Во демантот на ВМРО-ДПМНЕ се вели:

„Не постои документ подготвен од Републичкиот изборен штаб на ВМРО-ДПМНЕ за злоупотреба на изборниот процес, како што се наведува во емисијата на Фуркан Салиу и потоа прераскажани од СДСМ.

Потписите на документот се целосно измислени и не кореспондираат со реалните. Иако видовме дека за СДСМ е нормално да го згрешат презимето на нивниот лидер Ковачевски, веројатно разумно и логично е ВМРО-ДПМНЕ да си ги препознава луѓето и потписите од својата партија, нешто што не е случај и во посочениот и измислен документ, што само кажува кој е изворот на веста.

Сметаме дека изворот на ваквите информации се од кујната на СДСМ, кои очајнички прибегнуваат кон дезинформации, фалсификуваат документи соочени со претстојниот пораз“.

Откако синоќа новинарот Фуркан Салиу објави сторија за постоење „оперативен план, меѓу другото и за креирање на лажни вести“, утрово со наводни документи излезе и владејачката СДСМ. Според клеветничките обнвинувања, задолжен за тоа, освен шефот на центарот за комуникации на ВМРО-ДПМНЕ, Луке Галевски, бил и Владимир Божиновски, сопственик на Агенцијата ИПИС, која од 31 јануари па до денес прави анкети за МТВ.

На ова, ВМРО-ДПМНЕ возвраќа:

„На времето правеа бугарски летоци, сега измислуваат документи. За парите дадени на Асаф Исеин можеле да бидат барем малку покреативни во измислувањето.

Поминува времето кога Ковачевски може шеретски да седи на влада и да одлучува кој што ќе прави. Да потсетиме, на седница на влада со која раководи Димитар Ковачевски е доделено државно земјиште за фотоволтаици на неговата сопруга по цена од 1 евро за метар квадратен. Додека Ковачевски беше заменик министер за финансии и мандатар на состав на влада, неговиот кум Паунов преку фирмата Пиксел груп добивал државна помош. Бараме СДСМ да се извини за ваквите лаги, во спротивно ќе следи тужба за клевета“.

The post СДСМ ФАБРИКА ЗА КЛЕВЕТИ Некогаш измислуваа бугарски летоци, сега измислуваат таен план за лажни анкети и лажни вести appeared first on plusinfo.mk.

Целта на техничката влада е на 100 дена пред изборниот ден да се воведат контролни механизми во клучните ресори каде што се трошат државните ресурси, но ако таа контрола не постои, односно ако на опозицијата не ѝ биде овозможено да предложи свои технички министри и заменици, тогаш таа влада не е техничка, туку повторно е политичка, без оглед на тоа дали техничкиот премиер е Македонец или Албанец.

Вака политичките аналитичари ја коментираат можноста предлогот за состав на техничката влада што ќе биде доставен до Собранието да има празни места во делот каде што треба да фигурираат имињата на министрите од ВМРО-ДПМНЕ.

Па така, доколку ВМРО-ДПМНЕ остане на ставот да не гласа за техничката влада и доколку не ги поддржи нивните предлози, тогаш за нив нема да гласаат ниту пратениците од владината коалиција.

Предлогот за креирање половична влада е еден обичен политички аматеризам од страна на власта. Ние практично нема да имаме министри во неколку сектори. Кој ќе ги потпишува платите, на пример?

Никола Мицевски Пратеник, ВМРО-ДПМНЕ

Во таков случај, местата на опозициската партија во техничката влада би останале неисполнети, па оттаму е и загриженоста на координаторот на пратеничката група на ВМРО-ДПМНЕ, Никола Мицевски, кој предупредува на опасноста да нема кој да потпишува плати и други решенија во секторите каде што нема да бидат назначени министри.

– Оставката на претседателот на Владата повлекува и оставка на целата Влада, а тоа значи дека датумите коишто ги соопштуваат како можни датуми за оставки на премиерот и на претседателот на Собранието, практично е оставка на целата Влада. Така што, предлогот за креирање половична влада е еден обичен политички аматеризам од страна на власта. Ние практично нема да имаме министри во неколку сектори. Кој ќе ги потпишува платите, на пример? Ние не можеме да имаме дополнителни министри или заменици-министри кога законот е сосема јасен: орган на управа е Владата, а со Владата управуваат министри – објаснува Мицевски.

Интересно е тоа што ваквиот развој на настаните, во поглед на проблемите со формирањето техничка влада, не е единствен пример на којшто се сеќаваат граѓаните.

Во 2016 година, за време на гласањето за техничка влада на ВМРО-ДПМНЕ на чело со тогашниот технички премиер Емил Димитриев, пратениците на СДСМ ја напуштија седницата за избор на техничка влада. На таа седница СДСМ не ги гласаше своите кандидати за министри.

Тогашните технички министри за внатрешни работи Оливер Спасовски и за труд и социјала Фросина Ременски дадоа заклетва дури 3 дена подоцна, а ВМРО-ДПМНЕ воопшто не се закани со санкции за таквото кршење на законот од страна на СДСМ.

Политичкиот аналитичар Владимир Божиновски вели дека ниту некогаш се видело, ниту некогаш се чуло да се формира техничка влада без опозиција.

– Никако не е изводливо, затоа што не постои полупразна или полуполна влада. Мандатарот предлага состав на новата влада којашто треба да добие поддршка од мнозинството пратеници, а во тој состав на влада има повеќе ресори. Доколку вие не предложите министри за тие ресори, тоа значи дека ресорите треба да се укинат. Така што, не постојат празни места или влада во којашто ќе имаме министри на чекање. Мнозинството е 61 пратеник, па кој ќе гласа за таа влада и дали воопшто ќе се собере 61 пратеник, правото воопшто не навлегува во тоа дали ќе гласаат пратеници од ДУИ, СДСМ, ВМРО-ДПМНЕ или на било која друга парламентарна партија – објасни Божиновски.

Ако во техничката влада не учествуваат министрите од опозицијата и не се воспостави заштитниот механизам, додаваат експертите, тогаш може да си остане политичката влада, бидејќи нема да има потреба од формирање техничка влада.

– Тогаш веќе немаме техничка влада, туку имаме политичка влада, односно тоа што го тврдеше ВМРО-ДПМНЕ дека целата игра всушност со техничката влада е да се исполни ветувањето кон ДУИ во последните 100 дена од мандатот на оваа влада да добие свој премиер – посочи Божиновски.

Поранешниот претседател на Државната изборна комисија (ДИК) и поранешен генерален секретар на Собранието, Александар Новаковски, во интервју за Канал 5 изјави дека техничката влада теоретски би можела да функционира и без учество на најголемата опозициска партија во неа, но како што вели, со тоа ќе се отворат низа правни прашања кои ќе доведат до сериозни последици меѓу кои и оспорување на нејзиниот легитимитет.

– Главната цел на формирањето на техничката влада беше учеството на најголемата опозициска партија во неа, која, преку клучните министерски позиции – Министерство за внатрешни работи и Министерство за труд и социјала – ќе ја контролира власта при спроведувањето на изборите за да се спречат евентуални злоупотреби. Ако опозицијата не се согласи да номинира свои технички министри и заменици, може да се доведе во прашање и да се оспори законски таа техничката влада иако не носи суштински одлуки и нема мандат за тоа – вели Новаковски и додава дека се надева дека ВМРО-ДПМНЕ сепак ќе биде дел од техничката влада.

Оставките на премиерот Димитар Ковачевски и на претседателот на Собранието Талат Џафери се најавени за в четврток, пред новата седница на Собранието закажана за в петок, 26 јануари, кога би биле констатирани оставките и би бил избран новиот претседател на Собранието, Јован Митрески, актуелен координатор на пратеничката група на СДСМ.

Изборот на техничката Влада треба да биде в недела на 28 јануари. Владата треба да биде избрана најдоцна до полноќ, а ќе ја предводи новиот технички премиер Талат Џафери.

The post ТЕХНИЧКА ВЛАДА БЕЗ ОПОЗИЦИЈА – И ИЗГЛЕДА ШАШАВО И НЕ ФУНКЦИОНИРА! Ќе настане хаос, многу луѓе ќе останат без плати appeared first on plusinfo.mk.

Но, прашањето што сега е од клучна важност е дали Руфи Османи ќе биде единствениот кандидат Албанец за претседател на претстојните претседателски избори, или, пак, ДУИ сепак ќе биде принудена да ѝ откаже љубов на СДСМ и да предложи свој кандидат, наместо да го поддржи Стево Пендаровски, кој најверојатно ќе се бори за втор мандат.

Ако албанската опозиција лансира свој кандидат, а тоа не го стори ДУИ, тогаш голем дел од гласачите Албанци би гласале за кандидатот Албанец, коментираат политичките аналитичари. Од друга страна, ако и ДУИ оди со свој кандидат, посочуваат експертите, тогаш би имало двајца кандидати Албанци, а би се загубила поддршката за кандидатот на СДСМ.

Политичкиот аналитичар Владимир Божиновски во разговор за Плусинфо зборува за сите можни сценарија што би можеле да се случат доколку ДУИ предложи свој кандидат за претседател на претседателските избори, односно ако ДУИ не предложи свој кандидат и го поддржи кандидатот на СДСМ.

– ДУИ е во многу деликатна ситуација. Доколку албанската опозиција излезе со свој кандидат за претседател, а партијата на Али Ахмети го поддржи кандидатот на СДСМ и не излезе со свој кандидат, тоа ќе им даде дополнителна мотивација на самата албанска опозиција и на нејзините поддржувачи. Од друга страна, ДУИ ќе треба цела недела да тера кампања за кандидатот на СДСМ, а тоа е многу деликатно, бидејќи ќе се поврзе кампањата за претседателските со кампањата за парламентарните избори. Плус, самиот прв круг на претседателските избори е многу важен сигнал околу самиот рејтинг на политичките партии, па на него може да гледаме како на една голема политичка анкета. Во пракса, тоа значи дека тие што ќе постигнат поголем резултат на претседателските избори ќе добијат ветер во грбот за парламентарните избори, и обратно. Без разлика на актуелните рејтинзи, резултатите од првиот круг на претседателските избори многу ќе влијаат врз резултатите на парламентарните избори. Доколку изборите беа раздвоени и доколку не се одржуваа во ист ден, тогаш претпоставувам дека ДУИ без проблем ќе го поддржеше кандидатот на СДСМ. Но, сега се споени изборите и партијата на Али Ахмети се наоѓа во многу лоша ситуација – објаснува Божиновски.

На Бихаќка се свесни за ситуацијата и многу добро знаат дека евентуалната одлука на Ахмети да промовира свој кандидат за претседател ќе значи тежок пораз за СДСМ на претседателските избори, кој дополнително ќе се одрази и на парламентарните избори

Владимир Божиновски Аналитичар

Доколку ДУИ сепак не излезе со свој кандидат за претседател, додава тој, тогаш голема е веројатноста албанските гласачи во Македонија да гласаат за единствениот кандидат Албанец од редовите на опозицијата.

– Може да се случи голем дел од албанските гласачи да не излезат на изборите, но тие што ќе излезат дефинитиво ќе гласаат за кандидатот Албанец. Зошто некој би очекувал албански гласачи да гласаат за кандидат на СДСМ кога веќе им е понуден кандидат Албанец? Од друга страна, пак, доколку и ДУИ сепак одлучи да излезе со свој кандидат за претседател, а истото го стори и албанската опозиција, тогаш тоа ќе претставува дополнителен удар за СДСМ. Тоа е најлошото сценарио што може да ѝ се случи на партијата на Димитар Ковачевски. Сето она што се случува во изминатиот период и сета таа сервилност на СДСМ кон коалициските партнери, особено кон ДУИ, е базирано на таа молба за поддршка на кандидатот за претседател. На Бихаќка се свесни за ситуацијата и многу добро знаат дека евентуалната одлука на Ахмети да промовира свој кандидат за претседател ќе значи тежок пораз за СДСМ на претседателските избори, кој дополнително ќе се одрази и на парламентарните избори – вели Божиновски.

И поранешниот министер за финансии Џевдет Хајредини за Плусинфо коментира дека ДУИ нема да може да ги натера албанските гласачи да гласаат за кандидатот на СДСМ ако истовремено им се нуди можност да гласаат за кандидат Албанец од редовите на опозицијата.

– Според искуството од досегашните претседателски избори во земјава, една појава е константна: мал број Албанци гласаат во вториот круг за избор на претседател на државата. Обично во првиот круг бројот на албански гласачи е голем затоа што албанските политички партии ја користат можноста за меѓусебно да си ја измерат силата. Веројатно се сеќавате дека Али Ахмети се фалеше со победата на Стево Пендаровски на претходните претседателски избори, но тогаш дојде тогашниот премиер Зоран Заев и му ја затна устата со тоа што јавно кажа дека Пендаровски не е избран со гласовите на Албанците во земјава. Во моментов, сите секојдневни скандали и афери ги ставаат СДСМ и ДУИ во една многу тешка ситуација – изјави Хајредини.

Точно е, посочува тој, дека постојат гласини дека СДСМ и ДУИ веќе почнале да одат по амбасади и да ги молат амбасадорите да ѝ наредат на албанската опозиција да не вади свој кандидат за претседател за да не би морала и ДУИ да вади кандидат.

– Ако албанската опозиција понуди кандидат Албанец, а тоа не го направи ДУИ, тогаш најголемиот дел од албанските гласачи во земјава би гласале за кандидатот Албанец, без разлика од која партија е поддржан. Но, лично јас не верувам дека странците, односно амбасадите би можеле нешто да сменат во однос на оваа работа – рече Хајредини.

Како што потврди и лидерот на опозициската ВМРО-ДПМНЕ, Христијан Мицкоски, наводно вицепремиерот Бојан Маричиќ во име на СДСМ барал од амбасадорите да направат притисок врз Изет Меџити, Африм Гаши и Билам Касами да се откажат од намерата да номинираат кандатот за шеф на државата.

Ако се случи ДУИ да промовира свој кандидат за претседател, тогаш гласовите на Албанците ќе бидат поделени, а според проценките, во таков случај ќе се зголеми и разликата помеѓу кандидатите на СДСМ и на ВМРО-ДПМНЕ. Тоа, пак, би ги демотивирало поддржувачите на СДСМ да го дадат гласот на 8 мај кога заедно со вториот круг на претседателските избори ќе се одржат и парламентарните избори.

Од ВМРО-ДПМНЕ брифираат дека разликата во првиот круг ќе биде изнесува околу 150.000гласови во полза на нивниот кандидат, а во вториот круг таа бројка ќе порасне. Партијата на Мицкоски веќе најави дека ако ДУИ остане без свој кандидат за да го поддржи кандидатот на СДСМ, тогаш шансите за било каква соработка во иднина ќе бидат сведени на – нула.

Засега, пратеничката Гордана Силјановска е најсериозен кандидат за кандидат од редовите на ВМРО-ДПМНЕ, но конечниот избор ќе се случи на партиската конвенција која е закажана на почетокот на март.

Во СДСМ, пак, сѐ поголеми шанси добива актуелниот шеф на државата Стево Пендаровски, иако во игра е и актуелниот министер за внатрешни работи Оливер Спасовски.

Од албанската опозиција велат дека нема да отстапат од намерата да имаат кандидат за шеф на државата.

– Дефинитивно ќе имаме наш кандидат за претседател на претстојните претседателски избори – потврди Изет Меџити од Демократското движење за Плусинфо.

Според неофицијални информации, поранешниот претседател на Националната демократска преродба, Руфи Османи, е потенцијален кандидат за претседател од редовите на албанската опозиција.

Првиот круг од претседателските избори е на 24 април, додека вториот круг на 8 мај, кој ќе се одржи заедно со парламентарните избори.

The post РУФИ ОСМАНИ КАНДИДАТ НА АЛБАНСКАТА ОПОЗИЦИЈА ЗА ПРЕТСЕДАТЕЛ? Да не си му во кожата на Али Ахмети! appeared first on plusinfo.mk.

Според Божиновски, единствен политички адут на СДСМ биле уставните промени и со оглед на тоа што тие не успеале, разликата на парламентарните избори ќе биде најмалку 20 пратеници во корист на ВМРО-ДПМНЕ.

– Сега нема промена на уставот, разликата може само да се зголемува. Како поминува времето така расте довербата дека ВМРО-ДПМНЕ стои на кажаното и ги штити националните интереси, довербата во нив расте. Сега имате влада која од 2020 досега нема ништо направено освен да повторува за евроинтеграции и да не води во ќорсокак. Ќе излезат на избори и што ќе кажат – праша Божиновски.

The post НА ИЗБОРИТЕ ВМРО-ДПМНЕ ЌЕ ПОБЕДИ СО 20 ПРАТЕНИЦИ РАЗЛИКА Аналитичарот Владимир Божиновски смета дека СДСМ го изгубил единствениот адут appeared first on plusinfo.mk.

Аналитичарите во тоа гледаат замисла на владејачкото мнозинство да добие на рејтинг и гласови доколку опозицијата во меѓувреме гласа за уставните измени, но планот, како што посочуваат, е безуспешен бидејќи засега не постојат никакви најави за да се случи такво нешто.

– Мислам дека идејата на власта, пред сѐ на СДСМ, беше да ја принуди ВМРО-ДПМНЕ да гласа за уставните измени, а потоа да се одржат претседателски избори на коишто владината коалиција би одела со заеднички кандидат, па поради прифаќањето на уставните измени од ВМРО-ДПМНЕ би се намалила поддршката на оваа опозициска партија. На тој начин власта се надеваше дека ќе победи на претседателските избори и дека таа победа ќе ѝ претставува ветер во грбот за парламентарните избори. Накратко, ако изборите се одржат заедно во ист ден, тогаш ќе се заштедат народни пари и ќе се обезбеди сигурен консензус за вториот круг за избор на претседател – вели универзитетскиот професор Владимир Божиновски.

Власта се надева дека ќе победи на претседателските избори и дека таа победа ќе ѝ претставува ветер во грбот за парламентарните избори.

Владимир Божиновски Универзитетски професор

Слично мислење дели и политичкиот аналитичар Синиша Пекевски, кој објаснува дека државата ќе заштеди многу пари ако се спојат изборите во еден ден.

– Првата работа е тоа што власта знае дека ќе ѝ се случи политички дебакл на следните избори. Втората работа е тоа што властите очекуваат со помош на албанските граѓани во Македонија да победат на претседателските избори во април, па таа победа да им биде ветер во грб за време на парламентарните избори кои и да избегнат цунами. Факт е дека СДСМ отсекогаш се грижел само за сопствениот интерес и никогаш не се грижел за интересот на Македонија. Наместо да се намалат трошоците и да не ја продолжуваме таа политичка криза и вакуум период во кој сѐ се стопира поради изборите, ние уште сега знаеме дека 2024 година за нас ќе претставува уште една загубена година во секој поглед – изјави Пекевски.

Претседателот на СДСМ Димитар Ковачевски не попушта и упорно настојува за одвоени избори во редовните термини: претседателски уште во март, а парламентарни може и во јуни в година.

Предвремени избори за него би биле опција само ако се изгласаат уставните измени. Тоа му го предложил на лидерот на ВМРО-ДПМНЕ Христијан Мицкоски на последната лидерска во јуни и предлогот, па и сега порачува дека предлогот „сѐ уште е на маса“.

Мицкоски, пак, смета дека одржувањето на парламентарни и претседателски избори одвоено во краток период претставува само непотребно трошење на државните пари.

– Има ли Македонија доволно пари за да влезе во еден бесконечен циклус на избор на претседател којшто континуирано ќе биде неуспешен?! Нема проблем за ВМРО-ДПМНЕ, секако ќе учествуваме и ќе победиме. Но, не сакам да трошиме пари попусто. И пологично е да успеат претседателските избори доколку вториот круг е заедно со парламентарните, ќе има поголема мобилизација. Во спротивно, постои голема можност да имаме неуспешни претседателски избори од многу фактори. Не затоа што ВМРО-ДПМНЕ нема да излезе, немаме ние причина зошто да не излеземе, бидејќи победуваме. Може други партии и етнички заедници да не излезат затоа што немаат интерес да излезат. Имаме ли ние како држава и како општество две години на располагање да зборуваме само за избори? Јас не мислам дека имаме и не мислам дека можеме тоа да си го дозволиме – изјави Мицкоски.

Одговор на истото прашање денеска повторно побаравме од ВМРО-ДПМНЕ, а оттаму ни соопштија дека една од причините поради којашто Мицкоски инсистира на одржување лидерска средба е токму тоа: да се разговара за спојување на изборите во ист ден, затоа што тоа би било најлогично и најекономично решение.

– Секој изборен цуиклус чини многу пари и затоа треба изборите да се одржат на ист датум. Ние не треба да трошиме толку пари на избори за да има одвоени избори. Наместо посебни избори во два-три месеци, што е неразумно трошење на парите на граѓаните, претседателските и парламентарните избори треба да има во ист термин. Да не се трошат пари на избори и да не се губи време, парите треба да се трошат за здравство, образование – рече Александар Пандов, претседател на Патриотскиот институт на ВМРО-ДПМНЕ.

И поранешниот собраниски спикер Трајко Вељаноски потврди дека не постојат правни пречки да се одржат претседателски и парламентарни избори во ист ден, а исто така рече дека во Македонија таква одлука била носена дури 3 пати во изминатите 33 години.

„Од прегледот на изборните процеси во Република Македонија во изминативе 33 години може да се забележи дека дури во три наврати (односно во 1994, 2009 и 2014 година) се одржале два изборни процеса истовремено. Отаму, кога станува збор за следните парламентарни и претседателски избори, апсолутно јасно е дека не постојат никакви финансиски, економски и/или безбедносно-политички причини да имаме одвоени претседателски и парламентарни избори, освен поради партиските калкулации на власта“, напиша Вељаноски на Фејсбук.

Законските норми предвидуваат избор на нов претседател во последните 60 дена од истекот на стариот мандат, а новиот состав на Парламентот се бира на 90 дена пред истекот на постојниот.

Последен термин за вториот круг од претседателските избори е 5 мај идната година, кога православните христијани го слават Велигден.

Последниот ден за распуштање на Собранието е 7 април кога треба да почне за функционира техничка влада која треба да ги спроведе изборите.

НЕМА ПРЕЧКИ ЗА ИСТОВРЕМЕНО ОДРЖУВАЊЕ НА ПРЕТСЕДАТЕЛСКИТЕ И НА ПАРЛАМЕНТАРНИТЕ ИЗБОРИ Вељаноски гледа пречка само во партиските калкулации

The post НА ОПОЗИЦИЈАТА Ѝ СЕ ШТЕДИ, НА ВЛАСТА Ѝ СЕ АЗДИСУВА Ќе гласаме ли за премиер и за претседател во ист ден? appeared first on plusinfo.mk.

Кои би биле следните чекори на потписниците на писмото, како и дали постои реална можност за фракција во ДУИ, прашавме експерти кои активно ја следат политичката сцена во Македонија и кои со години наназад во милиметар ги мерат сите партиски придвижувања предизвикани од разни политички несогласувања и кавги.

Тие, пак, наместо одговор, ни возвратија со прашањето: А дали членовите на „огнената група“ можат и дали воопшто сакаат да сменат нешто или ова е само обид за нивно подобро позиционирање и за добивање посилни партиски позиции?

Инаку, членови на оваа т.н. „огнена група“ се Муса Џафери, Изет Меџити, Невзат Бејта, Блерим Беџети, Висар Ганиу, Башким Хасани, Ејуп Адеми, Камил Ковачи, Аднан Ејуп…

„Ветераните“ контра „јуниорите“

Владимир Божиновски од Институтот за политичко истражување (ИПИС) во разговор за Плусинфо забележува дека ова не е првпат „огнената група“ да има несогласувања со раководството на ДУИ, но како што вели, и првиот и вториот обид биле неуспешни.

Се обидоа еднаш и не успеаја. Се обидоа вторпат, не успеаја. Што ако не успеат и третиот пат? Ќе се закануваат по четврти пат? Ќе пишуваат писма по петти пат? По десетти пат?

Владимир Божиновски Институтот за политички истражувања (ИПИС)

– Истото се случуваше лани за локалните избори и преклани за парламентарните избори, но никаков резултат не видовме. Ова сега е нивни трет обид да извршат притисок врз партискиот лидер Али Ахмети и да го искажат јавно своето незадоволство од работењето на партијата. Очигледно е дека постојат сериозни несогласувања, но прашање е дали членовите на „огнената група“ воопшто ќе сакаат да направат посериозен чекор, односно да формираат фракција и на тој начин сериозно да ја ослабнат партијата. Такво нешто можеа да сторат за локалните избори, ама тие не го направија тоа. Затоа се поставува прашањето дали групата е доволно моќна за да направи голем партиски раздор, оти ако членовите чувствуваа дека се моќни, веќе ќе го направеа првиот сериозен чекор. А како што кажав, ова е нивниот трет обид, па затоа и целата оваа работа изгледа повеќе смешно и несериозно. Оти, вие можете да се обидете еднаш и да не успеете да направите ништо. Можете и вторпат да се обидете и повторно да не направите ништо. Ама третиот пат е веќе смешно, несериозно и досадно – објаснува Божиновски.

Членовите на „огнената група“ се против првиот вицепремиер Артан Груби, појаснува Божиновски, а не се задоволни и од министерот за надворешни работи Бујар Османи, без оглед на тоа што наводно ја одбиле понудата од Ахмети за да го испрати „курбан“ шефот на дипломатијата, а за возврат да го задржи Груби.

– И двајцата, условно кажано се дел од поновата гарнитура на партијата, додека, пак, потписниците на писмото се едни од основачите на ДУИ. Очигледно е дека има некое незадоволство поради фактот што Груби и Османи успеаја да дојдат до одредена моќ во партијата преку рефлексија на моќта на лидерот Али Ахмети. Но, во случајов причината за кавгата е најмалку важна, бидејќи најважно е да се одговори на прашањето дали членовите на „огнената група“ реално можат да направат сериозен чекор и да ги измрдаат работите во партијата. Дали тие можат и дали сакаат да сменат нешто или ова е само обид за нивно подобро позиционирање и за добивање посилни партиски позиции? Од друга страна, пак, се обидоа еднаш и не успеаја. Се обидоа вторпат, не успеаја. Што ако не успеат и третиот пат? Ќе се закануваат по четврти пат? Ќе пишуваат писма по петти пат? По десетти пат? Јас лично сметам дека нема ништо да се промени, но да оставиме на времето – истакна Божиновски.

Ништо без амин од Ахмети

Политичкиот аналитичар Петар Арсовски вели дека членовите на „огнената група“ се значајни личности од ДУИ, меѓутоа, како што вели, партијата на Али Ахмети досега се покажала како прилично имуна на вакви напади.

– Во овој момент, нападите од „огнената група“ не изгледаат толку сериозно за да би ја загрозиле парламентарната група или парламентарната стабилност. Меѓутоа, не знаеме до каде може да ескалираат работите, бидејќи на ниту една партија не ѝ одговара во последните две години од мандатот да ѝ се појавуваат сериозни фракции. Мислам дека притисокот ќе биде кон тоа да се најде заеднички јазик во ДУИ, иако оваа партија во неколку наврати се покажа како прилично отпорна на обиди за формирање фракции. Сметам дека наскоро ќе се појави една посериозна потреба за дебата, а парламентарната стабилност нема да биде чепната – објаснува Арсовски.

Тој вели дека ниту Груби, ниту Османи, ниту некој друг политичар од ДУИ може да носи одлуки и да ја крои политиката без знаење на лидерот Ахмети.

Како што јас разбирам, потписниците на писмото не се задоволни од политиката, но ако е борбата само за да имаат учество во власта и да добијат парче од колачот, тоа е друга приказна.

Петар Арсовски Политички аналитичар

– Во писмото на „огнената група“ се посочува вицепремиерот Артан Груби како главна причина за незадоволството. Но, верувајте, ниту Груби, ниту Османи, ниту некој друг, не може да крои политика без да добие „амин“ од лидерот Ахмети. „Огнената група“ во основа се буни против политиките на ДУИ, па не знам дали би било доволно да се заменат Груби или Османи со некој друг човек кој ќе ја тера истата политика на Ахмети. Како што јас разбирам, потписниците на писмото не се задоволни од политиката, но ако е борбата само за да имаат учество во власта и да добијат парче од колачот, тоа е друга приказна – вели Арсовски.

На денешниот брифинг со новинарите, шефот на дипломатијата Бујар Османи истакна дека лажна вест е информацијата за негова смена и дека таа не заслужува никаков коментар.

Ахмети вчера во Тетово изјави дека ДУИ може да функционира без кој било поединец затоа што има стабилни структури.

– Без сомневање дека ДУИ има воспоставено стабилни структури кои можат да функционираат без Али Ахмети, Блерим Беџети, Муса Џафери, Изет Меџити. Ова е национална инвестиција која има силна основа и силна поддршка. За 20 години има инвестирано во кадарот на партијата. Советот и Конгресот се функционални, за анархија нема место – изјави Ахмети.

The post ПОСЛЕДЕН ТРЕТ ОБИД ЗА ФРАКЦИЈА, ЧЕТВРТИОТ БИ БИЛ НЕСЕРИОЗЕН Можат ли „огнените момчиња“ да ја опожарат ДУИ? appeared first on plusinfo.mk.

Последната анкета која од ИПСОС беше спроведена за потребите на ВМРО-ДПМНЕ покажа огромна предност од безмалку 200.000 гласови на најголемата опозициска партија во однос на владејачката. Анкетираните во голема мерка се насочени кон проблемите на полето на економијата и на животниот стандард, но воедно и со големо мнозинство го отфрлаат францускиот предлог, кој стана основа за преговарачката рамка со Европската Унија.

– Падот на популарноста на СДСМ трае повеќе години и во меѓувреме не се случи ништо што може да го поправи нивниот рејтинг, а напротив со прифаќањето на францускиот предлог тие дополнително ја загрозија својата позиција пред гласачите. Огромно мнозинство граѓани беа против прифаќањето на договорот, но тие инсистираа тоа да биде прифатено. Со тоа, СДСМ не само што се дистанцираше од своите традиционални гласачи, туку се дистанцираше и од своето членство. Тоа го видовме и на неодамна одржаните протести, каде можеа да се забележат членови на владејачката партија – вели Божиновски.

Тој смета дека на партијата ѝ следува т.н. „пасокизација“, односно дека ја очекува слична судбина како и грчката социјал-демократска партија ПАСОК, која од владејачка спадна на освоени неколку проценти од гласовите на последните два изборни циклуса.

– Македонија помина многу лошо со здравствената, како и со енергетската криза. Сега се соочуваме со економска криза, која дополнително ќе ја влоши состојбата. Згора на сè, Владата подготвува да ги покачи даноците. Доколку СДСМ во таква ситуација ги дочека редовните избори во 2024 година, тогаш резултатот ќе биде застрашувачки по нив – додава Божиновски.

Надеж во „асномското“ јадро на СДСМ

Аналитичарот Ивица Боцевски не се сомнева дека СДСМ на наредните парламентарни избори ќе доживее пораз. Но, тој смета дека партијата би можела и да се најде на маргините, доколку дел од поранешните функционери на партијата се решат да формираат ново политичко движење.

– Огромен дел од традиционалните гласачи на СДСМ се разочарани, но тоа не значи дека тие ќе гласаат за ВМРО-ДПМНЕ или за Левица. За политиките на Владата веќе поддршка нема ниту од т.н. „длабок СДСМ“, но хомо политикус за кого претпоставуваме дека е рационално суштество, сепак, често знае да се однесува и емоционално. Затоа е тешко да се поверува дека голем дел од разочараните гласачи на СДСМ ќе преминат во спротивниот табор. Но, доколку се случи поранешните функционери од т.н. асномско јадро на државотворната партија, да формираат нов политички субјект, тогаш можеме да говориме за целосна маргинализација на СДСМ, бидејќи поголемиот дел од гласовите ќе преминат кај „алтернативниот СДСМ“. Тоа ќе може да се спореди единствено со примерот од соседна Србија, кога гласовите на СРС на Воислав Шешељ преминаа на контото на СНС формирана од Тома Николиќ и од Александар Вучиќ – вели Боцевски.

Како можни актери во формирањето и подигнувањето на „СДСМ-АСНОМ“, покрај поранешниот претседател Бранко Црвенковски, Боцевски ги гледа и Весна Бендевска, независниот социјалдемократски градоначалник на Куманово Максим Димитриевски, но и подзаборавените на политичката сцена Горан Минчев, Гордан Георгиев, Зоран Јовановски, Каролина Астеруд, Ана Павловска-Данева и други.

СДСМ: Мицкоски е изолиран и прочитан политичар

На објавената анкета од пред два дена, од СДСМ денеска објавија нова реакција, со која беше повторена тезата дека лидерот на ВМРО-ДПМНЕ, Христијан Мицкоски е прочитан и изолиран и може да се надева единствено на поддршка од Левица.

„На Христијан Мицкоски му пропаднаа сите лаги, сите блокади, сите обиди за насилни и крвави сценарија. Заради лична корист, Мицкоски ги лажеше граѓаните, ги лажеше своите коалициски партнери, го лажеше и своето членство, го повикуваше на протести на кои ниту самиот тој не се појавуваше. Откако беше прочитан, Мицкоски остана сам и изолиран со поддршка единствено од Левица и Димитар Апасиев. По сите порази, Мицкоски е уплашен за својата фотелја во Белиот дворец, затоа си нарачува анкети со штелувани резултати, во кои не верува ниту членството на ВМРО-ДПМНЕ. Сето ова е веќе видено, секогаш кога на Мицкоски му се ниша фотелјата, тој нарачува анкети за да му го држат стравот. Ниту една фингирана анкета не го сокрива фактот дека Мицкоски и ВМРО-ДПМНЕ работат против граѓаните, против државните и националните интереси“, се вели во реакцијата на СДСМ на објавената анкета.

The post КАКВА СУДБИНА ГО ОЧЕКУВА СДСМ? Дали „асномското“ јадро е вистинската алтернатива на владејачката партија? appeared first on plusinfo.mk.

Институтот за политички истражувања од Скопје (ИПИС) спроведе кратко телефонско истражување во периодот помеѓу 4 и 6 јули 2022 на 1114 полнолетни испитаници на ниво на Република Македонија. Во истражувањето граѓаните ги изразуваа своите ставови за нивната поддршка за политичките партии, како и за одредени актуелни прашања.

На прашањето, дали би прифатиле почеток на преговори со ЕУ, по цена Македонија да се согласи со т.н. француски предлог, 72,8 отсто од етничките Македонци опфатени со анкетата одговориле не. Од вкупниот број на испитаници, каде се содржани и одговорите од другите етнички заедници во Македонија, против францускиот предлог се изјасниле 56 отсто од испитаниците.

62,8 отсто од етничките Македонци сметаат дека новиот предлог е ист како претгодниот, а 67 отсто од нив ги поддржуваат протестите кои во изминатите денови се одржуваат во Скопје, на кои демонстратите бараат од Владата да го одбие предлогот.

– Владата се обиде францускиот предлог да го опише како добар, но апсолутното мнозинство на Македонците го одбиваат. Исто така во јавноста беше направен обид да се направи претстава дека мнозинството на Македонците го прифаќаат предлогот, а само мала група на граѓани што протестира е против. Анкетата покажува дека тоа не е точно – вели за Плусинфо, Владимир Божиновски од ИПИС.

Во анкетата се содржани и одговорите во врска со популарноста која во моментов ја уживаат политичките партии во Македонија. Тука нема преголеми изненадувања, односно ВМРО-ДПМНЕ сè уште ја одржува значајната предност пред СДСМ.

The post МАКЕДОНЦИТЕ СЕ АПСОЛУТНИ ПРОТИВНИЦИ НА ФРАНЦУСКИОТ ПРЕДЛОГ Анкетата на ИПИС го открива вистинското расположение кај народот appeared first on plusinfo.mk.

Анкетата е правена во периодот од 27 ноември до 23 декември во 2021 година, што докажува дека и по завршувањето на локалните испори, на кои владејачката партија доживеа голем пораз, рејтингот на најголемата опозициска партија продолжува да расте. Нормално дека во ваква ситуација, прашањето дали на Македонија ѝ се потребни предвремени избори, се наметнува како логично.

Од СДСМ веќе пет месеци со индигнација одбиваат било каква дебата за предвремени избори, а за резултатите од конректната анкета од партијата порачаа дека не се релевантни, бидејќи според нив, во Македонија сега имаме нова политичка реалност.

„Во периодот од изминатите 4 месеци, имаме сосема поинаква политичка реалност, нова влада којашто е избрана во јануари, со нов премиер, зголемено паралемнтарно мнозинство и многу други фактори кои се променети по ова истражување, а силно влијаат на перцепциите. Оттука, цениме дека објавувањето на резултатите од анкетата создава погрешна перцепција кај граѓаните, како за рејтинзите на политичките партии, така и во однос на другите теми и прашања од истражувањето“, порачаа од СДСМ.

Сепак, со ставот на СДСМ не се сложуваат нашите соговорници, кои сметаат дека само брзи избори, ќе можат оваа партија да ја спасат од катастрофа.

Владата наскоро ќе падне?

Политичкиот аналитичар Синиша Пекевски е сигурен дека актуелната Влада наскоро ќе падне, како резултат на економското цунами предизвикано од геополитичките случувања во Европа, но и неспособноста на нашата власт да донесе било какви мерки, со кои ќе се ублажат последиците од кризата.

– Ако знаеле дека ќе има војна, тогаш зошто не се подготвиле за тоа? Гледаме дека земјите од регионот на различен начин од нашата се справуваат со кризата – за Плусинфо вели Пекевски.

Тој додава дека многу бргу Владата ќе биде соочена со социјален бунт на граѓаните и ќе биде приморана да отстапи пред барањата на мнозинството, а предупредува дека СДСМ би можела да заврши као партијата на поранешниот српски премиер Зоран Ѓинѓиќ.

– Не е битно дали ќе имаме техничка влада или веднаш ќе се оди на избори, бидејќи СДСМ не може да се надева на победа. Но, доколку изборите се одржат по 6 или 12 месеци, тогаш оваа партија би можела да ја доживее судбината на Демократска странка во Србија и во иднина да стравува дали ќе го помине изборниот праг – додава Пекевски.

Чесен пораз или катастрофа со драматачни последици?

Владимир Божиновски од Иститутот за политички студии од Скопје (ИПИС), за Плусинфо посочи дека уште еднаш е потврдена тенденцијата кај бирачите, за широка поддршка на опозицијата.

– Кога рејтингот на една владејачка партија ќе почне да опаѓа, тогаш сè што може да се направи во таква ситуација е да се сопре или да се забави падот. Но такви политики кај СДСМ не гледаме во моментов. СДСМ е во континуиран пад од предминатите локални избори, кога го остварија најдобриот резултат. Тие се дел од „Франкенштајн-влада“, која е тотално неспремна за економската криза, која од ден во ден ќе се влошува и ќе го намалува стандардот на граѓаните. Со брзи избори од СДСМ ќе се соочат со чесен пораз, но за 6 или 8 месеци ќе доживеаат драматичен пораз со катастрофални последици по партијата – вели Божиновски.

Тој смета дека најдобро за државата во моментов би било да се формира техничка влада, која ќе биде поддржана од сите партии во Собранието, со цел да се создадат услови за подобро и поефикасно справување со последиците од кризата.

Довербата во владеењето на правото е на историскиот минимум

Од ВМРО-ДПМНЕ постојано испраќаат соопштенија дека на земјата ѝ се потребни брзи, предвремени избори, а сега во изјавата за Плусинфо, тие додаваат дека бројките никогаш не биле толку лоши кога е во прашање рејтингот на една владејачка партија.

„Анкетата на американскиот институт ИРИ е направена по локалните избори што потврдува дека народот е незадоволен од општата власт и бара промени. Би напоменале дека од времето на правење на анкетата до денес не се случија никакви изненадувања од страна на Владата кои би биле прифатени позитивно од народот што значи дека состојбите се уште полоши. И тоа не се отсликува само со значајна предност на рејтингот на ВМРО ДПМНЕ, а намалување на СДСМ туку и другите бројки од истата анкета се лоши за Владата и за државата и го отсликуваат незадоволството на народот. Само 18% сметаат дека Македонија се движи во позитивна насока. И само 5% позитивно одговориле дека во Македонија има владеење на правото што е апсолутен историски минимум. Затоа потребни се избори на кои треба да се гледа како на решение на општиот хаос кој владее во државата“, велат од ВМРО-ДПМНЕ.

Тековниот модел не може да ја издржи кризата

Од Левица сметаат дека новата влада е продолжување на старата и затоа населението е негативно расположено и е наклонето кон предвремени избори.

– Сега, во време на тековната европска криза, кога верижно се надополнуваат непосредни предизвици, нам навистина не ни е потребно опстојувањето на овој собраниски состав кој овозможува во кризни времиња, да владее коалиција која има озбилни дамки на човечки трагедии позади нив. Тековниот економски модел на СДСМ не може да ја издржи општата криза во која се наоѓаме, на што дополнително се надоврзува сеопфатна корупција како носечка одлика на мнозинството. Не се работи веќе за политичкиот легитимитет на Владата – кој не постои, туку за социјалниот интегритет на населението на кое му се заканува опасно загрозување. Во интерес на разумот потреби се предвремени избори – тврди портпаролот на Левица, Амар Мециновиќ.

The post СДСМ ЌЕ ЈА ДОЖИВЕЕ СУДБИНАТА НА ПАРТИЈАТА НА ЃИНЃИЌ? Само брзи избори ќе ја спасат партијата од катастрофа appeared first on plusinfo.mk.

Политикологот Владимир Божиновски од ИПИС вели дека тоа не е ништо ново, туку дека тоа е дел од нашата политичка култура. Тој нè уверува дека процентот и не е така висок, а дека истото се случувало и во минатото, кога на власт биле партиите што сега се во опозиција.

– Политичката перцепција е сензитивно прашање особено за тие што ѝ припаѓаат на опозицијата. Не е битно кој е на власт, а кој е во опозиција. Тоа е дел од нашата политичка култура, и затоа процентот на испитаници кои не сакаат да одговорат е висок. Луѓето што во анкетата одговориле дека не сакаат да кажат за кого ќе гласаат не значи автоматски дека ја поддржуваат опозиција. Може да се претпостави дека дел од нив воопшто нема да гласаат, дел од нив ќе ја поддржат власта, но поголемиот дел, сепак, за очекување е дека својот глас ќе го дадат за опозциските партии. И тоа не само за ВМРО-ДПМНЕ, туку за Алијанса, Беса, како и за Левица – вели Божиновски.

Токму од Левица по крајот на локалните избори се жалат во континуитет дека врз нивните членови и симпатизери, се врши силен притисок од припадниците на владејачките партии.

– Исто како и во 90-тите години од минатиот век, кога СДСМ спроведе капмања за „демонизација“ на ВМРО-ДПМНЕ, што имаше за резултат одредена воздржаност кај симпатизерите на партијата во урбаните средини, денеска истиот рецепт се применува и врз Левица. Оваа партија е прогласувана за фашистичка, анти-НАТО, анти-ЕУ, назадна, проруска итн. Дел од гласачите на Левица поради тоа имаат проблем да кажат јавно дека се поддржувачи и секако дека добар дел од нив се меѓу анкетираните кои не сакале да откријат за кого ќе гласаат. Власта Левица ја третира како радикална партија и тоа е главната причина за претпазливоста на членовите и симпатизерите на оваа партија – додава Божиновски.

Од Левица за Плусинфо истакнаа дека македонското општество се наоѓа на политичка раскрсница. Тие велат дека од една страна е Левица како автентична левичарска партија, а од другата е СДСМ како реликвија од времето на транзицијата.

– Гласачкото тело на СДСМ непрестано се одлева на контото на Левица заради расипничките политики на социјалдемократите. Сепак, СДСМ се покажа како опасна и мафијашка структура која традиционално владее со насилство, притисоци, уцени и бркања од работа, како главен извршител на пеколната транзиција. За криминалната гарнитура на СДСМ која е целосно деидеологизирана, мануфактурата на фиктивниот легитимитет почива на овој насилнички и уценувачки однос, во отсуство на било какви принципи и начела за клучните социјални, национални и општествени прашања. Токму од овие причини, гласачите со левичарски убедувања се во незавидна позиција, кадешто симпатиите кон автентичноста на Левица можат да ги доведат на метата на владејачката партија, и кон натамошна општествена маргинализација. Но, на повидок е крајот на владејачката тероризација на населението и ослободувањето на политичката мисла. Во кратко време оние кои не смеат да проговорат за подршката кон Левица ќе добијат и сопствен глас под закрила на храбрата политичката борба која ја водиме, и анкетите на јавното мнение ќе добијат поразличен облик. Левица се движи кон народна победа, а СДСМ кон damnatio memorae – изјави Амар Мециновиќ, портпаролот на Левица.

The post МАКЕДОНЦИТЕ СЕ ПЛАШАТ ОД АНКЕТИ? Од Левица тврдат дека нивните членови се „тивки“ поради страв од политички прогон appeared first on plusinfo.mk.