Видливоста на одредени патни делници низ државата е значително намалена, а коловозите се влажни, што го отежнува утринскиот сообраќај. Маглата локално ја спушта видливоста и до околу 70 метри.

Условите за возење се дополнително отежнати на планинските превои, во клисурите и на делниците каде што постои ризик од одрони. Надлежните укажуваат дека ваквите појави бараат зголемено внимание зад воланот.

Автомотосојузот на Македонија повика возачите да ја приспособат брзината на движење кон состојбата на патот, да одржуваат поголемо безбедно растојание и да користат светла за магла таму каде што е потребно.

Лизгавите коловози претставуваат дополнителен ризик, особено во утринските и вечерните часови кога температурите се пониски. Од тие причини, се препорачува редовна проверка на состојбата на патиштата пред подолги патувања и следење на официјалните сообраќајни информации.

The post ВИДЛИВОСТ ДО 70 МЕТРИ, МОКРИ ПАТИШТА И ОДРОНИ Претпазливо на патиштата, апелира АМСМ appeared first on plusinfo.mk.

Деветнаесетгодишна девојка од Радовиш е приведена утрово, откако под дејство на алкохол предизвикала сообраќајна несреќа, а потоа го напуштила местото на инцидентот. Информацијата ја потврди Министерството за внатрешни работи.

Како што информираат од СВР Струмица, на 29 јуни 2025 година во 06:30 часот на улицата Самоилова во Радовиш, полициски службеници од ОВР Радовиш ја лишиле од слобода Т.К. (19) од Радовиш.

– Лицето управувало моторно возило и предизвикало сообраќајна несреќа, по што го напуштило местото на настанот. По преземени мерки, било утврдено дека таа возела под дејство на алкохол, при што е измерена концентрација од 2,23 промили во крвта – велат од полицијата.

Од Министерството информираат дека Т.К. е задржана во Полициската станица Радовиш и дека по целосно документирање на случајот, против неа ќе биде поднесена кривична пријава по член 297-а од Кривичниот законик – „безобѕирно управување со моторно возило“.

The post ВОЗЕЛА СО 2,23 ПРОМИЛИ, ПРЕДИЗВИКАЛА НЕСРЕЌА И ПОБЕГНАЛА Полицијата привде 19-годишна радовишанка appeared first on plusinfo.mk.

Дваесетгодишен скопјанец е лишен од слобода откако бил фатен како управува товарно возило со повеќе од двојно поголема брзина од дозволената, на патот меѓу Прилеп и Крушево.

Како што соопшти МВР, инцидентот се случил на 18 јуни 2025 година, околу 10:00 часот, кај местото викано „Стопанство“. Полициските службеници од ОВР Крушево, при редовна сообраќајна контрола, го запреле возилото „дачиа“ со скопски регистарски ознаки, кое се движело со брзина од 121 километар на час на делница каде што максимално дозволената брзина е 50 км/ч.

– Возачот С.А. (20) од Скопје е приведен во полициска станица. По целосно документирање на случајот, против него ќе биде поднесена пријава по член 297-а од Кривичниот законик – за безобѕирно управување со моторно возило – соопшти МВР.

The post ВОЗЕЛ КАКО НА ФОРМУЛА ПА ЗАВРШИ ВО ПОЛИЦИЈА Скопјанец фатен со 121 км/ч каде што е дозволено 50, веднаш е приведен appeared first on plusinfo.mk.

60-годишниот Д.Б. од село Пискупштина бил приведен откако е затекнат како управува возило под дејство на алкохол на регионалниот пат Струга–Дебар, кај местото викано „Кореа“.

Настанот се случил на 10 јуни во 20:00 часот, кога полициски патролен тим запрел возило застава со струшки регистарски таблички. По извршената алкотест контрола, било утврдено дека возачот има дури 2,61 промили алкохол во крвта, што е далеку над дозволената граница.

„Возачот веднаш беше исклучен од сообраќајот и задржан во полициска станица. По целосно документирање на случајот, против него ќе биде поднесена кривична пријава за безобѕирно управување со моторно возило,“ информираат од СВР Охрид.

Случајот се води по член 297-а од Кривичниот законик, а полицијата апелира до граѓаните да не седнуваат зад волан под дејство на алкохол, бидејќи на тој начин директно го загрозуваат својот, но и животот на другите учесници во сообраќајот.

The post ВОЗАЧ СО 2,61 ПРОМИЛИ ФАТЕН ВО СТРУГА Седнал пијан зад волан и завршил зад решетки appeared first on plusinfo.mk.

Казни од 350 до 2.000 евра за употреба на мобилен телефон или за неносење кацига на мотор, намалување на дозволената брзина во населените места и зголемување на автопатите, казни од 2.000 до 8.000 евра за брзина од над 200 километри на час, меѓу другото, предвидуваат промените во законот за безбедност во сообраќајот, според алтернативниот министер за транспорт на Грција Константинос Киранакис, јави дописничката на МИА од Атина.

Во интервјуто за грчката телевизија „Скај“, Киранакис објасни дека измените се вклучени во законот што денеска се очекува да биде доставен до надлежната комисија во Парламентот.

Поконкретно, според алтернативниот министер, за користење мобилен телефон без притоа да се предизвика несреќа, предвидена е казна од 350 евра и одземање на возачката дозвола за 30 дена, доколку се работи за прво прекршување.

При второто, казната е 1.000 евра и одземање на дозволата за 180 дена, а доколку возачот биде фатен по трет пат да користи мобилен додека вози, ќе треба да плати 2.000 евра и една година ќе остане без возачка дозвола.

Слични казни се предвидени и за некористење кацига, како од возачите на мотори, така и од сопатникот.

Ограничувањето на брзината, како што објасни Киранакис, ќе се намали на 30 километри на час за тесни и мали улици во внатрешноста на населбите, на 50 километри на час за главни градски патишта, додека пак на автопатите ограничувањето ќе се зголеми на 140 км/ч.

Вечерните часови за време на викендите според Киранакис се регистрираат најголем број сообраќајни несреќи со смртни последици, а со измените во законот целта е да се елиминира антисоцијалното однесување при возење.

За недозволени трки на автомобили и брзина од над 200 км/ч, казните се од 2.000, 4.000 и 8.000 евра при првиот, вториот и третиот прекршок, заедно со одземање на возачката дозвола на една, две или четири години, во зависност дали е прв, втор или трет прекршок.

Во случај на несреќа со сериозни телесни повреди, се активира член од Кривичниот законик, што предвидува затворски казни до десет години.

За возење под дејство на алкохол и пречекорувањето на ограничувањата ќе донесе и отстранување на возилото со пајак.

Дополнително, за паркирање на место наменето за инвалиди, ќе се отстрануваат регистарските таблици од возилото на прекршителот, додека пак за велосипедистите ќе биде забрането да возат на улица.

Алтернативниот министер за транспорт на Грција нагласи дека статистиката покажува дека 50 отсто од смртните случаи во сообраќајни несреќи се поврзани со мотори, поголемиот дел од жртвите-пешаци се постари лица, а од сите сообраќајни несреќи, 94 проценти се предизвикани од возачи-мажи.

The post ПЕКОЛ ЗА ВОЗАЧИТЕ, КАЗНИ ОД 350 ДО 8.000 ЕВРА Грција ќе казнува немилосрдно со најстрогиот закон досега appeared first on plusinfo.mk.

Ако патувате до Грција ова лето и не ги почитувате правилата, подгответе се за високи казни. На патиштата има повеќе полицајци и камери, а првата е по Евзони пред исклучокот за Солун, рутата што често ја користат македонските туристи.

На веб-страницата Никана беа објавени казните во сообраќајот кои важат веќе 7 години според новиот закон.

Возење под дејство на алкохол: 78–1.200 евра

Брзо возење (до 20 км/ч над дозволеното): 100 евра

Црвено светло и претекнување на полна линија: 700 евра

Возење без појас: 350 евра

Неправилно паркирање: 40–80 евра

Користење мобилен телефон при возење: 100 евра

Пушење во возило со дете под 12 години: 1.500 евра и одземање возачка дозвола

За разлика од порано, во Грција повеќе не постои можност да ја платите казната во половина износ во рок од 10 дена. И не се надевајте дека ќе поминете неказнети – ако информацијата уште не стигнала до граничниот премин, тоа не значи дека сте „чисти“.

„Казната може да не ви биде пратена дома, но ќе ве чека при следен влез во земјата. Ако не е застарена, мора да ја платите. Постојат регистри во рамките на ЕУ и можно е да бидете казнети во која било земја“, пишува Никана.

Грција од 1 април воведен ново правило за тивки часови во летната сезона, со што попладневниот мир е од 15 до 17:30 часот, додека ноќниот е од 23 часот до 7 наутро. Правилото за тивки часови ќе трае до 30 септември.

Плусинфо веќе пишуваше и за дополнителната туристичка такса за престој, со цел да се заштити културното наследство и локалната инфраструктура од масовниот туризам.

The post ВНИМАНИЕ, СООБРАЌАЈНИТЕ КАЗНИ ВО ГРЦИЈА СЕ СОЛЕНИ Ако не платите, казната може да ве чека при следниот влез во земјата appeared first on plusinfo.mk.

Почнува сезоната на матурските прослави, а со неа и зголемениот ризик на улиците. Министерството за внатрешни работи испрати предупредување до младите матуранти и нивните родители – прославувајте, но не по цена на животот!

Според сообраќајната статистика, токму во деновите кога се слават матурските вечери значително се зголемува бројот на сообраќајни несреќи, а голем дел од жртвите се токму млади луѓе. Многу од нив се здобиваат со тешки повреди, а некои, за жал, го губат и животот.

„На матурска прослава без автомобил!“, „Без конзумирање алкохол!“, „Без користење наркотични средства!“, „Без нарушување на јавниот ред и мир!“ – се четирите силни пораки кои МВР ги упатува до матурантите, но и до нивните родители.

Од МВР потенцираат дека одговорноста за девијантното однесување не паѓа само на младите, туку и на нивните родители, кои честопати дозволуваат нивните деца да дојдат со сопствени возила, да консумираат алкохол или да бидат оставени без надзор.

„Грешките во сообраќајот може да бидат фатални“, велат од полицијата и повикуваат на одговорно и безбедно однесување.

Целта на апелот е јасна – матурската вечер да остане најубава ноќ за сеќавање, а не трагедија која ќе ги обележи животите на семејствата.

The post 📽️ НЕ ВОЗЕТЕ ПИЈАНИ И НЕ КОРИСТЕТЕ ДРОГА Полицијата со остра порака до матурантите appeared first on plusinfo.mk.

Во рамки на вчерашните активности на полициските службеници од сите осум сектори за внатрешни работи при БЈБ на МВР, во врска со засилените сообраќајни контроли за почитување на сообраќајните правила и прописи на патиштата низ државава, биле издадени 968 платни налози.

МВР денеска соопшти дека од нив, поради непочитување на пропишаната брзина на движење беа изречени 636 платни налози, а за неправилно паркирање 57. Санкционирани се и 29 прекршоци заради некористење сигурносен појас, а 11 за користење мобилен телефон.

– Вчера се откриени и санкционирани и 81 лице поради непоседување возачка дозвола, а 27 возачи управувале возило под дејство на алкохол. Согласно пак одредбите од Законот за возила – четири возила се исклучени од сообраќај заради техничка неисправност, а 21 возило затоа тоа што не биле со валидна регистрација, соопшти МВР.

Сообраќајните контроли продолжуваат и во наредните денови.

The post ДВЕ ТРЕТИНИ ОД ВОЗАЧИТЕ КАЗНЕТИ ЗА БРЗО ВОЗЕЊЕ Полицијата најавува уште поригорозни контроли appeared first on plusinfo.mk.

На регионалниот пат Тетово – село Јажинце, полициски службеници од Полициската станица за безбедност на патниот сообраќај Тетово лишиле од слобода 49-годишниот Н.Л. од Тетово, откако бил фатен како управува патничко моторно возило „Хонда“ со тетовски регистерски ознаки со брзина од 111 километри на час на место каде максималната дозволена брзина е 50 километри на час.

Од Министерството за внатрешни работи информираа дека лицето е задржано во полициска станица и против него ќе биде поднесен соодветен поднесок по член 297-а од Кривичниот законик за „безобѕирно управување со моторно возило“.

„Апелираме до сите учесници во сообраќајот да ги почитуваат сообраќајните правила и ограничувањата на брзината, со цел зголемување на безбедноста на сите патници“, соопштија од МВР.

The post ВОЗЕЛ СО 111 НАМЕСТО СО 50 КМ/Ч Приведен безобзирен возач во Тетово appeared first on plusinfo.mk.

Тројца возачи беа приведени по акција на полициските служби во Куманово и во Кратово, откако беа фатени како управуваат моторни возила под дејство на алкохол, соопшти Министерството за внатрешни работи. Сите три случаи се процесуираат и против лицата ќе бидат поднесени кривични пријави за безобѕирно управување со моторно возило.

Како што информираат од полицијата, на 27 април 2025 година, полициски службеници од Полициската станица за безбедност на патниот сообраќај Куманово го лишиле од слобода А.М. (38) од Куманово. При контрола на патниот сообраќај, било констатирано дека управувал патничко моторно возило „Цитроен“ со присуство на 1,56 промили алкохол во крвта.

„Возачот беше веднаш исклучен од сообраќај и приведен во полициска станица за понатамошна постапка“, соопштија од СВР Куманово.

Истата вечер, полициски службеници од Куманово го лишиле од слобода и А.Р. (49) од село Ваксинце, општина Липково. При контрола било утврдено дека управувал патничко возило „Опел“ со концентрација од 1,55 промили алкохол.

„Возачот бил исклучен од сообраќај веднаш по констатирање на нарушувањето и спроведен е во службените простории“, наведуваат од полицијата.

Во Кратово, полициските службеници го приведоа З.Л. (60) од село Страцин. Тој, при обид за полициска контрола, не застанал на даден знак за запирање и се обидел да побегне, но бил набргу сопрен. Извршената алкотест анализа покажала присуство на 2,28 промили алкохол во крвта.

„Возачот беше фатен за кратко време и против него се преземаат сите законски мерки“, истакнаа од Полициското одделение за безбедност на патниот сообраќај Кратово.

По целосно документирање на случаите, против тројцата возачи ќе бидат поднесени кривични пријави по член 297-А од Кривичниот законик за „безобѕирно управување со моторно возило“.

The post ФАТЕНИ ПИЈАНИ ЗАД ВОЛАНОТ Приведени тројца возачи во Куманово и во Кратово, еден се обидел да побегне appeared first on plusinfo.mk.