Не е точно дека е пронајдена ешерихија коли во водата која го снабдува Скопје. Скопјани да бидат спокојни, рече денеска скопскиот градоначалник Орце Ѓорѓиевски, кој пред новинарите се напи чаша вода од чешма.

Ѓорѓиевски одржа вонредна прес-конференција по гласините кои масовно почнаа да се споделуваат на социјалните мрежи дека водата од скопскиот водовод е наводно загадена со ешерихија коли и дека веќе има заболени пациенти на Инфективната клиника.

– Ќе има одговорност за сите кои шират паника и хистерија, што според мене е еднакво на тероризам. До МВР ќе бидат доставени сите профили на социјалните мрежи кои шират лажни вести – порача Ѓорѓиевски.

Нагласи дека тој, неговото семејство и 8-годишниот син ја пијат оваа вода за која кажа дека е чиста и една од најквалитетните.

Тој ги обвини опозициските партии дека шират паника.

– Од одредени центри се шири паника, мислам на СДСМ и една сателит-партија која му помага на СДСМ. Тоа почна уште пред некој ден, со приказни на терен дека постоела опасност да се загрози изворот поради депонија на 30 километри од изворот Рашче. Денес се чисти депонијата од страна на „Водовод и канализација“, но никој не спомна дека таа депонија е на 30 километри од Рашче. Тој обид за паника го разбивме како меур од сапуница и еве денеска нов обид за ширење паника – рече градоначалникот.

Додаде дека дезинформацијата дека „некоја госпоѓаа дознала од пријателка дека анализи покажале бактерија во водата“ се шири во групи со родители на деца од претшколска возраст и други родителски групи

Посочи дека добил повеќе од 200 пораки од вознемирени скопјани и порача дека станува збор за прашање кое, како што нагласи, не смее да биде предмет на политички пресметки.

– Имам повеќе од 200 пораки од вознемирени наши сограѓани. Уште еднаш сакам да им порачам дека ова не е политика – рече Ѓорѓиевски.

Градоначалникот најави остар одговор од надлежните институции кон оние кои намерно шират непроверени информации и создаваат паника.

Тој посочи дека последиците од ширењето на ваквите информации веќе се чувствуваат, односно граѓаните масовно купуваат вода во маркетите.

– Да правите хистерија, да се прави хаос во маркетите, да купуваат луѓето вода, како не знам каква криза да се случува со градот Скопје – тоа нема да го дозволиме. За овој случај ќе нема толеранција – порача Ѓорѓиевски.

Додаде дека претпријатието „Водовод и канализација“ работи одговорно и дека ова лето, првпат по 10 години, и покрај горештините нема прекини во водоснабдувањето на Скопје и дека притисокот е задоволителен насекаде, а тоа ѝ е проблем на опозицијата.

Агенцијата за храна и ветеринарство (АХВ) денеска најостро ги демантира пласираните дезинформации во јавноста дека водата од скопскиот водоснабдителен сиистем е небезнедена за пиење поради наводно присуство на бактерија ешерихија коли.

„Како одговорна институција ја информираме јевноста дека АХВ до овој момент нема добиено известување од скопското јавно комунално претпријатије за незадоволителен резултат од лабораториско тестирање на водата за пиење, што е нивна законска обврска, врз основа на кое би била донесена и забрана за нејзина употреба. Граѓаните не треба да стравуваат. Водата од градскиот водовод во Скопје е безбедна за пиење и употреба“, велат од АХВ.

Директорот на Јавното претпријатие „Водовод и канализација“ – Скопје, Иван Митровски, исто така, изјави дека водата од скопскиот водовод е исправна.

Директорот на Клиниката за инфективни болести во Скопје Фадил Цана денеска изјви дека на клиниката има нормално зголемен број на оациентим со оглед на горештините.

– Бројот е зголемен, но, не е над нормалата во споредба со претходните години, тука е, во очекуваниот раст. Така што, немаме податоци дека некој има гастроинтестинални тегоби поради водата, поради пиење на вода -речед-р Цана.

Јавното претпријатие „Водовод и канализација“ – Скопје во вчерашниот извештај од мониторингот на водата објави дека Секторот за санитарна контрола зел 42 примероци од водоводната мрежа на градот, од кои 4 од бунарскиот потег Нерези – Лепенец и истите покажале дека водата е исправна за конзумирање.

The post 🎥 ГРАДОНАЧАЛНИКОТ ЃОРЃИЕВСКИ СЕ НАПИ ВОДА ОД ЧЕШМА ЗА ДА ГИ ДЕМАНТИРА ГЛАСИНИТЕ ДЕКА Е ЗАГАДЕНА Ширењето паника и хистерија го спореди со тероризам appeared first on plusinfo.mk.