Обвинетиот Влатко Кешишев изрази длабоко каење што бил дел од групата која, како што рече, ги испланирала и извршила убиствата на Вања Ѓорчевска и на Панче Жежовски во ноември 2023 година.

– Многу се каам што бев со нив, тие испланираа сѐ сами и завршија сами. Ми беше кажано да не се мешам и да стојам настрана. Седев пред куќата во „кангуто“. По еден час се вратија со „цитроенот“ и тргнавме кон Рудник. Јас го возев „кангуто“, а Палчо „цитроенот“. Кога стигнавме јас останав а тие тргнаа со „цитроенот“ кон дупката. Кога завршија се вративме во Скопје. „Цитроенот“ го оставивме во Маџари. Во Рудник слушнав истрел, но од далеку – рече Кешишев во неговите завршни зборови искажани денеска во Судот.

Рече дека бил со групата за време на двете убиства.

– Стоев настрана, бев во возилото, а Боре и Велибор влегоа во зградата. Претходно ги купивме лопатите на пазар. Многу се каам што го слушав Палчо без да размислувам, многу му верував. Не го напаѓам, кажувам како се чувствувам. Му бев послушен, без да знам дека има намера за убиства. Знаев, слушав, бидејќи по 24 часа бев таму, дека се работи за грабнување и за изнуда, а не за трагичните работи кои се случија. За пиштолот не знам каде е. Многу сум згрешил и многу се каам што го слушав Палчо. Што ќе ми наредеше, тоа правев. Уште еднаш да кажам дека многу се каам и имам грижа на совеста – заврши Кешишев.

The post КЕШИШЕВ СЕ ПОКАЈА ШТО ГО СЛУШАЛ ПАЛЧО Знаел дека се планирале грабнувања, но не и убиства appeared first on plusinfo.mk.

Велибор Манев, второобвинет за две грабнувања и двете свирепи убиства на Панче Жежовски (74) и на Вања Ѓорчевска (14) денеска пред Кривичниот суд ќе го даде својот завршен збор. По него пред судот ќе се обратат и третообвинетиот Боре Видевски и четвртообвинетиот за тешките злосторства, Влатко Кешишев. Свој завршен збор ќе даде и таткото на убиената Вања, Александар Ѓорчевски, кој е петообвинет во овој кривичен процес, за помагање во грабнувањето на неговата ќерка.

По нив, следуваат завршните зборови на Јовица Страшевски, бранител на првообвинетиот Љупчо Палевски Палчо, кој пак, ќе се обрати последен. Доколку сите овие обраќања завршат денеска, на следното рочиште ќе биде изречена пресудата за тешките злосторства.

Јавните обвинителки во своите завршни зборови побараа најстроги казни, доживотен затвор за четворицата обвинети за грабнувањата и за убиствата, а за таткото Александар соодветна затворска казна.

На претходното рочиште бранителите на Манев, Видевски и на Кешишев побараа Кривичниот суд да ги ослободи од обвинението за убиствата. Нивните аргументи се дека ниеден од тројцата не може да биде прогласен за соучесништво во убиство, затоа претходно не постоел договор меѓу членовите на групата дека ќе извршат убиства. Адвокатите Горан Бошевски и Игор Ефремов, кои ги застапуваат Манев и Кешишев, побараа судот да ги казни нивните клиенти само за делата грабнување. Ефремов отиде и чекор подалеку, со барање Кешишев да биде осуден само за едно грабнување, на детето Вања Ѓорчевска, во кое свесно учествувал, иако не знаел кој треба да биде грабнат, а да биде ослободен за грабнувањето на Панче Жежовски. Во своите искази Манев и Кешишев опишаа како се случиле грабнувањата и убиствата и истакнаа дека тие планирале само да грабнуваат лица и за нив да бараат откуп, но нивниот шеф Љупчо Палевски Палчо ладнокрвно ги убил Панче и Вања, а потоа им се заканувал на останатите да молчат и да го слушаат.

– Ако соизвршителот е лице кое со своите дејствија дало придонес за сторување на кривично дело, односно лице без чии дејствија не би можело да се стори кривичното дело, тогаш се наметнува прашањето кои се дејствијата на обвинетиот Кешишев без кои немало да се изврши грабнување или убиство на оштетениот Жежовски – рече адвокатот Ефремов.

Тој го бранеше Кешишев дека дејствувал од улога на потчинетост и страв од Палевски.

Бранителот на Видевски, Бојан Манев, пак, во завршниот збор ја бранеше тезата дека целото обвинение е конструкција. Неговиот клиент Видевски во исказот негираше дека учествувал во киднапирањата и убиствата. За денот на убиството на Панче, 22 ноември 2023 година рече дека бил на работа, а на денот на убиството на Вања бил во партијата Десна, каде имале активности за поддршка на МПЦ-ОА.

– Правецот по којшто е водена истрагата за овие кривично правни настани е целосно погрешен. Погрешна е и намерата да се осудат овие луѓе уште на самиот старт, со примена на мерки што не се карактеристични за овој политички систем и кои во никој случај не можат да ја утврдат вистината за случувањето на овие кривично правни настани, а со цел да се покрие аматерското работење, непрофесионалноста, неквалитетот на истрагата и незнаењето да се соочат со еден вака голем предмет, како и брзањето да се дојде до финале – рече адвокатот Манев.

Сите тројца адвокати во завршните зборови истакнаа и дека нивните клиенти биле тепани во полициска станица со цел да им се изнуди признание за делата, но и за да го посочат таткото на Вања, Александар, како соучесник, кој му одал информации на Палчо кога неговата постара ќерка ќе оди сама на училиште, за да биде грабната.

Бранителот на таткото, Владимир Туфегџиќ, во завршниот збор истакна дека Обвинителството не изнело ниту еден доказ дека Александар е виновен за помагање во грабнувањето и побара ослободителна пресуда, како единствена праведна судска одлука во случај каде „не постои ниту мотив, ниту дејствие, ниту доказ за вина“. Туфегџиќ апелираше судот да не го легитимира концептот на „вина по претпоставка“, бидејќи тоа не е право, туку неправда.

– Одбраната не само што успеа да побие сите конструкции на Обвинителството, туку и со докази, сведоштва и логичка аргументација ја потврди вистината дека Александар Ѓорчевски не е соучесник, туку е жртва. Татко што во критичниот период се однесувал како што би се однесувал секој друг родител во слична страшна ситуација – со паника, болка, очај, но и со целосна посветеност во обидот да го најде своето дете – рече Туфегџиќ.

The post ЗАВРШЕН ЗБОР НА ОБВИНЕТИТЕ МАНЕВ, ВИДЕВСКИ, КЕШИШЕВ И ЃОРЧЕВСКИ Финишира судењето за убиствата на Вања и на Панче, ќе се обрати и првообвинетиот Палчо appeared first on plusinfo.mk.

Игор Ефремов, бранител на четвртообвинетиот Влатко Кешишев за грабнувањата и за убиствата на Панче Жежовски и на Вања Ѓорчевска, денеска во завршниот збор пред Кривичниот суд побара ослободителна пресуда за неговиот клиент, оценувајќи дека Јавното обвинителство не успеало да докаже ја докаже неговата вина.

– Му предлагам на Советот да донесе праведна пресуда со која Влатко Кешишев ќе биде ослободен од обвинението за две тешки убиства и за едно грабнување, бидејќи докази кои несомнено го инкриминираат нема. А евентуалната вина, доколку се утврди, да се квалификува исклучиво во рамки на учество во кривично дело Грабнување од чл.141 ст.2 в.в. со ст.1 в.в. со чл.22 од Кривичниот законик – истакна Ефремов.

Во завршниот збор адвокатот аргументираше дека ниту еден материјален доказ, ниту еден исказ од сведок или обвинет не потврдува дека Кешишев учествувал како извршител или соизвршител во убиствата на Панче и на Вања.

– Обвинетиот не може да биде ниту обвинет, а уште помалку осуден како соизвршител. За да постои соизвршителство мора да има свест, умисла и конкретни дејствија кои се нужни за извршување на делото, а такво нешто кај Кешишев нема – подвлече адвокатот.

Во текот на постапката, според Ефремов, Кешишев покажал искреност и каење за своето присуство пред зградата на улицата Наум Наумовски Борче, каде што била грабната Вања, но тоа, како што рече, не значи дека имал намера за убиство, ниту учествувал во извршувањето на тој акт.

– Она што може да се стави на товар на обвинетиот е учество во грабнувањето на оштетената Вања Ѓорчевска, што претставува тешко кривично дело, но суштински различно од делото убиство – и по својата тежина, и по својата правна квалификација. Во правото постои принцип на индивидуализација на вината – секој одговара за она што лично го сторил или свесно помогнал да се стори. Токму поаѓајки од овој принцип на индивидуализација, целосно се исклучува одговорноста за дел од кривичните дела кои му се ставаат на товар на обвинетиот, односно обвинетиот ниту знаел, ниту имал намера ниту пак учество за да бидат сторени кривичните дела Убиство — рече бранителот Ефремов.

Тој потсети дека и самите искази на другите обвинети, на Велибор Манев и на Боре Видевски, не го ставаат Кешишев во улога на директен извршител. Во таа насока, според него, обвинителниот акт не содржи правна и фактичка основа за осудителна пресуда за убиство.

Ефремов потсети дека од исказот на Кешишев даден во судот, јасно и недвосмислено може да се разграничат дејствијата и евентуалната умисла во дејствијата на обвинетиот, а со тоа и евентуалното сторување на кривичното дело.

– Со сообвинетите се запознал врз основа на членување и политичко дејствување во политичка партија. Подолг период престојувал во седиштето на партијата каде што имал задача да биде готвач за потребите на тогашниот претседател на партијата, а сега сообвинет Љупчо Палевски. Имајќи предвид дека престојувал во седиштето на партијата, односно живеел заедно со сообвинетиот Љупчо Палевски, после одреден временски период, како што самиот посочи, од за него непознати причини започнал да има потчинет и поданички однос кон сообвинетиот Палевски. За ваквиот однос потврда дадоа и сведоците кои биле дел од членовите на партијата, но и сообвинетите Велибор и Боре. Доволен доказ за ваквата потчинетост и, како што самиот Кешишев ќе каже – стравопочит од Палевски, е и начинот на давање на неговиот исказ пред судот, односно барањето при давање на исказот, Палевски биде отстранет од судницата – додаде адвокатот Ефремов.

Тој побара од судот при донесувањето на одлука за обвинетиот Кешишев, особено да го има во предвид фактот дека да не било неговото каење и товарот на совеста на обвинетиот, немало да бидат пронајдени ниту телата на убиените, односно дека со негов особен придонес при распитот пред полициските службеници го посочил местото на закопувањето на оштетените.

– Слушајќи ги наредбите од Палевски, преземал дејствија без да размислува за можни последици. Состојбата на неговата совест и каењето, но и стравот којшто го имал целосно е опишан во неговата прва реакција вечерта при претресот во седиштето на партијата каде на полицискиот службеник, сведокот Дејан Димовски му кажал: „Кај сте до сега, ве чекавме.“ – рече адвокатот Ефремов и додаде дека Кешишев бил „своевиден заложник и жртва во корист за искористување на туѓи идеи и интереси“.

Според Ефремов, Кешишев не го негирал своето присуство на местото на грабнувањето на оштетената Вања Ѓорчевска на 27.11.2023 година.

– Како што посочи самиот, му било кажано дека треба заедно со сообвинетите Манев и Видевски да земат некое лице, а за кое лице се работи знаеле само Манев и Палевски. Тоа утро бил испратен да наточи бензин во туба, а за како што му било кажано да биде ставено во возилото бидејки нема гориво. Откако утрото пристигнале со возилото пред зградата на оштетената, Манев и Видевски излегле од возилото, а на Кешишев му било наредено да остане во возилото на местото на возачот, и кога ќе му дадат знак да ја отвори вратата на багажникот и да се премести на совозачкото место. Кешишев не бил ни свесен дека всушност ќе биде грабнато малолетно лице. Оттука па сѐ до местото викано Дупки обвинетиот нема преземено никакви дејствија кои се однесуваат на грабнување на лице, а кај местото викано Дупки, повторно му било наредено да остане на некои 50 метри, за доколку наиде некој, да ги извести другите. Како што посочи самиот, никогаш не му било кажано од никого, ниту пак учествувал во било какви разговори кои би се одвивале за можно убиство на било кого. Во својот исказ посочи дека слушнал звук што наликува на пукање од пиштол, по што по неколку минути бил повикан да помогне во закопување на некое лице. За прв пат дознал дека станува збор за малолетно лице кога се вратил во седиштето на партијата, кога видел на социјалните мрежи, по што го прашал обвинетиот Палевски дали тоа е личноста од утрото, на што му било најостро наредено да оди во својата соба и да не поставува дополнителни прашања – рече бранителот Ефремов во завршните зборови и додаде дека за дејствијата преземени од Кешишев потврдил во својот исказ и обвинетиот Велибор Манев.

The post ДА НЕ БИЛЕ КАЕЊЕТО И СОВЕСТА НА КЕШИШЕВ НЕМАЛО ДА СЕ ОТКРИЈАТ УБИСТВАТА НА ВАЊА И НА ПАНЧЕ Адвокатот Ефремов бара Влатко да одговара само за грабнувањето на Ѓорчевска appeared first on plusinfo.mk.

Денеска продолжи распитот на Влатко Кешишев, четвртообвинет за убиствата на Вања Ѓорчевска и на Панче Жежовски што се случија во ноември 2023 година.

Судијата Ивица Стефановски го испрашуваше четвртообвинетиот.

– На 24 ноември минатата година, во колку часот тргнавте во прв обид да ја грабнете жената? – праша судијата.

– Рано наутро – одговори Кешишев.

– Кога се враќавте претходниот ден со „кангуто“ во штабот, по настанот со Панче, дали видовте лопати во „кангуто“? – праша судијата.

– Мислам дека имаше лопати и копач – рече Кешишев.

На прашањето дали имаше некаков синџир во автомобилот, Кешишев одговори дека не се сеќава.

– А дали го видовте ранецот? – запраша судијата.

– Не беше позади, можеби беше пред совозачкото седиште – одговори Кешишев.

– На 24.11.2023 утрото, петок, во колку часот тргнавте, се сеќавате ли? – праша судијата.

– Мислам дека беше пред 7 часот – рече Кешишев.

• КЕШИШЕВ ПРЕТПОСТАВУВАЛ ДЕКА ВО РАНЕЦОТ ИМА ПИШТОЛ, АМА КАЖАНО МУ БИЛО ДА НЕ ПИПА „Вељо и Боре се договараа како да му пријдат на Панче“

– Од каде тргнавте?

– Од штабот.

– Како возевте, кој кое возило? – праша судијата.

– Вељо го возеше „цитроенот“, во него бевме јас и Боре, а „кангуто“ го возеше Палчо – одговори Кешишев.

– Тој ден, на 24.11.2023 како дојдоа во штабот Боре и Велибор? – рече судијата.

– Не можам точно да кажам – возврати Кешишев.

– Имавте со вас мотороли? – праша судијата.

– Јас немав, тие имаа. Беа три мотороли. Мобилните телефони ни беа оставено во штабот – рече Кешишев.

– Тој ден кога беше неуспешен обидот, со „цитроенот“ вие пристигнавте на паркингот пред зградата? – запраша судијата.

– Не. Вељо го паркираше возилото блиску до зградата, до скалите. Излезе и се симна долу во сутеренот, а Боре остана покрај колата на скалите, а јас отидов кон аголот од друга страна, да набљудувам – објасни Кешишев.

– Бидејќи обидот беше неуспешен, што се случи потоа? – праша судијата.

– Се вративме во штабот со „цитроенот“, а пред нас беше Палчо со „кангуто“ – рече Кешишев.

– Каде го паркиравте „цитроенот“? – праша судијата.

– Мислам дека го паркиравме во Маџари, каде што го паркиравме првиот пат – истакна Кешишев.

– Кој ве зеде вас од таму? – праша судијата.

– Палчо со „кангуто“. Велиобор седеше до него – раскажа Кешишев.

Рековте дека по настанот со Панче не сте можеле да се повлечете. Зошто? – запраша судијата.

– Бидејќи премногу знаев. Првиот пат ме опомена Вељо, кога ја копавме дупката. Рече дека за ова не смее никој да знае, може глави да летаат. Јас го сфатив тоа како опомена, дека никому не смеам да кажам – рече Кешишев.

– По неуспешниот обид за грабнување на 24.11 вие и Боре сте влегле во „кангуто“ и тоа позади. Што имаше позади, имаше ли алат? – праша судијата.

– Мислам дека лопатите стоеја сѐ уште таму – одговори Кешишев.

– Што се случуваше во недела, еден ден пред грабувањето на девојчето, односно жената? – праша судијата.

– Вечерта, не знам во колку часот, дојдоа Велибор и Боре со „мерцедесот“ на Боре – одговори Кешишев.

– Кога ги купивте ашовот, лопатата и копачот? – рече судијата.

– Не знам кој е точниот ден. Бевме да пазаруваме на Бит-пазар, зајре за храна, тутун за цигари и Палчо ми рече да одиме да купиме уште нешто и го купивме алатот. Тоа беше пред обидот за грабнување, во тој период, не се сеќавам дали пред грабувањето на Панче или после тоа – објасни Кешишев.

– Опишете го понеделникот, кога е извршено грабнувањето – рече судијата.

– Во неделата седевме во штабот јас и Палчо, стигнаа Боре и Вељо навечер. Утредента во 6 утрината тргнавме – раскажа Кешишев.

– Кој го однесе возилото од Маџари во Радишани? – праша судијата.

– Палчо и јас. Една вечер ми рече да го пренесеме возилото. Тој возеше со „цитроенот“ напред, а јас возев позади со „кангуто“. Отидовме до Радишани и таму го оставиве „цитроенот“, а со „кангуто“ се вративме во штабот – раскажа Кешишев.

– Кога стигнавте во Радишани, што се случуваше? – праша судијата.

– Јас, Велибор и Боре влеговме во „цитроенот“, а Палчо со кангуто тргна напред. До Радишани сите четоворица стигнавме со „кангуто“, Палчо возеше, Велибор седеше до него, а вообичаено, јас и Боре бевме назад – одговори Кешишев.

– Имаше ли алат?

– Мислам дека лопатата, ашовот и копачот сѐ уште беа таму – рече Кешишев.

– Ќе ве вратам сега малку кај Рудник. Вие не сте биле во моментот кога е убиен Панче? – праша судијата.

– Бев далеку и не знам што се случуваше – одговори Кешишев.

– Но, бидејќи бевте постојано во партијата, дали дознавте што се случи со телото на Панче? Дали веднаш беше затрупано?

– Не знам дали беше затрупано, само слушнав од нив дека е убиен – рече Кешишев.

– Не ви кажаа дали го закопале телото? – праша судијата.

– Не, мене не ми кажаа – одговори Кешишев.

– Но, знаевте дека ќе го носат кај дупката во Рудник – рече судијата.

– Да, ама не и дека ќе го убијат. Не се разговараше за убиство – истакна Кешишев.

– А што мислевте дека ќе му прават?

– Првиот пат се договараа да го однесат таму, да го остават извесно време и после други планови да прават – одговори Кешишев.

– Кои се тие други планови? – праша судијата.

– За грабнување на друга личност – одговори Кешишев.

– Мислите дека требаше таму да го чуваат? – праша судијата.

– Така се договараа – рече Кешишев.

– Колку време мислеа да го држат таму? – рече судијата.

– Додека не ја завршат другата работа. Така се договараа – одговори Кешишев.

– Размислувавте ли како ќе преживее Панче таму, во таа дупка? – праша судијата.

– Не, мене ми кажаа да си молчам, да не се мешам, да седам настрана, а тие се договараа што и како да биде – одговори Кешишев.

– А што се договорија, да го чуваат таму? – праша судијата.

– Па, мислам да – рече Кешишев.

– Понесоа храна и вода за да го чуваат? – рече судијата.

– Не видов – одговори Кешишев.

– А видовте копач, лопата?

– Мислам дека стоеја цело време во „кангуто“ – рече Кешишев.

– Во таа дупка направивте услови за некој да престојува? – праша судијата.

– Вељо измери, знае, мислам дека можеше таму да стои и да седи човек – рече Кешишев.

– Како планираа да го стават човекот внатре? – праша судијата.

– Имаше скала за качување и за симнување во дупката – објасни Кешишев.

– Што се случи со таа скала? – праша судијата.

– Не знам, изгледа остана таму. Таа беше дрвена скала, искована од две даски. Вељо ја направи – одговори Кешишев.

– Кога се враќавте со „кангуто“ од кај местото Рудник, дали внатре имаше скала? – праша судијата.

– Не – рече Кешишев.

На прашањето кога Велибор ја направил таа скала во дупката, Кешишев одговори дека била направена откако завршиле со копање.

– Што имаше друго во дупката за да може да престојува човек? – праша судијата.

– Имаше скала, анкер и на него алка за синџир – одговори Кешишев.

– А која беше температурата дента кога го грабнавте Панче? – праша судијата.

– Беше свежо, но не беше толку ладно – рече Кешишев.

– На 22 ноември не било ладно? – запраша судијата.

– Свежо беше.

– А нели мислевте дека човекот може да замрзне таму?

– Јас не мислев нипто, тие планираа, тие се договараа и немав право на збор – одговори Кешишев.

– Немавте право на збор, ама секогаш бевте тука присутен? – праша судијата.

– Да – одговори Кешишев.

– На што ја базирате претпоставката, ако е претпоставка, појаснете ни, дека пиштолот е на Боре? – праша судијата.

– Поради тоа што се зборуваше овде и се наведуваше дека Боре имал пиштол. Боре призна дека имал пиштол и дека не знае каде е и по таа логика помислив дека е негов – одговори Кешишев.

– Значи помсиливте дека пиштолот е на Боре од тоа што го чувте во судот, тука во оваа судница? – праша судијата.

– Да – рече Кешишев.

– Утрото кога е извршено грабнувањето на жената, како стигнавте од Радишани до пред зградата? – праша судијата.

– Палчо тргна со „кангуто“ напред, а Вељо го возеше „цитроенот“. До него бев јас, а одзади седеше Боре. Не знам по кои улици стигнавме пред зградата, Велибор возеше. Ја паркираше колата блиску до зградата, на паркинг, на 7 до 8 метри од влезот – објасни Кешишев.

– Откако ја грабнавте што се случи? – праша судијата.

– Влеговме во „цитроенот“, јас седев до него, имав моторола. Се сеќавам кај „Александар Палас“ свртевме лево кон Качанички пат, таму кај подвозникот беше паркиран Палчо со „кангуто“, стигнавме до него, тој тргна напред и Велибор возеше по него со „цитроенот“ – раскажа Кешишев.

– Снимките што ги видовме во судот беа од грабнувањето? – запраша судијата.

– Да. Сѐ добро се виде – рече Кешишев.

– Каде го паркиравте „цитроенот“, а каде „кангуто“? – праша судијата.

– Кога стигнавме се паркиравме еден зад друг. Излеговме сите и Палчо веднаш ми кажа да одам на едно 20 метри да гледам дали ќе наиде некој. Таму кајшто застанав се гледа една викендица и патот – рече Кешишев.

– Како се вративте?

– Палчо го возеше „кангуто“, јас и Боре седевме позади, а Велибор позади нас со „цитроенот“. Кога излеговме на асфалтот едно 500 метри, Палчо ми кажа да ја отворам вратата и да ги фрлам алатите – раскажа Кешишев.

– На кое место отидовте да го запалите „цитроенот“? – праша судијата.

– Отидовме на една рамница, каде нема дрва, за да не направиме пожар – рече Кешишев.

– Колку беше оддалечено тоа место од местото на убиството? – запраша судијата.

– Воздушно околу 1 километар, а по патот, бидејќи се влегуваше в село, можеби имаше 4 до 5 километри – одговори Кешишев.

– Целта на грабнувањето на жената беше за да се земат пари, за откуп? – праша судијата.

– Целото време тоа го зборуваа, за откуп – рече Кешишев.

– Откако го запаливте „цитроенот“ се вративте сите во штабот со „кангуто“? – праша судијата.

– Да. Палчо возеше, Велибор седеше покрај него, а јас и Боре позади – објасни Кешишев.

– Поради тоа што во меѓувреме го видовте пиштолот, дали пиштолот беше позади? – праша судијата.

– Не. Изгледа повторно го вратил во ранецот. Не го видов никаде, па моја претпоставка е дека пиштолот е во ранецот – одговори Кешишев.

Судијата побара од четвртообвинетиот да го опише ранецот.

–  Темно син – одговори Кешишев.

– Тоа е истиот кој го видовме дека го носите во Велес, пред домот на Велибор, еден ден пред убиството на Панче? – праша судијата, а Кешишев одговори потврдно.

– Кога стигнавте во штабот, го извадивте синиот ранец до „кангуто“? – праша судијата.

– Не сум го видел, не сум го фаќал. Не го извадив ранецот од „кангуто“ – рече Кешишев.

– Дали беше чистено „кангуто“ со WD-40? – праша судијата.

– „Кангуто“? Не видов, мислам не – одговори Кешишев.

– Вие како домар ги вршевте сите работи во седиштето на партијата? – праша судијата.

– Да, му бев како десна рака – рече Кешишев.

– Рековте дека не ви дал право на збор. Ви дадоа ли моторола? – праша судијата.

– Па, беа таму – рече Кешишев.

– Сте виделе ли некој од обвинетите да го носи синиот ранец во кој претпоставувате дека било оружјето? – праша судијата.

– Не се сеќавам – одговори Кешишев.

– Само вие го носевте? – праша судијата.

– Не, Палчо го носеше. Јас само го извадив во Велес од „кангуто“ и го внесов во гаражата – одговори Кешишев.

КЕШИШЕВ ПРЕТПОСТАВУВАЛ ДЕКА ВО РАНЕЦОТ ИМА ПИШТОЛ, АМА КАЖАНО МУ БИЛО ДА НЕ ПИПА „Вељо и Боре се договараа како да му пријдат на Панче“

The post „ЗА ОВА НЕ СМЕЕ НИКОЈ ДА ЗНАЕ, ОТИ ГЛАВИ ЌЕ ЛЕТААТ“ Кешишев откри што му зборувал Вељо додека ја копале дупката appeared first on plusinfo.mk.

Обвинетиот Влатко Кешишев денеска во судница негираше дека тој и Велибор Манев ја копале дупката за убиената Вања Ѓорчевска, во местото Бразда.

Тој рече дека ги однел полицајците и до местото каде што биле фрлени лопатите со кои била закопана Вања.

– Јас им го покажав местото. Пред мене ја зедоа лопатата. Имаше уште една лопата и копач, но некој ги зел. Најдена е само една лопата, полицијата коментираше дека другите некој ги зел. Јас едната лопата ја фрлив, а после 20 метри ги фрлив другата лопата и копачот. Не излегував од возилото, ги фрлив низ вратата – рече Кешишев.

– Како успеавте да фрлите лопата од затворено комбе чија врата се отвора однадвор? – праша адвокатот на Љупчо Палевски, Јовица Страшевски.

– Вратата се отвора странично, ја отворив и ја фрлив. Јас знам дека комбето се движеше споро – рече Кешишев.

– Носевте ли ракавици кога ги фрливте лопатите? – праша Страшевски, а Кешишев одговори негативно.

– Ако не сте носеле ракавици, како е можно да нема ваши траги на лопатата? – праша Страшевски.

– Не знам, да не е поради WD-40 – рече Кешишев.

– И вие ли ја бришевте лопатата? – праша Страшевски.

– Не – рече Кешишев.

– Вие бевте заедно на лице место со Боре, Велобор и со Палчо на местото на убиството на Вања? – праша Страшевски.

Кешишев потврди.

– Видовте кој пукаше? – праша Страшевски.

– Видов дека Палчо држи пиштол во рака – рече Кешишев.

– Дали видовте кој пука? – праша Страшевски.

– Бев далеку. Стоев каде што ми кажаа. Тоа може да го потврди Вељо бидејќи беше до него – рече Кешишев.

– Сигурен сте дека Манев беше до него? – праша Страшевски.

– Да – рече Кешишев.

Адвокатот рече дека Манев рекол дека бил на страна.

Тој го праша Кешишев дали можел да излегува од штабот кога ќе посака. Кешишев рече дека излегувал да купува, да го шета кучето, но кога сакал да оди во Хрватска, Палевски му рекол „не бива“, кога сакал да оди во Штип, Палевски го свртел муабетот кон друго.

– Дали вие, Боре, Велибор и Палевски за време на двата настани носевте маски за прикривање на лицето и ракавици? – праша Страшевски.

– Јас не сум носел ни во Велес ни во Скопје. А на лице место не бев и не видов дали носат маски и ракавици. На првиот настан бев премногу далеку. На вториот настан бев на 20 метри, а тројцата стоеја кај колата. Последен пат кога го видов Палчо го држеше пиштолот. Не можев да кажам дека не сум бил таму, бев на 20 метри – рече Кешишев.

– Дали Велибор и Боре носеа маски на лицата и ракавици кога ве повикаа да го донесете „цитроенот“ пред влезот на Вања и вие го отворивте гепекот? – праша Страшевски.

– Не знам, мислам дека не, бидејќи излегоа надвор – рече Кешишев.

– Кој од нив двајцата ја донесе Вања во гепекот? – праша Страшевски.

– Вељо ја носеше – рече Кешишев.

– Како е можно од Фејсбук да дознаете дека е убиено девојчето, а сте биле на лице место? – праша Страшевски.

– По настанот, видов дека девојчето се бара. Отидов кај Палчо и го прашав „што е ова?“ – рече Кешишев.

– Знаете ли отприлика кое време е извршено убиството на Панче? – праша Страшевски.

– Не знам време. Беше претпладне – рече Кешишев.

– Зошто по првото убиство на Панче не се повлековте и не се покајавте, туку продоживте и понатаму да учествувате со другите и во другото убиство? – праша Страшевски.

– Не можев, оти премногу имав слушнато. Уште првиот пат ми кажаа дека никој не смее да знае за тоа, јас тоа го зедов здраво за готово и така се случи – рече Кешишев.

– Зошто ливчето за кое тврдите дека ви го дал Палевски во комбето во кое има и затворски полицајци, не им го пријавивте ним или на Судот или на управата за затворот? – праша Страшевски.

– Затоа што тој ми го даде, имаше доверба во мене, инсистираше да го напишам и да го пратам и знаеше дека нема да го издадам – рече Кешишев. – Ако имате толкава доверба, тогаш од каде ви е стравот од Палевски? – праша Страшевски.

– Страв бидејќи ќе заглавам повеќе – рече Кешишев.

Тој рече дека Палевски го возел „кангуто“ со ракавици и затоа немало траги од него.

Од Кешишев можело да има отпушоци.

– Ако возел со ракавици, од каде потребата да го брише воланот со WD-40? – праша Страшевски.

– Носеше ракавици. Не знам – рече Кешишев.

– Семејниот човек кој беше тука споменат и заштитен со идентитет, за кој за жал никој не покрена постапка да го најдат кој е, а би бил битен за оваа постапка, дали дојде кај вас и од партија го подигна ранецот? – праша Страшевски.

– Никој не дошол да земе ранец, барем пред мене – одговори Кешишев.

ПАЛЕВСКИ ИМАЛ ЦРНА КУТИЈА СО СНИМЕНИ ТЕЛЕФОНСКИ РАЗГOВОРИ Кешишев вели дека им пуштал снимки

The post НЕКОЈ ГИ ЗЕЛ ЕДНАТА ЛОПАТА И КОПАЧОТ Кешишев вели дека само Велибор може да каже кој пукал во Вања appeared first on plusinfo.mk.

Првообвинетиот Љупчо Палевски го испрашуваше четвртообвинетиот Влатко Кешишев на денешното рочиште. Палевски седеше позади во судницата, а Кешишев на првата клупа и гледаше кон судијата. Кешишев беше свртен со грб кон Палевски.

Палевски најави дека ќе даде краток увод пред да ги постави сите 97 прашања. Тој рече дека ги прочитал сите 9 записници на ОЈО и ќе ги користи за да постави прашања.

– Се надевам дека не е тешко кривично дело што имам сознанија кој што кажувал и кој колку лажел и бил контрадикторен сам на себе и што е причина зошто не се читани записниците на Кешишев – рече Палевски пред да почне со вкрстени прашања за Кешишев.

– Кажавте дека сте помагале во штабот со месеци, дали за тоа време сте слушнале закани, навреди, уцени од мене кон вас? Дали сте слушнале на посетители, членови, да се заканувам, навредувам или уценувам? – праша Палевски.

– Не, никогаш – рече Кешишев и додаде дека Палевски секогаш им давал на другите совет.

Кешишев негираше дека Палевски му се заканил на Велибор Манев или дека го уценил.

-Во 3 искази на ОЈО не сте споменале збор ранец, син ранец, па прашувам, кога и зошто сега се сетивте да кажувате сознанија на таа околност – праша Палевски.

– Се сетив бидејќи сите видовме на видеоснимка и не можев да го побијам тоа. Се гледаше дека го земам и го носам ранецот во гаражата – рече Кешишев.

– Каде во штабот сте виделе плав ранец? – пааша Палевски.

– Не се сеќавам – рече Кешишев.

– Велибор Манев тврди дека на едно лице, преку него јас сум порачал да го уништи, цитирам, „пакетот, сѐ тоа“, откако сум во Турција, а вие сте приведен, господине Кешишев, а претресот во Десна е веќе направен. Дали ви е познато ова што го тврди Манев? – праша Палевски.

– Не ми е познато – рече Кешишев.

– Дали во периодот по приведувањето во Демир Капија, сте виделе пиштол во штабот, тоа е периодот 6 месеци пред настаните? – праша Палевски.

– Не сум видел, немало пиштол во штабот – рече Кешишев.

– Сте слушнале ли да разговарам со кого било за оружје? – праша Палевски.

– Не, колку што се сеќавам, пред мене не – рече Кешишев.

– Сте кажале на минатото рочиште дека ранецот го носеше само Палчо, па прашувам каде сум го чувал тој ранец? – праша Палевски.

– Не знам, главно ти го носеше, а не знам каде стоеше – рече Кешишев.

– Кажавте дека синиот ранец сум го носел само јас, а на снимката од ОЈО во дворот на Манев во 00.03 на 22.11.2023 што држите во раката и внесувате во куќата? – праша Палевски.

– Ми кажа да го земам ранецот од „кангито“ и да го внесам во гаражата, исто како и хартиената кеса во која беа моторолите – рече Кешишев.

– Спомнавте хартиена кеса, каде на видеото видовте дека изнесувате хартиени кеси? – праша Палевски.

– Се гледа дека првото е кеса, а второто е ранец – рече Кешишев.

– На монтираните видеа на ОЈО, презентирани на незаконски начин во судот на инсертите каде носите ранец, канистри со гориво, се гледа Палевски или Кешишев и Манев? – праша Палевски.

– Тоа што го видовме сите. Се гледам јас и Велибор, јас го извадив ранецот од „кангуто“, како што ти ми кажа – рече Кешишев.

– Кога и каде последен пат сте го виделе или носеле плавиот ранец? – праша Палевски.

– Мислам дека беше само тогаш, кога го вадам од „кангуто“ и го внесувам во гаража – рече Кешишев.

– Во месноста Дупки, го носевте ли ранецот? – праша Палевски.

– Не, јас цело време бев во „кангото“, не сум носел ранец, не сум го ни видел и не сум излегол од „кангото“ – рече Кешишев.

– На прашањето од вашиот бранител дали знаете каде се пиштолот и моторолите, вие сте одговориле „не, ранецот го носи само Палевски“, па ве прашувам што носевте на 22.11.2023? – праша Палевски.

– Ранецот го носев, но не знам што беше внатре, никогаш не проверувам – рече Кешишев.

– Зошто на прашање за пиштол од вашиот бранител, вие одговарате за ранецот? – праша Палевски, а судијата Ивица Стефановски не го дозволи прашањето.

Палевски сакаше да го преформулира прашањето. Страшевски наведе приговор, па судијата го опомена бранителот Страшевски да го почитува редот во судницата инаку ќе биде парично казнет. Страшевски рече дека реагираЛ процедурално, а судот му одреди казна од 200 евра.

Страшевски реагираше до судијата „Сакате да ме замолчите“, а судијата му реЧе дека ако продолжи ќе му ја дуплира казната.

После тоа атмосферата во судницата се смири и Палевски продолжи со прашања кон Кешишев.

– На минатото рочиште бевте прашан дали знаете каде се пиштолот и моторолите, а вие одговоривте во врска со син ранец, а не со пиштол. Па прашувам, зошто кога ќе ве прашаат за пиштол ве асоцира на плавиот ранец? – праша Палевски.

– Претпоставувам дека во ранецот е пиштолот. Да беше некаде во него, ќе се познаеше. Ако имаше пиштол до тебе, секако ќе се познаеше преку блузата – рече Кешишев.

– Во месноста Дупки, сте биле присутен, а Манев тврди дека пуштолот сум го извадил од „реното кангу“. Дали вие сте виделе такви дејствија? – праша Палевски.

Кешишев негираше.

– На прашање чии се моторолите и пиштолот сте одговориле „моторолите ги купи Палчо, а пиштолот слушнав бил на Боре“. Како знаевте и што значи тоа дека е на Боре? – праша Палевски.

– Не знам. Овде се напоменуваше многу често дека се бара пиштолот на Боре – рече Кешишев.

– Сега спомнавте дека сте слушнавте во Судот дека се бара пиштолот на Боре? Зошто мислите дека токму пиштолот на Боре се наоѓа во синиот ранец? – праша Палевски.

– Не мислев дека се наоѓа во ранецот. Цело време се споменуваше пиштолот на Боре, па претпоставив, помислив дека пиштолот што го бараат се наоѓа во ранецот – рече Кешишев.

Палевски го праша дали при претресот во штабот му биле одземени мачета од пола метар и пиштол плашливец копија од берета, но судијата го прифати приговорот на адвокатот на Кешишев, Игор Ефремов и не го дозволи прашањето.

– Дали при претресот во штабот вршеа претрес во кујната каде вие ги чувавте вашите работи? – праша Палевски.

– Во кујната само погледнаа и не влегоа, бидејќи кучето Хера беше таму. Јас морав да ја држам за да не нападне некого. Беше претресена целата куќа од подрум до кров и немам видено дека имаат изнесено мачета и плашливец пиштол. Од мене го одзедоа телефонот и клучевите од штабот и од „доблото“ – рече Кешишев.

– Дали некогаш се виделе НН пиштол од 9 милиметри, освен, како што кажавте, на настанот кај Дупки? – праша Палевски.

Кешишев негираше.

– Во судот кажавте дека од страв од мене сте напишале изјава која преку КПУ Затвор Скопје сте ја пратиле во судот. Зошто после 10 рочишта ве ставија со мене во комбе? – праша Палевски.

– Кога ме транспортираа бев сместен во комбето со Палчо, тогаш ми даде запис, да го препишам со мој ракопис и потпис и да го пратам до вас. Јас уште тогаш му кажав дека нема да биде ништо од ова, дека се плашам дека нема да испадне ништо од тоа, тој ми рече „ти само прати го и не се секирај“ – рече Кешишев.

– Во врска со спроводите, точно ли е дека сте барале од затворот да ве тргнат од Велибор Манев оти ви вршел притисок? – праша Палевски.

– Да – рече Кешишев.

– Дали таков поднесок поднесовте и за мене? – праша Палевски.

– Кога ја предадов изјавата, кога беше следното судење, пред судот реков дека ми е дадена да ја препишам и да ја пратам. До директорот не пишав писмо, затоа што вие судија донесовте одлука да нѐ транспортираат сами – рече Кешишев.

– Дали сте во самица? – праша Палевски.

– Да, сам сум во собата – рече Кешишев.

– Дали имате закани од некого – рече Кешишев.

– Не, немам контакт со никого, само командир доаѓа – рече Кешишев.

– На почетокот на ова рочиште рековте дека не сум ви се заканувал никогаш. Од што конкретно се плашите? – праша Палевски.

– Имам стравопочитување кон тебе – рече Кешишев.

– Кажавте дека сум ви дал лист со содржина. Каде е листот? – праша Палевски.

– Кога го препишав со мој ракопис, ливчето го скинав и го фрлив. А кога дадов овде изјава дека листот ми е даден за препишување, имав страв дека повеќе ќе заглавам, слушајќи овде сѐ што се кажа – рече Кешишев.

– Кој од сообвинетите беше организатор и инсистираше да се оди во Демир Капија? – праша Палевски.

– Дати не помнам. Најголем иницијатор беше Вељо. Цело време притискаше, навалуваше да се оди во Демир Капија да се бара злато. Тогаш, по многу убедувања Палевски рече ајде, ќе одиме да видите дека нема ништо. Отидовме, Вељо и Боре влегоа во пештерата, а ние останавме надвор, муабетевме додека не дојде полицијата – раскажа Кешишев.

– Откако потпишавме записници со инспекторите од ПС Неготино, дали заедно сите четворица заминавме во ПС Неготино да потпишам одземање на пиштолот кој го поседував со дозвола? – праша Палевски.

– Да, ние чекавме во колата, а ти влезе кај началникот за да потпишеш за пиштолот – рече Кешишев.

– Се сеќавате ли дека почна да се разденува кога пристигнавме кај Велибор во куќата сите четворица од Неготино, по што јас и вие заминавме во Скопје? – праша Палевски.

– Да, се разденуваше, ние двајцата се вративме во штабот – рече Кешишев.

– Дали времињата што се случија во Демир Капија и лицата одговараат на снимките? –  праша Палевски.

Кешишев потврди.

– На околноста палење на „цитроенот“, сте кажале пред Судот и во ОЈО, прво дека јас сум го полеал, а Боре го запалил. А Манев тврди дека јас полевам и јас палам. Дали Манев ја говори вистината? – праша Палевски.

– Ти го поли возилото, а Боре го фрли чкорчето и се запали колата – рече Кешишев.

– Кој што фрлал во „цитроенот“ за да биде запален? – праша Палевски.

– Не видов – рече Кешишев.

– Вие фрливте нешто од она што го носевте со вас? – праша Палевски.

– Не сум фрлил ништо. Ги фрлив лопатите кога ми кажа – рече Кешишев.

– Каква јакна носевте на 22 и на 27 ноември? – праша Палевски.

– Црна јакна и црна качкета, капа – рече Кешишев.

Палевски рече дека при претресот на Кешишев му е одземена јакна која е приложена во судот како доказ, видно од камерите на Макпетрол каде полнел бензин. Тој го праша Кешишев дали ја носел таа јакна на 22 и на 27 ноември 2023 година.

– Не, бев во црната јакна, а таа црвената што е дадена во судот е земена од закачалката во штабот – рече Кешишев.

– Дали на видеото од 22 ноември се гледа таа јакна која не е одземена од полицијата при претресот – праша Палевски.

– Се мислам дека во црна јакна бев тогаш, а другата ми е одземена – рече Кешишев.

Палевски извади фотографија од видео снимките од пред куќата на Манев и праша дали е таа јакната.

– Ако е подолга, е црната – рече Кешишев.

Палевски побара судијата од оригиналните фотографии да извади примерок за да се види бојата на јакната на Кешишев. Но судијата му рече дека не се гледаат боите на снимките.

– Па како тогаш се виде бојата на ранецот? – праша Палевски.

КЕШИШЕВ ГИ ФРЛИЛ ЛОПАТИТЕ ВО ДОЛ СО КАПИНИ Тврди дека другите обвинети пред него не зборувале кој и зошто ќе биде грабнат

The post ГОТВАЧОТ ВЛАТКО МУ ОДГОВАРАШЕ НА „ЦАРОТ“ ПАЛЧО СВРТЕН СО ГРБ Кешишев тврди дека Палевски го полил со бензин „цитроенот“ appeared first on plusinfo.mk.

Денеска продолжи распитот на Влатко Кешишев, четвртообвинет за убиствата на Вања Ѓорчевска и на Панче Жежовски што се случија во ноември 2023 година.

Првообвинетиот Љупчо Палевски остана во судницата, никој не побара да биде отстранет.

За Кешишев немаа прашања Велибор Манев и неговиот адвокат Горан Бошевски.

Бојан Манев, адвокат на Боре Видевски го праша Кешишев од каде тргнале дента на убиството на Панче.

– Во Велес ги чекав паркиран со „кангуто“ кај пругата. Дојдоа по еден саат со „цитроенот“. Ставивме гориво во „кангуто“. Вељо дојде до мене во „кангуто“ и ми кажуваше од каде да возам, а позади нас во „цитроенот“ возеа Палчо и Боре. Покрај езерото тргнавме кон Рудник, јас се паркирав. Вељо излезе од „кангуто“ и тргна со нив со „цитроенот“ кон јамата. Ги чекав околу половина час. Потоа дојде Вељо, седна покрај мене во „кангуто“ и ми кажа каде да возам. Се исклучивме покрај самиот пункт за да излеземе на автопатот. Ми кажуваше каде да возам. Се приклучивме на стариот пат преку Катланово, а зад нас возеа на растојание Палчо и Боре. Имаа контакт со моторола. Стигнавме до првата населба Маџари и Палевски ни кажа да се паркираме на еден голем паркинг плац. Палчо и Боре стигнаа и се паркираа позади нас. Палчо ги избриша воланот и менувачот со WD-40, па влезе во „кангуто“. До него седна Вељо, а јас и Боре бевме позади во „кангуто“ и така стигнавме до штабот – раскажа Кешишев.

– На денот на убиството на Панче, кога влеговте во Велес каде се паркиравте? – праша адвокатот Манев.

– Ние не влеговме во Велес, скршнавме десно кон индустриската зона и по тој пат стигнавме до паркинг блиску до пругата – рече Кешишев.

– Во исказот кажавте дека после убиството на Вања вие ги фрлате лопатите. Може ли да појасните каде ги фрливте? – праша адвокатот.

– Откако излеговме од местото се приклучивме на асфалтот, на патот кон селото Бразда. По 500 метри Палчо ми рече да ги фрлам во еден дол со капини. Јас ги фрлив, мене ми рекоа – рече Кешишев.

– Дали пред убиството на Вања некогаш сте биле во обиколка на зградата каде таа живееше? – праша адвокатот Манев.

– Не сум бил, само првиот пат кога се проба и вториот пат кога се изврши, а претходно не сум бил во обиколка на зградата. Не знам дали останатите биле – рече Кешишев.

– Дали знаете колку влеза има зградата? – праша адвокатот Манев.

– 25. Од каде да знам? – рече Кешишев.

Со ова заврши испитувањето од адвокатот Бојан Манев, а неговиот клиент, обвинетиот Боре Видевски немаше прашања за Кешишев.

Адвокатот Владимир Туфегџиќ, бранител на Александар Ѓорчевски, го праша Кешишев, дали во негово присуство имало разговори за грабнување на други лица пред да се донесе одлука за грабнување на личноста од зградата во Скопје.

– Знаев, првиот пат кога ја ископавме дупката, дека ќе биде наменета за киднапирање луѓе. После тоа не разговарале, колку што се сеќавам, сѐ додека не се случи тоа со Панче во Велес. Да, слушав муабети, но не до крај, бидејќи не ме интересираше. Помина долго време, се правеа тие муабети, но немаше ништо. Јас не се вратив, но не го сфатив тоа здраво за готово додека не се случија тие работи што се случија – рече Кешишев.

– Откако го зедовте „цитроенот“ во Велес и се вративте во Скопје, каде и кога за прв пат слушнавте договарање за киднапирање на друга личност? – праша Туфегџиќ.

– Мислам дека тоа беше кога бевме првиот пат, кога немаше успех. После вториот пат, се случи тоа – рече Кешишев.

– Откако се вративте со „цитроенот“ од Велес, на 15.12.2023 година пред јавен обвинител, изјавивте, цитирам „По ден и пол, околу пладне, дојдоа Велибор и Боре, го донесоа ‘кангуто’ и тогаш се договараа за грабнување на женска личност, но не знам која.“ Дали е тоа точно? – праша Туфегџиќ.

На ова приговараше обвинителката Ана Стојковиќ-Димитровска, која рече дека таков доказ не бил изведен, но судијата го дозволи прашањето.

– Не се сеќавам точно, не лажам, не се сеќавам точно – рече Кешишев.

– Колку средби и состаноци имало во ваше присуство пред да се донесе одлука за грабнување на личноста од зградата во Скопје? – праша Туфегџиќ.

– Не знам точно, неколку пати, кога доаѓаше Велибор во станот се почнуваше таа тема. Не знам колку време траеле тие средби. Не бев до крај присутен и не ги слушав до крај. Не се правдам, не знам точно да одговорам – рече Кешишев.

– Дали на тие средби на кои сте биле присутен сте слушнале некој да спомне дека разговарал со татко на некоја личност што треба да се грабне? – праша Туфегџиќ.

– Не, првпат слушнав тука во судницата – рече Кешишев, кој додаде дека не мислел ништо за тие планови зашто не ги сфаќал сериозно, додека не се случиле.

– Дали, според планот што сте го слушнале, однапред се знаело од каде требало да се бараат пари за откуп на грабнатото лице од зградата во Скопје? – праша Туфегџиќ.

– Не знам, тоа беше договор меѓу нив. Да не ги напаѓам, да не се правдам, не знам – рече Кешишев.

– Дали сте знаеле дека има фотографија од конкретната личност што требало да биде грабната во Скопје?

– Не, прв пат ја видов сликата кога се вративме од настанот во штабот, отворив Фејсбук и ја видов сликата од детето. А дотогаш немав видено никаква слика – рече Кешишев.

– Кога и како за прв пат дознавте за таткото на детето? – праша Туфегџиќ.

– Кога го доведоа во притвор слушнав дека разговараат со таткото на детето? Никогаш не сум слушнал Палевски дека разговарал со Ѓорчевски. А и никогаш не сум го следел со кого разговара – рече Кешишев.

Тој рече дека дента кога била грабнате Вања никој од нив немал телефони, туку само три радиостаници. Рече дека сите телефони најверојатно биле во штабот на Десна.

– Дали слушнавте дека девојчето било по грешка грабнато? – праша Туфегџиќ.

– Не, јас бев околу 20 метри настрана, да гледам дали ќе наиде некој и немам слушнато разговор – рече Кешишев.

– Дали некој во ваше присуство пред убиството на детето се јавил на мајката или на таткото? – праша Туфегџиќ.

– Не знам, не сум чул и не сум видел – рече Кешишев.

– Дали после убиството на детето некој ги спомна мајката и таткото на детето – праша Туфегџиќ.

– Не, сите молчеа, молчев и јас – рече Кешишев.

The post КЕШИШЕВ ГИ ФРЛИЛ ЛОПАТИТЕ ВО ДОЛ СО КАПИНИ Тврди дека другите обвинети пред него не зборувале кој и зошто ќе биде грабнат appeared first on plusinfo.mk.

Иако на минатото рочиште пред два дена Љупчо Палевски Палчо беше отстранет од судницата поради голем страв на Влатко Кешишев од него, денеска четвртообвинетиот ќе мора да се соочи со првообвинетиот. Во Кривичниот суд во Скопје на ред е Палевски да го испрашува Кешишев за грабнувањата и убиствата на 74-годишниот Панче Жежовски од Велес и на 14-годишната Вања Ѓорчевска од Скопје. За свирепите злосторства извршени на 22 и на 27 ноември 2023 година им се суди и на Велибор Манев и Боре Видевски од Велес, а петообвинет е Александар Ѓорчевски за помагање во грабнувањето на неговата ќерка Вања.

Штипјанецот Кешишев на прашања на неговиот адвокат Игор Ефремов раскажа дека го видел Палевски како држи пиштол и го слушнал истрелот со кој ја убил Вања во околината на скопското село Бразда. Убиството на Панче, во близина на селото Рудник кај Велес, не го видел оти бил подалеку, но го слушнал истрелот. Тој не бил активен во планирањето на грабнувањата со цел откуп. Рече дека плановите ги правел Палевски со Манев и Видевски, а тој не се мешал. За двете убиства разбрал дека се случиле дури откако се вратил со останатите обвинети во штабот на партијата Десна.

Рече дека не пријавил за злосторствата во полиција и не се спротиставил, затоа што му било страв од Палевски, кој во телефонскиот именик му бил мемориран под „Царот“. Пред убиствата рече дека сакал да оди во Хрватска да работи како готвач, но Палевски не му дозволил, а по убиството на Панче сакал да оди дома во Штип, но Палевски, исто така, не му дозволил.

Кешишев откри дека слушнал дека убиствата се извршени со пиштолот на Боре Видевски.

Не рече дека е тепан од страна на полицијата, за разлика од Манев и Видевски кои се жалеа дека биле под силна полициска тортура.

Не беше прашан како ги однел инспекторите до местото каде ја закопале Вања.

Кешишев не ја потврди верзијата на Манев дека Вања ја грабнале по грешка и дека било планирано да се грабне ќерка на фармацевт. Тој тврди дека цело време не знаел кого грабнале, затоа што Манев грабнатата личност ја изнел во вреќа од влезот, а тој чекал во „цитроенот“ на Панче. На местото на убиството стоел малку настрана и не видел кого убиле и закопале, а сфатил дека убиле дете кога отворил Фејсбук штом се вратиле во партијата.

Во врска со злосторството врз Панче, Кешишев потврди дека планот бил да се грабне за да му се земе „цитроенот“. Откри дека Панче е грабнат од втор обид, односно дека и претходната вечер сакале да го грабнат, го чекале, ама не успеале. За таа вечер Манев сведочеше дека излегле да проверат како работат радиостаниците и да го разгледаат теренот. На снимките од пред куќата на Манев од таа вечер се гледа како Кешишев се прекрстува кога излегува од гаражата.

Влатко Кешишев е третиот обвинет, по Манев и Видевски, кој пред судот рече дека не го познава таткото Александар Ѓорчевски и кој на ниту еден начин не го поврза со злосторството во кое настрада неговата 14-годишна ќерка.

Адвокатот Ефремов во одбрана на својот клиент пред новинарите рече дека Кешишев бил своевиден заложник на дел од обвинетите и жртва за искористување за нивните потреби и активности. Додаде дека постапувал според волјата на некој друг, по наредби.

По распитот на Кешишев, Палевски се врати во судницата, каде судијата Ивица Стефановски 1 час и 10 минути му го читаше исказот. Палевски побара во притворот да го добие и записникот од сведочењето на Кешишев, за да може да се подготви со прашања за денешното рочиште.

На следното рочиште, во понеделник, треба да сведочи обвинетиот Александар Ѓорчевски.

The post „ЦАРОТ“ ПАЛЧО ЌЕ ГО ИСПРАШУВА „ПОДАНИКОТ“ КЕШИШЕВ Ќе открие ли готвачот уште детали од убиствата на Вања и на Панче? appeared first on plusinfo.mk.

Исказот на Влатко Кешишев е клучен, изјави денеска по неговото сведочење за убиствата на Вања Ѓорчевска и на Панче Жежовски, бранителот Игор Ефремов.

– Се потврди тоа што го кажав во воведните зборови дека истиот нема преземано дејствија кои го ставаат на местото извршител или соизвршител за делата за кои се товари. Тој нема никаква улога во извршувањето на грабнувањата, а уште помалку во извршувањето на убиствата. Слушнавте дека бил во положба на потчинетост на останатите обвинети. Тој посочи дека никогаш не му било дозволувано да даде некаков заклучок, не му бил даван збор. Кога сакал да посочи нешто за партијата, бил негиран и отстрануван од собата. Помеѓу двете грабнувања тој посакал да се врати во Штип кај семејството, но Палевски му забранил да се враќа дома. Летото сакал да оди во Хрватска на работа, но и тоа не му било дозволено – рече Ефремов.

На новинарско прашање дали адвокатот сака да каже дека Кешишев бил злоупотребен од Палевски, адвокатот Ефремов одговори дека Кешишев е своевиден заложник на дел од обвинетите и жртва за искористување за нивните потреби и активности. На забелешка дека не е докажано дека Кешишев дејствувал против својата волја, Ефремов потврди, но додаде дека се докажало дека Кешишев постапувал според волјата на некој друг.

– Тој во јавното обвинителство кажал дека постапувал на начин како му е наредувано, значи постапувал по наредби – рече Ефремов.

На прашање зошто сепак не ги пријавил двете убиства во полиција адвокатот рече дека Кешишев бил во шок и бил исплашен и дека не можел да излегува од канцелариите.

Во врска со писмото кое Палевски му го дал на Кешишев во полициско комбе со наредба да го препише, Ефремов рече дека не поставил прашање зашто сметал дека таа епизода е разрешена.

– Обвинетиот Кешишев на 25 ноември објасни како тоа писмо стигнало до него и како го доставил до судот – рече Ефремов.

Тој објасни дека пред почетокот на исказот на Влатко Кешишев, согласно Законот за кривична постапка, побарале обвинетиот Љупчо Палевски да биде времено отстранет од судницата, затоа што од оправдан страв од него  можело Кешишев да не ја заборува вистината.

– Ова може да се потврди и од досегашниот тек на постапката, односно од обидот за влијание, со исказот што требаше да го даде Кешишев, поточно изјавата доставена од негова страна до судот, која претходно му ја дал Палевски и му наредил да ја препише и да ја потпише. Во таа изјава Кешишев сам се става на места на кои не бил и кажува дека презел дејствија што не го презел, а сето тоа поради страв – рече Ефремов.

ПАЛЧО ФРЛИЛ ЧКОРЧЕ И ГО ЗАПАЛИЛ „ЦИТРОЕНОТ“ Истрелот што го слушнал Кешишев при убиството на Панче бил потап

The post ИСКАЗОТ НА КЕШИШЕВ Е КЛУЧЕН Бил потчинет на останатите обвинети, но не е извршител, вели адвокатот Ефремов appeared first on plusinfo.mk.

Обвинитиот Влатко Кешишев рече дека не видел дали во „цитроенот“ биле ставени докази пред да биде запален, одговарајќи на вкрстени прашања од обвинителката Жаклина Крстевска Јосифовска.

Адвокатот на Љупчо Палевски, Јовица Страшевски побара Палевски да биде повикан во судницата, но судијата Ивица Стефановски не дозволи.

– Рековте дека без надомест сте работеле во партијата од 2021 година. Како се согласивте да работите без пари, кога зад вас сте имале преголемо искуство како готвач во Германија, Швајцарија, Црна Гора, Хрватска? Логично ли беше да не примате надомест за повеќе години ангажман во партијата?

– Јас прифатив од патриотски аспект. Да помогнам колку можам. Дојдов за да спремам пици и сендвичи за децата од училиштето во близина – рече Кешишев.

– Вие живеевте без пари од 2021? – праша обвинителката.

– Да. Имавме помош од членови и симпатизери, и секогаш беше платен интернетот и сметките и имавме секогаш и храна и тутун – рече Кешишев.

– Рековте дека сте учествувале во копањето на дупката во Велес во повеќе наврати и сте помислиле дека копате злато. Најдовте ли злато во дупката?

– Не. Во почетокот копавме до одредена длабочина. Не разговаравме ништо околу тоа, само работевме. Кога ми кажа Вељо која е намената на таа дупка, ми рече дека за тоа не смее никој да знае, дека за тоа може и глави да летаат. Така јас го разбрав, дека мора да молчам – рече Кешишев.

– Значи, ви беше познато дека дупката е наменета за негативни настани – праша обвинителката.

– Да – рече Кешишев, но додаде дека не му е познато како било избрано местото за копање на дупката во Велес и дека тоа било договор меѓу Палчо и Вељо, дека тие го одбрале местото.

Тој потврди дека Палевски му кажувал каде да чека, каде да се паркира.

– Видовте ли кај обвинетиот Палевски пиштол во седиштето на партијата Десна? – праша обвинителката.

– Во почетокот, да, го видов неговиот пиштол. Тој му беше одземен во Демир Капија. Откако му го одзедоа, друг пиштол не сум видел – рече Кешишев.

– Го спомнавте настанот во Демир Капија на 05.05.2023 година. Таму ли бевте да копате злато? – праша обвинителката.

– Да. Вељо нѐ натреа сите да одиме таму, имало злато во една пештера. Не најдовме таму злато. Боре и Вељо влегоа во пештерата, а јас и Палевски седевме надвор, на бетонски ѕид. Пушевме и чекавме да излезат. Дојде полиција, нѐ праша што правиме. Во тој момент излегоа Боре и Вељо, нѐ претресоа, го најдоа пиштолот на Палевски таму каде што седевме кај реката. Прашаа чиј е, тој рече дека е негов. Нѐ однеса во полициска станица во Неготиво и Палчо влезе кај началникот да даде изјава за пиштолот и се вративме во Скопје – раскажа Кешишев.

Тој рече дека на 22.11.2023 година кога оделе кон Рудник не го носел со себе мобилниот телефон. Го имал оставено во штабот во Скопје.

– Логично ли ви беше, ако не одите да убивате некого, да го оставите вашиот телефон во Скопје, со цел да не се открие ваквото движење? – праша обвинителката.

– Не отидовме да убиваме. Никогаш не се правеле муабети и планови за тоа. Се зборуваше само за грабнување. Јас го оставив мобилниот бидејќи имавме мотороли. Никогаш никој не спомнал убиства – рече Кешишев.

– Логично ли ви беше тогаш, откако сте ги дочекале другите тројца обвинети да се вратат од кај дупката, да не разговарате со нив ништо и да не ги прашате што се случило со лицето? – праша обвинителката.

– Не знам дали е логично, но никој не разговараше. Кога стигнавме во штабот, направив кафе и тогаш се напомена дека е убиен – рече Кешишев.

– Од ваша страна немаше никаква реакција за тоа дека се случило убиство на 22.11.2023 во Велес? Точно ли е дека иако дознавте дека грабнатиот Жежовски е убиен, а вие не сте се согласиле на тоа, вие никаде не пријавивте? – праша обвинителката.

– Не пријавив. Прво бев збунет, а после не можев да го напуштам штабот – рече Кешишев.

– Во вашиот мобилен што сте го користеле во критичниот период обвинетиот Палевски ви е мемориран како „Царот“. Тоа значи дека слушавте сѐ што ќе ви нареди? – праша обвинителката.

– Да – рече Кешишев.

– Од психијатриското вештачање од вешто лице вие сте здрава лилност со уредна интелигенција. Вие свесно сте ги преземале сите дејствија, така? – праша обвинителката.

– Не баш свесно. По навика сум му послушен. И кога ќе ми каже да не зборувам, да седам настрана, јас ќе седам настрана. И ќе слушам – рече Кешишев.

– Во вашиот телефон пред настаните сте имале комуникација со Палевски и поголемиот дел од комуникациите сте ги избришале по 27.11.2023 година. Точно ли е? – праша обвинителката.

– Не. Комунициравме кога имаше потреба. За пазарување ми се јавуваше, од состанок ми се јавуваше. Не сум бришел комуникации, не знам како се бришат – рече Кешишев.

– Контактите со Велибор Манев од истиот телефон од 23.11.2023 дали сте ги избришале на 25.11.2023? – праша обвинителката.

– Не сум бришел – рече Кешишев.

– Од изготвената анализа на вашиот телефон произлегува дека сте имале комуникација и со Баге Палевски на 30.11 и на 01.12.2023? – праша обвинителката, а Кешишев негираше.

Кешишев рече дека не му бил познат теренот околу зградата на Вања, ниту знаел каде има камери.

– Точно ли е дека бевте сигурни дека на 24.11.2023 личноста ќе дојде сама од лифтот? – праша обвинителката.

– Не знаев ништо за тоа. Договорот и планот што треба да се прави беше договорен меѓу нив. Мене ми беше кажано само „ „цитроенот“ да го поместам до влезот – рече Кешишев.

– Однапред знаевте дека „цитроенот“ ќе биде запален? – праша обвинителката.

– Така ми рекоа – рече Кешишев.

– Можевте да заклучите дека учествувате во настан во кој ќе треба да се сокријат секакви траги? – праша обвинителката.

– После сѐ, да – рече Кешишев.

– Ако слабо го познавате Скопје и неговите улици, како ги однесовте овластените службени лица до местото Дупки кое е на поголема одалеченост од Скопје и на непозната локација?- праша обвинителката.

– Ми беше свежо сеќавањето. Им реков село Бразда, кога стигнавме таму, самиот пат ми е познат – рече Кешишев.

– Рековте дека не сте разговарале ништо по убивањето на Жежовски, како и во наредните денови. Ви стана ли чудно што заминал за странство, во Белград, а требаше да одржите конгрес. Го прашавте ли за конгресот кога ви се јави? – праша обвинителката.

– Јас не правев со него муабет на таа тема – рече Кешишев.

– Не го прашавте ли ништо и за убиството од 27.11.2023? – праша обвинителката.

– Кога ја видов сликата од детето на Фејсбук, отидов кај него во канцеларија, му ја покажав и прашав што е ова? Немаше одговор и сѐ ми стана јасно, дека во вреќата било детето кое се бара на Фејсбук – рече Кешишев.

– Откако замина Палевски за Белград, вие не отидовте да пријавите што се случи? – праша обвинителката.

– Свесно или несвесно јас не можев него да го предадам. Уште не бев свесен за целата ситуација – рече Кешишев.

Тој потврди дека биле на куќна слава кај Вељо ама рече дека не помни датуми.

Кешишев потврди дека сѐ што било прикажно претходно на видео снимките е вистина.

– Рековте дека откако останатите го грабнале Панче, сте се упатиле кон Рудник. Значи ли тоа дека тргнавте точно кон дупката што претходно сте ја ископале? – праша обвинителката.

– Да – рече Кешишев.

За настанот на 27.11.2023 година кој ни го опишавте денеска, точно ли е дека додека ја чекавте Вања возилото за цело време работеше? – праша обвинителката.

– Да – рече Кешишев.

Тој рече дека дупката во која е закопана Вања е ископана на денот на убиството, а не претходно.

– Точно ли е дека жртвата била прво ставена во дупката, а потоа е пукано во неа? – праша обвинителката.

– Јас стоев подалеку, не знам – рече Кешишев.

Тој исто така рече дека знае и не видел дали пред да го запалат „цитроенот“ во него биле ставени сите работи кои се траги од злосторството.

– Рековте дека сте ги слушале Велибор и Палевски како прават планови за изнуда, а сепак учествувавте. Значи ли тоа дека и вие сакавте дел од парите? – праша обвинителката.

– Не значи. Јас не ги ни сфаќав сериозно дека ќе го направат тоа. А пари не ме интересираат, можам сам да направам пари со работа во Хрватска – рече Кешишев.

– Значи, и откако е убиен Панче, вие не ги сфаќавте работите сериозно? – праша обвинителката.

– Не се правдам, ама јас не бев свесен што се случи – рече Кешишев.

– Не сте сфаќале ништо сериозно, но сепак заедно со Палевски сте купиле лопати и копач и свесно сте ги понеле со себе дента кога требало да биде грабната личноста? – праша обвинителката.

– Не можам да кажам дека е свесно. Ги купивме, ги ставивме во автомобилот. Не сум го прашал зошто му се лопатите – додаде Кешишев.

ИСКАЗОТ НА КЕШИШЕВ Е КЛУЧЕН Бил потчинет на останатите обвинети, но не е извршител, вели адвокатот Ефремов

The post ПАЛЕВСКИ МУ БИЛ СНИМЕН ВО ТЕЛЕФОНОТ ПОД ПРЕКАРОТ „ЦАРОТ“ Кешишев не видел дали во „цитроенот“ биле ставени докази пред да биде запален appeared first on plusinfo.mk.