскрипт од оваа средба.

Како да се затвори скандалот?

Ова го очекувам од домашните актери на скандалот:

Прво, предлагам сите присутни на средбата со посебни изјави да одобрат снимката и транскриптот јавно да се објават. Јавниот интерес во овој случај е неспорен.

Второ, очекувам тогашниот претседател Пендаровски, како домаќин на средбата, значи во ролјата која носела посебна одговорност, јавно и детално да објасни за што се разговарало, да го потврди списокот на присутните и да соопшти која била неговата позиција.

Трето, очекувам тогашниот премиер Димитар Ковачевски да објасни која била неговата позиција на таа средба и дали е вистина тврдењето дека од Блинкен барал американска помош за да се протуркаат уставните промени.

Посебни прашања за амбасадорите Агелер и Гир

Посебни прашања имам и за актуелната американска амбасадорка на САД Анџела Агелер и за тогашниот амбасадор на ЕУ, Дејвид Гир:

Прво, би сакал објаснување врз основа на кои делови од Виенската конвенција за дипломатски односи, клучен документ за дипломатското право, амбасадорите Агелер и Гир биле присутни и учествувале на средба на која се договарала една таква скандалозна операција поврзана со внатрешните политички односи во Македонија.

Второ, би сакал амбасадорката Агелер и амбасадорот Гир јавно да соопштат какви биле нивните ставови за идејата за амнестија или за помилување на Груевски заради негово враќање во Македонија.

И трето, би сакал да слушнам коментар, посебно од амбасадорката Агелер – во која нормална демократска земја, членка на НАТО и кандидатка за членство во Европската унија, е дозволено локални политичари, заедно со водечки амбасадори, да разговараат за спроведување на своевиден политички пуч, заради промена на Уставот и заради слабеење на опозицијата?

Јавноста има право да знае!

Нека биде транспарентно!

The post До кога ќе молчат Пендаровски, Ковачевски, Агелер и Гир за средбата на која се договарало враќање на Груевски во земјата? appeared first on plusinfo.mk.

„Поминаа четири дена откако јавноста беше потресена од шокантните откритија за ДУИ и нејзината разбиена клика. Што прават тие? Молчат! Планот за враќање на Никола Груевски, оркестриран од високи експоненти на ДУИ, е нож во грб на Албанците. Вие, кому Албанците му веруваа, работевте скришно да го вратите нивниот најголем непријател. Зошто? За да ја зачувате вашата скапана моќ!“, соопшти владејаќката коалиција Вреди.

За враќање на Груевски и за амнестија, се додава во соопштението, беа искористени тајните средби, притисокот врз институциите и вмешаноста на високи функционери.

• НА ТАЈНА, НО СНИМЕНА СРЕДБА КАЈ ПЕНДАРОВСКИ СЕ ДОГОВАРАЛО ВРАЌАЊЕТО НА ГРУЕВСКИ Блерим Беџети ја снимал заверата помеѓу експретседателот, Ковачевски, Маричиќ, Ахмети, Груби и Османи, обвини Вреди

„Но, овој срамен план пропадна и сега Албанците бараат одговори. Вреди нема да молчи. Од Скопје му велиме на Али Ахмети, немој да се криеш во Швајцарија, туку врати се и дај отчет. Зошто сета оваа љубов кон Груевски? Што имаш ти со тоа? Какви пазарења направивте и што се обидувате да скриете од Албанците?“, прашува Вреди.

Правдата доаѓа, а вашите игри завршија, порачува коалицијата.

„Албанскиот народ повеќе нема да се манипулира. Ќе се разоткријат лаги, манипулации и тајни зделки. Албанците ја заслужуваат вистината и ќе ја добијат. Дојде време за одговорност!“, се вели во соопштението.

И вчера на прес-конференција Дритон Суљејмани од Вреди повтори дека за враќање на поранешниот премиер Груевски лани во март во Вила Водно се сретнале експретседателот Стево Пендаровски, експремиерот Димитар Ковачевски, како и Али Ахмети, Бојан Маричиќ, Артан Груби и Бујар Османи.

– На таа средба Ахмети нагласил дека истиот може да се врати на два начини – преку помилување од претседателот на државата или преку нивните луѓе во судовите, како што рекол Ахмети. Сега се обидуваат да го покријат нивниот неуспешен план, но ние ќе зборуваме гласно додека секој граѓанин, каде и да живее, не ја разбира горчливата вистина што се крие зад амблемот на оваа партија – рече Суљејмани.

Тој додаде дека Ахмети и ДУИ за да го спроведат планот за ослободување на Груевски вршеа силен притисок врз Врховниот суд, но  наидоа на отпоро од претседателката Беса Адеми, против која подоцна беше покрената иницијатива за разрешување.

– Вреди веќе два дена јавно го прашува ДУИ и Али Ахмети зошто сета ова носталгија за Никола? Али не молчи. Излези и кажи им на Албанците какви случаи си планирал да монтираш заедно со Груевски – рече Суљејмани.

The post АЛИ, НЕ СЕ КРИЈ ВО ШВАЈЦАРИЈА, ДАЈ ОТЧЕТ ЗОШТО ЌЕ ГО ВРАЌАШЕ ГРУЕВСКИ Ќе се откријат лаги, манипулации и тајни зделки, најавува Вреди appeared first on plusinfo.mk.

„Опиена од 20 години власт и заслепена од арогантното однесување, ДУИ го избра молкот пред вистината. Јавноста деновиве дозна шокантни детали за тоа како оваа партија преку свои експоненти, како во холивудско филмско сценарио, го оркестрирала сензационалното враќање на поранешниот премиер Никола Груевски во Скопје. Во месецот на албанските празници, кога треба да го славиме нашето единство и достигнувањата, избива скандал кој покажува дека оваа партија, која се нарекува албанска партија, тивко работела за враќање на теророт на државата и на Албанците – Груевски“, соопшти Вреди.

Овој план не успеа, се додава, но мрачните намери на ДУИ не треба да останат прикриени.

„Во шокантните детали за операцијата за враќање на поранешниот премиер Никола Груевски во Северна Македонија, вмешани се група шверцери, предводени од претседателот на партијата Али Груевски Ахмети, поранешниот вицепремиер Артан Казиномани Груби и поранешниот министер за надворешни работи Бујар Пациентот. Османи, кој додека беше министер се сретна со Груевски во Будимпешта. Во Вила Водно имаше средба за враќање на Груевски. На оваа средба, што се одржа во март, учествуваа Стево Пендаровски, Димитар Ковачевски, Али Ахмети, Бојан Маричиќ, Артан Груби, Бујар Османи“, обвини Вреди.

Според коалицијата, Ахмети на состанокот рекол дека има два начина да се врати Гревски.

„Али, кој има толкава носталгија за Никола Груевски, кој толку многу им нанел зло на Албанците, нагласи дека овој може да се врати на два начина, преку помилување од претседателот и преку „нашите луѓе“ во судовите. Сепак, ова беше најпозитивниот дел од средбата, која ја сними вработен во администрацијата. Тој успеа да го сними разговорот на телефон од кабината на преведувачот, а на крајот снимката му ја предаде на Блерим Ќосето Беџети“, открива Вреди.

Ахмети и ДУИ, се додава во соопштението, за да го спроведат својот план за ослободување на Груевски, вршеа силен притисок врз Врховниот суд.

„Но, тука наидоа на неволност на претседателката на овој суд, Беса Адеми, против која подоцна беше покрената иницијатива за разрешување, како резултат на неслушање на наредбите. Потсетуваме дека тогаш холандскиот амбасадор го посети Али Груевски во Мала Речица, каде го предупредил дека тој и неговата партија треба да се откажат од судовите и да престанат со притисоците. Потсетуваме и дека измените на Кривичниот законик што ги спроведе ДУИ беа донесени за да се активира од Будимпешта“, се вели во соопштението.

Вреди јавно ги прашува ДУИ и Ахмети зошто ја имаат „сета оваа носталгија за Никола“.

„Што ве спојува? Бевте ли уценети од Блерим Ќосето Беџети, кој ја сними тајната средба во Вила Водно, да ги вратите на сцената заедно со Муса Џафери, поставајќи како носители на листа за пратеници? Ваквиот пристап на Али Груевски кон Никола и покрај неговата антиалбанска политика нè натера да заклучиме дека е лесно да се врати Груевски и да се амнестира, затоа што неговите дела веројатно не се само негови, туку во соработка со злото на Албанците ДУИ. Вреди работи, Вреди демаскира, Вреди е надеж за светла иднина!“, соопшти владејачката коалиција Вреди.

The post НА ТАЈНА, НО СНИМЕНА СРЕДБА КАЈ ПЕНДАРОВСКИ СЕ ДОГОВАРАЛО ВРАЌАЊЕТО НА ГРУЕВСКИ Блерим Беџети ја снимал заверата помеѓу експретседателот, Ковачевски, Маричиќ, Ахмети, Груби и Османи, обвини Вреди appeared first on plusinfo.mk.

Операцијата ја води водството на ДУИ, на чело со Али Ахмети, но во согласност со челниците на СДСМ. Идејата, наводно, е Груевски, откако експресно ќе се врати во земјата, да оформи политичка фракција во ВМРО-ДПМНЕ и да го намали резултатот на најмоќната опозициска партија на следните парламентарни избори. Ова во ситуација кога сега, на неколку месеци пред изборите, сите анкети покажуваат убедливо водство на ВМРО-ДПМНЕ пред СДСМ.

Засега не е познато дали и Груевски активно учествува во оваа операција и дали се согласил со својата ролја на човек што ќе го симне својот наследник Христијан Мицкоски од тронот во ВМРО-ДПМНЕ. Но, неспорно е дека иницијативата на адвокатот Миле Наумовски од Скопје до Врховниот суд, во која тој бара Судот да утврди начелен став и начелно правно мислење за дадените помилувања од страна на поранешниот претседател Иванов, оди во прилог на бегалецот во Будимпешта.

Врховната судијка Беса Адеми јавно сведочи за политички притисоци

Врховниот суд има рок од шест месеци да расправа за иницијативата на адвокатот Наумовски, но притисоците врз Судот почнале веднаш по поднесувањето на иницијативата. Во интервју за порталот СДК, Беса Адеми, претседателката на Уставниот суд, јавно сведочи за тоа:

„Врховниот суд е под страшен политички притисок, како знае и умее да ја оживее амнестијата на Ѓорге Иванов врз непостоечки член, за да се спаси Никола Груевски, кој со измените на Кривичниот законик не е доослободен комплетно. Им треба на некои партии да дојде тука за предизборни математики, а ослободувањето може да се случи само со начелен став од Врховниот суд, од кого се бара да си го погази зборот и да порекне дека аболицијата на Иванов била незаконска“, изјави таа во интервјуто, кое предизвика голема нервоза кај авторите на планот за враќање на Груевски.

Плусинфо неофицијално дознава дека судијката Адеми се пожалила на политички притисоци и кај некои амбасадори на западни земји, по што американската амбасадорка Анџела Агелер го посети Врховниот суд и на врховните судии им даде поддршка да судат слободно, според Уставот и според законите. И додека посматрачите се обидуваа да протолкуваат што сакала да каже амбасадорката Агелер, Судскиот совет ја повика судијката Адеми на состанок, за да ги „објаснела“ своите изјави. Но, таа писмено го отфрли барањето на Судскиот совет да се појави на „сослушување“ во понеделникот на 6 ноември, објаснувајќи дека „написите за состојбите во судството, вклучително и написите за потенцијални или присутни влијанија, треба да се вреднуваат како суштински придонес за независноста на судството“.

Кој ја охрабрил судијката Беса Адеми вака да одговори на притисоците? Амбасадорката Агелер или можеби и некој друг?

Има ли Заев „лични интереси“ да го осуети планот за враќање на Груевски?

Добро упатен извор, близок до една од владејачките партии, на своја иницијатива, во саботата го информираше Плусинфо за очекувањето на актерите на планот на ДУИ судијката Беса Адеми да потклекне на „сослушувањето“ во Судскиот совет. Изворот тврди дека меѓународниот фактор е согласен со овој план и дека единствениот што се обидува да го минира е поранешниот премиер Заев.

„Заев тоа го прави за да ги заштити своите лични политички и бизнис интереси  и да го држи СДСМ под контрола. Тој е во комуникација со лидерот на опозицијата Мицкоски и заедно работат против иницијативата на ДУИ“, тврди нашиот извор.

Според него, Заев им се јавувал на водечки луѓе на Бихаќка и бурно реагирал на идејата за оживувањето на аболицијата на Иванов. Изворот вели дека во разговор со своите сопартијци, Заев дури и се заканувал со жесток отпор и со преземање на група од 15 пратеници на СДСМ, кои наводно се под негова контрола.

„Подгответе ми ја салата на Бихаќка, ќе одржам прес-конференција“, се заканил Заев

Плусинфо од прва рака ги провери овие наводи. Извор од СДСМ потврди дека Зоран Заев водел разговори со претседателот Димитар Ковачевски и со генералниот секретар Миле Зечевиќ. Во тие разговори Заев настапил директно и остро, обидувајќи се да им објасни дека СДСМ дошол на власт со јавното споделување на нелегалните снимки од серијалот „Вистината за Македонија“ и со жестоко спротивставување на аболицијата на претседателот Иванов.

„Со нему својствениот речник, Заев отворено и директно го прашал Ковачевски дали е свесен што прави одобрувајќи ги притисоците врз врховни судии да ја оживеат аболицијата заради враќање на Никола Груевски во земјата. Ковачевски се обидел пред Заев да се огради од таа операција, одговарајќи дека таа работа ја води ДУИ и дека СДСМ нема никаква врска со тоа“, вели нашиот извор од СДСМ.

Незадоволен од развојот на настаните, поранешниот лидер Заев разговарал и со генералниот секретар Зечевиќ.

„Во тој разговор, Заев отишол до таму што во својство на почесен претседател на партијата ја побарал салата во седиштето на СДСМ на Бихаќка за одржување прес-конференции, изразувајќи намера да одржи прес-конференција на која би ја известил јавноста што се случува. Зечевиќ реагирал вознемирено на овие најави, но не му дал на Заев конкретни одговори за тоа што се случува на Бихаќка“, вели изворот од СДСМ.

Заев нема мирно да гледа како ДУИ ја презема политичката контрола врз СДСМ

Во разговорите со Ковачевски и со Зечевиќ, поранешниот претседател Зоран Заев недвосмислено кажал дека има намера да го извести народот за планот за оживување на аболицијата и за враќање на Груевски во земјата.

„Верувајте ми, ако тоа се случи, ќе има народ на улиците. Јас ја предводев Шарената револуција и ако треба пак ќе го предводам народот да протестира против ова што го правите“, рекол Заев.

Што се однесува до тврдењата дека тој се заканувал дека контролира 15 пратеници, изворот од СДСМ тврди дека Заев во повеќе прилики јасно рекол дека нема да работи против својата партија, дека нема да контролира пратеници и дека ако има потреба да зема, ќе ги земе сите 45, а не само 15 пратеници.

„Тој е цврсто решен да истрае во оваа битка и смета дека неговите ставови се принципиелни. Јас сум убеден дека раководството на СДСМ во иднина треба да има на ум дека Заев нема мирно и од страна да гледа како раководството на неговата партија ги жртвува целите на досегашната борба и принципите, соработувајќи во иницијативите со кои ДУИ сака да оствари политичка контрола врз СДСМ и целосна власт во земјата“, вели изворот од СДСМ.

Голем срам е Груевски да го спасува СДСМ од пораз на изборите

Реакцијата на Заев несомнено значително ја „поскапела“ операцијата за враќање на Никола Груевски во земјата. Особено што таа доаѓа после еден сериозен гаф на првата неформална средба на која лидерот на ДУИ, Али Ахмети, пред претседателот Стево Пендаровски, пред премиерот Ковачевски и пред други лица и ја промовирал својата иницијатива за амнестија на Груевски и за негово враќање во земјата. Се зборува дека деталите од таа средба, на која присуствувале и двајца влијателни амбасадори на земји од Запад, протекле во политичките кулоари на еден несекојдневен и скандалозен начин. За своите сознанија за тој гаф, Плусинфо ќе ја извести јавноста кога ќе ги потврди деталите.

Но, реакциите во јавноста по протекувањето на првичните информации, како и сето она што се случуваше во последните неколку недели и месеци, вклучувајќи ги и вчерашните настани, веќе јасно покажуваат дека операцијата за враќање на Груевски во Македонија сега е задоцнета, во овој момент правно речиси неизводлива, политички прескапа и без поддршка од меѓународниот фактор.

„ДУИ го прави ова затоа што проценува дека може да спечали, а при тоа нема што да изгуби. Но, тоа не важи и за СДСМ. На клучни позиции и во пратеничката група на СДСМ и во Владата се луѓе кои во политиката растеа во  времето на Отпорот и на Шарената револуција, се хранеа со жестока критика врз Никола Груевски и неговата екипа и се надеваа на правда и мир. Тие луѓе не можат да ја одобрат иницијативата на ДУИ. Тоа што Ковачевски и Зечевиќ пред Заев се оградуваат од плановите на Ахмети за тие луѓе не е доволна сатисфакција. Едноставно, за нив е голем срам Груевски да го спасува СДСМ од пораз на изборите. Мислам дека Заев има многу знајни и незнајни сојузници во својот обид да ја осуети и до крај да ја растури таа операција“, тврди нашиот извор од СДСМ.

The post „БЕРЕТЕ УМ, ЌЕ МУ КАЖАМ НА НАРОДОТ ШТО ПРАВИТЕ!“ Плусинфо ексклузивно открива детали за разговорите на Заев со Ковачевски и со Зечевиќ за планот за враќање на Груевски appeared first on plusinfo.mk.