Американскиот претседател Доналд Трамп објави дека САД во понеделник наутро ќе ја почнат операцијата „Проект слобода“ за ослободување на бродовите заглавени во Ормускиот Теснец.

Тој ја опиша операцијата како „хуманитарен гест во име на Соединетите Американски Држави, земјите од Блискиот Исток, а особено земјата Иран“ чија единствена цел е да им помогне на неутралните земји кои не учествуваат во војната на САД и Израел против Иран.

Целта на операцијата, според Трамп, е ослободување на „жртвите на околностите“. Тој рече дека е потребна итност, бидејќи на многу бродови им снемува храна и други залихи, што го загрозува здравјето и хигиената на екипажите.

„За доброто на Иран, Блискиот Исток и на САД, им кажавме на овие земји дека безбедно ќе ги отстраниме нивните бродови од овој ограничен воден пат, за да можат слободно да продолжат со својот бизнис“, објави Трамп на социјалната мрежа Трут соушл.

Станува збор за бродови од земји кои не се вклучени во конфликтите на Блискиот Исток и кои побарале помош од САД, додаде Трамп.

„Доколку овој хуманитарен процес биде попречен на кој било начин, на таа опструкција, за жал, ќе мора да се одговори со сила. Ви благодарам за вашето внимание кон ова прашање“, објави Трамп.

Трамп, исто така, откри дека неговите претставници „водат многу позитивни разговори со Иран“, за кои се надева дека би можеле „да доведат до нешто многу позитивно за сите“.

Иранската војска се закани дека секоја странска војска што ќе се обиде да влезе во Ормус ќе биде нападната.

Шефот на обединетата команда на иранската армија Али Абдолахиги предупреди американските сили да не се приближуваат кон теснецот, велејќи дека ќе „одговорат жестоко“ на каква било закана.

Тој додаде дека трговските бродови и танкерите треба да се воздржат од движење ако не се во  координација со иранската војска.

– Постојано повторуваме дека безбедноста на Ормускиот Теснец е во наши раце и дека безбедното поминување на бродовите мора да биде координирано со вооружените сили. Предупредуваме дека секоја странска вооружена сила, особено агресивната американска војска, ќе биде нападната ако се обиде да се приближи и да влезе во теснецот – изјави Абдолахиги.

И шефот на комитетот за национална безбедност на иранскиот парламент, Ебрахим Азизи ги предупреди САД „да не се мешаат во ситуацијата во Ормускиот Теснец“.

„Секое мешање на САД во новиот поморски режим во теснецот ќе се смета за кршење на прекинот на огнот. Ормускиот Теснец и Персискиот Залив нема да бидат водени од најавите на Трамп кои немаат никаква врска со реалноста! Никој нема да верува во сценарија за префрлање на вината“, објави Азизи на социјалната мрежа Икс.

Американската операција „Проект слобода“ за ослободување на заглавените бродови ќе вклучува уништувачи со водени ракети, повеќе од 100 авиони, беспилотни мултидоменски системи и околу 15.000 војници, објави Централната команда на САД (CENTCOM).

– Нашата поддршка за оваа одбранбена мисија е клучна за регионалната безбедност и за глобалната економија, додека се одржувата поморска блокада – рече адмиралот Бред Купер, командант на CENTCOM.

Меѓународната поморска организација соопшти дека околу 20.000 морнари се заглавени на околу 2.000 бродови во Ормускиот Теснец од почетокот на американско-израелската војна против Иран, што почна на 28 февруари.

Бродовите вклучуваат танкери за нафта и за гас, товарни бродови, контејнерски бродови и туристички крстосувачи. Според организацијата, од почетокот на војната имаше најмалку 19 напади врз бродови во теснецот, при што загинаа најмалку 10 морнари, а 8 беа повредени.

Организацијата предупреди дека бродовите заглавени во Персискиот Залив остануваат без храна, гориво и без вода.

The post СО 100 АВИОНИ, БРОДОВИ, ДРОНОВИ И СО 15.000 ВОЈНИЦИ САД ЌЕ ГИ ОСЛОБОДУВААТ ЗАРОБЕНИТЕ БРОДОВИ ВО ОРМУС Почнува американската операција „Проект слобода“ appeared first on plusinfo.mk.