Претставници од 31 медицинска установа од 19 држави од Европа ќе присуствуваат на одбележувањето на првата годишнина од трагичниот пожар во дискотеката „Пулс“, беше најавено денеска на прес-конференцијата на Организацискиот одбор и градоначалникот на Кочани, Влатко Грозданов.

Градоначалникот Грозданов апелираше до граѓаните во текот на тридневното одбележување на најголемата трагедија на Кочани во која загинаа 63 луѓе да се воздржат од излегување на улица со автомобил, со цел странските делегации да можат слободно да се движат низ градот. Тој нагласи дека полициски службеници ќе го регулираат сообраќајниот режим.

Грозданов упати препорака до јавниот и до приватниот сектор во градот да ги ослободат вработените од работните обврски, за да може сите заедно на достоинствен начин да им оддадат почит на жртвите во пожарот што се случи минатата година на 16 март.

Содржините за одбележувањето на годишнината ќе се одржат од 14 до 16 март на различни локации.

Одбележувањето ќе почне со богослужба во храмот „Свети Георгиј“ во Кочани. Во 8 часот ќе се одржи литургија за упокоените, а во 9.30 часот – општ парастос. Во 10.45 часот на Градските гробишта ќе биде одржано опело за жртвите од катастрофалниот пожар.

На 15 март, во 9 часот ќе се одржи рекреативна трка и велосипедска тура на релација Штип-Кочани во чест на загинатите 63 млади лица. Во исто време ќе започне и првиот меморијален планинарски марш „Ивона Антова и 63 ангели“, на Пониква.

Во 10 часот во спортската сала кај гимназијата во Кочани ќе се одржи кошаркарски турнир меѓу повредените во трагедијата.

Во Центарот за култиура „Бели мугри“ во 13.30 часот ќе биде прикажан музичко-балетски перформанс насловен „Кочани ви благодари“, по што следува концерт на Марко Виденовиќ и триото „Мевлем“. Во 17.30 часот во еден од салоните на „Бели мугри“ ќе биде промовирана книгата „Ќе те има“ од Марина Стојчевска.

На 16 март во 2.15 часот пред дискотеката „Пулс“ ќе се одржи настан насловен „Светлина што останува“, а во 7 часот ќе почне трката Свети Николе-Штип-Облешево-Кочани.

Во Паркот на револуцијата во Кочани во 8.45 часот ќе биде поставена симболичната инсталација „63 бели столчиња – 63 животи“, со муралот „Ѕид на сеќавање“, посветен на жртвите.

Во 9 часот е предвиден прием на гости и делегации во Општината, а во 10 часот ќе се одржи молитва за упокоените.

Комеморацијата „Ден на сеќавање – 16 март 2025“ ќе се одржи во 10.30 часот во Центарот за култур „Бели мугри“.

Во 12.30 часот ќе се отвори меморијалот „Недовршени соништа – секое име е нечиј свет“, со што ќе заврши тридневното оддавање почит кон загинатите во пожарот во кочанската дискотека.

The post ТРИ ДЕНА ВО КОЧАНИ ЌЕ СЕ ОДБЕЛЕЖУВА ГОДИШНИНАТА ОД ТРАГИЧНИОТ ПОЖАР ВО „ПУЛС“ Ќе дојдат медицински работници од 19 држави во Европа appeared first on plusinfo.mk.

Постигнувањето на цензусот е доказ за достоинството и чесноста на граѓаните на Кочани, рече денеска кандидатот на ВМРО-ДПМНЕ за градоначалник на Кочани, Влатко Грозданов, кој ќе оди во вториот круг на локалните избори.

Грозданов порача дека само преку заедништво, отворена комуникација и заедничка одговорност може да се создаде подобра иднина за сите.

– Ова е една од најтешките изборни трки во историјата на Кочани. Една трка со најголем товар, како за мене, така и за моите противкандидати. Но, сепак моите кочанчани, моите сограѓани, се одважија и пред сè, со постигнувањето на цензусот за легитимност на изборите, покажаа дека се достојни и чесни и секако, со самиот резултат кој го доделија во моментот ја покажаа својата визија за иднината – рече Грозданов во гостување на Телма.

Грозданов им се заблагодари на сограѓаните за поддршката, истакнувајќи дека таа го охрабрува уште посилно и поодговорно да работи. Тој порача дека само со обединување и заедничка работа може да се обезбеди подобра иднина за Кочани.

– Со овој резултат, моите сограѓани ми дадоа една поддршка, но тоа не ме воздигнува, туку напротив, ме охрабрува што посилно, попосветено, почесно да се посветам на ова. Доколку бидам избран за градоначалник на Кочани, заедно со нив, сплотени, чесно, одговорно, со комуникациски методи помеѓу нив, едноставно мора да се сплотиме и заедно да продолжиме сите. Претстои иднина за нашите деца, претстои иднина за Кочани. Кочани мора да се исправи – рече Грозданов.

The post ПОСТИГНАТИОТ ЦЕНЗУС Е ДОКАЗ ЗА ДОСТОИНСТВОТО НА КОЧАНИ Ова е најтешката изборна трка во историјата на градот, вели Грозданов appeared first on plusinfo.mk.

Владејачката ВМРО-ДПМНЕ вечерва го претстави својот натпартиски кандидат за градоначалник на Кочани – доктор Влатко Грозданов. Од партијата порачаа дека со оваа одлука испраќаат јасна порака дека интересот на граѓаните е над партиските разлики.

– Во Кочани, ВМРО-ДПМНЕ ќе застане зад натпартискиот кандидат д-р. Влатко Грозданов – изјави Марија Митева, член на Извршниот комитет на партијата, нагласувајќи дека тој претставува личност со интегритет и доверба кај жителите на градот.

Покрај оваа одлука, ВМРО-ДПМНЕ ги објави и останатите кандидати: Бети Стаменкоска Трајкоска за Кисела Вода, Мирослав Славковски за Старо Нагоричане, Илија Тентов за Дојран, Сашко Велјановски за Долнени и Даниел Павловски за Ранковци.

Од партијата велат дека се убедени оти со оваа кадровска структура ќе понудат квалитет и решенија за локалните заедници.

– Кандидатите за градоначалници убедливо водеа на сите внатрепартиски анкети и анализи. Сите кандидати на ВМРО-ДПМНЕ се посветени личности, подготвени да ги застапуваат интересите на секој жител, во секое населено место. Тие се луѓе кои имаат енергија и решителност да работат за подобро утре на граѓаните, сите се посветени и дополнително ќе бидат ангажирани за развој на општините и државата воопшто – рече Митева.

Сите тие ќе работат во насока на стабилни и силни општини, а воедно и за стабилна и силна држава.

– ВМРО-ДПМНЕ секој ден покажува дека работи за доброто на секој граѓанин, на секое населено место и на државата воопшто. Ги повикуваме граѓаните да ја поддржат визијата на ВМРО-ДПМНЕ, да изградиме подобра и поквалитетна иднина за сите – додаде Митева.

The post ВМРО-ДПМНЕ СО НАТПАРТИСКИ КАНДИДАТ ВО КОЧАНИ Соопштени имињата и за Кисела Вода, Дојран, Старо Нагоричане, Долнени и за Ранковци appeared first on plusinfo.mk.