Американски воен пилот преживеал дури 36 часа зад непријателски линии во Иран, избегнувајќи заробување и покрај тоа што бил тешко повреден, благодарение на специјализираната „SERE“ обука, пишува „The Wall Street Journal“.

Станува збор за елитна програма за обука на американските воздухопловни сили, чиј назив доаѓа од англиските зборови „survival, evasion, resistance and escape“ – односно преживување, избегнување, отпор и бегство. Оваа обука е клучна за пилоти и за специјални единици кои може да се најдат сами на непријателска територија.

Според поранешниот генерал на американските воздухопловни сили Давид А. Дептула, ваквата подготовка има за цел да ги научи пилотите како да преживеат, да избегнат заробување и да ги зголемат шансите за спасување.

Пилотот од ловецот „F-15“, кој бил соборен во Иран, успеал да преживее во планински и непристапен терен, додека локалните сили активно го барале. Неговото евентуално заробување би претставувало сериозен пропаганден и политички адут за Техеран.

Обуката „SERE“ се темели на четири клучни столба.

Првиот е преживување, каде пилотите учат како да ги санираат сопствените повреди, да најдат засолниште и да обезбедат вода и храна, дури и во екстремни услови. Дел од тренингот вклучува консумирање инсекти, градење импровизирани засолништа и палење оган без алат.

Вториот столб е избегнување, односно способноста да не бидат откриени. Пилотите учат да се движат ноќе, да користат терен за прикривање и да воспостават контакт со спасувачките тимови без да ја откријат својата позиција.

Третиот сегмент е отпор, однесување во случај на заробување. Овој дел од обуката е строго доверлив, но познато е дека се темели на правила утврдени уште за време на Корејската војна, кога бил воспоставен кодекс за однесување на заробени војници.

Последниот столб е бегство, користење на достапна опрема и тактики за безбедно враќање на своја територија.

Воените експерти нагласуваат дека токму ваквата обука прави разлика меѓу живот и смрт, но и меѓу слобода и заробеништво, особено во ситуации кога пилотите се изолирани и изложени на постојана закана.

The post 📽️ СОБОРЕНИОТ ПИЛОТ ЈАДЕЛ ИНСЕКТИ И 36 ЧАСА СЕ КРИЕЛ ВО ИРАН Елитна воена обука му го спасила животот appeared first on plusinfo.mk.

Во Иран постои уникатен одред на жени нинџи, наречен „куноичи“, кој во моментов брои меѓу 3.500 и 4.000 активни членки. Странските медиуми ги опишуваат како „страв и трепет“, а тие кои имале прилика да се запознаат со нив велат дека се неверојатно вешти во борбени вештини и тактичко движење.

Тие користат мечеви, стрели, нунчаки, ножеви и пред сè, раце и нозе. Тие со години се најстрого чуваната воена тајна на Иран, но овие денови, како што се разгорува конфликтот на Блискиот Исток, упатените се прашуваат дали е време опасните куноичи воини, што во превод значи жени нинџи, да се вклучат во акција.

Во јапонската боречка култура, „куноичи“ е општо име за жени нинџи. Нинџуцу се практикува како уметност уште од 6 век, и за разлика од самураите кои имале свој бушидо код, нинџите биле специјалисти за герилска војна, шпионажа, изведување разни диверзии и вешто криење. Но, благодарение на холивудските филмови и стрипови, во современиот свет тие се перцепираат на сосема поинаков, романтизиран начин.

Во нивниот свет, жените не само што одгледувале деца и ги чекале своите сопрузи. Некои од нив биле и самите нинџи. Во однос на вештината и воинскиот дух, „куноичи“ воопшто не биле инфериорни во однос на мажите („шиноби“). Катани, шурикени, чадни бомби, нунчаки – совршено се справувале со секое оружје. Тие сè уште постојат во Јапонија, велат тие, но во сосема поинаква смисла, како културата на нинџуцу. Најпознатото училиште „куноичи“ денес, сепак, не е во Земјата на изгрејсонцето, туку во – Иран.

Основано е во 1989 година, а досега низ него поминале околу 25.000 жени. Во моментов, помеѓу 3.500 и 4.000 од нив се активни, и се во таква состојба што дури и Рамбо би им завидувал. Сепак, во согласност со моменталната состојба на Блискиот Исток, можеби е подобро да се спомене „американскиот нинџа“ во овој контекст, бидејќи и тој би морал да биде внимателен.

Освен што се одлични експерти за боречки вештини, жените нинџи мора да бидат и акробати, да покажат дека се вешти во брзо искачување и тивко, скриено движење (бидејќи, „кој може да му го види лицето на нинџа“…). Се подразбира дека се во одлична форма, дека се специјалисти за ладно оружје (ако станува збор за борба гради в гради), дека се дисциплинирани и дека никогаш не отстапуваат од своите задачи.

Обуката се одвива во замок недалеку од главниот град, Техеран. Фатима Муамер, една од инструкторките, нагласува дека обуката им помага на жените да одржат рамнотежа на умот и телото, како и да стекнат самодоверба.

– Тие учат како да се почитуваат себеси, но и да останат смирени во секое време – вели Фатима.

Иако не се сомневаме дека би можеле да го победат секој противник без многу мака и тешкотии (веќе го споменавме Рамбо), ученичките на училиштето тврдат дека сè што учат е поврзано исклучиво со гореспоменатата рамнотежа и дека немаат планови да се соочат со никого надвор од полигонот за обука.

– Учам подобро да го разбирам своето тело и да ги контролирам своите емоции, и секако да се бранам доколку е потребно. Поради ова, се чувствувам повредна, посамоуверена. Иако може да биде опасна, оваа обука е всушност многу добар лек. А костимот ми стои доста добро. (се смее) Исто така, благодарение на нинџуцуто, стекнуваме знаење за фасцинантната култура на земјата од која потекнува – открива еден член на иранскиот одред „куноичи“.

The post 📽️ ОПАСНИТЕ ЖЕНСКИ НИНЏИ ОД ИРАН СЕ ПОДГОТВЕНИ Дали „куноичи“ воинките ќе се вклучат во војната? appeared first on plusinfo.mk.

Хрватскиот парламент денес изгласа измени на Законот за одбрана со кои се враќа задолжителната воена обука по повеќе од една деценија. Со 84 гласа „за“, 30 воздржани и 11 против, пратениците ја поддржаа иницијативата на владата за повторно воспоставување на основна воена подготовка, јавуваат хрватските медиуми.

Основната воена обука ќе трае два месеци, а првите повици ќе бидат испратени до крајот на годината. Првите регрути ќе стапат во касарните во Книн, Слуњ и во Пожега во почетокот на 2026 година.

Младите мажи кои ќе наполнат 19 години ќе бидат задолжени да посетат обука, по претходен лекарски преглед. Исклучоци се предвидени за студенти, професионални спортисти и лица со двојно државјанство што веќе имаат воена обврска во странство.

Меѓутоа, законот дозволува и приговор на совеста. Тие што поради верски или морални причини одбиваат оружје, ќе служат во цивилна заштита или во локални институции, во период од четири месеци.

Според владата, обуката ќе се плаќа 1.100 евра месечно и ќе се брои во работен стаж, додека цивилната служба ќе биде пониско платена. Жените нема да бидат задолжени, но ќе можат доброволно да се пријават, што ќе им овозможи прием во активната служба или во резервата.

Непојавувањето на повик за обука ќе се казнува со парична казна од 250 до 1.320 евра, а полицијата ќе може да издаде наредба за доведување. Исклучени од обврската се кадетите, полициските студенти и ракоположените свештеници.

Лицата кои ќе ја завршат обуката ќе имаат предност при вработување во државните и локалните институции. Новите измени овозможуваат и лица со само основно образование да бидат примени во војска, под услов да го завршат средното образование во рамките на првиот договор.

Пратениците Анте Деур и Ивица Кукавица од владејачката ХДЗ истакнаа дека е неопходно пополнување на резервите и подготвеност на армијата. Од опозицијата, Арсен Баук од СДП предупреди дека постои нееднаков третман меѓу оние што ќе служат воена и оние што ќе изберат цивилна обука.

Далија Орешковиќ од ДОСИП оцени дека воведувањето на задолжителната обука е „измама без јасна потреба“, додека владата уверува дека станува збор за мерка на одбранбена подготвеност, јави Хина.

The post ХРВАТСКИОТ ПАРЛАМЕНТ ПРЕСЕЧЕ, СЕ ВРАЌА ЗАДОЛЖИТЕЛНИОТ ВОЕН РОК Казните за избегнување служба ќе бидат солени appeared first on plusinfo.mk.

Децата во Литванија ќе учат како да градат и да управуваат со дронови, како дел од напорите на оваа мала балтичка држава да ја зголеми способноста за справување со можни идни закани од Русија, објави британски Гардијан.

Во заедничка иницијатива на министерствата за одбрана и за образование, владата во вторникот соопшти дека се надева дека ќе обучи повеќе од 22.000 лица, вклучително и ученици, во вештини за работа со дронови, како дел од обидот за „проширување на обуката за граѓанска отпорност“.

Програмата ќе биде приспособена на различни возрасни групи, при што учениците од трето и од четврто одделение, на возраст од 8 до 9 години, ќе учат да составуваат и да управуваат со едноставни дронови, соопшти владата. Средношколците ќе дизајнираат и ќе произведуваат делови за дронови и ќе учат како да составуваат и да управуваат со напредни дронови.

Литванија е во постојана состојба на висока готовност

Како и соседните Естонија и Латвија, Литванија – држава со 2,8 милиони жители која граничи со рускиот ексклав Калининград и со сојузникот на Москва, Белорусија – е во постојана состојба на висока готовност за војна откако Владимир Путин ја започна целосната инвазија врз Украина.

Перцепцијата за руска закана во балтичките држави беше потврдена во средата со протерувањето на еден руски дипломат од Естонија. Естонскиот министер за надворешни работи, Маргус Цахкна, изјави дека тоа се должи на „континуирано мешање“ во внатрешните работи на државата.

– Дипломатот за кој станува збор директно и активно учествувал во поткопување на уставниот поредок и на правниот систем на Естонија… Мора да престане континуираното мешање на руската амбасада во внатрешните работи на Република Естонија – рече Цахкна.

Литванија ќе даде 3,3 милиони евра за специјализирана опрема

Во Литванија, владата планира да потроши 3,3 милиони евра за специјализирана опрема, вклучително и за внатрешни и надворешни дронови со прво лице (FPV), системи за контрола и видео-пренос, како и мобилна апликација за обука за беспилотни летала (UAV).

Министерката за одбрана, Довиле Шакалиене, рече:

– Планираме 15.500 возрасни и 7.000 деца да стекнат вештини за управување со дронови до 2028 година. Во септември ќе отвориме центри за управување со дронови во Јонава, Таураге и Кеданиаи, а до 2028 година ќе отвориме уште 6 центри за обука во други региони на Литванија.

„Продлабочување на техничката писменост на децата“

Обуката ќе ја спроведува Литванскиот сојуз на стрелци во соработка со Литванската агенција за неформално образование, која ќе ги обучува децата во основните и во средните училишта.

Заменик-министерот за национална одбрана на Литванија, Томас Годлиаускас, рече дека обуката ќе биде во форма на воннаставни курсеви кои ќе ја продлабочат „техничката писменост“ на децата.

– Најмладите учесници ќе се занимаваат со едноставна изработка и со управување со дронови преку игри и експерименти. Средношколците ќе ги учат основите на програмирање заедно со управување и изработка на дронови во затворен простор, додека учениците од повисоките средни училишта ќе дизајнираат 3Д-делови за дронови и ќе составуваат FPV-дронови – рече тој.

Литванија го зголемува фокусот на технологијата на дронови, при што беспилотните летала се користат интензивно за способности за контранапад на дронови на своите граници, по 2 инцидента во јули кога двајца сомнителни руски дронови влегоа од Белорусија во литванска територија.

Во Русија, обуката на деца за работа со дронови е контроверзна, особено по неодамнешните откритија за наводно систематско вклучување на деца во дизајнот и во тестирањето на технологијата преку видео-игри.

The post ЛИТВАНИЈА ЌЕ ОБУЧУВА 8-ГОДИШНИ ДЕЦА ДА УПРАВУВААТ СО ДРОНОВИ Земјата се спрема за можна војна со Русија appeared first on plusinfo.mk.

Лидерот на Северна Кореја, Ким Јонг Ун, повика на понатамошен развој на артилериските тактики на војската, во согласност со „острата и акутна“ природа на секојдневно променливото модерно боиште, како и на засилување на „интензивната обука за „вистинска војна“, објавија државните медиуми во четвртокот, пренесе Анадолија.

Додека надгледувал артилериско натпреварување на потчинети единици на Корејската народна армија (КНА) во средата, Ким повикал војската да ја засили борбената подготвеност преку интензивна обука, нагласувајќи ја способноста „да се реагира веднаш во случај на војна и да се уништи непријателот во секоја битка“, пренесе Корејската централна новинска агенција (KCNA).

Изразувајќи задоволство по набљудувањето на натпреварот, тој изјавил дека армијата треба уште повеќе да го зголеми интензитетот обуката за вистински конфликт и потенцирал дека најсилното средство за одвраќање од војна е „најјасниот став кон заколнатиот непријател“.

За време на неговата посета на Министерството за одбрана во февруари, Ким ја означи 2025 година како година на воена обука, во услови на зголемени тензии на Корејскиот Полуостров.

Оттогаш, тој надгледува различни воени активности за да ја нагласи важноста на интензивната обука и стекнувањето на способности за современо војување.

Ким присуствуваше и на сличен артилериски натпревар во доцниот мај.

The post КИМ ЈОНГ УН ИМ РЕКОЛ НА СВОИТЕ ВОЈНИЦИ ДА СЕ СПРЕМАТ ЗА ВИСТИНСКА ВОЈНА Го спомнал „заколнатиот непријател“ на Северна Кореја appeared first on plusinfo.mk.