Лидерот на Врховниот политички совет на јеменското бунтовничко движење „Ансар Алах“ (Хути), Махди ал Машат, најави жестока одмазда против Израел по убиството на премиерот на хитистичката влада, Ахмед Галеб ал Рахави.

– Се колнеме пред Алах, јеменскиот народ и семејствата на загинатите дека ќе се одмаздиме и ќе го претвориме нашето страдање во победа. Нашите вооружени сили се во целосна борбена готовност – изјави Ал Машат за телевизијата „Ал Масира“.

Тој порача дека „одмаздата нема да трае долго“ и предупреди на „мрачни денови“ за Израел.

– Нашиот непријател никогаш повеќе нема да се чувствува безбедно. Бог е со нас, а победата е неизбежна – додаде тој, истакнувајќи дека цената на слободата е крв.

Ал Машат ги повика сите странски компании што работат во Израел да го напуштат пред, како што рече, „да биде предоцна“.

Неговата закана доаѓа по воздушниот напад на израелската армија врз јеменскиот главен град Сана, кој е под контрола на Хутите. Нападот се случил во четвртокот, токму за време на телевизиско обраќање на друг лидер на бунтовниците, Абдел Малик ал-Хути.

Според израелската армија, бил погоден воен објект на Хутите, а израелските медиуми јавуваат дека мета биле високи функционери на „Ансар Алах“, меѓу кои и министерот за одбрана и началникот на Генералштабот. Во акцијата, како што се тврди, биле извршени повеќе од десет воздушни напади.

The post „ЌЕ ПЛАТИТЕ ВИСОКА ЦЕНА ЗА АТЕНТАТОТ“ Хутите упатија сериозна закана кон Израел по убиството на премиерот ал Рахави appeared first on plusinfo.mk.