Владата го прекинува обезбедувањето оружје од бугарската армија за Украина. Ова го изјави премиерот Румен Радев на почетокот на денешната седница на Советот на министри на ЕУ.

– Веќе дадовме доволно, а нашата земја продолжува да трпи социо-економски штети од оваа крвава војна – рече Радев, кој е убеден дека „решението на конфликтот не може да се постигне со воени средства“.

Одлуката засега ја коментираат странските медиуми. Според „Блумберг“, одлуката на новата бугарска влада да престане да ѝ обезбедува оружје на Украина, е во спротивност со напорите на европските земји да го зголемат притисокот врз Русија за прекин на војната.

Политико забележува дека овој курс го зајакнува поскептичниот став на Софија кон воената поддршка за Киев, во контекст на пошироките политики на Европската Унија. Порталот потсетува дека Бугарија обезбедила 13 пакети воена помош за Украина од почетокот на руската инвазија во 2022 година, но исто така ги истакнува критичките ставови на претседателот Румен Радев, кој ја дефинираше украинската кауза како „осудена на пропаст“.

The post БУГАРИЈА ЈА ЗАПИРА ВОЕНАТА ПОМОШ НА УКРАИНА Дадовме доволно, вели Радев appeared first on plusinfo.mk.

Американскиот претседател Доналд Трамп го обвини Иран дека го соборил американскиот борбен хеликоптер AH-64 Apache во близина на Ормускиот Теснец и најави дека Вашингтон ќе одговори на нападот.

Двајцата членови на екипажот се спасени и не се повредени, а според американските власти станува збор за првиот изгубен „Апачи“ од почетокот на конфликтот со Иран.

„Тукушто бев информиран од нашата Голема војска дека синоќа Иранците соборија еден од нашите високософистицирани хеликоптери „Апачи“ додека патролираше над Ормускиот Теснец. Имаше двајца пилоти вклучени, двајцата се безбедни и неповредени. Сепак, Соединетите Држави мора, од нужност, да одговорат на овој напад“, напиша Трамп на својата социјална мрежа Truth Social.

Централната команда на САД (ЦЕНТКОМ) претходно соопшти дека хеликоптерот се урнал во близина на брегот на Оман за време на патролна мисија и дека двајцата пилоти биле извлечени со поморски дрон околу 2 часа потоа.

„Спремни за дипоматија и за одмазда“

Иако претходно тврдеше дека Вашингтон е блиску до договор со Техеран, Трамп сега испрати значително поостра порака.

Неколку минути пред пораката на Трамп, претседателот на иранскиот парламент и главен преговарач Мохамед Бакер Калибаф порача дека Иран е подготвен и за дипломатија и за одмазда.

„Ние го претпочитаме јазикот на дипломатијата, но многу течно зборуваме и други јазици. Прекршете ги вашите обврски, а ние ќе преминеме на она што најдобро го зборуваме“, напиша Калибаф.

• ДРАМА ВО ОРМУЗ, ПАДНА АМЕРИКАНСКИ „АПАЧИ“ Пилотите спасени, ги извлече дрон во форма на глисер

Бомби повторно паѓаа врз Тир

Паралелно со кризата во Ормускиот Теснец, повторно се влошува состојбата и на либанско-израелската граница.

Израелската армија изврши нови воздушни и артилериски напади врз јужен Либан, и покрај предупредувањата од Иран да не продолжува со операциите.

Либанското Министерство за здравство соопшти дека најмалку осум лица загинале во градот Тир, откако израелската армија издала нова наредба за евакуација на делови од градот, вклучувајќи го и христијанскиот кварт.

Нападите следуваат само еден ден откако Израел и Иран формално ги прекинаа непријателствата по најновата размена на оган.

Според либанските медиуми, во серијата напади низ јужен Либан во вторникот загинале најмалку 13 лица.

Примирјето повторно на испит

Иран предупреди дека повторно ќе го нападне Израел доколку продолжат операциите во Либан, додека израелските власти порачаа дека нема да ја прекинат кампањата против Хезболах.

Новата ескалација дополнително ги комплицира обидите на администрацијата на Трамп да обезбеди поширок договор меѓу САД, Израел и Иран и повторно отвора прашања дали неодамнешното примирје може да опстане.

The post „МОРАМЕ ДА ОДГОВОРИМЕ, ИРАН СОБОРИ АПАЧИ“ Трамп се закани по падот на хеликоптер во Ормуз appeared first on plusinfo.mk.

Американскиот претседател Доналд Трамп изјави дека го предупредил израелскиот премиер Бенјамин Нетанјаху да не отвора нов фронт против Иран, нагласувајќи дека во таков случај Израел би можел да остане без американска поддршка.

Во интервју за американскиот портал Аксиос, Трамп откри дека директно му порачал на Нетанјаху да биде внимателен со идните потези.

– Му реков: „Биби, подобро внимавај, инаку многу брзо ќе останеш сам“ – изјавил Трамп.

Американскиот претседател ги отфрли и критиките дека евентуален конфликт со Иран би бил спротивен на неговото предизборно ветување дека нема да вовлекува нови војни, порака што често ја повторуваше за време на кампањата за враќање во Белата куќа.

Изјавите на Трамп доаѓаат само неколку часа пред Израел и Иран повторно да разменат одмазднички напади, што дополнително ги зголеми стравувањата од поширока ескалација на Блискиот Исток.

Тензиите меѓу двете земји остануваат високи, а меѓународната заедница со загриженост ги следи случувањата поради опасноста конфликтот да се прошири и надвор од границите на Израел и Иран.

The post „БИБИ, ВНИМАВАЈ! МНОГУ БРГУ ЌЕ ОСТАНЕШ САМ“ Трамп откри што му кажал на Нетанјаху зад затворени врати appeared first on plusinfo.mk.

Aмериканскиот претседател Доналд Трамп го коментираше отвореното писмо што украинскиот претседател Володимир Зеленски му го испрати на рускиот колега Владимир Путин, во кое повика на нивна директна средба и преговори за завршување на војната.

На средба со новинарите во Белата куќа Трамп изрази уверување дека токму САД одиграле клучна улога во приближувањето на двете земји кон мирот.

– Мислам дека би било одлично тие да се сретнат. Треба да го направат тоа и да го разработат – рече Трамп, додавајќи дека двете страни ќе мора да направат некакви компромси.

Кога новинар го праша за какви компромиси двете страни би морале да се согласат, американскиот претседател кратко одговори дека „подобро би молчел за тоа“, но додаде: „Сакам двете страни да направат одредени отстапки и мислам дека на крајот ќе го сторат тоа.“

Говорејќи за војната во Украина Трамп рече дека Киев „немаше да издржи ниту еден ден или два ​​во војна со Русија без американско оружје и опрема“.

– Да не беше нашата војска и нашата опрема, Украина денес немаше да може да се бори за својот опстанок. Им дадовме опрема во вредност од стотици милијарди долари, најдобрата опрема. А ние произведуваме најдобра опрема во светот. Без тоа, тие немаше да издржат ниту еден ден или два – рече Трамп.

Трамп, исто така, се осврна на испораката на противтенковски ракети во Украина, верgојатно алудирајќи на преносните системи „Џавелин“ што му беа продадени на Киев за време на неговиот прв претседателски мандат.

– Се сеќавате на противтенковските ракети? Кога тенковите се заглавија во калта, и ги извадија, бум-бум-бум-бум. Тоа им го дадов. Тие рекоа: „Обама ви даде чаршафи, а Трамп ви даде едно од најдеструктивните оружја – рече американскиот претседател.

Претставничкиот дом на американскиот Конгрес во четвртокот усвои закон со кој се обезбедува воена помош за Украина, поддршка за обновата на земјата и воведување нови санкции против Русија.

Предлог-законот беше ставен на гласање преку посебна постапка, таканаречена петиција за гласање, која ги заобиколи редовните комисии. На демократите им се придружија 18 републиканци и еден независен, Кевин Кајли, чие гласање овозможи да започне процесот.

Во меѓувреме, шефот на американската дипломатијата Марко Рубио сигнализираше дека наскоро се очекува соопштение за воена помош за Украина во вредност од 400 милиони долари, кое Конгресот веќе го одобри.

Trump: Ukraine would not have lasted one or two days without American support. Remember the anti tank missiles when Russian tanks got stuck and were destroyed? Obama gave sheets. Trump gave Javelins. We have the greatest military equipment anybody has ever seen. pic.twitter.com/qqPCdUB8ll

— Tymofiy Mylovanov (@Mylovanov) June 5, 2026

The post СУПЕР БИ БИЛО ДА СЕ СРЕТНАТ, ЌЕ МОРА ДА ПРАВАТ КОМПРОМИСИ Трамп го коментираше писмото на Зеленски до Путин appeared first on plusinfo.mk.

Контролата врз Ормуската Теснина за Иран е поважна од поседување нуклеарно оружје, изјави високопоставен  претставник на Иранската револуционерна гарда.

Заменик-политичкиот командант, Јадола Џавани, изјавил дека воспоставувањето суверенитет над Ормуската Теснина претставува „стратешко оружје“ кое, според него, е поважно од нуклеарниот арсенал бидејќи и овозможува на земјата да „казнува агресори“.

Тој додал дека воената конфронтација со Соединетите Американски Држави и Израел била „неизбежна“ и дека Иран се подготвувал за таков развој на настаните.

Џавани исто така оцени дека конфликтот донел одредени „придобивки“ за Иран, тврдејќи дека земјата не само што се одбранила, туку и излегла зајакната од судирот.

Во меѓувреме, дел од светските медиуми меѓу кои и „Си-Ен-Ен“, пренесуваат дека Иран ги засилува напорите за обновување на подземните ракетни капацитети, по неодамнешните напади и затегнатите безбедносни состојби во регионот.

The post ОРМУСКИОТ ТЕСНЕЦ ПОВАЖЕН ОД НУКЛЕАРНАТА ПРОГРАМА? Иран нема да се откаже од контролата врз преминот appeared first on plusinfo.mk.

Премиерот на Израел Бенјамин Нетанјаху изјави дека израелската војска ја продлабочува офанзивата во Либан и дека во операциите учествуваат „значајни копнени сили“. Тој тврди дека армијата контролира стратешки области. Тензиите повторно растат.

Изјавата била дадена на почетокот на состанокот на израелскиот безбедносен кабинет, соопштил неговиот кабинет. Нетанјаху не прецизирал за кои локации станува збор.

„Продолжуваме со операциите“

– Ги продлабочуваме нашите операции во Либан, а израелската војска таму делува со значајни копнени сили и контролира стратешки области – изјавил Нетанјаху.

Тој додал дека армијата воспоставува „безбедносен појас“ со цел да ги заштити градовите во Северен Израел. Израелските власти со месеци предупредуваат за безбедносни закани долж северната граница. Судирите не запираат.

Најавата доаѓа и покрај прекинот на огнот што стапи на сила на 17 април со посредство на САД. Подоцна примирјето беше продолжено до почетокот на јули. Договорот сè повеќе слабее.

Примирјето на сила, нападите продолжуваат

Според либанските власти, израелската војска продолжила со напади и по стапувањето на сила на прекинот на огнот. Либанските официјални претставници тврдат дека од почетокот на март досега се убиени речиси 3.200 луѓе.

Според истите податоци, повеќе од 9.600 лица биле ранети, додека над 1,6 милиони жители се раселени. Независна потврда за бројките засега нема. Хуманитарната криза се продлабочува.

Израелските власти претходно соопштуваа дека операциите во Либан се насочени кон спречување напади врз северниот дел на земјата. Ситуацијата останува крајно нестабилна. Новата ескалација предизвикува загриженост.

The post НЕТАНЈАХУ НАЈАВИ ПРОШИРЕНА ОФАНЗИВА ВО ЛИБАН Израел испраќа копнени сили и покрај примирјето appeared first on plusinfo.mk.

Украина побара итна седница на Советот за безбедност на Обединетите нации и состанок на Организацијата за безбедност и соработка во Европа, по масовните руски воздушни напади врз земјата, соопшти украинскиот министер за надворешни работи Андриј Сибиха.

Во објава на платформата Х, Сибиха побара „силен и одлучен одговор“ од меѓународната заедница по ноќните напади, кои најмногу го зафатија регионот околу Киев, при што била употребена и балистичка ракета со среден дострел „Орешник“.

Тој ја обвини Русија дека со „варварски ракетни напади“ се обидува да го надомести недостигот на напредок на фронтот во војната против Украина.

Според украинските власти, само во Киев загинале најмалку две лица, додека бројот на повредени во главниот град се искачил на 81 лице.

Украинскиот претседател Володимир Зеленски соопшти дека во нападите низ целата земја се повредени околу 100 лица, а најмалку четири лица го загубиле животот.

Нападите оштетиле и повеќе владини згради, меѓу кои Министерството за надворешни работи и зградата на Владата, а биле погодени и станбени објекти, музеи и училишта. Нападите се случиле на државен празник.

– Рускиот претседател Владимир Путин се обидува да ја заплаши Украина преку напади врз цивили и уништување на инфраструктурата – изјави Сибиха.

Тој додаде дека меѓународната заедница мора да реагира и да преземе конкретни мерки.

– Ги повикуваме партнерите на одлучна акција за да ја одвратат Русија и да ја поттикнат кон сеопфатен, праведен и траен мир – порача украинскиот министер.

The post УКРАИНА БАРА ИТНА СЕДНИЦА НА ООН Киев бара меѓународна реакција против Русија appeared first on plusinfo.mk.

Американскиот претседател Доналд Трамп денеска изјави дека преговорите со Иран за ставање крај на војната напредуваат, но порача дека нема да дозволи избрзан договор кој би бил неповолен за САД.

Изјавата доаѓа само еден ден откако Трамп соопшти дека рамковниот договор меѓу Вашингтон и Техеран е „во голема мера усогласен“, вклучително и прашањето за повторното отворање на Ормускиот Теснец.

„Преговорите се одвиваат на уреден и конструктивен начин. Ги информирав моите претставници да не брзаат со договор, затоа што времето е на наша страна“, напиша Трамп на својата платформа.

Тој порача дека американската блокада на иранските пристаништа ќе остане во сила сè додека договорот не биде целосно финализиран и потпишан.

„Двете страни мора да си земат време и да го направат тоа како што треба. Не смее да има грешки“, нагласи американскиот претседател.

Трамп додаде дека односите меѓу САД и Иран стануваат „попрофесионални и попродуктивни“, но повтори дека Вашингтон нема да дозволи Техеран да развие нуклеарно оружје.

„Тие мора јасно да разберат дека не можат да развијат или да набават нуклеарна бомба“, порача Трамп.

Според американските медиуми, Трамп во телефонски разговор го информирал и израелскиот премиер Бенјамин Нетанјаху за текот на преговорите, уверувајќи го дека САД ќе останат на барањето за запирање на иранската нуклеарна програма и отстранување на високо збогатениот ураниум од Иран.

The post САД НЕМА ДА БРЗААТ СО ДОГОВОР СО ИРАН Трамп најави внимателни преговори со Техеран appeared first on plusinfo.mk.

Најмалку четири лица загинаа, а 35 деца се повредени во ноќниот украински напад со дрон врз ученички дом во Луганската област, под контрола на Русија, во источна Украина, соопштија руските официјални претставници во петокот

Ројтерс не можеше веднаш независно да го потврди настанот, а Украина, која се бори во обид да ја врати Луганската област, веднаш не коментираше. Тоа е една од четирите области кои Русија еднострано ги припои во 2022 година, во она што Киев го нарече незаконско заземање територија.

Јана Лантратова, руски комесар за човекови права, изјави дека 86 тинејџери на возраст од 14 до 18 години спиеле во ученичкиот дом на Луганскиот педагошки универзитет во Старобилск кога бил нападнат од украински дронови.

„Вооружените сили на Украина извршија целен напад врз децата кои спиеле“, наведе Лантратова во изјавата.

Леонид Пасечник, висок руски функционер во Луганск, изјави дека две лица се извлечени од урнатините и дека спасувачките екипи сè уште трагаат по децата заробени под нив.

Фотографиите и видеото објавени од руските власти прикажуваат спасувачки работници како носат еден маж на носила од урнатините на тешко оштетените згради, од кои едната изгледа делумно урната, како и пожари кои сè уште горат.

Портпаролот на Кремљ, Дмитриј Песков, в петок им изјави на новинарите дека одговорните мора да бидат изведени пред лицето на правдата.

The post УКРАИНСКИ ДРОН ПОГОДИ УЧЕНИЧКИ ДОМ ПОЛН СО ДЕЦА ВО ЛУГАНСК Најмалку 4 мртви, 35 повредени appeared first on plusinfo.mk.

Соединетите Американски Држави подигнаа федерално кривично обвиниение против поранешниот кубански претседател Раул Кастро и уште пет лица, што претставува сериозна ескалација на повеќедецениската кампања на администрацијата на американскиот претседател Доналд Трамп против кубанскиот комунистички режим.

Според судски документи до кои дошол Си-Би-Ес (CBS), 94-годишниот Кастро е обвинет во Мајами за заговор со цел убиство на американски државјани, за четири точки од обвинението за убиство и за две точки поврзани со уништување летала.

Меѓу обвинетите се наоѓа и пилот на борбен авион кој се поврзува со инцидентот од 1996 година, кога четири лица загинале откако кубанската војска ги соборила нивните авиони за време на хуманитарна мисија над Флоридскиот Проток.

Обвинителството тврди дека наредбата за отворање оган ја издал токму Кастро. Како симболично место за објавување на обвинението е избрана зградата Фридом Тауер во Мајами, низ која помеѓу 1962 и 1974 година поминале повеќе од половина милион кубански бегалци кои по револуцијата на Фидел Кастро од 1959 година ја напуштиле земјата.

Американските власти наведуваат дека Раул Кастро го одобрил соборувањето на два мали авиони на организацијата „Brothers to the Rescue“ на 24 февруари 1996 година.

Организацијата на кубански емигранти од Мајами трагала по бегалци во водите меѓу Куба и Флорида. Во нападот загинале Армандо Алехандре Џуниор, Карлос Коста, Марио де ла Пења и Пабло Моралес, откако нивните летала биле погодени со проектили истрелани од кубански МиГ авиони.

Раул Кастро се повлече од функцијата претседател во 2018 година, а три години подоцна се откажа и од местото секретар на Комунистичката партија на Куба. И покрај тоа, тој и понатаму се смета за една од највлијателните личности во кубанската политика. Засега не е познато дали некогаш ќе се појави пред американски суд.

Претседателот на Куба, Мигел Дијаз-Канел оцени дека обвинението против Раул Кастро само ја открива „ароганцијата и фрустрацијата што претставниците на империјата ја чувствуваат кон непоколебливата одлучност на Кубанската револуција и кон единството и моралната сила на нејзиното раководство“.

Дијаз-Канел на својот профил на „Икс“ наведе дека станува збор за политички маневар лишен од правна основа, кој служи за да се оправда „лудоста на воената агресија“ врз Куба.

„Многу добро знаат, со оглед на изобилството документирани докази, дека не беше преземена никаква непретпазлива акција ниту пак беше прекршено меѓународното право, како што американските воени сили навистина правеа со своите ладно пресметани и отворено објавени вонсудски егзекуции на цивилни бродови на Карибите и Пацификот“, напиша Дијаз-Канел, алудирајќи на инцидентот од 1996 година, кога беа соборени американски цивилни авиони со кои управуваа кубански бегалци.

Тој истакна дека Куба тогаш делувала во легитимна самоодбрана во рамките на своите јурисдикциски води, по повеќекратните и опасни повредувања на воздушниот простор на Куба „од страна на озлогласени тероисти“.

„За тој факт тогашната американска администрација беше предупредена во повеќе од десет наврати, но ги игнорираше предупредувањата и дозволи тие кршења да продолжат“, наведе Дијаз-Канел.

Тој го опиша Раул Кастро како герилски командант и државник кој „ја заслужи љубовта на својот народ“.

The post САД ПОКРЕНАА ОБВИНЕНИЕ ПРОТИВ РАУЛ КАСТРО Хавана остро реагира – само барате изговор за агресија appeared first on plusinfo.mk.