Забраната за употреба на водата за пиење од градскиот водовод во Струга е укината, соопшти попладнево на својата официјална фејсбук-страница јавното претпријатие „Водовод и канализација“. Информацијата ја потврди и Општина Струга.

Одлуката, како што се наведува, е донесена врз основа на анализите на примероците од водата од изворот „Шум“ направени во последните денови.

„Според најновите анализи на Центарот за јавно здравје – Охрид, извршени на примероци од водата во водоводниот систем на градот, водата во Струга е безбедна за пиење“, соопштија од Општина Струга.

Анализите на Центарот за јавно здравје – Охрид од денешните мостри земени од изворот „Шум“ и од неколку мерни места во градот покажуваат дека матноста е во дозволените граници – 1,11 на извориштето и околу 0,80 во градската мрежа, додека максимално дозволената вредност е 1,5.

Надлежните информираат дека ќе продолжат со секојдневно земање мостри, поради можност од варирање на вредностите.

Водата од градскиот водовод, од кој се снабдуваат Струга и околните села, беше забранета за употреба речиси еден месец поради зголемена матност на водата од изворот „Шум“.

The post СТРУЖАНИ ПОВТОРНО МОЖАТ ДА ЈА ПИЈАТ ВОДАТА По речиси еден месец укината забраната appeared first on plusinfo.mk.