Американскиот претседател Доналд Трамп и израелскиот премиер Бенјамин Нетанјаху имале тензичен телефонски разговор околу натамошниот пристап кон Иран, објави Си-Ен-Ен, повикувајќи се на информации од „Аксиос“ и на „Волстрит џурнал“.

Разговорот открил сериозни разлики меѓу Вашингтон и Тел Авив околу тоа дали треба да продолжат нападите врз Иран или да ѝ се даде шанса на дипломатијата.

Според информациите, Трамп првично му соопштил на Нетанјаху дека САД размислуваат за нови целни удари врз Иран, во рамки на операција со кодно име „Операција Чекан“.

Но, само еден ден подоцна американскиот претседател ги стопирал нападите.

Заливските држави барале пауза

Според Си-Ен-Ен, одлуката за стопирање на ударите била донесена по барање на Катар, Саудиска Арабија и Обединетите Арапски Емирати.

Овие држави, заедно со пакистански посредници, се обидуваат да изградат рамка за нови разговори меѓу Вашингтон и Техеран.

– Во последните фази сме со Иран. Ќе видиме што ќе се случи – изјавил Трамп.

Тој додал дека или ќе има договор или ќе следуваат „непријатни потези“.

Нетанјаху барал продолжување на нападите

Израелскиот премиер, според извештаите, бил незадоволен од дипломатскиот пристап. Нетанјаху сметал дека секое одложување му оди во прилог на Иран.

За време на едночасовниот разговор тој наводно побарал продолжување на нападите и му порачал на Трамп дека паузата е грешка.

Но, американскиот претседател и натаму инсистирал на можност за дипломатско решение. На прашањето што му порачал на Нетанјаху, Трамп кратко одговорил:

– Тој ќе направи тоа што сакам да направи.

Иран и САД повторно разменуваат пораки

Во меѓувреме, Иран потврдил дека продолжуваат индиректните контакти со Вашингтон преку посредство на Пакистан.

Според портпаролот на иранското Министерство за надворешни работи, разговорите се водат врз основа на документ од 14 точки предложен од Техеран.

– Пораките се разменети во неколку наврати, ги добивме ставовите на американската страна и во моментов ги разгледуваме – изјавил портпаролот.

Сепак, според Си-Ен-Ен, клучните разлики остануваат. Прашањата за нуклеарната програма на Иран и замрзнатите средства сè уште не се решени.

Воената опција останува на маса

И покрај дипломатските напори, Трамп повторно предупредил дека воената опција не е исклучена.

– Ако не ги добиеме вистинските одговори, тоа ќе се случи многу брзо. Сите сме подготвени да продолжиме – изјавил американскиот претседател.

The post 📽️ „ЌЕ НАПРАВИ КАКО ШТО ЈАС ЌЕ МУ КАЖАМ!“ Трамп и Нетанјаху имале жесток разговор за Иран appeared first on plusinfo.mk.

САД и Израел привремено ги тргнале од списокот за ликвидација иранскиот министер за надворешни работи Абас Арагчи и претседателот на Парламентот Мохамед Бакер Калибаф.

Американскиот весник „Волстрит џурнал“ повикувајќи се на неименувани американски официјални лица, пишува дека одлуката била донесена во рамки на напорите за започнување мировни преговори меѓу Вашингтон и Техеран.

Според изворите на весникот, двајцата ирански функционери биле тргнати од листата на неколку дена, како сигнал за подготвеност на администрацијата на Доналд Трамп за дипломатски разговори.

Сепак, официјални лица запознаени со ситуацијата оценуваат дека шансите за успех на разговорите се мали, поради значителните разлики во позициите на САД и Иран.

Говорејќи на вечера за републиканските членови на Конгресот, Трамп истакна дека Техеран, според неговите сознанија, всушност сака да постигне договор, но дека преговарачите се плашат тоа отворено да го признаат.

– Тие преговараат и толку многу сакаат да постигнат договор. Но, се плашат тоа да го кажат, бидејќи мислат дека ќе бидат убиени од сопствениот народ – изјави Трамп пред присутните конгресмени.

The post АРАГЧИ И ВИСОК ФУНКЦИОНЕР ТРГНАТИ ОД ЦРНИОТ СПИСОК? Трамп испраќа порака дека сака да преговара appeared first on plusinfo.mk.

Американски „Волстрит Џурнал“ пишува дека претседателот на САД Доналд Трамп разгледува ограничен воен напад врз Иран. Целта не би била тотална војна, туку притисок за Техеран да прифати нов нуклеарен договор.

Изворите блиски до администрацијата на Трамп изјавиле дека првиот удар можел да се случи во следните денови. Според анализата, на удар би биле ограничен број воени и владини објекти на Иран.

Трамп постави рок од 10 дена за одлука.

– Можеби ќе треба да одиме чекор понатаму, но можеби и не, можеби ќе постигнеме договор. Веројатно ќе дознаете во следните 10 дена – изјавил претседателот во Вашингтон.

Во срцето на спорот стои иранската програма за збогатување ураниум. Трамп бара целосно запирање. Иран тоа го одбива.

Доколку Техеран не попушти, САД, според истите извори, се подготвени за поширока воена кампања. Таа би таргетирала клучни објекти на режимот. Аналитичари предупредуваат на ризик од регионална ескалација.

Плусинфо веќе пишуваше за анализите на американскиот портал Аксиос во кои се вели дека Израел се координира со САД за можно учество во евентуалниот конфликт кој, во тој случај, би траел и повеќе од 12-дневната војна меѓу Иран и Израел минатиот јуни.

• САБОТА Е ДЕН Д ЗА АМЕРИКАНСКИ НАПАД ВРЗ ИРАН? Овој пат војната може да трае повеќе од 12 дена

Администрацијата на САД официјално молчи. Но, дипломатските и воените канали бележат зголемена активност. „Волстрит Џурнал“ наведува дека последните дискусии во Вашингтон се фокусирале на операции од поголем обем.

САД веќе распоредиле значителни сили во регионот. Ударната група околу носачот на авиони „USS Abraham Lincoln“ пристигнала прва. Од 12 февруари, нуклеарниот носач USS Gerald R. Ford се движи кон нова мисија.

Дел од маршрутата води кон Медитеранот, со можност за приближување до иранскиот брег.

Во базите на Блискиот Исток пристигнале борбени авиони Ф-22, Ф-35 и Ф-15E. Додадени биле и авиони за полнење гориво во воздух и системи за противвоздушна одбрана.

САД го предупредија Иран дека би било „мудро“ да склучи договор.

– Постојат многу причини и аргументи во прилог на нападот врз Иран – изјави портпаролката на Белата куќа, Каролин Ливит.

Стигна и остра реакција од Израел.

– Ако ајатоласите направат грешка и нè нападнат, ќе се соочат со одговор што не можат ни да го замислат – предупреди израелскиот премиер Бенјамин Нетанјаху.

Техеран соопшти дека подготвува „рамка“ за напредок во разговорите. Иран негира дека развива нуклеарно оружје и бара укинување на санкциите. Од друга страна, Вашингтон инсистира договорот да ја опфати и балистичката програма и поддршката за регионални вооружени групи.

Договорот од 2015 година меѓу Иран и шест светски сили предвидуваше ограничување на нуклеарната програма во замена за укинување санкции. САД се повлекоа во 2018 година, за време на првиот мандат на Трамп. Потоа воведоа нови санкции.

Иран одговори со зголемување на залихите на збогатен ураниум и инсталирање нови центрифуги.

The post ТРАМП МЕЃУ ДВА ОГНА, НАПАД ИЛИ ТОТАЛНА ВОЈНА? Си постави 10 дена рок за да пресече appeared first on plusinfo.mk.

Александар Лукашенко, лидерот на Белорусија, и американскиот адвокат Џон Квејли, човек од доверба на американскиот претседател, отвориле канал кој, наводно, води до рускиот лидер Владимир Путин, пишува „Волстрит џурнал“.

Лукашенко, кој долго беше во политичка изолација поради бруталното задушување на протестите во 2020 година, сега изненадно излегува на сцената како посредник меѓу две суперсили. „Волстрит џурнал“ наведува дека Лукашенко воспоставил личен однос со Џон Квејли, што го направил Квејли специјален пратеник на Трамп.

Квејли претходно го застапуваше Трамп во судски спор со „Фејсбук“.

Адвокатот, како што пишува весникот, во Белорусија не само што преговарал за политички прашања, туку и со Лукашенко зборувал за лекови за слабеење. Тој му го препорачал лекот„Зепбаунд“, а белорускиот лидер наводно веднаш се заинтересирал да го набави од САД.

Vodka-fueled negotiations with Belarusian leader Alexander Lukashenko over prisoner releases were described by Donald Trump’s special envoy, John Coale (@johnpcoale). https://t.co/GF9VZifBQt

— TVP World (@TVPWorld_com) December 25, 2025

Вотка, палачинки и делови за „Боинг“

Двајцата, велат сведоци, пиеле вотка, јаделе палачинки со кромпир и — пцуеле. Така, Квејли успеал да изгради доверба со Лукашенко, кој постепено го отворил патот за нов канал на комуникација меѓу Трамп и Путин. Белорускиот амбасадор во Обединетите нации дури побарал од САД дозвола за продолжување на испораките на делови за авиони „Боинг“, вклучително и за личниот авион на Лукашенко.

• ТРАМП И ЈАС ЌЕ СЕ СРЕТНЕМЕ Лукашенко најави договор со САД, но не ја заборава Русија

Слобода за Зенкович, сигнал за САД

Во пролетта, Квејли добил повик од Стејт департментот да замине во Белорусија и да го ослободи Јури Зенкович, адвокат и активист со двојно државјанство, белоруско и американско. Тој бил осуден на 11 години затвор за „обид за државен удар“.

Лукашенко го ослободил како гест на добра волја, а тоа, според американските извори, било сигнал дека е подготвен за ново отворање кон Западот.

„Зепбаунд“ и дипломатскиот шепот

Интересот на Лукашенко за лекот за слабеење „Зепбаунд“ не бил само шега. Белата куќа почнала да разгледува начини за обезбедување на пристап до препаратот за белорускиот претседател.

Во меѓувреме, САД ја олесниле продажбата на делови за „Боинг“ на белоруската авиокомпанија „Белавија“ во замена за ослободување на повеќе од 250 политички затвореници.

Американската администрација го претставува тоа како „пример за дипломатска реципроцитетна формула“ — мала концесија за голем ефект.

„Ќе се сретнеме со Трамп, но не го заборавам Путин“

Лукашенко неодамна отворено најави дека преговорите со САД можат да доведат до средба со американскиот претседател Доналд Трамп. Тој рече дека ситуацијата „се движи кон голем договор“ и дека „сè се движи кон тоа Трамп и јас да се сретнеме и да постигнеме договор“, истакнувајќи дека Белорусија сака да го повтори отворањето на американската амбасада во Минск што беше затворена по почетокот на руската инвазија на Украина во 2022 година.

Лукашенко, сепак, додаде дека Белорусија не ја заборава својата блиска врска со Русија и дека тие односи остануваат важни.

The post ЛУКАШЕНКО Е НОВИОТ ЧОВЕК НА ТРАМП ВО ПРЕГОВОРИТЕ? Вотката и еден лек против дебелеење биле клучни за зближување appeared first on plusinfo.mk.

Украина тивко ја измени клучната точка во американскиот мировен план предложен од Доналд Трамп, онаа што се однесува на контролата на корупцијата во Киев, јави „Волстрит џурнал“.

Според написот, првичниот документ предвидувал ревизија на сета меѓународна помош дадена на Украина, со цел да се идентификува злоупотребата на средствата. Новата верзија, објавена онлајн, веќе ги содржи амандманите на украинската влада, и предвидува целосна амнестија за сите страни во конфликтот.

По средбата со американската делегација во Киев, претседателот Володимир Зеленски избегна да даде остра реакција, но ја потврди подготвеноста на Украина за конструктивен дијалог.

– На Украина ѝ е потребен мир и Украина ќе направи сè за никој во светот да не може да каже дека ја попречуваме дипломатијата. Ова е важно – рече Зеленски во своето вечерно видео обраќање, додавајќи дека украинската страна нема да дава „проблематични изјави“.

Според украинскиот претседател главната задача за сите е конструктивен дипломатски процес со САД и со сите партнери на Украина.

– Клучно е да имаме стабилна поддршка за нашата војска и за сите наши планирани одбранбени операции и длабински напади – истакна тој.

Европските сојузници на Киев реагираа воздржано на најновата американска иницијатива, која се чини дека во голема мерка ги фаворизира руските интереси. Германскиот министер за надворешни работи Јохан Вадефул и високата претставничка на ЕУ за надворешна политика, Каја Калас, инсистираа на учество на Украина и Европа во можните преговори.

Шефот на Кремљ, Владимир Путин, нагласи дека Русија ќе стои зад своите воени цели во Украина.

– Имаме наши заеднички задачи, наши цели. Најважно е безусловно да се постигнат целите на специјалната воена операција – рече Путин, според наводите на Кремљ, за време на посетата на командниот центар.

Руските сили објавија дека го освоиле Купјанск.

The post ОД РЕВИЗИЈА ДО АМНЕСТИЈА – КЛУЧНА ТОЧКА БИЛА СМЕНЕТА ВО ПЛАНОТ НА ТРАМП Зеленски е спремен да соработува за мир во Украина appeared first on plusinfo.mk.

САД редовно ѝ доставуваат разузнавачки информации на Украина преку интернет, изјави портпаролот на Кремљ, Дмитриј Песков.

Тој ги коментираше наводите на „Волстрит џунал“ дека САД планираат да ѝ обезбедат разузнавачки податоци на Украина конкретно насочени кон нафтени рафинерии, гасоводи, нуклеарни централи и слична критична инфраструктура длабоко на руска територија.

– Обезбедувањето и користењето на целата инфраструктура на НАТО и САД за собирање и пренесување разузнавачки информации на Украинците е очигледно – додаде тој.

Според написот на „Волстрит џурнал“ новото споделување информации за локации на постројките е со цел да ѝ се стане на патот на Русија во продажбата и во користењето на гориво.

Најавие за новата помош од НАТО и од САД за Украина доаѓаат денови откако шефот на САД Доналд Трамп изјави дека Украина може да си ја врати територијата преземена од Москва.

The post КРЕМЉ РЕАГИРА, НАТО ЌЕ Ѝ ЦРТА НА УКРАИНА КАДЕ ДА УДРИ? Mожни се напади врз мега-постројки внатре во Русија appeared first on plusinfo.mk.

– Таму сè е безлично, повеќе наликува на планот на „Волстрит Џурнал“ за Украина – одговори тој на прашањето дали Кремљ ја прочитал оваа статија.

Во четвртокот, весникот, повикувајќи се на извори, објави дека советниците на Трамп му предложиле нов план за решавање на украинската криза кој вклучува замрзнување на конфликтот, создавање демилитаризирана зона долж линијата на фронтот и продолжување на снабдувањето со оружје во замена за ветувањето на Украина да не пристапи во НАТО во следните 20 години.

РИА Новости пишува дека во јуни рускиот лидер Владимир Путин даде нови мировни предлози за решавање на ситуацијата во Украина: признавање на статусот на регионите на Крим, ДПР, ЛПР, Херсон и Запорожје како региони на Русија, консолидација на неврзаниот и нуклеарен статус на Украина, нејзината демилитаризација и денацификација и укинување на санкциите кон Русија.

Путин повеќепати изјави дека Москва е подготвена за преговори со Киев.

The post ТОА Е ПЛАНОТ НА „ВОЛСТРИТ ЏУРНАЛ“ ЗА УКРАИНА Песков го исмеа написот за наводниот план на Трамп appeared first on plusinfo.mk.

Анализата е на Јуџин Румер, поранешен разузнавач за Русија во Националниот разузнавачки совет на САД. Тој работел на руските прашања во администрациите на претседателите Џорџ Буш и Бил Клинтон, а сега работи во Фондацијата Каренги.

Анализата ја пренесоа повеќе западни медиуми со насловот дека „на САД им сменува оружје за Украина“. Оригиналниот наслов гласи „Време е да се стави крај на магичното размислување за поразот на Русија“.

Во почетокот на анализата се вели дека рускиот претседател Владимир Путин со самодоверба гледа на двегодишнината од војната во Украина. Се тврди дека „бурата на Блискиот Исток доминира во насловите, а двопартиската поддршка за Украина во САД е нарушена од поларизацијата и дисфункцијата во Конгресот, а да не ги спомнуваме про-Путин наклонетоста на републиканскиот претседателски кандидат Доналд Трамп“.

Исто така, стои во написот, „силно очекуваната украинска контраофанзива не го постигна пробивот што би му дал на Киев силна рака за преговори“.

Бунтот на Пригожин само го зајакна Путин

Понатаму, аналитичарот Румер дава слика за „нескршливиот Путин“ со следните зборови:

„Путин има причина да верува дека времето е на негова страна. На линијата на фронтот, нема индикации дека Русија го губи она што стана војна на трошење. Руската економија е погодена, но таа не е скршена. Парадоксално, власта на Путин беше зајакната по неуспешниот бунт на Евгениј Пригожин во јуни. Народната поддршка за војната останува солидна, а поддршката на елитата за Путин не е скршена“.

Санкциите повеќе му сметаат на Западот?!

Потоа доаѓа економскиот дел. Русија, според него, излегла како победник против санкциите од Западот.

„Ветувањата на западните официјални лица за заживување на сопствените одбранбени индустрии се судрија со бирократските и тесните грла на синџирот на снабдување. Во меѓувреме, санкциите и извозните контроли ги попречија воените напори на Путин многу помалку од очекуваното“, анализира Румер, потсетувајќи дека, од друга страна, Украина е зависна од инфузијата на пари од Западот.

Тој вели и дека Путин едноставно одлучил да стане „помлад партнер на Кина“ на краток рок и дека 50 отсто од рускиот увоз е од оваа земја.

Путин очекува да се договори со Трамп

„Путин не чувствува никаков притисок да ја заврши војната или се грижи за неговата способност да ја одржува повеќе или помалку на неодредено време“, продолжува прогнозата на Румер. А малку подоле во текстот се вели:

„Во најмала рака, Путин очекува дека американската и европската поддршка за Украина ќе се расипе, дека Украинците ќе се изморат од бескрајниот терор и уништување што им се нанесуваат и дека комбинацијата од двете ќе му овозможи да ги диктира условите за договор за да се стави крај на војна и тврдат победа. Од негова перспектива, идеална личност да склопи таков договор е Доналд Трамп, доколку се врати во Белата куќа во јануари 2025 година“.

Трката за нуклеарно оружје е поважна од оружјето за Украина?

Потоа анализата се осврнува на оружјето велејќи дека Путин е подготвен да вооружи сѐ.

„Рускиот лидер е подготвен да вооружи сѐ што има на располагање за да победи во војната во Украина. Контролата на нуклеарното оружје и европската безбедност сега се заложници на инсистирањето на Русија Западот да ја прекине поддршката за Украина. Она што останува од рамката за контрола на оружјето од времето на Студената војна ќе биде целосно исчезнато во 2026 година, а постои зголемен ризик од непредвидлива тристрана трка за нуклеарно вооружување меѓу САД, Русија и Кина“.

Магичното размислување на Западот

Конечно, Румер открива како Западот со своето магично размислување за војната мислел дека лесно ќе ја намами Украина да седне на преговарачкото столче и побрзо да ја заврши војната.

„Она што западните лидери очигледно не го направија е да се израмни со нивната јавност за трајната природа на заканата од охрабрената, ревизионистичка Русија. Тие премногу често се препуштаа на магично размислување – обложување на санкции, успешна украинска контраофанзива или трансфер на нови видови оружје за да го принудат Кремљ да дојде на преговарачка маса. Или се надеваа дека ќе го видат Путин соборен со пуч во палатата“.

Не е време за Студена војна туку за придобивање на Русите

Аналитичарот предупредува дека поентата не е Западот повторно да отпочне Студена војна со Русија, туку „ново стратешко отворање кон Русија што некако би можело да ја намами Москва подалеку од кинеската прегратка“. Тука Румер го спомнува обидот на Роналд Реган да го придобие Михаил Горбачов.

„Тоа не значи дека треба повторно да се бориме во Студена војна. Влегувањето во глобален натпревар со Кремљ не би било мудра инвестиција на американскиот престиж или ресурси. Тоа би нè оддалечило на бесмислена игра на удар со крт против која било и сите манифестации на руско влијание. Русија на Путин има малку цврста моќ или идеолошка привлечност што го направи Советскиот Сојуз толку влијателен во различни делови на светот“, подвлекува Румер.

Аналитичарот вели дека големо изненадување е дека Украина издржала досега и дека ја свела на прашина воената модернизација во која Путин инвестирал во последните 10 години. Тој вели дека е важно Украина да се движи кон „нејзиното вистинско место“, според него, „во Европа“.

Во заклучните пасуси Румер дури ја спомнува и можноста за долга или замрзната војна во Украина, но уште повеќе, меѓу Русија и Западот.

„Крајот на војната, кога и да се случи тоа, веројатно нема да ја смири конфронтацијата меѓу Русија и остатокот од Европа“.

The post „СТАВЕТЕ Ѝ КРАЈ НА МИСЛАТА ДЕКА ПУТИН ЌЕ ИЗГУБИ!“ Волстрит Џурнал анализира дека Западот „има бујна имагинација“ appeared first on plusinfo.mk.

Според извештај на САД за потеклото на ковид-19, хипотезата дека новиот коронавирус протекол од кинеска лабораторија во Вухан е можна и заслужува понатамошна истрага, објави „Волстрит џурнал“ повикувајќи се на извори запознати со содржината на тајниот документ.

Студија на Националната лабораторија на САД – Националната лабораторија Лоренс Ливермор во Калифорнија, беше подготвена во мај минатата година и испратена до американскиот Стејт департмент кога се истражуваше потеклото на пандемијата, за време на последните месеци на поранешниот американски претседател Доналд Трамп.

Проценката на американската лабораторија дека вирусот „избегал“ од лабораторијата, според „Волстрит џурнал“, произлегла од анализа на геномот на вирусот. Сепак, лабораторијата на Лоренс Ливермор одби да го коментира написот.

Американскиот претседател Џо Бајден во мај рече дека побарал помош за да најде одговори за потеклото на ковид-19.

Според американските разузнавачки агенции, постојат две можни сценарија – дека вирусот се проширил по лабораториска несреќа или бил предизвикан од човечки контакт со заразено животно, но заклучоците се уште не се донесени.

Во таен извештај на разузнавачките служби на САД, што циркулираше за време на администрацијата на Трамп, се вели дека тројца научници од кинескиот институт за вирусологија во Вухан во ноември 2019 година биле болни и побарале болничка нега

The post „Волстрит џурнал“: Ковид-19 можно е да протекол од кинеска лабораторија во Вухан appeared first on plusinfo.mk.

Шест месеци по почетокот на пандемијата на новиот коронавирус, научниците се блиску да најдат одговор на едно од главните прашања за вирусот – Колку е смртоносен?

Истражувачите кои првично анализирале податоци за појава на кластери на бродови и неодамнешни студии со илјадници луѓе во жариштата, сега спроведуваат десетици студии за да се утврди бројот на смртни случаи од вирусот.

Тие студии, кои испитувале смртни случаи од вкупниот број заразени лица, вклучително и нерегистрирани случаи, покажале дека ковид-19 „убил“ меѓу 0,3 отсто и 1,5 отсто од заразените. Повеќето студии индицираат дека стапката на смртност е помеѓу 0,5 отсто и 1,0 отсто, што значи дека за секои 1.000 заразени, во просек умираат меѓу пет и десет лица, пишува Волстрит Џурнал.

Ова докажува во оваа фаза дека новиот коронавирус е повеќе смртоносен од сезонскиот грип, но не толку смртоносен како еболата или другите заразни болести што се појавија во последните години. Сепак, коронавирусот убива повеќе луѓе отколку некои повеќе смртоносни заболувања, делумно заради поголема инфекциозност.

– Не само смртноста. Колку е заразна болеста, ковид-19 е многу заразен – смета Ерик Тонер од Здравствениот центар Џонс Хопкинс.

Според него, комбинацијата на стапка на смртност и инфекциозност го прави толку опасна болест.

Здравствените власти и научниците се обидуваат да ја утврдат смртноста на овој вирус за подобро да го разберат ризикот од заболување, пресметувајќи колку луѓе можат да умрат и какви мерки можат да се преземат за да се ограничи неговото ширење.

Тешко е да се измери, но истражувањата пронајдоа јасен сигнал, рече Тимоти Расел од Лондонската школа за хигиена и тропска медицина.

Студијата на Расел и неговите колеги објавена во февруари ги испитува податоците од Кина и жариштето на крузерот Дајмонд принцес. Откриле дека смртноста на коронавирусот е 0,6 отсто.

Повеќе од 14,7 милиони луѓе се заразени со коронавирус ширум светот и повеќе од 609.000 починале, со скоро околу една четвртина од жртвите се во САД, според универзитетот Џонс Хопкинс. Ова значи дека меѓу потврдените случаи ширум светот, стапката на морталитет е 4,2 проценти.

Овој процент на смртни случаи кај потврдените случаи е поголем од процентот на смртни случаи кај сите заразени, затоа што според научниците има многу поблаги случаи и асимптоматски, кои воопшто не се вклучени во статистиката.

Центрите за контрола и превенција на болести во САД откриле дека зад секоја потврдена инфекција со коронавирус, има околу 10 други случаи кои не биле регистрирани на почетокот на мај.

За да добијат појасна слика за смртноста од овој вирус, научниците треба да го пронајдат точниот број на пропуштени или асимптоматски случаи, како и непотврдена смрт која е поврзана со коронавирусот.

Анализата на 26 различни студии откри дека смртноста во различни делови на светот била околу 0,68 отсто –  варира помеѓу 0,53 отсто и 0,82 отсто, се вели во студијата објавена во medRxiv во јули, која се уште не е разгледана од други истражувачи.

Од 10 јули, Центрите за контрола и превенција на болести во САД соопштија дека стапката на смртност е 0,65 отсто.

Смртноста е различна кај различни возрасни групи. За оние над 65 години, смртноста е 5,6 отсто  – 40 пати поголем ризик отколку за некој на возраст од околу 50 години.

Ако просечната смртност од коронавирус е околу 0,6 отсто, тоа би значело дека овој вирус е 6 пати повеќе смртоносен од сезонскиот грип (0,1 отсто). Болестите како што се ебола, САРС и МЕРС се многу посмртносни – помеѓу 10 отсто и 50 отсто.

Одделно, многу лекари се загрижени дека новиот коронавирусот може да предизвика долгорочни компликации кај некои пациенти, особено кај оние кои се лекуваат во болници со недели.

The post „Волстрит џурнал“: Колку е смртоносен коронавирусот? appeared first on plusinfo.mk.